Juáán 18
18
Nikhuáa Jesús
(Mt 26.47-56; Mc 14.43-50; Lc 22.47-53)
1Ído̱ wámbo̱o̱ Jesús niꞌthán-jáñuu Ana̱ꞌlóꞌ, a̱ꞌkhue̱n nigájnuu̱ ni̱ke̱e̱ gajmíi̱ tsí naꞌsngúu̱n ná i̱mba̱ kri̱doo matha lájwíin rí mbiꞌyuu Sedrón. Ikhín ni̱to̱ꞌo̱o̱ awúun mbá xaxtii ixe̱ gajmíi̱ tsí naꞌsngúu̱n. 2Jamí Júda̱s, tsí niꞌgí-mina̱ꞌ máꞌ rí maxnáxi̱i̱ Jesús, naꞌne-nuwii̱n máꞌ mangaa̱ mbaa xaxtii ixe̱ rúꞌkhue̱n, numuu rí phú mbaꞌa miꞌtsú máꞌ ni̱ru̱wa-mina̱aꞌ Jesús ikhín gajmíi̱ tsí naꞌsngúu̱n. 3Ikhaa jngó ni̱ga̱nú Júda̱s ikhín, jayée̱ ikhúún mbá kuthuun xa̱bo̱ tsí ku̱ra̱tuun ajwa̱nꞌ, jamí xa̱bo̱ tsí nu̱ña̱wa̱án guꞌwá dxákuun, tsí waxúꞌmii nene̱ dxakuun tsí gíꞌdoo numúú jamí xa̱bo̱ fariséo̱. Judee̱ ajwa̱nꞌ jamí traꞌa̱ agu ñawúu̱n nigóo̱.
4Xómáꞌ Jesús ndaꞌyoo̱ máꞌ xúgíí rí ma̱gíꞌnuu̱, ikhaa jngó nixuꞌma-mine̱e̱ꞌ ginii̱ niraxúu̱n:
―Tsáa i̱ꞌyáalaꞌ róꞌ.
5Jamí ikhii̱n ni̱riꞌñee̱:
―Jesús tsí na̱ꞌkha̱ ná Nasarét.
A̱ꞌkhue̱n Jesús niꞌthúu̱n:
―Ikhúúnꞌ ñajunꞌ.
Xómáꞌ Júda̱s, ikhaa tsí naxnáxi̱i̱ Jesús, wéje̱ ga̱jma̱á nindxúu̱n. 6Ído̱ Jesús niꞌthúún xa̱bo̱: «Ikhúúnꞌ ñajunꞌ», a̱ꞌkhue̱n nigóo̱ skidi jamí ningáxii̱n mbayíí.
7A̱ꞌkhue̱n Jesús niraxúu̱n mbu̱júꞌ:
―Tsáa i̱ꞌyáalaꞌ, ta̱ꞌún.
Xómáꞌ ikhii̱n nithee̱n mbu̱júu̱n:
―Jesús tsí na̱ꞌkha̱ ná Nasarét.
8A̱ꞌkhue̱n Jesús niriꞌñúu̱ mbu̱júꞌ:
―Ni̱tha̱nꞌlaꞌ máꞌ rí ikhúúnꞌ ñajunꞌ. Xí ikhúúnꞌ i̱ꞌñúúlaꞌ, gu̱ni̱ꞌñúúlaꞌ tsíge̱ꞌ magóó.
9Ríge̱ꞌ niꞌthán Jesús kajngó ma̱mba̱núu rí jmína̱a̱ꞌ máꞌ niꞌthée̱n nákhí wapha: «Táne̱-mbáti̱ga̱a̱lo̱ꞌ nimbáa tsí niraxníꞌ».
