Márákoso 14
14
Vagónó vá vacekiye mómí vá díŋgámó anáá vá oná Yésusu
(Mat 26:1-5; Rúk 22:1-2; Yoh 11:47, 49, 53)
1Ibínó yá Pásáka na yá va beréte ává ka na mboŋga é ma ríi yá cáná metúú máváné. Vagónó vá vacekiye mómí na vayéere vá mbéndɔ́ vá katé sɔsɔ pé éjé anáá vá ambaana Yésusu na viŋgáŋgá índi vá me oná. 2Esené vá ma ená anáá ó ta geréméná weŋgavena isí yá ibínó, iwuru-iwuru é né riyámó na raaté wa vato.
Okótó omo a suunanamó tevere na ucé rá Yésusu
(Mat 26:6-13; Yoh 12:1-8; Rúk 7:36-38)
3Yésusu a ma ríi na oŋgórá rá Betaníya na yanje yá Símono ójó a ma nɔ́ mbaa. Kó okótó omo a ma iŋgááná hɔrɔ́ vá nyányá, a timbembósó ra siméte na embɔɔ́, mbósó mwané e ma timbe tevere éjé vá ta ma búriye na wandá owomó, tevere mwané e je díyé. Okótó a ma bunémbósó, osuunana Yésusu tevere na ucé. 4Vato vámó vá ma dɔɔtɔ́nɔ́ vá mwané na vá mwané vá járá anáá: «Mpí éjé a ndéérámó tevere éjé e ámó háá? 5Vá mó hítí osérá na motete mwá tóósini mwáráátó otéŋgíye vawora.» Kó vá katé owéna okótó omójo mbésé. 6Yésusu a ma eŋgá nawó anáá: «O me micámáno cók. Wusó wá até owo no me hwámó otémá rá wokáná? A mó eŋga usi wa wandá na wusó wámé. 7Esené no ámó na vawora mesí mimé kó no hítyámó o wó eŋgá wusi isí yimé éyé no diŋgámó, wó je rií anáá no ta ámó name itíndíkáná íŋgímé. 8Okótó omójo a mó eŋga até éyé a mó hítí, kó a mó késyé okumbye nótó rame na wusó wá evérá. 9Ŋgo nó ojanámó na vatɔ́ɔ́tɔ́ anáá pandó iŋgimé éjé Usi wa Cómó a mó ojavenámó na cí ra ndono, vá mó tɔɔ́tɔŋɔmó até éyé okótó ojó a ma eŋgá anáá vá me buŋgana.»
Yúdasa isíkariyóto a sérámó Yésusu
(Mat 26:14-16; Rúk 22:3-6)
10Yúdasa isíkariyóto, umwesíí ójó na Vábɔ́tɔ́ na vává a ma endá ondo ená vagónó vá vacekiye mómí anáá a wó séréna Yésusu. 11Ará vá ma maná o me vátɔ́rɔ́, vá ma ríi naáté yá vitaka kó vá ma me tánéná mwení. Ɔ́wɔ́, Yúdasa a ma katé sɔsɔ mpaŋá ra itíndíkáná anáá a me sérá.
Yésusu a komosanámó ibínó yá Pásáka
(Mat 26:17-19; Rúk 22:7-13)
12Isí yá makésyé má ibínó yá va beréte ává ka na mboŋga, na itíndíkáná íjí vá ma ré sómbá mwaná wa etómbá wa Pásáka, vihoóhóná vyá Yésusu ví ma me súsé anáá: «Héní kówo o diŋgámó anáá to wo námbéna Pásáka índi o nyá?» 13Kó Yésusu a ma tómá vihoóhóná vívé aye nawó anáá: «Ndáno na oŋgórá, no né bérúmámó na moto a byá kúrí ra matéyá, o me byɔɔnɔ́máno. 14Pandó iŋgimé éjé a né iŋgáanámó, ŋgáno na moto wa naŋgá anáá: Oyéere a mó tɔ́ŋɔ́ anáá: Pandó éjé ŋgo né nyámó manyá má Pásáka orɔŋgɔ na vihoóhóná vyámé e ámó háá? 15Kó a né nó tíhíyámó ekáné yá cómbá éjé jóŋgóŋgó, hénda-héndé na indií, ɔ́wɔ́ kówo no né só námbénámó Pásáka.» 16Vihoóhóná ví ma endá ondo húmé na oŋgórá, wetíye mamba ámó Yésusu a ma wó ojáná, kó vá ma námbá Pásáka.
