Juáán 19
19
1A̱ꞌkhue̱n Piláto̱ nixnáxi̱i̱ Jesús jamí nixná-ñájwii̱n rí mi̱xpáthii̱n ga̱jma̱á ñuu xtá rí tráma ajwa̱nꞌ inuu. 2Wámba̱ rúꞌkhue̱n, xa̱bo̱ tsí ku̱ra̱tuun ajwa̱nꞌ nene̱-gámíi̱ tsuwan, jamí ni̱ríguii̱ ne̱ ná idxu̱u̱ Jesús, xúꞌkhue̱n máꞌ ni̱tsuaꞌaa̱n mbá xtíin rí maña̱ꞌ skuni. 3Ni̱xu̱ꞌma-mijnée̱ ná inuu Jesús, nuxnáa̱ inuu jamí nutháa̱n: «¡Álá thúngaa drígu̱ún xa̱bo̱ judío̱!».
4A̱ꞌkhue̱n nigájnuu mbu̱júu̱ Piláto̱ rixa̱á jamí niꞌthúu̱n xa̱bo̱: «Gu̱ya̱xíi̱laꞌ, na̱ríya̱a̱ꞌlo̱ꞌ mbu̱júꞌ rixa̱á kajngó mbu̱ya̱álaꞌ rí ikhúúnꞌ tsíxkamaa nimbá aꞌkhúu̱n». 5Ído̱ nigájnuu Jesús, rígu mbá gámíi tsuwan ná idxu̱u̱ jamí júwuu̱n xtíin rí maña̱ꞌ skuni. A̱ꞌkhue̱n niꞌthán Piláto̱: «¡Ra̱ꞌkháa xa̱bo̱ wéje̱ ge̱jyoꞌ!».
6Ído̱ rí dxakuun tsí gíꞌdoo numúú jamí tsí nu̱ña̱wa̱án guꞌwá dxákuun ndiyáa̱ Jesús, a̱ꞌkhue̱n ni̱gíꞌdíi̱n ni̱ndxa̱ꞌwe̱e̱: «¡Athadujmaa̱ ná ixe̱ krúsi̱! ¡Athadujmaa̱ ná ixe̱ krúsi̱!».
A̱ꞌkhue̱n niꞌthán Piláto̱:
―Aꞌgua ju̱ya̱a̱ máꞌ ikháanꞌlaꞌ jamí gu̱dujmaa̱laꞌ xúꞌkhue̱n róꞌ, numuu rí ikhúúnꞌ tsíxkamaa nimbá aꞌkhúu̱n.
7Xómáꞌ xa̱bo̱ ñajun judío̱ ni̱riꞌña:
―Ikháanꞌxo̱ꞌ guáꞌdáá mbá xtángoo, jamí xtángoo rúꞌkhue̱n naꞌthán rí xa̱bo̱ tsíge̱ꞌ gíꞌmaa rí ma̱ja̱ñúu̱, numuu niꞌthée̱n rí ikhaa̱ ñajuu̱n A̱dée Ana̱ꞌlóꞌ.
8Ído̱ nidxawuun Piláto̱ ríge̱ꞌ, i̱tha̱án nimíñuu̱. 9A̱ꞌkhue̱n ni̱ta̱ꞌaa̱ mbu̱júu̱ ná awúun guꞌwá mba̱a̱, jamí niraxu̱u̱ Jesús:
―Náá xa̱bo̱ ñajwaanꞌ ikháánꞌ róꞌ.
Xómáꞌ Jesús táriꞌñuu̱ nitháan.
10A̱ꞌkhue̱n Piláto̱ niraxu̱u̱ Jesús:
―Á ma̱xátriꞌñuꞌ dxe̱ꞌ. Á tsíthayáá rí ikhúúnꞌ gúꞌdo̱ꞌ tsiakhe̱ rí ma̱xna̱-ñájun rí mi̱ꞌdujmáá ná ixe̱ krúsi̱ rá dxe̱ꞌ. Xúꞌkhue̱n máꞌ gúꞌdo̱ꞌ tsiakhe̱ rí ma̱ne̱-jríñáaꞌ mangaa.