10A̱ꞌkhue̱n Simón Pédro̱ niríye̱e̱ꞌ chíde̱ rí jayée̱, ni̱ro̱thon-ríguíi̱ ñaꞌwun mújúun yumbée tsí jayá idxu̱ún dxakuun. Málko̱ mbiꞌyuu yumbáá tsí neꞌne-jámbi̱yu̱u̱ꞌ. 11Xómáꞌ Jesús niꞌthúu̱n Pédro̱: «Atiáxi̱i chídia̱aꞌ ná awúun xtóo. Xí Tátéꞌ nandoo rí ma̱mínu̱u̱ꞌ, xtáá na̱ma̱ñuꞌ rí ma̱mínu̱u̱ꞌlo̱ꞌ».
Ni̱ka̱-jiꞌyáa Jesús ná inuu Anás
(Mt 26.57-58; Mc 14.53-54; Lc 22.54)
12A̱ꞌkhue̱n nikhuáa Jesús jamí nixtoꞌóo̱ nene̱ xa̱bo̱ tsí ku̱ra̱tuun ajwa̱nꞌ, gajmíi̱ xa̱bo̱ ede̱ drígúu̱n, jamí tsí nu̱ña̱wa̱án guꞌwá dxákuun tsí waxúꞌmii nene̱ xa̱bo̱ ñajun judío̱. 13A̱ꞌkhue̱n nigóo̱ juya̱a̱ ginii jayu ná inuu Anás, numuu rí ikhaa̱ ñajuun jmégui̱i Kaifás, jamí Kaifás ñajuun tsí jayá idxu̱ún dxakuun tsigu rúꞌkhue̱n. 14Kaifás ñajuun tsí wapha máꞌ niꞌthúún xa̱bo̱ ñajun judío̱ rí i̱tha̱án máꞌ máján rí mbáwíi xa̱bo̱ gája̱ñúu ga̱jma̱á numúú mbá xúgíin xa̱bo̱ xuajen.
Pédro̱ naꞌthán rí tsíꞌne-nuwiin Jesús
(Mt 26.69-70; Mc 14.66-68; Lc 22.55-57)
15Xómáꞌ Simón Pédro̱ ga̱jmáa̱ i̱mba̱a̱ꞌ tsí waꞌsngáá, jngrígúu̱n nigóo̱ tsu̱du̱u̱ Jesús. Tsí i̱mba̱a̱ꞌ waꞌsngáá, na̱gu̱ma-nuwii̱n eꞌne tsí jayá idxu̱ún dxakuun, ikhaa jngó ndiyoo ni̱to̱ꞌo̱o̱ ga̱jmáa̱ Jesús ná rixo̱o̱ tsí jayá idxu̱ún dxakuun. 16Xómáꞌ Pédro̱ ninguanúu̱ rixa̱á, ná mijngi wéje̱ xkrugua. A̱ꞌkhue̱n nigájna̱a tsí waꞌsngáá, tsí na̱gu̱ma-nuwiin eꞌne tsí jayá idxu̱ún dxakuun, jamí niꞌthúu̱n dxáꞌgú tsí na̱ña̱wu̱u̱n xkrugua rí maniñuu̱ Pédro̱ ma̱to̱ꞌo̱o̱ awúún.
17A̱ꞌkhue̱n rí dxáꞌgú tsí na̱ña̱wu̱u̱n xkrugua niraxu̱u̱ Pédro̱:
―Á ra̱ꞌkhá ikháánꞌ mangáánꞌ ñajwaanꞌ mbáa tsí nisngáá eꞌne xa̱bo̱ tsúꞌkhue̱n dxe̱ꞌ.
A̱ꞌkhue̱n niriꞌña Pédro̱:
―Na̱nguá, ra̱ꞌkhá ikhúúnꞌ ñajunꞌlo̱ꞌ.
18Xómáꞌ yumbáá jamí tsí nu̱ña̱wa̱án guꞌwá dxákuun, mbá nawa̱a̱ wájwii̱n nu̱tsiga-mijnáa̱ ná nakha agu rí ni̱ꞌgíi̱, numuu rí mingúwán. Xúꞌkhue̱n máꞌ Pédro̱ mangaa, wíji̱i̱ natsiga-minaa̱ꞌ gajmíi̱.