Yésusu a ojámó anáá ehoóhóná yáa ímwéesií é váŋgámó o me sérá
(Mat 26:20-25; Rúk 22:14; Yoh 13:21-30)
17Enéŋgá, Yésusu a ma jiné ɔ́wɔ́ orɔŋgɔ na vihoóhóná vyábɔ́t na vívé. 18Na itíndíkáná íjí vá katé rií na dévere vá nyányá, Yésusu ayáá: «Ŋgo nó ojánámó ná vatɔ́ɔ́tɔ́ anáá, umwesií ójó na vinó, ójó a nyányámó orɔŋgɔ name a né cérámó.» 19Kó vá ma késyé wová makáná na etémá, ámó moto a ma me súsé anáá: «Ye noó?» 20Yésusu a ma wó wundíyé nawó anáá: «Ó ámó umwesií ójó na raaté wa vinó, ójó a váámó ombɔɔ́ orɔŋgɔ name na pána. 21Esené Mwaná moto a endámó ámó é ámó áŋgɔ́-áŋgé na wusó wáá, kó anyamá na ojo a sérámó Mwaná-moto, mpí e ma ríi hónó na wusó wáá anáá a rií ka byánávena!»
Manyá má Okí Yésusu
(Mat 26:26-29; Rúk 22:15-20; 1Ko 11:23-26)
22Na itíndíkáná íjí vá ma ré nyányá, Yésusu a ma wɔ́rɔ́ beréte, omana téŋgyé Irɔŋgɔ, océcéna, weréena vihoóhóná vyáa aye nawó anáá: «Wɔ́rɔ́no nótó rame ejé.» 23Tii waá, a ma wɔ́rɔ́ kɔ́ve, o mana téŋgyé Irɔŋgɔ, o wó hwá kó vá ma vényú bimé. 24Aye nawó anáá: «Miné mámé káamá, miné má iretye ámá má utúwámó anáá má atá ombunu rá vato. 25Ŋgo nó ojánámó na vatɔ́ɔ́tɔ́ anáá Noó ta mó ne vényú mɔwɔ́ amá ondo húmé ará ŋgo mó wundámó o ne vényú hɔrɔ́ má rií mkpámáká na edɔŋgɔ yá Irɔŋgɔ.»
Yésusu a ojámó anáá Pyéere a né me vásáŋgámó
(Mat 26:30-35; Rúk 22:33-34; Yoh 13:37-38)
26Ará vá ma maná ováána esawo ra mbásóóryé, kó vá ma endá na yene rá marété má mbiti. 27Yésusu aye nawó anáá: «Ŋgɔ́tɔ́wéná ra vinó bimé e vaŋgámó woba esene éyé wó ámó áŋgɔ́-áŋgé anáá: Ŋgo mó onámó abeerye mutíri kó vitómbá ví mó sárámandámó 28wó je rií anáá ará ŋgo né honovámó na evérá, ŋgo né endámó nó gíré na Gariréya.» 29Pyéere aye naá anáá: «Ará ŋgátɔ́véná ra vasɔ́ɔ́ e né obámó, raame e ta né oba.» 30Yésusu a ma járá naá anáá: «Ŋgo wo ojanámó na vatɔ́ɔ́tɔ́, mámó, wusí ówó, wutúú owó hónó, hɔrɔ́ itétí yá árɔ́wɔ́ ka tátéta eŋgendɔ ebané, o né mbásáŋgámó eŋgendɔ etató.» 31Kó Pyéere a ma wundé ojárá na ŋguru anáá: «Itɔɔ wá ríi anáá ŋgo né geremenámó ogwé orɔŋgɔnɔɔ, noó ta né wo vásáŋgá.» Kó bimáná vá ma járá sɛ́ɛm wa wandá.