11Xómáꞌ Jesús niriꞌñuu Piláto̱:
―Ra̱xtáꞌdáá nitháan tsiakhe̱ rí ma̱tha̱ne̱ ga̱jma̱á numuꞌ, xí ra̱ꞌkhá Ana̱ꞌlóꞌ nixnáaꞌ ne̱. Ikhaa jngó tsí nixnáxu̱ún ná ñawáanꞌ, i̱tha̱án máꞌ mba̱a̱ aꞌkhán nixuda-mine̱e̱ꞌ xó rí ikháánꞌ.
12Asndo nákhí máꞌ mbrúma rúꞌkhue̱n, Piláto̱ ndiꞌyée̱ xáne gáꞌnii̱ rí ma̱ꞌne-jríya̱a̱ꞌ Jesús, xómáꞌ xa̱bo̱ judío̱ ni̱ndxa̱ꞌwa̱ ná inuu̱: «Xí ikháánꞌ nathane̱-jríya̱a̱ꞌ xa̱bo̱ tsúꞌkhue̱n, ra̱ꞌkhá iyanga̱jwe̱e thúngaa Sésa̱r ñajwaanꞌ. Jámba̱a̱ tsí nandoo gánindxu̱u̱ thúngaa, naꞌne-mine̱e̱ꞌ xa̱bo̱ sia̱nꞌ ná inuu Sésa̱r».
13Ído̱ nidxawuun Piláto̱ ríge̱ꞌ, nixná-ñájwii̱n rí ma̱ga̱jnáa Jesús ná awúun guꞌwá mba̱a̱, jamí ni̱ke̱e̱ gági̱ꞌi̱i̱ ná xílii̱ kajngó maxudaa̱ awan. Ná ajngáa ebréo̱ Gabatá mbiꞌyuu ná ꞌgí xíle̱, jamí ajngáa rúꞌkhue̱n nandoo gáꞌthán «Ná nibóo itsí paska». 14I̱mbo̱ó mbiꞌi iꞌyóo rí ma̱gu̱ma-ri̱ya̱aꞌ ndxa̱a̱ Páskua̱, jamí naꞌne xó mbá wakha̱ꞌ niníí wáa. A̱ꞌkhue̱n Piláto̱ niꞌthúún xa̱bo̱ judío̱: «¡Ge̱jyoꞌ xtáa̱ thúngaa dríga̱ꞌlaꞌ!».
15Xómáꞌ xa̱bo̱ judío̱ ni̱riꞌña: «¡Ayu ꞌcháa̱ janíí! ¡Ayu ꞌcháa̱ janíí! ¡Athadujmaa̱ ná ixe̱ krúsi̱!».
A̱ꞌkhue̱n Piláto̱ niraxúu̱n:
―Gakon rí nandalaꞌ rí ma̱dujmaa ná ixe̱ krúsi̱ thúngaa dríga̱ꞌlaꞌ ráanꞌ.
Xómáꞌ dxakuun tsí gíꞌdoo numúú ni̱riꞌña:
―Na̱nguá guáꞌdaa ikháanꞌxo̱ꞌ i̱mba̱a̱ꞌ thúngaa, rí i̱ndo̱ó máꞌ Sésa̱r.
16A̱ꞌkhue̱n Piláto̱ nixnáxi̱i̱ Jesús ná ñawúu̱n kajngó mi̱ꞌdujmaa ná ixe̱ krúsi̱ ma̱ja̱ñúu, jamí xa̱bo̱ tsí ku̱ra̱tuun ajwa̱nꞌ nigóo̱ juya̱a̱.
Waꞌdujmaa Jesús ná ixe̱ krúsi̱ ma̱ja̱ñúu
(Mt 27.32-44; Mc 15.21-32; Lc 23.26-43)
17Ikhín nigájnuu Jesús, jagui̱i̱ ixe̱ krúsi̱ ni̱ke̱e̱ ná xndúu rí mbiꞌyuu «Itso̱ Idxu̱u̱ Xa̱bo̱». Gólgo̱ta̱ mbiꞌyuu xndúu rúꞌkhue̱n rí ajngáa ebréo̱. 18Ikhín nidujmaa̱ Jesús ná ixe̱ krúsi̱. Xúꞌkhue̱n máꞌ nidujmii̱ ná ixe̱ krúsi̱ i̱jmi̱i xa̱bo̱ mangaa, mbá ixe̱ krúsi̱ wéje̱ mbámbá mbíꞌthá ná níjñúu Jesús jamí krúsii̱ ikhaa̱ wéje̱ ná tikhuíí.
