Lúka̱s 16
16
Ajngáa ga̱jma̱á numuu yumbáá tsí na̱nguá jmbii
1Jesús niꞌthúún tsí naꞌsngúún ajngáa ríge̱ꞌ mangaa: «Nixtáa mbáa xa̱bo̱ tsí maphú gíꞌdoo, tsí ni̱gi̱ꞌdaa mbáa yumbáá tsí na̱ña̱wu̱u̱n mbá xúgíí rí gíꞌdoo̱. Mbá mbiꞌi waꞌtháa̱n rí tsúꞌkhue̱n natsíjmuu drígo̱o̱. 2A̱ꞌkhue̱n nindxaꞌwóo̱ yumbée̱ jamí niꞌthúu̱n: “Maphú ra̱máján rí na̱dxawuunlo̱ꞌ ga̱jma̱á numaaꞌ. Ikhaa jngó, ataxnáxi̱i mbá i̱yi̱i̱ꞌ inuꞌ ná ma̱ra̱thu̱nꞌ makaaꞌ ga̱jma̱á numuu mbá xúgíí rí gúꞌdo̱ꞌlo̱ꞌ, numuu rí nánguá jaꞌyaaꞌ ma̱tia̱wa̱án mbá xúgíí rí gúꞌdo̱ꞌlo̱ꞌ”. 3Xómáꞌ yumbáá tsí na̱ña̱wu̱u̱n mbá xúgíí rí gíꞌdoo ña̱ꞌñii, nindxaꞌwá-mina̱ꞌ: “Dí máꞌ gáne̱ xúge̱ꞌ, rí narígúu ñajun ñawúnꞌ táta̱ tsíge̱ꞌ rá. Ra̱gúꞌdo̱ꞌ tsiakhe̱ rí ma̱ñajun inuu ju̱ba̱ꞌ, jamí na̱ti̱yu̱ꞌ rí ma̱nda̱ꞌa̱-mínu̱u̱ꞌ rí me̱ꞌkho. 4Ndi̱yo̱o̱ máꞌ dí gáne̱lo̱ꞌ rá, kajngó ma̱ju̱wá xa̱bo̱ tsí ma̱goo ma̱gánú guꞌwúún ído̱ rí marígúu̱ ñajun ríge̱ꞌ ñawúnꞌ”.
5»A̱ꞌkhue̱n nindxaꞌwóo̱ mbámbáa xa̱bo̱ tsí gíꞌmaa inuu ña̱ꞌñii̱. Tsí ginii niraxu̱u̱: “Ikháánꞌ, wátha̱ gíꞌmááꞌ inuu ña̱ꞌñiꞌ róꞌ”. 6Xómáꞌ xa̱bo̱ tsí gíꞌmaa niriꞌña: “Mbá witsu skíñú (100) daan mba̱ꞌwo̱#16.6 Awan rí gíꞌdoo daan ríge̱ꞌ mbiꞌyuu «batos» ná ajngáa griégo̱, jamí mbámbá ne̱ najno̱ꞌ mbá 35 lítro̱ wáa. yatsi̱i xndú olíbo̱”. A̱ꞌkhue̱n rí xa̱bo̱ tsí na̱ña̱wu̱u̱n rí gíꞌdoo ña̱ꞌñii niꞌthán: “Ayáa la i̱yi̱i̱ꞌ gidxóó dríga̱a̱ꞌ. Araꞌún, athane̱ i̱mba̱ ga̱jma̱á numuu a̱jma̱ skíñú gu̱wa̱ꞌ (50) daan mba̱ꞌwo̱. Nacha̱ gátha̱ne̱”. 7Nda̱wa̱á niraxu̱u̱ i̱mba̱a̱ꞌ xa̱bo̱: “Ikháánꞌ rá, wátha̱ gíꞌmááꞌ róꞌ”. A̱ꞌkhue̱n rí tsúꞌkhue̱n niriꞌña: “Mbá witsu skíñú (100) gúxta̱a̱ mba̱ꞌwo̱#16.7 Awan rí na̱giewan-muu ixí iña nákhí wajyúú mbiꞌyuu «koros», jamí nati ne̱ mbá 350 lítro̱ wáa mbámbá. ixí iña”. Xómáꞌ ikhaa̱ niꞌthúu̱n tsúꞌkhue̱n: “Ayáa la i̱yi̱i̱ꞌ gidxóó dríga̱a̱ꞌ, jamí athane̱ i̱mba̱ ga̱jma̱á numuu akho̱ skíñú (80) gúxta̱a̱ mba̱ꞌwo̱”.
8»Xómáꞌ xa̱bo̱ tsí phú gíꞌdoo ndiꞌyoo̱ rí phú wiphii yumbáá rí ma̱ꞌne rí ra̱máján, ga̱jma̱á numuu rí niꞌnii̱. Na̱tha̱nꞌlaꞌ rí xa̱bo̱ tsí ñajúún i̱ji̱in numbaa ríge̱ꞌ, i̱wa̱á máꞌ na̱ma̱ñúu̱ ikhii̱n rí ma̱mbáxúu̱n gajmíi̱ xa̱bo̱ tsí mbríguu̱n gajmíi̱ xó rí xa̱bo̱ tsí nambiꞌñúú eꞌne aguu Ana̱ꞌlóꞌ. 9Na̱tha̱nꞌlaꞌ mangaa rí ga̱jmalaꞌ mbá xúgíí rí guáꞌdáálaꞌ ná numbaa aꞌkhán ríge̱ꞌ rí ma̱guaꞌdiinlaꞌ iyanga̱jwa̱, kajngó ído̱ rí ma̱mbá ne̱, ma̱xtáa tsí ma̱grui̱guáanꞌlaꞌ ná guꞌwá rí ríga̱ jámuu ná mikhuíí.
10»Tsí najmuu mújúun rí lájwíin nijanáá, ma̱ma̱ñuu̱ máꞌ ma̱jmuu̱ rí mba̱a̱ mangaa. Tsí naꞌne-kúwa̱ꞌ inuu rí lájwíin nijanáá ma̱ña̱wu̱u̱n, ma̱ꞌne-kúwe̱e̱ꞌ máꞌ inuu rí mba̱a̱ mangaa. 11Ikhaa jngó, xí na̱nguá jmbáanꞌlaꞌ ga̱jma̱á rí ríga̱ mbégo ná numbaa aꞌkhán ríge̱ꞌ, tsáa gáxnálaꞌ rí ríga̱ jámuu xúꞌkhue̱n rá. 12Xí na̱nguá jmbáanꞌlaꞌ ga̱jma̱á rí drígo̱o̱ i̱mba̱a̱ꞌ xa̱bo̱, tsáa gáxnálaꞌ rí phú dríga̱ꞌlaꞌ xúꞌkhue̱n rá.
13»Nimbáa yumbáá ma̱xáxóo ma̱ꞌne ñajúún a̱jmi̱i ña̱ꞌñii. Numuu rí ma̱xáxóo̱ jaꞌyoo̱ mbáa jamí ma̱goo̱ jaꞌyoo̱ i̱mba̱a̱ꞌ, o ma̱ꞌne-mbánuu̱ rí nandoo mbáa jamí ma̱xáꞌne-mbánuu̱ rí nandoo i̱mba̱a̱ꞌ. Ma̱xáxóo mu̱ne̱laꞌ ñajuun Ana̱ꞌlóꞌ jamí mu̱ne̱laꞌ ñajuun mbúkha̱a̱».
14Mbá xúgíí ajngáa ríge̱ꞌ nu̱dxawíín xa̱bo̱ fariséo̱, jamí nu̱ndu̱ꞌwa̱jmaa̱ Jesús, numuu rí na̱ni̱gúu̱nꞌ ma̱guáꞌdáa̱ mi̱ndaꞌkho. 15Xómáꞌ Jesús niꞌthúu̱n: «Ikháanꞌlaꞌ nu̱ne̱ máján-mijnálaꞌ ná inúú xa̱bo̱, xómáꞌ Ana̱ꞌlóꞌ ndaꞌyoo xáne jaꞌnii a̱kia̱nꞌlaꞌ. Numuu rí Ana̱ꞌlóꞌ tsíni̱gu̱u̱ꞌ jaꞌyoo̱ rí gíꞌdoo guéño numuu iyáá xa̱bo̱ numbaa.
Ajngáa ga̱jma̱á numuu xtángoo
16»Rí xtángawoo Moisés jamí rí nitháán tsí ni̱rawíjnga̱a ajngóo Ana̱ꞌlóꞌ wajyúú, waꞌthán-raꞌa ne̱ asndo mbiꞌi rí ni̱ꞌkha̱ Juáán. Jamí asndo nákhí máꞌ mbiꞌi rúꞌkhue̱n nithán-raꞌa rí Ana̱ꞌlóꞌ ñajuun tsí naꞌthán-ñájúún xa̱bo̱, jamí mbá xúgíi̱n nuxna-mijnée̱ tsiakhe̱ rí ma̱nindxúu̱n xa̱bo̱ tsí nithán-ñájúún eꞌne Ana̱ꞌlóꞌ. 17I̱ndo̱ó máꞌ numuu rí i̱tha̱án máꞌ na̱nguá mingíjyúu rí ma̱ndáti̱ga̱ mikhu ga̱jma̱á numbaa, xó rí ma̱ndáti̱ga̱ rí gíꞌdoo numuu mbá tsinuu xtángoo.
Gisngáá ga̱jma̱á numuu rí nu̱ni̱ꞌñá-mijnáa xa̱bo̱
(Mt 19.1-12; Mc 10.1-12)
18»Jámba̱a̱ xa̱biya̱ tsí naniña̱a a̱ꞌgui̱i jamí ndayáa i̱mba̱a̱ꞌ a̱ꞌgo̱, naꞌnii̱ aꞌkhán ga̱jmáa̱ a̱ꞌgo̱ tsúꞌkhue̱n. Xúꞌkhue̱n máꞌ xa̱biya̱ tsí ndayáa a̱ꞌgo̱ tsí ninguanáa neꞌne a̱jmba̱a, naꞌnii̱ aꞌkhán rí nabóo̱ ga̱jmáa̱».
Lása̱ro̱ ga̱jma̱á xa̱bo̱ tsí phú gíꞌdoo
19Jesús niꞌthán xóó: «Nixtáa mbáa xa̱bo̱ tsí ni̱gi̱ꞌdoo guéñuu, tsí júwuun xtíin rí phú máján jamí phú mitsaan. Tsitsíí naꞌnii̱ ndxa̱a̱ mitsaan jamí naꞌkhui̱i̱ mbá xúgíí rí i̱tha̱án máján. 20Mangaa máꞌ nixtáa mbáa xa̱bo̱ ngínáa mbiꞌyuu Lása̱ro̱. Ikhaa tsúꞌkhue̱n mbá xa̱ꞌ jayu tima ska ná xuyuu, jamí na̱gi̱ꞌi̱i̱ ná rawuun xkrugoo xa̱bo̱ tsí gíꞌdoo guéñuu. 21Naꞌne a̱kuii̱n rí ma̱janáa̱ mi̱khui̱i̱ rí nafrigu ná nakueꞌtso-rámuu xa̱bo̱ tsí gíꞌdoo guéñuu, jamí i̱ndo̱ó máꞌ xu̱wánꞌ naguwá nuxtíí ska ná xuyuu̱.
