Rúkasa 9
9
Yésusu a ma tóma enásá yábɔ́t na eba
1Yésusu na weŋga ówó anáá a wónjéena enásá raá yábɔ́t na eba a wó hwámó ŋguru iŋgimé ra ugúné ówó vambé vá vireréŋgi bimé, kó na wondóna ówó vinɔ́. 2Na nímé ráá a ma wó tómá váte oja tamba ra Irɔŋgɔ, kó na wondóna ówó vinɔ́. 3A wó ojánámó anáá: «Ará no endámó na oŋgendɔ, vinó ka wɔ́rɔ́ wandá: Tɔɔ itímbó, tɔɔ ícáka, tɔɔ manyá, tɔɔ mwení. Wɔ́rɔ́no ámó moto cunú imweesií. 4Yanje éyé vá nó akámó, ríyáno ɔ́wɔ́ ondo húmé itíndíkáná rá obáréyá. 5Oŋgórá ójó vá to ne o naká, vinó wúrikye oŋgórá mwané, vinó ogite mpumí éjé na eŋgoró ra vinó ŋgeŋgéná mwané éné owó tihíyámó anáá vá mó eŋga wobé.» 6Enásá e ma endá o vidɔŋgɔ o vidɔŋgɔ vá te oja Usi wa cómó vá wunde wondoona vinɔ́ pandó íŋgímé.
Eróde Antipas a wa súsámó anáá ané kójo Yésusu
7Eróde ojo a ma ríi njwé na Griréyá owana até éyé é katé járewena na até éyé Yésusu a katé eŋga, peyɔ e ma me dáŋgá esena vámó vá ma ré oja anáá: «Yésusu a ámó Yohánese ojo a ma háténá na raaté rá vigwé.» 8Avámó vá ojá anáá: «Wó ámó Eríyasa kójo a má wundé.» Avámó hée vá oja anáá: «O omo a húmiye maaró má Irɔŋgɔ wa póná kójo a ma háténá na vigwé.» 9Kó Eróde a ma járá anáá: «Noó máté ŋgo ma sombá Yohánese ucé. Ojaté moto ojo ŋgo vánámó ombunu rá mamba o járéwena na wusó waa ojo? Kó Eróde a ma re osɔsɔ anáá a ená Yésusu.»
Yésusu a tonyámó ncumbí wa vato
10Ará enásá e ma wundé, kó va ma ojáná Yésusu wimé owó vá ma eŋgá kó Yésusu a ma wetúrátá wenda na wó váká na kɔ́ŋgɔ́ ra oŋgórá omó ebérááná anáá Bethaida. 11Ncumbí wa vato a ma jembé anáá a ma endá na pandó mwané, kó vá ma mo byɔɔnɔ́. Yésusu a ma wó áká okésyé o wó ojána cómó ra tamba ra Irɔŋgɔ, kó a ma ondooná vinɔ́. 12Wusí wó ma ríi wó te mana, enásá yábɔ́t na eba ví ma keréná Yésusu, kó vá ma járá náá anáá: «Wundiyé vato ává na vidɔŋgɔ kó na byanje iví na kɔɔ́kɔŋgɔ ɔ́wɔ́ vá ne wɔŋgɔmó hóma wá ombete kó na wandá wá wónyá, esene éyé to omó hómá owó byanje vitámó.» 13Kó Yésusu a mawó wundíyé anáá: «O wó hwamáno vinó máté manyá.» Enásá e ma járá náá anáá to timbámó bɛ́ŋ beréte isáánó na cwí ibé ye o diŋgámó anáá visó maté to enda kuse manyá na wusó wa moto oŋgime? 14Vanomóto vá ma ríi ohumé tɔɔ́sini isáánó. Yésusu a ma járá na enásá raá anáá va numiye vato na modiŋge mwa vato mawó matáánó, matáánó. 15Vá ma eŋgá até éyé Yésusu a ma járá nawó, kó vá ma numiyé vato bimé. 16Yésusu a ma wɔ́rɔ́ va beréte ává vátáánó na cwí íjí ibé, oneétye aŋgísó na mána, otéŋgyé Irɔŋgɔ, ocecéna, weréena enásá raá anáá vá taŋgáána vato. 17Bimána vá ma nyá wobéyá kó vá ma tótá bisímbí vyá beréte iví ví ma cáná onwíyé visáŋgá vyábɔ́t na vívé.