Yésusu a vásoóriyámó na pandó éjé vá béráanámó anáá Getesemané
(Mat 26:36-46; Rúk 22:40-46)
32Na nimé raá, vá ma endá na pandó emo ebérááná anáá Getesemané kó Yésusu a ma járá na vihoóhóná vyáa anáá: «Nuúmánáno ará itíndíkáná íjí ŋgo endámó vásoóriye.» 33A ma wɔ́rɔ́ Pyéere, Yáka na Yohánese wenda nawó kó a ma késyé onúútana wohwá orɔŋgɔ na mintyé. 34A ma járá nawó anáá: «Otémá ramé yó té ová makáná má nugwé, cánáno ará, no kuré.» 35A ma vánéŋgéyá, ovánúbáta na cí, ovásoóriye anáá, ŋgé wó ámó weŋgavena, índi itíndíkáná rá makáná imíji yó endá urehí naá. 36A ma katé járá anáá: «Ába, Tetáŋgá, mámó o hítyámó weŋga wandá wimé, mbakéténámó ndeya ra makáná ejé! Ítɔɔ náná até owo mbáŋgámó, bɛ́ŋ owo mámó o vaŋgámó.» 37Kó a ma wundé pére éjé vihoóhóná ví ma ríi, o wó etíye otonó, kó a ma járá na Pyéere anáá: «Símono, wo endanámó tonó! O ta ohítí orií pwené háwo mbímí! 38Kuráno, no vásoóriye, índi no rií ka oba na vímaa; ireréŋgi é ámó váhéndé vahéndé anáá é kuré, é vásóóriye, nótó é mwané e ámó na wubire.» 39A ma vánéŋgéyá hée, weŋga mbásóóríye mwané imwesíí. 40A ma wundé, o wó atíye hée otonó esene éyé aŋgísó á ma ríi yó té nywá kó vá ta ma tímbe ŋgaráná ra o me wundiye. 41Ará a má wundé na eŋgendɔ etato, a ye nawó anáá: «No árɔ́wɔ́ otonó kó no huwámóo? Wó omana! Itíndíkáná yá jíné íjí vá geremenámó okava Mwaná moto na embɔɔ́ ra veŋga mabé. 42Hatéénáno, tɔ́kɔno; ojo a vaŋgámó o nkava a etá kerana!»
Kambeena ra Yésusu
(Mat 26:47-56; Rúk 22:47-53; Yoh 18:2-11)
43Enjárá ka mana na uŋgúté, umwesíí ójó na vábɔ́tɔ́ na váváné, Yúdasa a má jiné orɔŋgɔ na enɔmbɔ́ yá vato, éyé vagónó vá vacekiye mómí, vayéere vá mbéndɔ́ na vagónó vá edɔŋgɔ vá ma tómá, vá ma timbé mwaápánó mwá vitá na mbóŋgó. 44Ojo a ma me kává a ma wó hwá tévéré éjé: «Ojo ŋgo né me vétíyámó na ŋgundi, vinó ojembe anáá ó mwané omó. O me ambáánámáno kpɔ́k, no enda naá.» 45Béŋ ámó a ma jiné, a ma kerá berebe na Yésusu, aye naá anáá: «Oyéere!» O tómba o me vétíyé na ŋgundi. 46Kó vasɔ́ɔ́ ava a ma uré orɔŋgɔ nawó vá ma váá ombɔ́ɔ́ na Yésusu o me ambaana. 47Umwesií ójó na ava vá ma ríi ɔ́wɔ́ orɔŋgɔ na Yésusu a ma somóná yáápánó ráa rá vitá, owóbá eŋga manɔnɔwɔ wa ogónó wa vacekiye mómí o me sómbá utú. 48Yésusu a ma wɔ́rɔ́ enjárá aye nawó anáá: «No mó uré ondo ŋgambaana na námá orɔŋgɔ na mbóŋgó mámó wéŋga anáá ndo ámó moto ójó a ta beeryé mbéndɔ́! 49Ŋgo má katé rií na vinó mesí mímé njeére vato na yanje yá Irɔŋgɔ vinó ka ŋgambaana. Kó wimé omówo wó jínámó ukú ójó anáá wandá wímé ówó aŋgóŋgí a ma njárá wó eŋgávena.» 50Kó vihoóhóná vyáa bimáná ví ma me céŋgítyé, obwɔ́nɔ́nɔ. 51Énjárá yá obwene emó é ma byɔɔnɔ́ Yésusu, é tímbe bɛ́ŋ ekoo yá sande na nótó. Vá ma me ambááná, 52kó a ma wó micéná sande waá, obwɔ́nɔ́ ntúmbí.