22»Ni̱ga̱nú mbiꞌi rí nijáñuu xa̱bo̱ tsí ngínáa, jamí ni̱ka̱ jiꞌyáa̱ nene̱ ánje̱l rí ma̱xtáa̱ mújúu̱n ná níjñúu Abraám. A̱ꞌkhue̱n nijáñuu xa̱bo̱ tsí gíꞌdoo guéñuu mangaa, jamí waꞌdii̱. 23Awúun máꞌ rí xtáa̱ namínu̱u̱ꞌ ná iñá-wajíín, niraꞌée̱n ri̱jma̱á, jamí asndo tsíngua̱ꞌ ndiꞌyoo̱ Abraám, jamí Lása̱ro̱ xtáa̱ ná níjñúu̱. 24A̱ꞌkhue̱n nindxaꞌwée̱: “¡Tátéꞌ, Abraám, ga̱ñáwíin a̱kia̱anꞌ xtayoꞌ! Ataxúꞌmaa Lása̱ro̱ ma̱ꞌga gármu̱juun idxu̱u̱ a̱dée ñawúun, jamí ma̱ꞌkha̱ gáꞌne-maxaa̱ ra̱ju̱nꞌ. Numuu rí phú xtáá na̱mínu̱u̱ꞌ ná awúun agu ríge̱ꞌ”. 25Xómáꞌ Abraám niriꞌñuu̱: “A̱ꞌdéꞌ, ga̱rmáꞌáan a̱kia̱anꞌ rí ikháánꞌ niraꞌdáá máꞌ mbá xúgíí rí naꞌne a̱kia̱anꞌ nákhí niraxtaa ná numbaa, xómáꞌ Lása̱ro̱ phú mingíná nixtáa̱. Jamí xúge̱ꞌ rá, ikhaa̱ xtáa̱ ge̱jyoꞌ naꞌni̱i a̱kuii̱n, xómáꞌ ikháánꞌ xtaa natamíni̱í. 26Ra̱ꞌkhá máꞌ i̱ndo̱ó rúꞌkhue̱n, rí kri̱ga̱ mbá rí me̱jno̱ꞌ guéño na̱we̱je̱-ꞌthu̱u̱n ná xtaa ikháánꞌ jamí ná juwa ikháanꞌxo̱ꞌ. Kajngó tsí júwa̱ꞌ ge̱jyoꞌ ma̱xáxóo ma̱nújngúún a̱ꞌkhue̱n, ni máꞌ tsí júwa̱ꞌ a̱ꞌkhue̱n ma̱xáxóo ma̱nújngúún ge̱jyoꞌ”.
27»Xómáꞌ xa̱bo̱ tsí ni̱gi̱ꞌdoo guéñuu niꞌthán: “Na̱tha̱n-jáñaaꞌlo̱ꞌ, tátéꞌ Abraám, rí ma̱ta̱xu̱ꞌmáa Lása̱ro̱ ma̱ꞌga ná guꞌwóo tátéꞌ, 28ná gúꞌdiin witsuun dxíyo̱ꞌ, kajngó maꞌthúu̱n rí ma̱thanga̱a a̱kuíi̱n, ra̱ꞌkhá ma̱guwée̱ꞌ mangii̱n ná xtáá na̱mínu̱u̱ꞌ ge̱jyoꞌ”. 29Xómáꞌ Abraám niriꞌñuu̱: “Guáꞌdáa̱ máꞌ i̱yi̱i̱ꞌ rí niꞌtháán Moisés jamí rí nitháán tsí ni̱rawíjnga̱a ajngóo Ana̱ꞌlóꞌ wajyúú. ¡Ga̱nimbúu̱n rí nithan xa̱bo̱ tsúꞌkhue̱n!” 30Xómáꞌ xa̱bo̱ tsí ni̱gi̱ꞌdoo guéñuu niꞌthán: “Na̱nguá, tátéꞌ Abraám, ma̱xánimbúu̱n. I̱ndo̱ó máꞌ numuu rí, xí mbáa tsí nijáñuu máꞌ gáyáa mbiꞌyuu jamí ma̱thanga̱a maꞌthúu̱n, a̱ꞌkhue̱n rí ma̱thanga̱a a̱kuíi̱n ná inuu Ana̱ꞌlóꞌ”. 31Xómáꞌ Abraám niriꞌñuu̱: “Xí tsínimbúu̱n eꞌne i̱yi̱i̱ꞌ rí niꞌtháán Moisés jamí rí nitháán tsí ni̱rawíjnga̱a ajngóo Ana̱ꞌlóꞌ wajyúú, ma̱xánimbúu̱n máꞌ maske mbayáa mbiꞌyuu mbáa tsí nijáñuu kajngó maꞌthúu̱n”».
ទើបបានជ្រើសរើសហើយ៖
Lúka̱s 16: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