Pyeere a kamsanámó anáá Yésusu a amo a sotyé
18Isí emó Yésusu a ma wá turátá na mbasóóriye, vihoóhóná vyáá ví ma ríi orɔŋgɔ náá, kó Yésusu a ma wó súsé anáá vato vá jarámó anáá ndo ámó ané? 19Vihoóhóná ví ma wundíyé anáá: «Vámó vá ma járá anáá o omó Yohánese a dwé, ava vámó va ma járá anáá o omó Eriyása ava vámó hée vá ye anáá o omó ahúmíye maaró ma Irɔŋgɔ wa póná ojo a ma wundé ná vígwé.» 20Yésusu a ye nawó anáá: «Kó vinó no járámó anáá noó ndámó ané?» Pyeere a ma wundíyé anáá: «O ámó Etómá yá Irɔŋgɔ, Asotyé ojó Irɔŋgɔ a ma ijátá.»
Yésusu a ojámó nugwé náa na ehonowa yáa
21Kó Yésusu a ma wó tewéré anáá, vinó ká ojana moto wandá mwané. 22Kó a ma wundé owɔ́rɔ́ enjárá a ye nawó anáá: «O geremenámó anáá Mwaná moto a juwe na makáná mbunu, vagónó vá vato na vagónó vá vacekiye mómí, kó na vayéere vá mbéndɔ́ vá ne omo benámó; vá ne omonámó, kó na masí matáto a ne humámó ná evéra o wundé na esɔ́tɔ́.» 23Na nimé ráá Yésusu a ma járá ná moto oŋgimé anáá: «Ŋge moto a diŋgé anáá a mbyɔɔnɔ, ómwané ka ne vábúŋge ó mwané maté, káá o mwané obyá koróso ráá masí mímé ombyɔɔnɔ.» 24Kaá ojo a diŋgámó anáá a sotyé esɔ́tɔ́ yáá a ne daŋgyámó esɔ́tɔ́ mwané, wó je rií anáá ojo a me daŋgyámó esɔ́tɔ́ yáá na wusó wámé a me sɔ́tɔ́mó. 25Mpí éjáté kéje e ámó anáá moto a timbe akúmé aŋgimé ájá na cí rá dono káá a daŋgyé esɔ́tɔ́ yáá pɔ́ke na pɔ́ke. 26Ŋgé moto a ová wuswéní name kó na enjárá rame, mwaná moto hónó a ne ovámó wuswéní naá ará a mó urámó naáté yá niimí náá kó naáté yá niimí ná Isyé na niimí ná va éŋgerese ává mwáŋ mwáŋ. 27Ŋgo no ojánámó na vatɔ́ɔ́tɔ́ anáá, vato vámó vá ámó ará ává vá te ne gwé hɔ́rɔ́ vá arɔ́ɔ́ ká ená tamba ra Irɔŋgɔ.
Pyeere, Yohánese, na Yáka vá enámó Yésusu naáté yá niimí ná Irɔŋgɔ
28Wandá ámó metúú merémane me ma tómbá na weŋga owó anáá ojá vipeŋge mwané, Yésusu a ma wɔ́rɔ́ Pyeere, Yohánese na Yáka kó vá ma náátá na máná ra yene na ovásoóriiye. 29Na itíndíkáná íjí Yésusu a ma re ovasóóriye, kó a ma cendyé pwani, cunú ráá i ma bundé puŋgúum ŋgɛm-ŋgɛm. 30Bunúku, vato vává vá ma késyé ojáráana na Yésusu; ó ma ríi Mósese na Eríyasa. 31Niimí ná Irɔŋgɔ ne ma wó inditíyé. Kó vá ma járáná na Yésusu na wusó wá nugwé náá e ne no ne ryámó ná Yérusareme. 32Pyeere na vasɔ́ɔ́ ava vámó vá ma ríi na tónó pyá pyá, kó are vá ma honówá, vá ma ená niimí ná Yésusu, vato vává vá ríi orɔŋgɔ náá 33Itindikana ijí Mósese na Eriyása vá ma sáá na Yésusu, kó Pyeere a ma járá na Yésusu anáá: «Oyéere, wó ámó wusi anáá to ririí ará. To vaŋgámó ohaá virárá vitátó: Emwesií e yɔ́ɔ́ e mó na wusí owó wá Mósese e yemó na wusó wá Eriyása.» Wó je rií anáá Pyeere a te ma re jembe ate eyé a ma járá. 34A rií na ojárá, eyásá yá máná e ma sisé kó ititi yáá e ma wó bweená kó wokótó o ma ambááná vihoóhóná na itíndíkáná mwané. 35Mií e ma endá uré na eyásá yá máná anáá: «Ojó a ámó mwaná ame, o mwané kójo ŋgo mo ijyáta vinó o mová!» 36Na nimé rá mií kó va ma ená Yésusu a cáná moká, vihoóhóná vá ma obá ihóhó metúú mwané vá ta ma ojána moto wandá owó vá ma ená.
Moŋgajó ojó a timbámó ombé wá Ireréŋgi
37Isí eyé tií, Yésusu na vihoóhóná vyáá vitátó vá ma sisé yene kó ncumbí a vato a ma nde barume na Yésusu. 38Naáté yá ncumbí wa vato mwané, moto omo a te rume anáá: «Kutu-kutu oyéere nɔɔ́ aŋgísó na ombwene rámé, ó ámó nukí námé ná mwaná. 39Itíndíkáná íŋgímé, ombé wa Ireréŋgi a me ambaanámó, ikɔkɔ ka tómbá, maŋgájó a rumatámó, ombé wa Ireréŋgi a ma mo suusí na ŋguru, ŋgúsú okésyé opɔkɔ na uŋgúté, kó ombé wa Ireréŋgi a ma me túúríyé na sáási ará a eŋgámó anáá a húmé na nótó raá, kó a ma cámó jomboro-jomboro.» 40Ŋgo ma súsé vihoóhóná vyɔ́ɔ́ anáá vá gúné Ireréŋgi mwané, kó vá to ma timbe ŋguru rá o me gúné. 41Yésusu a ma kémbyé ayáá: «Éée vinó ává vato ává wusóó no ta timbé ŋgɔ́tɔvena, kó no eŋgámó wóbé ŋgo no ryámó na vinó o húmé itíndíkáná ijyáté? Ŋgo né nó ménevámó ondo húmé itíndíkáná até? Na nimé ráá Yésusu a ma járá na moto omójo anáá uré na ombwene rɔ́ɔ́ a rá.» 42Amó moŋgájó a ma ré kerana na Yésusu, ombé wa ireréŋgi a ma mo bétá náá cí o mo súúsi na ŋguru, kó Yésusu a ma báméná ombé wá Ireréŋgi, wondoona mwoŋgájó, kó a ma mo wundíyé na isyé. 43Vato bimáná vá ma re kembyé ekáné yá ŋgúru rá Irɔŋgɔ. Ame vato vá marii vá rá kembye até yímáná eyé Yésusu a katé eŋga, kó Yésusu ómwané a ma járá ná vihoóhóná vyáá anáá: 44«Bunáno etú rá vinó wúsi anáá no veténa até éyé ŋgo no ojánámó tetee ojó: Vá né kávámó mwaná moto na embɔɔ́ rá vato.» 45Kó vihoóhóná ví ta ma ová enjárá mwané, esene éyé vá ma wó aséénéná ntimisáná ra vipeŋge mwané anáá rií ka ová, kó va ma ré tiné anáá vá súsé Yésusu até eyé a ma diŋgé anáá a járá.
Áné kójo a tómbámó vasɔ́ɔ́ na raaté wa visó?
46Vihóóhona ví katé petaana vá mwané na vá mwané, vá wa súsámó anáá: Vá ijíme ané kójo a ámó ogónó na raate ra wó? 47Yésusu a ma jembé na wusó owaté vá katé petaana na etémá rawó, kó a ma wɔ́rɔ́ mwá moŋgájó o mo tirimye na kɔŋgɔ. 48Kó a ma járá na vihoóhóná vyáá anáá: «Moto ojó akámó mwá moŋgajó wusi na wusó wá ebérááná yá mé, ó mó nóó kójo no mo aka kó ojo a mo ŋgaka a ma aka moto ojó a ma ntomá, esene éyé anáá ojo a vá sisyámó noto na raaté ra vinó bime, ómwané kójo a ámó ogónó.»
Ojo a ta pékááná na vinó a ámó na vinó
49Kó Yohánese a ma járá na Yésusu anáá: «Oyéere, to ma ená moto omo a gúné vambé vá vireréŋgi na ebérááná yɔ́ɔ́ kó visó to mo ríí anáá tomo kamana esene éyé anáá a támó na ncamba ra visó.» 50Yésusu a ma járá na Yohánese anáá o mo misámáno, esene éyé anáá ojo a ta pékááná na vinó a ámó orɔŋgɔ na vinó.
Vato ává na samari vá váráŋgámó Yésusu
51Itíndíkáná ijí Irɔŋgɔ a ma geréméná wuryé Yésusu na cí, i ma ríi yé te kérana, Yésusu a ma wɔ́rɔ́ combena anáá a wundámó na Yérusareme. 52A ma tómá vyoja cómó na wusó. Kó vyoja cómó vá ma endá, wiŋgaana na edɔŋgɔ e mó eyé ná Samarí anáá vá komsana wuré wá Yésusu. 53Kó vato wá vidɔŋgɔ vá ma varáŋgá o mo aka esene éyé anáá a ma ré enda na Yérusareme. 54Na weŋga ówó anáá vá ená wandá mwané, vihoóhóná íví Yaka na Yohánese ví ma járá anáá: «Okí ye watɔ́wámó anáá to sisye ihyáné ijí na máná i wó hyáni?» 55Ko Yésusu a ma bundyé aŋgísó o wó núné a te owó riŋgána. 56Kó vá ma endá ná edɔŋgɔ idye.
Omise wimé na obyɔɔnɔ owó Yésusu
57Vá ma rií ndenda, kó moto omo a ma nde uré aye na Yésusu anáá: «Ŋgo no obyɔɔnámó homá wimé ówó o no endamo.» 58Yésusu a ma mo wundye anáá: «Vihaa ví timbámó viwana anáá vá wɔseména, mo nóóní omó na máná mo timbámó virárá, Mwaná moto a ta timbé homó wá ovitimiye ucé.»
59Yésusu a ma járá na moto undye anáá: «Mbyɔɔnámó.» Moto a ma járá náá anáá: «Okí, pwámó ŋgúru anáá mane nda otitána Tetáŋgá.» 60Yésusu a ma mo wundíyé anáá: «Misé vigwé ví titána vigwé vyá wó; mámó ndá o ta oja tamba ra Irɔn.»
61Moto undye hée a ma járá na Yésusu anáá: «Okí mbaŋgámó o ta obyɔɔnɔ, mane pwá ŋgúru anáá mana o nde yáákana na yanje yá vato yá mé.» 62Yésusu a ma járá náá anáá: «Moto ójó a késyámó owute, kó a néménámó nimé, omójo a ta geréméná onɔnɔwɔ na wusó wá tamba ra Irɔŋgɔ.»
ទើបបានជ្រើសរើសហើយ៖
Rúkasa 9: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