Tsí jayá idxu̱ún dxakuun naraxu̱u̱ Jesús
(Mt 26.59-66; Mc 14.55-64; Lc 22.66-71)
19Awúun máꞌ rúꞌkhue̱n, tsí jayá idxu̱ún dxakuun niraxu̱u̱ Jesús ga̱jma̱á numúú xa̱bo̱ tsí naꞌsngúu̱n, jamí ga̱jma̱á numuu rí naꞌsngáa̱. 20A̱ꞌkhue̱n niriꞌña Jesús: «Ikhúúnꞌ ni̱tha̱nlo̱ꞌ a̱pha̱ ná inúú xa̱bo̱. Jámba̱ miꞌtsú ni̱sngáálo̱ꞌ ná awúun mbámbá guꞌwá rí na̱gi̱mbáanꞌlóꞌ jamí ná awúun guꞌwá dxákuun, ná na̱gi̱mbíin mbá xúgíin xa̱bo̱ judío̱. Jamí nimbá rí tátha̱nlo̱ꞌ ná ngu̱ꞌwa̱. 21Náá numuu kajngó natraxu̱ꞌ ikhúúnꞌ róꞌ. Atraxu̱ún xa̱bo̱ tsí ni̱dxawíín rí ni̱tha̱nlo̱ꞌ, dí ni̱thúu̱nlo̱ꞌ. Ikhii̱n nduyáa̱ rí ni̱tha̱nlo̱ꞌ».
22Ído̱ niꞌthán Jesús ríge̱ꞌ, a̱ꞌkhue̱n mbáa tsí na̱ña̱wu̱u̱n guꞌwá dxákuun nixpáthun inuu̱ jamí niꞌthúu̱n:
―Á xkuaꞌnii gíꞌmaa rí ma̱triꞌñáá tsí jayá idxu̱ún dxakuun dxe̱ꞌ.
23Xómáꞌ Jesús niriꞌñuu̱:
―Xí ra̱máján ni̱tha̱nlo̱ꞌ, arathán náá gída̱ꞌ rí ra̱máján ni̱tha̱nlo̱ꞌ. Jamí xí máján ni̱riꞌñalo̱ꞌ, náá numuu kajngó naraxnúꞌ xúꞌkhue̱n rá.
24A̱ꞌkhue̱n rí Anás nixuꞌmaa Jesús ma̱ꞌga ná inuu Kaifás, tsí jayá idxu̱ún dxakuun. Jaꞌnii máꞌ xóó xtoꞌwóo Jesús nixuꞌmaa̱.
Naꞌthán mbu̱júu Pédro̱ rí tsíꞌne-nuwiin Jesús
(Mt 26.71-75; Mc 14.69-72; Lc 22.58-62)
25Awúun máꞌ rí xóó wéje̱ Pédro̱ natsiga-mina̱aꞌ, a̱ꞌkhue̱n watraxíi̱ nene̱ xa̱bo̱:
―Á ra̱ꞌkhá ikháánꞌ mangáánꞌ ñajwaanꞌ mbáa tsí nisngáá eꞌne xa̱bo̱ tsúꞌkhue̱n dxe̱ꞌ.
A̱ꞌkhue̱n niꞌthán mbu̱júu Pédro̱:
―Na̱nguá, ra̱ꞌkhá ikhúúnꞌ ñajunꞌlo̱ꞌ.
26Ikhín máꞌ wéje̱ mbáa tsí nayumbáá ná inuu tsí jayá idxu̱ún dxakuun, jamí ikhaa̱ mijngi jaꞌyoo̱ xa̱bo̱ tsí nithon-rígú ñaꞌwuun neꞌne Pédro̱. A̱ꞌkhue̱n waꞌtháán Pédro̱ neꞌne yumbáá tsúꞌkhue̱n: «Á ra̱ꞌkhá ikháánꞌ ndi̱ya̱a̱ꞌlo̱ꞌ jáma̱ ná mbaa xaxtii ixe̱ ga̱jma̱a̱ꞌ xa̱bo̱ tsúꞌkhue̱n dxe̱ꞌ». 27Xómáꞌ Pédro̱ niꞌthán mbu̱júu̱ rí ra̱gákon. Inu wámbo̱o̱ niꞌthée̱n ríge̱ꞌ, a̱ꞌkhue̱n nindxaꞌwá mba̱xtá.
