Márákoso 13
13
Yésusu a ojámó anáá yanje yá Irɔŋgɔ é né sasavenámó
(Mat 24:1-3; Rúk 21:5-7)
1Ará Yésusu a ma ríi na wurúkye ówó na yanje yá Irɔŋgɔ, ehoóhóná yáa emó é ma járá naá anáá: «Oyéere, néméná! Ukú até rá vesi vá atááné, ukú até rá vikáné vyá byanje!» 2Yésusu a ma me wundíyé anáá: «Wo enámó vikáné vyá byanje imívi? Kaá jembé anáá na pandó ejé itááné númwéesií nó ta né cáná na máná ra sɔ́ɔ́ wimé wó né baábaŋgaámó.»
Vitɔɔ na itúúryé
(Mat 10:17-22; 24:4-14; Rúk 12:11-12; 21:8-19)
3Yésusu a ma nuumáná na yene rá marété má mbiti na wusó wá yanje yá Irɔŋgɔ. Pyéere, Yáka, Yohánese na Anderéya ámó vá ma ríi vaká orɔŋgɔ naá vá ma me súse anáá: 4«O só ojánámó itíndíkáná íjí mamba mwané má né eŋgavenámó kó ejaté ndeme kéje e né tíhíyámó anáá mamba mwané má geremenámó ojine.» 5Kó Yésusu a ma késyé ojárá nawó anáá: «Kéríkyáno anáá moto ka nó déŋgyé pé. 6Vato mbunu vá mó urámó na niyó namé kó vá mó járámó anáá: Noó kójo Irɔŋgɔ a ma ijátá! Kó vá mó déŋgyámó vato mbunu pé. 7Ará no mó ovámó uduŋgú rá vitá berebe na urehí na vinó, vinó ka tíné, mamba mwané má géremenámó ojine, ítɔɔ náná, ó ta né rií mamana má cí. 8Noyɔŋɔ nomó nó mó núbáanámó na sɔ́ɔ́ noyɔŋɔ, edɔŋgɔ emó onɔ́ vitá na sɔ́ɔ́ edɔŋgɔ; cí e mó nóonoŋgórámó na pandó mbunu kó njeŋge e mó riyámó ɔ́wɔ́. Wó mó riyámó ámó okótó ójó a késyámó okokore. 9Na vinó, kéríkyáno na vinó maté, esene éyé vato vá mó nó byámó na byanje vyá jósi kó vá mó nó núbámó na byanje vyá mbásóóríyé. Vá mó nó jósyámó na aŋgísó rá va ŋgɔ́mɔnɔ na mahumu na wusó wamé ukú ójó anáá no rií va wúsinete vamé na aŋgísó ráwó. 10Wó je rií anáá Usi wa Cómó a geremenamó omana ojavena na mayɔŋɔ mimé. 11Kó ará vá né nó ambáanámó anáá vá nó byá na yanje yá jósi, vinó ka késyé oyérána anáá até kéye to né járámó? Ojáno bɛ́ŋ vipéŋgé íví Irɔŋgɔ a né nó hwámó na itíndíkáná mwané, esene éyé até vinó káva no né járámó, Mwáŋ mwáŋ wa Ireréŋgi kójo a né járámó. 12Va návéne vato vá né kávámó vasɔ́ɔ́ va navéna anáá vá wó oná, va isyé vaná vá né eŋgámó sɛ́ɛm na vaná váwó, vaná vá né búndámó vambéembéná vá vabonda váwó kó vá né eŋgámó anáá vá wó sómbéna ntóró ra nugwé. 13Moto uŋgimé a né nó bénámó na wusó wámé, wó je rií anáá ojo a né menevámó ondo húmé na mamana, Irɔŋgɔ a né me sotyámó.»
