Rúkasa 1
1
Rúkasa a tíhíyámó kárate waá
1Aá Teyofíri ogoó, Ombunu rá vato ó ma késyé otire até éyé Irɔŋgɔ a ma eŋgá anáá yó eŋgávena na raaté wa visó, 2ámó vatisiye ává vá ma ríi ɔ́wɔ́ na makésyé ará mamba mwané ma katé eŋgavena kó vá ma só ojáná mamba mwané, vá mwané maté owunde obúndé veŋga manɔnɔwɔ vá maró mwané, 3wandá mwané kówo noó hónó na nimé éjé anáá mana onimana mamba mwané wusi na wusi owɔ́rɔ́ ówó na makésyé, kó ŋgo mó ená wusi anáá, ŋgo wo tirana mamba mwané na mpaŋá ra tékéná, 4índi wijíme anáá ehoóhona éyé o ma timbé e ámó vatɔ́ɔ́tɔ́.
Ŋgojéná ebyánávéná yá Yohánese adwe vato
5Wó ma ríi na itíndíkáná íjí Eróde a ma ríi ogónó wa ahumu na Yúdeyá, moto omo ebérááná anáá Sakaríyása, a katé rií ná iwónjá rá vacekiye mómí rá Ábya. Egé a rií kurúmbútu ra ogónó wa vacekiye mómí ójó anáá Arɔ́ŋɔ, vá me béráana anáa Erísabete. 6Vá mwané bimé vá katé rií ndíŋgirííŋ na aŋgísó rá Irɔŋgɔ, vá rií na mowá, vá béerye mbéndɔ́ na tévéré íŋgímé rá Okí ka na mwaná wa ihusí. 7Wó je rií anáá, vá ta ma bonda esene éyé Erísabete a ma ríi ewóndá yá okótó, kó hónó vá mwané bimé vá ma ríi vá étá virunú. 8Kó Isí émó éyé Sakaríyása a katé nwíyé manɔnɔwɔ máa na aŋgísó rá Irɔŋgɔ esene éyé iwónjá ráa kíji í ma geréméná ondo keriye mómí, 9kó honó ámó na ntumu rawó vá katé ijata vibérááná vyáwó, kó vá ma wɔ́rɔ́ ebéraáná yáá anáá ómwané ojo a enda heénye butú naáté yá yanje yá Okí. 10Kó Sakaríyása a ma iŋgááná naáté yá yanje, ncumbí wa vato a vásóóriye na naŋgáté na itíndíkáná rá oheénye ówó butú. 11Kó Éŋgerese wa Okí a ma húmáná Sakaríyása, a rií eténé na ombɔɔ́ rá enémé rá iburúutu yá oheénye butú. 12Ará Sakaríyása a ma mo ená kó a ma siríkáná wokótó o me ambaana. 13Kó Éŋgerese a ma járá naá anáá: «Sakaríyása o ta eŋgá tíné, Irɔŋgɔ a má óvá mbásóóríyé rɔɔ. Ogɔ́nɔ́ ójó Erísabete a né byánámó ombwene kó o né me béráanámó anáá Yohánese. 14No né ovámó vitaka mbunu, kó ombunu rá vato ó né riyámó na visaŋgena na wusó wá mwaná mwané, 15Esené a né riyámó ekáné yá moto na aŋgísó rá Okí, a ta né vényú mɔwɔ́ ítɔɔ mɔɔwɔ́ ámá má ambáanámó, kó a né núwámó táásé na Ireréŋgi éyé Mwáŋ mwáŋ hɔrɔ́ a ré rií na ibumu ná netí. 16Ómwané ojo a né eŋgámó anáá ombunu rá vaná ává na Israyéere ó céndyé visɔ́tɔ́ vyáwó vá wundena Okí Irɔŋgɔ wawó; 17Kó a né ndendámó na aŋgísó rá Irɔŋgɔ hɔrɔ́ a timbe ncaŋa na ŋguru ra Eríyasa, ukú ójó anáá etémá ra vabonda i wunde na vaná váwó, ava na etú vá tímbe peyɔ ra ava ndíŋgirííŋ índi vá héhenda noyɔŋɔ éné nó rúkyámó Okí.» 18Sakaríyása a ma járá na Éŋgerese anáá: «Ŋgo né ijímámó twiiní anáá wó ámó vatɔ́ɔ́tɔ́? Esené Visó bimé to etá virunú.» 