19Jamí niꞌtháán Piláto̱ ajngáa ríge̱ꞌ ná inuu mbá ixe̱ wapa: «JESÚS TSÍ NA̱ꞋKHA̱ NÁ NASARÉT, THÚNGAA DRÍGU̱ÚN XA̱BO̱ JUDÍO̱», jamí nixná-ñájwii̱n rí ma̱gi̱ꞌma ne̱ ná idxu̱u̱ ixe̱ krúsi̱ rí brákamaa Jesús. 20Maphú mbaꞌiin xa̱bo̱ judío̱ ni̱raxnuu ajngáa rúꞌkhue̱n, numuu rí mijngi ꞌgí xuajen ná waꞌdujmaa Jesús. Atsú inii ajngáa rí nuthan xa̱bo̱ waꞌtháán ajngáa rúꞌkhue̱n: ebréo̱, latíín jamí griégo̱. 21A̱ꞌkhue̱n dxakuun tsí gíꞌdoo numúú tsí drígu̱ún xa̱bo̱ judío̱ nitháa̱n Piláto̱:
―Ma̱xára̱tháán: “Thúngaa drígu̱ún xa̱bo̱ judío̱”, rí aratháán: “Tsíge̱ꞌ niꞌthán: ‘Thúngaa drígu̱ún xa̱bo̱ judío̱ ñajunꞌ’”.
22Xómáꞌ Piláto̱ niriꞌñúu̱:
―Rí ni̱tháán, ni̱tháán máꞌ.
23Ído̱ wámbu̱ún xa̱bo̱ tsí ku̱ra̱tuun ajwa̱nꞌ nidujmaa Jesús ná ixe̱ krúsi̱, a̱ꞌkhue̱n ni̱xpi̱ꞌtha̱a̱ akho̱ kothon xtíñuu̱, kajngó mbámbá ne̱ mbayá mbámbáa gúni̱i̱. Xúꞌkhue̱n máꞌ ni̱ra̱tuu̱n xtíñuu Jesús rí najúwuun awúún mangaa, rí mbijwa̱ꞌ jamí ma̱jña̱ꞌ, rí na̱nguá kixmí mbá jayu. 24A̱ꞌkhue̱n xa̱bo̱ tsí ku̱ra̱tuun ajwa̱nꞌ nithan-mijná: «Mu̱xúro̱thon makalóꞌ ne̱, rí gu̱ꞌtsínlóꞌ kajngó mbu̱ꞌyáálóꞌ tsáa mbiꞌyuu mbayá ne̱». Ikhaa ríge̱ꞌ niríga̱ kajngó ma̱mba̱núu rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:
«Ni̱xpi̱ꞌtha̱-mijnée̱ ikhii̱n xtíñuꞌ,
jamí nitsíi̱n kajngó mbuyáa̱ tsáa mbiꞌyuu mbayá xtíñuꞌ».#19.24 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 22.18.
Jamí xkuaꞌnii nene̱ xa̱bo̱ tsí ku̱ra̱tuun ajwa̱nꞌ.
25Ná mijngi wéje̱ ixe̱ krúsi̱ rí waꞌdujmaa Jesús, ikhín wéje̱ nánée̱, jamí dxuéꞌgúu nánée̱. Ikhín máꞌ wéje̱ María̱ a̱ꞌgui̱i Kléofa̱s, jamí María̱ tsí na̱ꞌkha̱ ná Magdála̱ mangaa. 26Ído̱ ndiꞌyoo Jesús rí wéje̱ nánée̱ ná níjñúu mbáa tsí waꞌsngáá, ikhaa tsí phú nandoo̱ jaꞌyoo̱, a̱ꞌkhue̱n niꞌthúu̱n nánée̱: «Nána̱, a̱ꞌkhue̱n xtáa a̱ꞌdiáaꞌ».