Vá endámó na Yésusu na ogónó wa yanje yá jósi
(Mat 26:57-68; Rúk 22:54-55, 63-71; Yoh 18:12-18)
53Vá ma endá na Yésusu na edɔŋgɔ yá ogónó wa vacekiye mómí, kó vagónó vá vacekiye mómí bímé, vagónó ává na edɔŋgɔ, vayéere vá mbéndɔ́ vá ma endá váwónjéena ɔ́wɔ́. 54Pyéere a ma té byɔ́ɔnɔ Yésusu urehí ondo humé na naŋgáté ra ogónó wa vacekiye mómí. A ma nuumáná orɔŋgɔ na veŋga manɔnɔwɔ a vásɔ́wɔ ihyáné. 55Vagónó vá vacekiye mómí na yanje yá jósi yimé vá ma ré sɔsɔ ucé rá sɔ́mɔnɔ ukú ójó anáá vá sómbéna Yésusu ntóró ra nugwé ka wɔ́ŋgɔ́. 56Esené ombunu rá vato vá katé me bátyáana enjárá, ítɔɔ náná, vibátá mwané ka geremena. 57Vato vámó vá ma hatyááná, osɔ́mɔ́nɔ Yésusu na eváná eyé: 58«To má ová moto omójo a járá anáá: Noó ŋgo né báŋgónámó yanje yá Irɔŋgɔ éyé vato vá ma háá, kó na metúú mátátó ŋgo né wundámó ohaá índyé éyé ombɔɔ́ rá moto ó ta né taátena na ohaá.» 59Ítɔɔ náná, vámwané na vámwané ává vá katé oja viváná imíví ka oba mií. 60Kó ogónó wa vacekiye mómí a ma hatééná na raaté wa vato bimé osúsé Yésusu anáá: «O ta wundíyé wandá na até éyé vato ává vá tɔ́ŋɔ́mó na niyó nɔɔ́?» 61Yésusu a ma umé ihóhó, ka wundye epéŋgé. Ogónó wa vacekiye mómí a ma jitíyé o me súsé anáá: «Mámó kójo Irɔŋgɔ a ma tómá, Mwaná Irɔŋgɔ ójó to gúmíyámó?» 62Kó Yésusu a ma me wundíyé anáá: «Ndo ámó mwané ojo Irɔŋgɔ a ma tómá. Kó no né enámó Mwaná moto indindíi na ombɔɔ́ rá enémé rá Irɔŋgɔ ójó ŋguru iŋgimé, a uré naáté yá viyásá vyá máná.» 63Kó ogónó wa vacekiye mómí a ma saróná cunú ráa, ayáá: «Ye mpí e ámó hée anáá to sɔsɔ va wúsinete? 64No mó ová ámó a ré seyá Irɔŋgɔ, no buŋganámó eéné?» Moto uŋgimé a ma sómbéna Yésusu ntóró bɛ́ŋ anáá a geremenamó na nugwé. 65Kó vato vámó vá ma késyé o me cáká metí kó vá ma me bwaá wusó okésyé o me twáná nkɔndɔ́ hɔrɔ́ vá járá naá anáá: «Tɔ́ŋɔ́ moto ójó a katé wo twaná nkɔndɔ́!» Kó veŋga manɔnɔwɔ vá ma turátá Yésusu ondo me cúpé embéré.
Pyéere a vásáŋgámó Yésusu
(Mat 26:69-75; Rúk 22:56-62; Yoh 18:17, 25-27)
66Itíndíkáná íjí Pyéere ómwané a katé rií na cí ɔkɔ́ na naŋgáté, okótó umwesií ójó ná veŋga manɔnɔwɔ vá ogónó wa vacekiye mómí a ma uré. 67A ma ená Pyéere a vásɔ́wɔsɔwɔ ihyáné, kó a ma me núné aye naá anáá: «Mámó hónó o má ríi orɔŋgɔ na Yésusu ójó na Nasaréte.» 68Pyéere a ma vásáŋgá a járá anáá: «Ta jembé, ta ová wandá ówó o díŋgámó anáá ojárá.» Kó a ma húmé wenda na yiŋgáánéná kó itétí é ma tátétá. 69Okótó mwané umwesií a ma ená hée Pyéere, kó a ma wundé ojárá na vato ává vá ma ríi ɔ́wɔ́ anáá: «Moto ojó hónó a má ríi orɔŋgɔ na vato amáva.» 70Kó Pyéere a ma vásáŋgá hée. Ikɔkɔ, ava vá ma ríi ɔ́wɔ́ vá ma wundé ojárá na Pyéere anáá: «Na vatɔ́ɔ́tɔ́ o ámó mwané umwesií ójó na vato amáva, esene éyé o ámó moto ójó na Gariréya.» 71Kó Pyéere a ma késyé oryáana vivérá, ovánɔ́mɔ́ ómwané maté a ye anáá: «Ta jembé moto ójó no katé járá omójo.» 72Ikɔkɔ ka mana, itétí é ma tátá na eŋgendɔ ebané. Kó Pyéere a ma buŋgé enjárá éjé Yésusu a ma járá naá anáá: «O né mbásáŋgámó eŋgendɔ etató, hɔrɔ́ itétí yá ré rií ka tátá eŋgendɔ ebané.» Pyéere a ma húmé kwakwa okésyé ovaŋga.
ទើបបានជ្រើសរើសហើយ៖
Márákoso 14: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL