Rúkasa 10
10
Yésusu a tómámó vihoóhóná mɔwɔ́ márátó na umwesií na vívé
1Na nimé ráá, kó Okí a ma ijátá vihoóhóna víndyé mɔwɔ́ márátó na umwesií na vívé, o wó tómá váváné váváné na eŋgórá íŋgímé bayete na pandó íŋgímé íjí ó mwané maté a ma yáaná wenda. 2Kó a ma járá nawó anáá: Mabuwe má rombámó, veŋgamanɔnɔwɔ dekétíí. Sóríyámáno sɔ́ moto wa mebuwe anáá a usiye vato vá manɔnɔwɔ na mabuwe máá. 3Ndáno! Ŋgo nó tómámó ámó vaná vá vitómbá na raaté rá viyábá. 4No ta eŋgá no wɔ́rɔ́ dɔ́rɔ, na icáka ítɔɔ va sírípasa, vinó ka té déŋgyé táma na pé anáá no vétíyáná vato. 5Na iŋgááná na yanje émó manáno járá anáá: Dɔ́ŋgɔrɔ́ɔ́ŋ na yanje éyé. 6Ŋgé moto ójó a tɔ́wɔ́mó dɔ́ŋgɔrɔ́ɔ́ŋ a ríi ɔ́wɔ́, dɔ́ŋgɔrɔ́ɔ́ŋ wa vinó a né riyámó naá, wá ríi ka je rií náná, dɔ́ŋgɔrɔ́ɔ́ŋ mwané a ne no wúndenámó. 7Ríyáno na yanje mwané, no nyá no venyú até éyé vá ne no hwámó, esene éyé anɔ́nɔɔ a geremenamó na maana máá. No toŋge ne tómbá o byanje byanje. 8Ará no ne iŋganámó tisɔ́nɔ emo, kó vato ává ɔ́wɔ́ vá mo nó aká, nyáno áté éyé vá no hwámó. 9Ondóónáno vinɔ́ iví no atiyámó, no ojána hónó vato bimé ává ɔ́wɔ́ anáá: Tamba ra Irɔŋgɔ ye ojine na vinó. 10Na iŋgááná na tísɔnɔ emo eje vá to nó aká áwɔ́, vinó wenda na masaráŋgana má enjɔ́ŋɔ́, no járá na vato anáá: 11To nó gitanámó tɔɔ mpumí ra ci rá tisɔnɔ ra vinó éjé e mó raténa na eŋgoró ra visó indi to no céné, veda, jembáno anáá: Tamba ra Irɔŋgɔ ye ojine na vínó. 12Ŋgo nó tɔ́ŋénámó anáá: Isí éyé Irɔŋgɔ a mó jósyámó vato, pwénísye ra ukúkú rá oŋgórá mwané e mó tómbámó ra oŋgórá rá Sɔ́dɔmɔ.
Eŋgórá éjé e váráŋgámó okaŋga
13Numerí nɔɔ mámó ójó oŋgórá ra Korasíni! Numerí nɔɔ mámó ojó oŋgórá rá Becayída! Esené wá ríi mesimbá ámá má ma eŋgávéná na vinó má ma eŋgávéná na eŋgórá ra Tíiri na Sidóŋo ŋgé vato ává ɔ́wɔ́ vá ma byá cunú rá nugwé kɔ́ɔ́m, owunde océndyé ombé wa esɔ́tɔ́ wawó. 14Isí yá njwési, itúúrí rá Tyr na Sidon í ta mó caka ámó rá vinó. 15Kó vinó vato ává na Kaperenawúmu, ye no buŋganámó anáá no mó naátámó ondo húmé na máná? No mó sísámó hwɔs na pandó ra vigwé. 16Yésusu a ma járá hée na vihoóhóna vyá anáá: «Ojo a né nó ovámó aŋgovámó nó hónó, ojo a né nó gúnámó, a ŋgúnámó, kó ojo a ŋgúnámó, a gúnámó hónó ojo a ma ntómá.» 17Vihoóhóná vyá Yésusu íví mɔ́wɔ́ márátó na umweesií na vívé ví ma endá váwúndye na vitaka vá oja anáá: «Oki, ítɔɔ vambé vá vireréŋgi ví katé vásísye dɔ́ɔ́ŋ aré to wó bamenámó na ebérááná yɔ́ɔ́.» 18Kó Yésusu a ma járá nawó anáá: «Ŋgo katé néméná saátana a suuwana na cí ámó ineŋgí yá mbemberitye. 19Óváno anáá ŋgo mó nó hwá ŋguru ra oséná ówó nɔɔ́ na eŋgoró ra vinó ítɔɔ ŋgeŋgá kó hónó no wunde oséná ŋguru ra vambémbéná wandá ka nó eŋgá. 20Kó Síkí vinó ka ová vitaka esene éyé vambé wá vireréŋgi vá katé vásísye na wusó wá vinó, óvánó vitaka anáá vibérááná vyá vinó ví ámó tiré-tíré na máná.»
Yésusu a saŋgenámó
21Na itíndíkáná mwané hónó, na ŋguru ra mwáŋ mwáŋ wa ireréŋgi vikáné vyá visaŋgena ví ma wɔ́rɔ́ Yésusu kó a ma járá anáá: «Ŋgo wo gúmíyámó tataá Irɔŋgɔ ójó na máná na cí, esene éyé o mó búne aŋgísó rá vaná vá viwúrú viwúrú vá vato anáá vá ená mamba mwané, obweená rá vajembe kárate na vapepéyɔ́. Ɛɛŋ tataá, náná kówo o ma atɔ́wɔ́ anáá mamba má tékávena na ndiŋgéná rɔɔ. 22Tatá a ma pwá wandá wimé, kó moto a ta jembe, áné kójo mwaná, ŋgé wá ríi ka rií isyé, ka je jembe isyé ŋgé wá ríi ka rií mwaná na ava mwaná a atɔ́wɔmó anáá a wó tíhíye.» 23Kó a ma búndé na vihoóhóná vyáa, okésyé ojáráana bɛ́ŋ nawó ayáá: «Wusi na aŋgíso ájá yó enámó até éyé vinó no enámó! 24Esené ŋgo nó ojanámó anáá ombunu rá vahúmíye maró vá Irɔŋgɔ na ombunu rá vahumu vá ma diŋgé anáá vá ená atééyé vinó no enámó, ka ená, vá ová até éyé vinó no ovámó, ka ová.»