27Wámba̱ rúꞌkhue̱n, Jesús niꞌthúun tsí waꞌsngáá: «A̱ꞌkhue̱n xtáa nániáaꞌ». Jamí asndo nákhí máꞌ mbiꞌi rúꞌkhue̱n, tsí waꞌsngáá ni̱grui̱guíi̱ María̱ ná guꞌwóo̱.
Nijáñuu Jesús
(Mt 27.45-56; Mc 15.33-41; Lc 23.44-49)
28Nda̱wa̱á a̱ꞌkhue̱n, ndaꞌyoo Jesús rí wámbo̱o̱ máꞌ neꞌne-gáxu̱u̱ mbá xúgíí, a̱ꞌkhue̱n niꞌthée̱n: «Najándawoꞌ», kajngó ma̱mba̱núu i̱yi̱i̱ꞌ ajngóo Ana̱ꞌlóꞌ.
29Ikhín máꞌ wéje̱ mbá daan gajno̱ꞌ iyoo úba̱ rí miga̱ꞌ. A̱ꞌkhue̱n ni̱rma̱jee̱n mbá xtíin me̱do̱ ga̱jma̱á iyoo úba̱ rí miga̱ꞌ, ni̱ru̱ꞌwáa̱ ne̱ ná inuu mbá ixe̱ mba̱ꞌ jamí ni̱xu̱ꞌmee̱ ne̱ ná rawuun Jesús. 30Ído̱ niꞌxúu Jesús iyoo úba̱ rí miga̱ꞌ, a̱ꞌkhue̱n niꞌthée̱n: «Mbá xúgíí máꞌ nimbánuu rá». Wámba̱ rúꞌkhue̱n, nidrákee̱ idxu̱u̱ jamí niniña-mine̱e̱ꞌ rí ma̱ꞌga xu̱u̱ꞌ.
Waꞌtsi̱ra̱ꞌáá ajwa̱nꞌ júdú inuu ná níjñúu Jesús
31Mbiꞌi biérne̱s ñajuun mbiꞌi rúꞌkhue̱n, i̱mbá gátsíí gáꞌne ndxa̱a̱ Páskua̱. Tsí xa̱bo̱ ñajun judío̱ tsíñúu̱ rí ma̱jngrígúmii xa̱bo̱ ná ixe̱ krúsi̱ awúun mbiꞌi rí nduyaa̱ xúu̱nꞌ, numuu rí mbiꞌi rí phú tsúꞌkhaa ñajuun mbiꞌi rúꞌkhue̱n. Ikhaa jngó ni̱nda̱ꞌáa̱ Piláto̱ rí maxná-ñájun rí ma̱miga nakhúún tsí waꞌdujmii ná ixe̱ krúsi̱, kajngó ma̱ja̱ñúu̱ nacha̱ jamí ma̱goo ma̱gata̱a xuñúu̱. 32A̱ꞌkhue̱n nigóó xa̱bo̱ tsí ku̱ra̱tuun ajwa̱nꞌ jamí ni̱xpi̱ge̱e̱ꞌ nakhúu mbáa tsí waꞌdujmaa ná níjñúu Jesús. Xúꞌkhue̱n máꞌ niñíi̱ i̱mba̱a̱ꞌ tsí waꞌdujmaa ná i̱mba̱ níjñúu̱. 33Jamí ído̱ ni̱xu̱ꞌma-mijnée̱ ná waꞌdujmaa Jesús, ndiyáa̱ rí nijáñuu̱ máꞌ, ikhaa jngó túxpi̱ge̱e̱ꞌ máꞌ nimbá nakhúu̱. 34Maske máꞌ xúꞌkhue̱n ndiyáa̱, mbáa xa̱bo̱ tsí kuatuun ajwa̱nꞌ nitsroꞌo̱o̱ ajwa̱nꞌ júdú inuu ná níjñúu Jesús, jamí mbá nacha̱ nitsowoo iꞌdi ga̱jma̱á iya ikhín. 35Tsí naꞌthán ríge̱ꞌ, ikhaa̱ ñajuu̱n tsí ndiꞌyoo̱, jamí gakon rí naꞌthée̱n. Ikhaa̱ ndaꞌyoo̱ rí gakon rí naꞌthée̱n, kajngó ma̱nimba̱ꞌlaꞌ mangáanꞌlaꞌ. 36Ikhaa ríge̱ꞌ niríga̱ kajngó ma̱mba̱núu i̱yi̱i̱ꞌ ajngóo Ana̱ꞌlóꞌ: «Ma̱xámiga nimbá itsu̱u̱».#19.36 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 34.20. 37Jamí mangaa máꞌ i̱mba̱ i̱yi̱i̱ꞌ ajngóo Ana̱ꞌlóꞌ naꞌthán: «Mu̱ya̱xíi̱ tsí waꞌtsi̱ra̱ꞌa̱á níjñúu».#19.37 Ajngáa ríge̱ꞌ na̱ꞌkha̱ ná I̱yu̱u̱ꞌ Sakaría̱s 12.10.