Ekáné yá etɔɔ éyé vato vá né enámó
(Mat 24:15-25; Rúk 21:20-24; 17:23; 21:8)
14«No né enámó ojo vá béráanámó anáá Ombé wa asasona, a rií na pandó éjé a ta geréméná orií. Ojo a ráŋámó, a geremenamó wová wandá mwané wusi na wusi! Na itíndíkáná mwané, ava vá mó riyámó na Yúdeyá vá mó géremenámó obwɔ́nɔ́nɔ naáté yá eŋgené. 15Ojo a mó riyámó na naŋgáté raá, a ta mó geremena wenda anáá a wɔ́rɔ́ wandá naáté yá yanje, 16kó ojo a mó riyámó na kondo a ta mó geremena owunde na naŋgá ondo wɔ́rɔ́ ówó cunú raá ra isíné. 17Na metúú mwané, eyáté etɔɔ na wusó wá vakótó vá embumu na ava vá mó riyámó na unwíyé ówó vaná! 18Kooránáno Irɔŋgɔ anáá mamba mwané ka jine na itíndíkáná rá isíné. 19Esené na metúú mwané, vato vá mó enámó etɔɔ ámó moto a ma eŋgá a árɔ́wɔ́ ka ená okésyé ówó ará Irɔŋgɔ a ma héndéná cí ondo júmé tetee ojó kó vato vá ta mó ne timbe etɔɔ ohúmé ámó eméye. 20Wá ríi Okí Irɔŋgɔ a ta ma sómbá anáá a nuŋge táŋgó ra metúú mwané, moto a ta mó hítí osɔ́tɔ́; kaá a ma nuŋgé metúú mwané na wusó wá vato ává a ma ijátá anáá vá rií íváa. 21Moto a mó riyámó a járá na vinó anáá: Énánó, ojo Irɔŋgɔ a ma ijátá a ámó ará! Ítɔɔ anáá: A ámó éníí! Vinó ka me kaŋga. 22Esené vato vá mó urámó vá tɔ́ŋɔ́ anáá Irɔŋgɔ a ma wó ijátá ndeke viváná kó hónó vahúmíye maró vá viváná vá mó urámó kó vá mó eŋgámó mamba má okémbyé na masimbá ukú ójó anáá vá déŋgyé vato pé. Vá mó hítyámó honó odéŋgyé tɔɔ ava Irɔŋgɔ a ma ijátá. 23Kaá vinó sɔɔ́, kéríkyáno! Ŋgo mana késyé o né bémbétena na até yimé éyé é né jinámó.»
Wuré wá Mwaná moto
(Mat 24:29-31; Rúk 21:25-28)
24«Wó je rií anáá na metúú mwané, ará itíndíkáná rá vitɔɔ í mó tómbámó, oŋgóná ó mó obámó mbínó, ohé ó ta mó ne eréena ineŋgí yáa, 25mokeekéní úmú na máná mó mó obanámó kó ŋguru íjí í ámó na máná í mó riímanámó. 26Kaá vá mó enámó Mwaná moto a uré naáté yá virandó na ŋguru raá iŋgimé kó na niimí náa nimé. 27A mó tómámó va éŋgerese váa na visɔɔtyá vyá cí íví bííní anáá vá wónjéena ava a ma ijátá na cí ra ndono iŋgimé.»
Eheyá na mpaŋganá
(Mat 24:32-36; Rúk 21:29-33)
28Ováno wusi na wusi ehoóhona éyé tíné ra ndɔ́ɔ́ yo eréenámó, ará párá ráá í késyámó oneŋgana owunde obyá twané, no jembámó anáá bwaá wó etá berebe. 29Sɛ́ɛm mwané kójo ará no mó enámó mamba mwané má eŋgávena, vinó ojembe anáá Mwaná moto a etá berebe na wuré kó a etá téné na ehɔ́tɔ́ ra vinó. 30Ŋgo nó ojanámó na vatɔ́ɔ́tɔ́, okará rá vato ójó ó ta né tómbá anáá mamba mwané ka eŋgavena. 31Cí na máná mó mo tómbámó, wó je rií anáá maró mámé má ta mó tómbá.
Irɔŋgɔ moká kójo a jembámó itíndíkáná rá mamana
(Mat 24:42; 25:13-15; Rúk 12:36-38; 19:12-13)
32«Na até éyé é néménámó isí na itíndíkáná, moto a ta jembé, ítɔɔ va éŋgerese na máná, ítɔɔ Mwaná, bɛ́ŋ Tetáŋgá moká. 33Wɔ́rɔ́no mé, kúráno, esene éyé no ta jembé ará itíndíkáná mwané í mó jínámó. 34Wó mó riyámó ámó moto omo, na wéŋga ówó anáá a enda oŋgendɔ, a ma micé yanje yáa, owundiye veŋga-manɔnɔwɔ váá ijwá, weréena ámó moto manɔnɔwɔ máa, o je tévére agíré-ohótó anáá a kuré. 35Kúráno sɔ́ŋ esene éyé no ta jembé itíndíkáná íjí moto wa naŋgá a mó jinámó, ŋgé enéŋgá, ŋgé na otémá rá wutúú, ŋgé iveri-iveri, ŋgé ibeesí. 36Tínáno anáá ómwané ka nó bwiye otonó. 37Até éyé njárámó na vinó eyé, njárámó na moto uŋgimé: Kúráno!»
ទើបបានជ្រើសរើសហើយ៖
Márákoso 13: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL