Lúka̱s 17
17
Na̱gu̱ma-rájáanꞌlóꞌ rí mu̱ꞌne̱ aꞌkhán
(Mt 18.6-7,21-22; Mc 9.42)
1Jesús niꞌthúún tsí naꞌsngúún: «Tsitsíí ma̱ri̱gá rí ma̱ꞌne-rájíin xa̱bo̱ rí mune̱ aꞌkhán. I̱ndo̱ó máꞌ numuu rí ¡phú mingínáa xa̱bo̱ tsí naꞌne rí mune̱ aꞌkhán i̱ꞌwíin! 2I̱wa̱á máján rí ma̱xtuꞌwájma mbá itsí mba̱a̱ drígo̱o̱ tse̱no̱ ná aphuu xa̱bo̱ tsúꞌkhue̱n, jamí mi̱ꞌdaa̱ ná awúun iya a̱pha̱ ma̱xmáto̱ꞌo̱o̱, xó rí ma̱ꞌnii̱ rí ma̱ꞌne aꞌkhán mbáa tsí lájwíin ge̱jyoꞌ. 3Ikhaa jngó, ¡gu̱ña̱wa̱n-mijnálaꞌ! Xí mbáa dxájwaaꞌ naꞌne aꞌkhán ná inaaꞌ#17.3 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «ná inaaꞌ»., ataxpríguíi̱. Jamí xí nathanga̱a a̱kuii̱n, athane̱ mba̱a̱ a̱kia̱anꞌ xtayáa̱. 4Maske máꞌ mbá juwan nothon naꞌnii̱ aꞌkhán ná inaaꞌ rí mbá mbiꞌi, jamí xkuaꞌnii máꞌ mbá juwan nothon nathangaa̱ naꞌtháa̱nꞌ: “Athane̱ mba̱a̱ a̱kia̱anꞌ xtayoꞌ”, athane̱ mba̱a̱ a̱kia̱anꞌ xtayáa̱».
Rí ma̱ꞌnga̱ꞌlóꞌ mu̱ꞌne̱ xí nanimba̱ꞌlóꞌ juꞌyáá Jesús
5A̱ꞌkhue̱n tsí mi̱xuꞌmii nitháán Táta̱:
―Athane̱ rí ma̱nimba̱ꞌxo̱ꞌ i̱tha̱án xóó ju̱ya̱a̱ꞌ.
6A̱ꞌkhue̱n rí Táta̱ niꞌthúu̱n:
―Xí numuu rí wéje̱ a̱kia̱nꞌlaꞌ ju̱yo̱ꞌ, maske asndo mbá lájwíin xómá phú lájwíin tsígoo ya̱ꞌwo̱ mostása̱, ma̱goo mu̱tha̱ánlaꞌ ixe̱ rí wéje̱ ndaꞌya a̱ꞌkhue̱n: “Atrubu-mina̱ꞌ ge̱jyoꞌ jamí ayu gátha̱du-mina̱aꞌ ná awúun iya a̱pha̱”, jamí ixe̱ ma̱ꞌne-mbánuu rí mu̱xna̱-ñájwíínlaꞌ.
Rí gíꞌmaa ma̱ꞌne tsí yumbáá
7»Ga̱ju̱ma̱ꞌlaꞌ rí mbáa tsí ikháanꞌlaꞌ gíꞌdaa mbáa yumbáá tsí ni̱ka̱ gáxpíꞌthá mbaa o ni̱ka̱ gáña̱wu̱ún xu̱kú mbo̱ꞌ. Jamí ído̱ rí na̱ꞌkhaa̱ rá, á nu̱tháa̱nlaꞌ: “Anújnga̱aꞌ jamí araꞌún ma̱tseꞌtso” dxe̱ꞌ. 8Na̱nguá, tsítháa̱nlaꞌ xkuaꞌnii, rí xáꞌnii phú i̱tháa̱nlaꞌ: “Athane̱ májáanꞌ rí me̱ꞌkho-añuꞌ, jamí athane̱-mbánu-mina̱ꞌ kajngó ma̱ta̱stráma rí me̱ꞌkho jamí rí ma̱ga̱nꞌlo̱ꞌ. Asndo nda̱wa̱á jayu ma̱goo ma̱tseꞌtso jamí mi̱gi̱i̱n ikháánꞌ”. 9Á nu̱tha̱ánlaꞌ núma̱aꞌ la yumbáá ga̱jma̱á numuu rí neꞌne-mbánuu̱ rí ni̱tha̱nlaꞌ dxe̱ꞌ. Ikhúúnꞌ na̱ju̱mu̱ꞌ rí na̱nguá.#17.9 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Ikhúúnꞌ na̱ju̱mu̱ꞌ rí na̱nguá». 10Xkuaꞌnii máꞌ mangáanꞌlaꞌ, ído̱ rí wámba̱ꞌlaꞌ ne̱ne̱-mbáníílaꞌ mbá xúgíí rí waꞌxná-ñájwanlaꞌ, gíꞌmaa mu̱tha̱nlaꞌ: “Yumbáá tsí tsíjmii ñajwanxo̱ꞌ, numuu rí nda̱a̱ máꞌ i̱mba̱ rí ne̱ne̱xo̱ꞌ, rí i̱ndo̱ó máꞌ rí jaꞌyaxo̱ꞌ ne̱ne̱xo̱ꞌ”.
