लुक 23
23
पिलातोअ जागे ईसु
(मत्तय 27:1-2,11-14; मार्क 15:1-5; योहान 18:28-38)
1ताहां पुरु पोन्सू उठीत कोइत ईसुहू पिलातोअ सामने लेत गोया. 2आन ते तियापोअ दोश लागाड़ा वोल्या के, “आमू याहा आमाआं माअहुंउं मोने भटकाड़त्लुज तोअयु, आन कैसरोहो फालू ने आपे तेहें कोत्लु, आन सोताहा ख्रिस्त आन राजा एहें कोत्लु उनाअयाहा.”
3ताहां पिलाते तियाहा फुशो, “तु यहुदी माअहोंअ राजा होय?”
ईसु कोयो, “तुज तोम कोहे आंय होंव.”
4ताहां पिलाते मुख्य पुंजाराहां आन माअहोंहों कोयो, “माहूं या माट्योमेहें कीज सुक नाहां देखाअती.”
5पोन तियां वादार दाबाव टाकीत कोयो, “तो यहुदीया मेर्याआ आखा माअहुंहूं सिकाड़ीत कोइत दोंगु माताड़ेहे, आन तो गालील रोत ते इंहीं जाआं आयुहू.”
ईसुहू हेरोदोअ जागे मोकलीइलो
6ओं पिलात उनाअयू, ताहां तिये फुशो, “ओ माटी गालीलोअ होय के?” 7जेहेलाम तियाहा समजाअयो के ईसु हेरोदोअ आधिकारोअ निसे आवनारा इलाखा मेर्युउ आवत्लु, तेहेलाम तियाहा हेरोदोअ जागे मोकल्यू. तियां दिहोम तो येरुसालेमो मेहेंज ओतू. 8हेरोद ईसुहू देखीत कोइत खुब खुस ओत गोयू, काहाके तो खुब वोर्ह्योंअ तियाआ बाप्तिम उनाअयुतो, आन तियाहा आशा ओती के तियाआ आथेए एखु समत्कार पालुहूं जोड़े. 9हेरोदे ईसुहू वारुज प्रश्ने फुशे, पोन ईसु तियाहा कीज उत्तर ने आप्यो. 10डाया पुंजारा आन कायदाअ मास्तरहों तिहीं उबा रोत कोइत,तियाआ विरुद्ध आरोप लागाड़ताते. 11ताहां हेरोद तियाआ सिपायडाअरी लागीत तियाआ अपमान कोअयू, आन तियाहा डांणवीइयू आन एक हाजाम हाजो आंगड़ो पेवाड़्यो आन फाशुउ पिलातोअ जागे मोकल्यू. 12तेदिहींज हेरोद आन पिलात एकमेकाअरी दोस्ती बोणीत गोया, तियाआ पेल ते एकमेकाअरी दुस्मोन ओता.
ईसुहू मोतोअ डोंड
(मत्तय 27:15-26; मार्क 15:6-15)
13पिलाते डाया पुंजाराहां, पुढार्योहों आन माअहोंहों एकवार्येज हाद्ये, 14“तुमू या माट्योहो मोन भटकाड़नारु जाईंत माआं जागे लेत आया; आन पाला, जियी गोठीइ आरोप तुमू यापोअ लागाड़ताहा तियाआ बाप्तिम आंय तुमाआं सामने तियाहा तापास्यू, ताहां कोड्लीज सुक ने सापड़्यी. 15आन ने हेरोदोहो बी यामेहें कीज खोटी गोठ देखाअयी, तिहीं वाअहीं तोम तियाहा फाशुउ माआं जागे मोकल्युहू. मोतोअ डोंड आपे एहेलिही कोड्लीज गोठ ये नाहां कोअयी. 16तियाहा काजे आंय याहा सापका देत कोइत सोड़ी देहो.” 17#23:17 ओं वसन थोड़हा जुना लेख्यामेहें ने जोड़त्लोकाहाके तिवारोअ दिहोम तियांआं कोअते राज्यपालोहो एका जेलेमेऱ्याहा सोड़ुहूं पोड़तोतो.
18पोन तें आखे जोरेज आअड़्ये, “याहा माईंत टाका! आन आमाआं कोअते बरब्बाहा सोड़ा!” 19बरब्बे होयरोमेहें दोंगु माताड़्युतो आन तिये खुने बी पाड्येते, तियाहा काजे तियाहा जेलेमेहें टाक्युतो.
20पिलात ईसुहू सोड़ी देअहूं ओतू, तियाहा कोत फाशुउ फिरीत तियांहां समजाड़्ये. 21पोन तें आअड़्याज कोअतेते, “याहा क्रुस खांबो पोअ टांगा! याहा क्रुस खांबो पोअ टांगा!”
22पिलाते तिसरी वारी तियांहां कोयो, “पोन काहा, ये कि गुनू कोअयुहू ताअहूं? याहा मोत जोड़े एहेलिही कोड्लीज सुक माहूं यामेहें नाहां देखाअती, तियाहा काजे आंय याहा सापका देत कोइत सोड़ी देहो.”
23पोन तियां ईसुहू क्रुस खांबो पोअ टांगेतेहें काजे आअड़ीइलोअ सालुज मिक्यो आन आखरी पोअ तियांआं आअड़ीइलोअ फल जोड़्यो. 24ताहरुउ पिलाते निर्णय आपी देदो के, तियांआं मागणीइं परमाणे ओवे. 25पिलाते तिया माट्योहो जिये दोंगा आन खुने पाड्येते तिहीं वाअहीं जेलेमेहें टाक्युतो तियाहा सोड़ी देदू, आन तिये तियांआं मागणी परमाणे तियाहा सोड़ी देदू आन ईसुहू तियांआं मोर्जीइ परमाणे तियांआं आथोम आपी देदू.