19Éŋgerese a ma járá naá anáá: «Ndó ámó Gabriyéere, ténámó na aŋgísó rá Irɔŋgɔ, a mó tómá anáá ŋgo enda wo ojana Usi wa cómó omójo. 20Kó ámó o mó séŋgá enjárá rame, o vaŋgámó orií múmú hwɔs ará wandá mwané wó né eŋgavenámó na itíndíkáná íjí Irɔŋgɔ a ma tírímíyé.» 21Ncumbí wa vato ójó a katé rií na naŋgáté a katé gíré hɔrɔ́ a kémbyé ámó Sakaríyása a katé rií rií naáté yá yanje ɔ́kɔ́. 22Ará a ma húmé, a ma ríi a etá ka ne járá kó a katé wó tíhíye bɛ́ŋ ndeme na embɔɔ́, ɔ́wɔ́ kówo vato vá ma ijímé anáá a ma ená mesimbá ɔ́kɔ́ na yanje. 23Ará itíndíkáná rá manɔnɔwɔ í ma maná, kó sakaríyása a ma etá na yánja yáa. 24Na nimé ra metúú, egé ójó Erísabete a ma súwé, kó a ma eŋgá éhé etaáno a váséesemana hɔrɔ́ a járá naáté yá otémá ráa anáa: 25«Énáno ámó Okí a má ŋgúryé wuswéní na aŋgísó rá vato bimé.»
Cómó ra ebyánávéná yá Yésusu
26Ibumu ná Erísabete nó ma ríi nó étá ehé racátó. Kó Irɔŋgɔ a ma tómá Éŋgerese Gabriyéere na oŋgórá ómó ójó na Gariréya vá béráana anáá Nasaréte, 27Na kím ra ŋgwande ra okótó e timbe tánó ra nobá na moto omo ebérááná anáá Yóseve, a rií ndírí ra Dáviti, ŋgwande mwané vá me béráana anáá Maréyá. 28Éŋgerese a ma iŋgááná na yanje aye na Maréyá anáá: «Ríi na vitaka! Okí a mó wo eŋga ekáné yá ntá, a ámó nɔɔ.» 29Ará Maréyá a ma ová vipéŋgé imívi, a ma káŋgá tembááŋ a vásúsé anáá: «Ukúkú rá mbétíyé até ojóo?» 30Éŋgerese a ma járá náá anáá: «Mámó ka tíné wandá, Maréyá, esene éyé o timbámó ntá ra Irɔŋgɔ. 31Éná, o vaŋgámó owɔ́rɔ́ ibumu, kó o né byánámó ombwene mámó o me béráana anáá Yésusu. 32A né riyámó ogónó kó vá né me béráanámó anáá ombwene rá Irɔŋgɔ ójó na máná fétéém. Okí Irɔŋgɔ a né me hwámó ijwé rá kókó ráa ójó Dáviti. 33A né riyámó ogónó wa ahumu na noyɔŋɔ ná Ísayéere kó ijwé ráá í ta né timbe mamana.» 34Kó Maréyá a ma súsé Éŋgerese anáá: «Wandá mwané wó né eŋgavenámó twiiŋí noó ŋgo arɔ́ɔ́wɔ́ ka ijíme onómótó?» 35Éŋgerese a ma me wundíyé anáá: «Ireréŋgi éyé Mwáŋ mwáŋ é né urámó na mámó, kó ŋguru ra Irɔŋgɔ ójó na máná urehí e né wo bútyáanámó na ititi yáa; na wusó mwané kówo mwaná ójó a né byánávenámó a né riyámó mwáŋ mwáŋ kó vá né me béráanámó anáá mwaná Irɔŋgɔ. 36Kó owó erená yɔɔ́ éyé Erísabete éyé vá katé béráana anáá ewóndá yá okótó a etá na ibumu ná ehé ratátó na wurunú wáa kó a né byánámó ombwene, 37esene éyé wandá wómó wó ta káŋgéná Irɔŋgɔ.» 38Maréyá a ma járá sɔɔ́ anáá: «Ndo ámó yeŋga manɔnɔwɔ yá Okí. Ŋgá wimé wéŋgávena ámó o mó járá!» Kó Éŋgerese a ma endá.