Waꞌdi̱i Jesús
(Mt 27.57-61; Mc 15.42-47; Lc 23.50-56)
38Nda̱wa̱á a̱ꞌkhue̱n, mbáa táta̱ tsí mbiꞌyuu José, tsí na̱ꞌkha̱ ná xuajen Arimatéa̱, ni̱ndo̱ꞌo̱o̱ Piláto̱ rí maxná ajngóo kajngó marígúu̱ xuyuu Jesús. José ninindxu̱u̱ mbáa tsí waꞌsngáá neꞌne Jesús, i̱ndo̱ó máꞌ numuu rí ra̱ꞌkhá ná pa̱jnu numuu rí namíñuu̱ ene̱ xa̱bo̱ ñajun judío̱. Piláto̱ nixná ajngóo rí marígúu̱ xuyuu Jesús, ikhaa jngó José nirígúu ne̱. 39Ni̱ꞌkha̱ Nikodémo̱ mangaa, tsí mbá mbroꞌon ni̱ꞌkha̱ gándxákuun ga̱jma̱á Jesús. Ikhaa̱ ni̱ꞌkha̱ jayóo̱ mbá thana ndaa thawuun rí ni̱gu̱ma ga̱jma̱á wájya rí mbiꞌyuu míra̱ jamí iná rí mbiꞌyuu álo̱e̱. Naꞌne máꞌ xí mbá skíñú gu̱wa̱ꞌ (30) kílo̱ wáa rúꞌkhue̱n jagui̱i̱ ni̱ꞌkhe̱e̱. 40A̱ꞌkhue̱n Nikodémo̱ ga̱jma̱á José, nigóo̱ juñúu̱ xuyuu Jesús jamí ni̱mbráꞌáa̱ ne̱ ga̱jma̱á xtíin wapa. Awúun máꞌ rí nagóo̱-ra̱mbráꞌáa̱ xtíin, nigóo̱-ra̱xta̱jmáa̱ thana ndaa thawuun rí ni̱ꞌkha̱ jagu̱u̱ Nikodémo̱, xómá nune̱ jañúú xa̱bo̱ judío̱ rí mudu̱un tsí nijáñúú. 41Ná waꞌdujmaa Jesús ixe̱ krúsi̱, ikhín kri̱ga̱ mbá xaxtii ixe̱ rí naxná xndúu. Ná awúun xaxtii ixe̱ rúꞌkhue̱n waꞌndi-raꞌáá mbá iñá-wajen nuxe̱ꞌ ná xóó táwaꞌdi̱i nimbáa xa̱bo̱. 42Ikhín ni̱xu̱da̱a̱ꞌ xuyuu Jesús, numuu rí mijngi kri̱ga̱ iñá-wajen rúꞌkhue̱n ná nijáñuu̱, jamí phú inu máꞌ ma̱gi̱ꞌdu̱u̱n mbiꞌi rí nduya̱a xu̱únꞌ xa̱bo̱ judío̱ mangaa.
ទើបបានជ្រើសរើសហើយ៖
Juáán 19: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