Na̱ka̱ jiꞌyáa Jesús ná inuu Piláto̱
(Mt 27.1-2,11-14; Mc 15.1-5; Lc 23.1-5)
28Ído̱ na̱ꞌkha̱ ra̱mbiꞌi máꞌ numbaa, nigájnúu̱ gajmíi̱ Jesús ná guꞌwóo Kaifás, nigóo̱ juya̱a̱ ná guꞌwá mba̱a̱ drígo̱o̱ xa̱bo̱ ñajun tsí na̱ꞌkha̱ ná Róma̱. Tsí xa̱bo̱ judío̱ tátu̱ꞌwúu̱n ná guꞌwá mba̱a̱, ra̱ꞌkhá ma̱ꞌne miꞌsmbii̱n xómá iꞌthán xtángoo drígúu̱n, jamí ma̱xáxóo mu̱peꞌtso-añúu̱ rí mune̱-ri̱yaa̱ꞌ ndxa̱a̱ Páskua̱ gáꞌne. 29Ikhaa jngó nigájnuu xa̱bo̱ ñajun Piláto̱ rixa̱á gáꞌñúu̱ jamí niraxúu̱n:
―Náá rí neꞌne xa̱bo̱ tsíge̱ꞌ róꞌ.
30A̱ꞌkhue̱n ikhii̱n ni̱riꞌñáa̱ Piláto̱:
―Xí ra̱ꞌkhá xa̱bo̱ tsí phú mba̱a̱ rí xkawe̱ꞌ neꞌne ñajuu̱n, ma̱xáguwa ju̱ya̱a̱xo̱ꞌ máꞌ ná inaaꞌ.
31Xómáꞌ Piláto̱ niriꞌñúu̱:
―Aꞌgua ju̱ya̱a̱ máꞌ ikháanꞌlaꞌ jamí gu̱ne̱-mbáníílaꞌ ga̱jma̱á numuu̱ xómá naꞌthán xtángoo dríga̱ꞌlaꞌ.
A̱ꞌkhue̱n rí xa̱bo̱ ñajun judío̱ nithan:
―Ikháanꞌxo̱ꞌ na̱nguá guáꞌdááxo̱ꞌ tsiakhe̱ rí mu̱xíya̱a̱xo̱ꞌ nimbáa xa̱bo̱.
32Ríge̱ꞌ nithee̱n kajngó ma̱mba̱núu ajngáa rí niꞌthán Jesús, nákhí niꞌnii̱ rí ma̱fruꞌu̱ún xa̱bo̱ xáne wéje̱ rí ma̱ja̱ñúu̱.
33A̱ꞌkhue̱n ni̱ta̱ꞌa̱a mbu̱júu Piláto̱ ná guꞌwóo̱ rí mba̱a̱. Nindxaꞌwóo̱ Jesús jamí niraxu̱u̱:
―Ikháánꞌ ñajwaanꞌ thúngaa drígu̱ún xa̱bo̱ judío̱ ráanꞌ.
34Xómáꞌ Jesús niriꞌñuu Piláto̱:
―Natraxe̱ ríge̱ꞌ numuu rí xkuaꞌnii na̱ju̱ma̱a̱ꞌ ráanꞌ o numuu rí xkuaꞌnii nithaanꞌ i̱ꞌwíin xa̱bo̱ ga̱jma̱á numuꞌ dxe̱ꞌ.