Maréyá a endámó heremena Erísabete
39Metúú ámá má ma táréyá, Maréyá a ma tótá eŋgoró wenda na mwaná wa oŋgórá omo ójó na pandó eŋgené ójó na edɔŋgɔ yá Yuda. 40A ma iŋgááná naáté yá yanje yá Sakaríyása ovétíyé Erísabete. 41Ará Erísabete a ma ová mbétíyé ra Maréyá, mwaná ójó na ibumu náa a ma véérítyé kó Erísabete a ma núwé táásé na Mwáŋ mwáŋ wa Ireréŋgi. 42A ma rumátám na ŋguru anáá: «O ámó na nosanjá otómbá vakótó bimé kó mwaná ójó naáté yá ibumu nɔɔ́ hónó a ámó na nosanjá! 43Ndo ámó áné ukú ójó anáá netí Okí wame a ŋguréna naáté yá yanje? 44Esené ará ŋgo mó ová mbétíyé rɔɔ kó mwaná ójó naáté yá ibumu namé a mó veérye na vitaka. 45O ámó na vitaka esene éyé o mó atɔ́wɔ anáá mbaŋgéná ra Okí yo eŋgavena.»
46Maréyá a ma járá anáá:
Na otémá rámé oŋgímé, njárámó anáá Okí a ámó ogónó
47otémá rámé ó ámó táásé na visaŋgena
na wusó wá Irɔŋgɔ asótyé wame;
48esene éyé a mó nɔ́ nisó náa na mwaná wa yeŋga manɔnɔwɔ waá,
ehéen tetee ojó ekará ra vato iŋgimé e né járámó name anáa: «O ámó na vitaka,
49esene éyé Irɔŋgɔ ójó ŋguru iŋgimé a mó eŋga vesi vá mamba na wusó wamé.
Ebérááná yáa é ámó mwáŋ mwáŋ,
50kó na ekará ra vato iŋgimé,
a eŋgámó wusi na ava vá me tinamo.
51Na ŋguru ra ombɔɔ́ ráa,
a sérémendiyámó vato ává na mebúnú;
52A búŋgúnanámó mahumu na indií rawó,
kaá oneétye ava vá vásísyámó nótó;
53ava vá ovámó njeŋge o wó nwíyé na mesi,
mbútí o wó míce embɔɔ́ na embɔɔ́.
54A ma uré ondo aka noyɔŋɔ na Ísayéere,
a ta ma béríhye weŋga ówó yeŋga manɔnɔwɔ yáa wusi,
55Náná kówo a ma tánéná va Tetáŋgá,
otánéna Abaraháma na bɔŋɔ raá na kɔ́rɔ́tɔ́tɔ́.»
56Maréyá a ma ríirii orɔŋgɔ na Erísabete wandá ámó ehé etátó, kó a ma etá.