Nkaná ra usi wa moto ójó na Samaríyá
25Kó njembe ra mbéndɔ́ emo e ma hatééná ukú ójó anáá a maa Yésusu, aye naá anáá: «Oyéere, até kéye ŋgeremenámó weŋga índi timbe esɔ́tɔ́ éyé kɔ́rɔ́tɔ́tɔ́?» 26Yésusu a ma járá naá anáá: «Kárate wa mbéndɔ́ a ma járá eénéo? Mámó wovámó eéné ará o ráŋámóo.» 27Kó a ma me wundíyé anáá: «O geremenámó odiŋge Okí ójó Irɔŋgɔ wɔɔ na otémá rɔɔ́ úŋgímé, na ireréŋgi yɔɔ́ yimé, na ŋguru rɔɔ iŋgimé, kó na mbuŋgáná rɔɔ́ íŋgímé, owunde odiŋge váánó ámó mámó maté.» 28Kó Yésusu a ma jará naá anáá: «O mó wúndye mpáŋá. Kaá ŋgá náná, ɔ́wɔ́ o né timbámó esɔ́tɔ́ éyé kɔ́rɔ́tɔ́tɔ́.» 29Kó ukú ójó anáá a tíhíye aá enjárá raá e ámó ntóró, njembe ra mbéndɔ́ eméje e ma súsé Yésusu anáá: «Áné kójo a ámó váánóo?» 30Kaá Yésusu a ma me kwená nkaná ayáá: Moto omo a ma urúkyé meníyé na Yerúsareme anáá a wɔsɔ na Yeríko, kó a ma bérúmé na vaŋgúŋgúbí. Vaŋgúŋgúbí mwané vá ma bɔɔ́ wandá wimé ówó a ma timbé, o me gite na wonywa, kaá osárámanda, o me cé hɔ́rɔ́ a úgwé hóhó. 31Pará omo a ma tómbéná pandó mwané, osereke moto omójo, weŋgéreta otómbá. 32Kó moto omo ójó na noyómó ná Réví#10:32 Vato ává na noyómó na Réví vá katé rií va ŋga manɔnɔwɔ na yanje yá rɔŋgɔ. a ma endá uré, ómwané hónó osereke moto omójo, o me vásaárá, otómbá ndaaŋ. 33Na nimé raá, mwaná wa va Samariténe#10:33 Va Samariténe vá katé rií vambéembéná vá va yuúdene. omo a rií na oŋgendɔ ráá, a ma tómbéná na pé mwané. Ará a ma ená moto omójo, noóŋgó nó ma me ambááná na wusó wáa. 34Kó a ma me keréná, orɔndɔ vinóni vyáa na mbiti na mɔwɔ́, owótá, kó, a ma me néétyé na ikemerí ráá wenda naá na yanje yá biní o me beerye ɔ́wɔ́. 35Ibeesi, a ma wɔ́rɔ́ vikpama vyá mwení vívé weréena moto ójó a katé nɔnɔɔ na yanje yá biní aye naá anáá: «Cáná obeerye moto ojó na táŋgó ra mwení ejé; ŋgé mwení yá váwúswíyé, ŋgo né wo wundiyámó ará ŋgo né endámó etá.»
36Kó Yésusu a ma súsé njembe ra mbéndɔ́ eméje anáá: «Na ŋgénéná rɔɔ, na vato ává vátátó, ojaté kójo a ma ríi vááno wa ojo a ma obéná na embɔɔ́ ra vaŋgúŋgúbí?» 37Njembe ra mbéndɔ́ e ma me wundíyé anáá: «Ó ámó ojo a ma me beeryé.» Kó Yésusu a ma járá naá anáá: «Ndá índi weŋga sɛ́ɛm ámó ómwané.»
Maáta na Maréyá vá tímbaanámó na Yésusu
38Amó Yésusu na vihoóhóná vyáa vá ma ríi na onjɔ́ŋɔ́, vá ma iŋgááná na edɔŋgɔ emó kó okótó omo ebérááná anáá Maáta a me aká na yanje yáá. 39A ma ré timbe erená yáá ebérááná anáá Maréyá. Kó Maréyá ómwané a ma nuumáná na eŋgoró ra Okí a vátɔ́rɔ́ enjárá éjé Okí a katé járá. 40Maáta a ma ré timbe matómáva mbunu kó a ma uré na kɔ́ŋgɔ́ ra Yésusu aye naá anáá: «Okí, náná wó ta wo eŋgá wandá? Erená yámé é mó mícena noó matómáva mimáná, járá naá anáá índi a uré a enda ŋgaka.» 41Yésusu a ma me wundíyé aye naá anáá: «Maáta, Maáta, o váhɔ́mbɔ́kɔmó kó o yéránámó na wusó wá mamba mbunu. 42Wandá wúmwéesií wó ámó na mpí. Maréyá ojo a mó íjata mpaŋá ra táŋgó éjé vá ta mó hítí o me bɔwena.»
ទើបបានជ្រើសរើសហើយ៖
Rúkasa 10: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