35A̱ꞌkhue̱n niriꞌña Piláto̱:
―Ra̱ꞌkhá ikhúúnꞌ ñajunꞌ xa̱bo̱ judío̱. Xa̱bo̱ xuajñaaꞌ jamí dxakuun tsí gíꞌdoo numúú ñajúún tsí niguwá juña̱á ná inuꞌ ge̱jyoꞌ. Dí nithane̱ kajngó róꞌ.
36Xómáꞌ Jesús niriꞌña:
―Ra̱ꞌkhá ná numbaa ríge̱ꞌ i̱ꞌkha̱ tsiakhe̱ rí na̱tha̱n-ñájunlo̱ꞌ ga̱jma̱á. Xí ná numbaa ríge̱ꞌ i̱ꞌkha̱ ne̱, mune̱ xkujndu xa̱bi̱ꞌ kajngó mu̱xúni̱ꞌñúu̱ xa̱bo̱ judío̱ rí mu̱rtuwúúnlo̱ꞌ. I̱ndo̱ó máꞌ numuu rí ra̱ꞌkhá ná numbaa ríge̱ꞌ i̱ꞌkha̱ tsiakhe̱ rí na̱tha̱n-ñájunlo̱ꞌ ga̱jma̱á.
37A̱ꞌkhue̱n Piláto̱ niꞌthúu̱n Jesús:
―Thúngaa máꞌ ñajwaanꞌ xúꞌkhue̱n róꞌ.
Xómáꞌ Jesús niriꞌña:
―Ikháánꞌ ñajwaanꞌ tsí naꞌthán rí thúngaa ñajunꞌlo̱ꞌ. Ikhaa numuu rúꞌkhue̱n ni̱gu̱múúlo̱ꞌ, jamí niꞌkha ná numbaa, kajngó ma̱tha̱nlo̱ꞌ ga̱jma̱á numuu rí gakon. Jámba̱a̱ tsí na̱ni̱gu̱u̱ꞌ jamí xtáa̱ ga̱jma̱á rí gakon, nadxawuu̱n rí na̱tha̱nlo̱ꞌ.
38A̱ꞌkhue̱n Piláto̱ niraxu̱u̱ Jesús:
―Dí ñajuun rí gakon róꞌ.
Piláto̱ naxná ajngóo rí ma̱ja̱ñúu Jesús
(Mt 27.15-31; Mc 15.6-20; Lc 23.13-25)
Ído̱ wámbo̱o̱ Piláto̱ niraxe̱ ríge̱ꞌ, a̱ꞌkhue̱n nigájnuu̱ mbu̱júu̱ ná gatiin xa̱bo̱ judío̱, jamí niꞌthúu̱n:
―Na̱nguá ni̱xkamaa nimbá aꞌkhúun xa̱bo̱ tsíge̱ꞌ. 39I̱ndo̱ó máꞌ numuu rí nda̱yo̱o̱ rí ikháanꞌlaꞌ naguꞌwanlaꞌ máꞌ rí na̱ríya̱aꞌ mbáa tsí kra̱ꞌaa géjwa̱nꞌ mbámbá ído̱ na̱gu̱ma-ri̱ya̱aꞌ ndxa̱a̱ rí mbiꞌyuu Páskua̱. Ikhaa jngó na̱ra̱xa̱ꞌlaꞌ, á nandalaꞌ rí ma̱ni̱ꞌñúu “thúngaa drígu̱ún xa̱bo̱ judío̱” dxe̱ꞌ.
40A̱ꞌkhue̱n mbá xúgíi̱n ni̱ndxa̱ꞌwe̱e̱ mbu̱júu̱n, jamí nithee̱n:
―Ma̱xáta̱tsi̱ꞌñáá tsúꞌkhue̱n, Barabás gáta̱tsi̱ꞌñáá.
Jamí Barabás ninindxu̱u̱ mbáa ku̱ꞌwá tsí na̱grui̱gú-jáꞌñúú xa̱bo̱ ga̱jma̱á tsiakhe̱.
ទើបបានជ្រើសរើសហើយ៖
Juáán 18: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