Ebyánávéná yá Yohánese adwe
57Metúú ámá Erísabete a ma geréméná obyáná má ma húme, kó a ma byáná ombwene. 58Vato ává na kɔɔ́kɔ́ŋgɔ́, na vijíjíyé vyáa vá ma ová anáa Okí a mó tíhíye Erísabete usi wa otémá waá, kó bimé vá ma saŋgena orɔŋgɔ naá. 59Na metúú méréma, kó vato vá ma uráná vá anjá maŋgájó, vá ma ríi vá etá me béráana na ebérááná yá isyé anáa Sakaríyása. 60Netí a ma eŋgá nawó anáa: Mbéndɔ́ vá me béráanámó anáa: «Yohánese.» 61Kó vato vá ma me wundíyé anáa: «Njíwó rɔɔ ejaté kéje e timbámó ebérááná eméye?» 62Vá ma járá na Sakaríyása na ndeme ra embɔɔ́ anáa a wó ojana ebérááná yá maŋgájó. 63Kó a ma wó súsé akɔ́kɔ́ otire ɔ́wɔ́ anáa: «Ebérááná yáa é ámó anáa Yohánese.» Kó vato bimé vá ma kékémbyé. 64Vá ma buwé uŋgúté ráá wá búnúwé, norémbé náá okákówa kó a ma késyé ojárá, a rukye Irɔŋgɔ. 65Wokótó wó ma ambáána vato bimé ává vá katé sɔ́tɔ́ na kɔ́ŋgɔ́ rawó; kó maró mwané a ma vásásétá na pandó ra eŋgené éjé na edɔŋgɔ yá Yúdeyá uŋgimé. 66Vato bimé ává vá katé ová enjárá mwané vá katé vá súsé naáté yá etémá rawó anáa: «A né riyámó ukú rá mwaná até?» Esené ombɔɔ́ rá Okí ó katé rií naá.
Osawo rá Sakaríyása
67Isyé ójó Sakaríyása a ma núwé táásé na Ireréŋgi éyé Mwáŋ mwáŋ, kó a ma járá ámó ahúmíye maró wa Irɔŋgɔ anáá:
68Niimí na Okí, Irɔŋgɔ wa Ísayéere
esene éyé a mó héremena noyɔŋɔ náa, owunde o me ata,
69Kó a mó só tóména moto ójó na ŋguru ra osótyé
na yanje yá Dáviti ójó yeŋga manɔnɔwɔ yáa.
70Náná kówo Irɔŋgɔ a ma járá na póná na uŋgute rá va mwáŋ mwáŋ vá vahúmíye maró váa anáá:
71«Ŋgo mó nó atámó na vambéembéná
vá vinó, noó owunde o nó uryé na embɔɔ́ ra ava vá nó bénámó.
72A ma tíhíyé va kókó vá visó usi wa otémá waá,
kó a buŋganámó iretye yáa éyé mwáŋ mwáŋ,
73Iretye mwané ó ámó tánó éjé a ma eŋgéná Tetáŋgá wa visó ójó Abaraháma;
74A ma járá anáá: Ŋgo né bɔɔmó vaná vɔɔ́ na embɔɔ́ ra vambéembéná váwó,
na nimé raá vá mwané onɔneena ka ne tíné wandá.
75Okú ójó anáá na mbímí wa esɔ́tɔ́ yáwó vá rií díŋgirííŋ, vá wunde orií mwáŋ mwáŋ na aŋgísó rámé.»
76Sakaríyása a ma járá hée na mwaná anáá:
Kó mámó, vá né wo béráanámó anáa ahúmíye maró wa Irɔŋgɔ ójó fɛ́tɛ́ɛ́m,
o né ndendámó na aŋgísó rá Okí índi o me hendyena pé,
77o né járámó na noyɔŋɔ náa anáá:
«Irɔŋgɔ a nó sotyámó,
a nó njwé mabé má vinó.
78Esené a timbámó otémá ójó ó cakámó neŋgenámó.
Usi wa otémá mwané kójo a né eŋgámó anáa oŋgóná ó só nómena na máná,
79Índi ó bónena ava vá sɔ́tɔ́mo naáté yá mbínó na ava naáté yá ititi yá nugwé,
ombótá ójó anáá to ndenda na pé ra dɔ́ŋgɔrɔ́ɔ́ŋ.»
Wobwene wá Yohánese adwe
80Yohánese a ma ré góná na nótó kó na Ireréŋgi; a ma katé sɔ́tɔ́ na pandó íjí vato vá ta ámó ɔ́wɔ́ hwɔs isí éyé a ma endá vá tíhíye na noyɔŋɔ na Ísayéere.
ទើបបានជ្រើសរើសហើយ៖
Rúkasa 1: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