Jesús naꞌne-thanúú mbá gu̱wi̱inꞌ xa̱bo̱ tsí naꞌgajmuu xuñúú
11Awúun máꞌ rí jayá ikhoo Jesús na̱ka̱ ná Jerusalén, ni̱ka̱-ranújngoo̱ ná ndawaa numbaa Samária̱ ga̱jma̱á numbaa Galiléa̱. 12Ído̱ ni̱ga̱níi̱ mbá xuajen lájwíin, ikhín ni̱díwíin inuu̱ mbá gu̱wi̱inꞌ xa̱bo̱ tsí naꞌgajmuu xuñúú. Tsíngua̱ꞌ niwájwii̱n, 13jamí ni̱ndxa̱ꞌwe̱e̱:
―¡Jesús, Táta̱ naꞌsngáá, ga̱ñáwíin a̱kia̱anꞌ xtayaxo̱ꞌ!
14Ído̱ Jesús ndiꞌñúu̱, niꞌthúu̱n:
―Gaꞌgua gúxna̱xí-mijnálaꞌ ná inúú dxakuun.
Jamí awúun máꞌ rí nagóo̱, ni̱gata̱a nandii ná xuñúu̱. 15Mbáa xa̱bo̱ tsúꞌkhue̱n, ído̱ ndiꞌyoo̱ rí niꞌni̱i a̱kuii̱n, nithangaa̱ inuu Jesús jamí neꞌne-mba̱a̱ Ana̱ꞌlóꞌ ga̱jma̱á mbá xúgíí a̱ꞌwóo̱. 16Nismáti̱go̱o̱ inuu Jesús jamí asndo mbayíí niꞌgíi̱ inuu̱ rí naríguu̱ gamaku inuu. Ná numbaa Samária̱ i̱ꞌkha̱ xa̱bo̱ tsíge̱ꞌ. 17A̱ꞌkhue̱n niꞌthán Jesús: «Á ra̱ꞌkhá mbá gu̱wi̱inꞌ xa̱bo̱ tsí ni̱gata̱a nandii ná xuñúú dxe̱ꞌ. Náá nigóó tsí i̱mbá mijnagu̱wi̱inꞌ rá. 18Mbáwíi xa̱bo̱ tsíge̱ꞌ, tsí na̱ꞌkha̱ ná i̱mba̱ xuajen, nithanga̱a gáꞌne-mba̱a̱ Ana̱ꞌlóꞌ ráanꞌ». 19A̱ꞌkhue̱n Jesús niꞌthúun xa̱bo̱ tsúꞌkhue̱n: «Araxu̱unꞌ jamí ayu̱uꞌ. Niꞌni̱i a̱kia̱anꞌ numuu rí wéje̱ a̱kia̱anꞌ ná inuꞌ».
Ído̱ magíꞌdu̱u̱n maꞌthán-ñájun Ana̱ꞌlóꞌ
(Mt 24.23-28,36-41)
20Mbá miꞌtsú xa̱bo̱ fariséo̱ ni̱ra̱xi̱í Jesús:
―Nguáná gága̱nú mbiꞌi rí Ana̱ꞌlóꞌ maꞌthán-ñájúún xa̱bo̱ róꞌ.
Xómáꞌ ikhaa̱ niriꞌñúu̱:
―Nda̱a̱ nimbá rí masngájmalaꞌ rí ni̱ga̱nú mbiꞌi rí Ana̱ꞌlóꞌ naꞌthán-ñájúún xa̱bo̱. 21Jamí ndawa̱a̱ tsí gáꞌthán: “Ge̱jyoꞌ naꞌthán-ñájun Ana̱ꞌlóꞌ”, o “Ñúꞌún naꞌthán-ñájun Ana̱ꞌlóꞌ” mbo̱ꞌ. Numuu rí júwa̱ꞌ máꞌ ná majña̱ꞌlaꞌ xa̱bo̱ tsí nithán-ñájúún eꞌne Ana̱ꞌlóꞌ.
22A̱ꞌkhue̱n Jesús niꞌthúún tsí naꞌsngúún: «Ma̱ga̱nú mbiꞌi rí ma̱galaꞌ rí A̱dée Xa̱bo̱ Numbaa ma̱xtáa maske asndo mbóó mbiꞌi ga̱jma̱á nindxa̱ꞌlaꞌ, jamí mu̱xúyáa̱laꞌ. 23Ma̱ju̱wá xa̱bo̱ tsí muthanlaꞌ: “Ge̱jyoꞌ xtáa̱”, o “Ñúꞌún xtáa̱”. Mu̱xúꞌgualaꞌ ná nuthanlaꞌ, ni mu̱xúꞌgualaꞌ tsu̱du̱ún xa̱bo̱ tsúꞌkhue̱n. 24Numuu rí xómá eꞌne ído̱ rí naxpíbi, nambiꞌi-taꞌa mikhuíí jamí mbá xúgíí numbaa, xkuaꞌnii máꞌ gáꞌne mbiꞌi ído̱ rí ma̱ꞌkha̱a A̱dée Xa̱bo̱ Numbaa. 25I̱ndo̱ó máꞌ numuu rí ndaꞌyóo rí mamínu̱u̱ꞌ mi̱ndaꞌkho rí ginii, jamí rí ma̱xáxúún gúyáa̱ xa̱bo̱ tsí júwa̱ꞌ xúge̱ꞌ.
26»Xómá niríga̱ nákhí mbiꞌi rí nixtáa Noé, xkuaꞌnii máꞌ gáríga̱ mangaa ído̱ rí ma̱ꞌkha̱a A̱dée Xa̱bo̱ Numbaa. 27Nákhí mbiꞌi rí ñúꞌún, napeꞌtso jamí naꞌwa̱a̱n xa̱bo̱, nu̱ni̱ꞌgúún xa̱bekha jamí nu̱nújún go̱ꞌo̱, asndo ni̱ga̱nú mbiꞌi rí ni̱to̱ꞌo̱o̱ Noé ná awúun guꞌwá-rguwa. A̱ꞌkhue̱n nixnúu mi̱ndaꞌkho ruꞌwa jamí nijáñúú mbá xúgíin xa̱bo̱. 28Xkuaꞌnii máꞌ niríga̱ mangaa nákhí nixtáa Lót. Napeꞌtso jamí naꞌwa̱a̱n xa̱bo̱, nutsi̱i̱ jamí nu̱ngu̱jwe̱e̱, nudii̱ jamí nuni̱i̱ guꞌwá. 29I̱ndo̱ó máꞌ numuu rí ído̱ nigájnuu Lót ná xuajen Sodóma̱, a̱ꞌkhue̱n nifrigu itsí agu ná mikhuíí, rí nitsikhíin jamí ni̱gu̱díin mbá xúgíin xa̱bo̱ tsúꞌkhue̱n. 30Xkuaꞌnii máꞌ gáꞌne ído̱ rí masngájma-mina̱ꞌ A̱dée Xa̱bo̱ Numbaa.
31»Ído̱ gága̱nú mbiꞌi rúꞌkhue̱n, xa̱bo̱ tsí kra̱ꞌmáa ndayáa xu̱u̱ꞌ ná tsu̱du̱u̱ guꞌwóo, ma̱xáta̱ꞌaa̱ la magui̱i̱ drígo̱o̱ rí traꞌa̱ ná awúun guꞌwóo̱. Xúꞌkhue̱n máꞌ xa̱bo̱ tsí inu xtáa nañajun xanáá, ma̱xáꞌkha̱a mago̱ drígo̱o̱ rí ríga̱ ná guꞌwóo. 32Ga̱rmáꞌáan a̱kia̱nꞌlaꞌ rí nigíꞌnuu a̱ꞌgui̱i Lót. 33Jámba̱a̱ tsí nandoo gáꞌne-jríya̱a̱ꞌ mbiꞌyuu, ma̱ndáti̱go̱o̱ ne̱. Jamí jámba̱a̱ tsí nandáti̱go̱o̱ mbiꞌyuu, tsúꞌkhue̱n tsí ma̱jríya̱a̱ꞌ.
34»Na̱tha̱nꞌlaꞌ rí mbroꞌon rúꞌkhue̱n, ná jubúún a̱jmi̱i xa̱bo̱ inuu mbá xi̱yoo, mbáa tsí ma̱ꞌga jiꞌyáa, xómáꞌ tsí i̱mba̱a̱ꞌ ma̱nguanúu. 35Ná timii a̱jmi̱i go̱ꞌo̱ nuno̱, mbáa tsí ma̱ꞌga jiꞌyáa, xómáꞌ tsí i̱mba̱a̱ꞌ ma̱nguanúu. 36Ná gachúún a̱jmi̱i xa̱bo̱ nu̱ñajun xanáá, mbáa tsí ma̱ꞌga jiꞌyáa, jamí i̱mba̱a̱ꞌ tsí ma̱nguanúu».#17.36 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ kíxnuu 36.
37A̱ꞌkhue̱n tsí naꞌsngúún Jesús ni̱ra̱xíi̱:
―Táta̱, náá gáríga̱ rúꞌkhue̱n rá.
Xómáꞌ ikhaa̱ niriꞌñúu̱:
―Ná kua̱ꞌa̱a̱n tsí nijáñuu, ikhín máꞌ na̱gi̱mbúun dxáꞌan.
ទើបបានជ្រើសរើសហើយ៖
Lúka̱s 17: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