क्रुस खांबोपोअ ईसु
(मत्तय 27:32-44; मार्क 15:21-32; योहान 19:17-27)
26जेहेलाम सेयनिक ईसुहू लेत जाताते, तेहेलाम तियां कुरेनी गावोंअ रेवासी शिमोन नावोअ एका जोओंहों जो तियाआ खेतोअहीं रोत आवया कोअतुतो, तियाहा तोअयु आन तियापोअ ईसुउ क्रुस खांब मिकी देदो आन तियाहा ईसुउ फासाड़ी सालुहूं लागाड़्यु.
27माअहोंअ वोडी गर्दी तियाआ फासाड़ी सालतीते, तिहीं एहेलिही बोईं ओती जे तियाआ काजे मुंडी आथ लागाड़ी लागाड़ीइ रोड़तीते. 28ईसु तियींइं वोलेहे वोलीत कोइत कोयो, “येरुसालेमवाली बेटीह्हीं, माआं कोअते मा रोडहा, पोने तुमा सोताआ काजे आन सोताआ पोर्यांआं काजे रोड़ा. 29काहाके एहेलाहा दिही आवताहा के तेहेलाम माअहें कोय, ‘वांज्यी बोईं केतीही नसीबवाली होये, जियीं केदिहीं पोर्ये ने जोण्ये आन केदिहीं बुजी ने खावाड़्यी!’ 30ते एहेलिही वेल रोय जेहेलाम माअहें डोगोहों कोय, ‘आमा पोअ पोड़ा!’ आन टेकड़ाहां कोय, ‘आमुहूं टापित ल्या!’ 31काहाके एंएं निल्ला साड़ोहो जाआं एहें कोअतेहे, ताहां उगाअला साड़ोअ कि ओवे?”
32बिहीरा बेन जोओं खाराब कामे कोअनारा ओता, तियांहां बी ईसुउरी मोतोअ डोंड आपीइलोअ काजे लेत गोये. 33आन जेहेलाम तें“मुनकाअ खोब्जो” कोतेहे तियी जागे आये, ताहां तिहीं ईसुहू क्रुस खांबो पोअ टांग्यू, आन बेनू बांडोहो एकाहा हाजाड़्यीइ वोगेहे आन बिहीराहा बांगाड़्यीइ वोगेहे क्रुस खांबो पोअ टांग्या. 34तेहेलाम ईसु तियांहां कोयो, “बा! याहां माफ कोइ दे, काहाके याहां नाहां समजाअतो के एं कि कोअतेहे.”
ताहां तियां सिट्टी फडकावित तियाआ आंगड़े वाटीत लेदे. 35माअहें तिहीं उबे रोत पाल्या कोअतेते. तेहेलाम यहुदी पुढाऱ्यों डाणवित कोइत कोयो, “तिये बिहीराहा वासाड़्ये; जर तो ख्रिस्त, एतू देवोअ निवड़ीइल्यु ओय, ताहां सोताहा बी वासाड़ुहूं जोवे!”
36सिपायड़ां बी तियाहा डांणवीइयू. ते तियाआ जागे आया आन तियाहा ओल्कामेऱ्युउ दाराक्शाआ रोह आप्यू. 37आन तियां कोयो, “जर तु यहुद्याआं राजा ओय ताहां सोताआ जिवोह वासाड़!”
38तियाआ उसीइ वोलेहे एहेलोह लेख्योतो के, “ओ यहुदी माअहोंअ राजा होय.”
39तिहीं टांगल्या मेर्युउ एक गुनेगार तियाआ टिंगल कोअयी. तिये कोयो, “तु ख्रिस्त कायनाहां के? सोताहा बी आन आमुहूं बी वासाड़!”
40पोन बिहीरे एके गुनेगारे तिया एका बांडोहो गाई देत कोयो, “ताहूं देवोअ बिक नाहां लागती के? ताहूं बी तोज डोंड जोड़्युहू जी. 41आपाअ डोंड बोराबर होय, काहाके आपू जों कोअयोहो तियाआ खोरो फल आपुहूं जोड़ेहे, पोन ये माट्ये कीज नाहां बाक्तो कोअयो. 42फाशुउ तिये कोयो, ईसु, तु ताआ राजोम आवही ताहां माआं बी ओर कोअजी!”
43ईसु तियाहा कोयो, “आंय ताहूं हुदाअलीज कोहो, आज तु माअरी होरगाआ ठिकाणे रोही.”
ईसुउ मोत
44तेहेलाम दिहेए बारा वाज्येते, आन तीन वाजता जाआं पुरा इलाखामेहें आंदारो पोड़्यो. 45तेहेलाम दिहोअ उजालो ने पोड़्यो. आन मंदिरोअ पोड़दू पोरापोर रोत फाटू आन तियाआ बेन भाग ओत गोया. 46ईसु जोरेज आअड़्यू, “बा! आंय माआं जीव ताआ आथोम होपी देहो.” एहें कोत तिये जिव सोड़ी देदू.
47एके रोमी पुलिश्योअ आधिकार्ये, कि ओवो तों देख्यो, ताहां तिये देवोअ महिमा कोइत कोयो, “हुदाअलीज ओं एक धर्मी माहुंउं ओतो.”
48ओं आखो पालिइलोअ काजे तिहीं जें माअहें टोलू वोल्येते, तें ओं देखीत साती ठोकतेज आन रोडतेज जाते रोये. 49पोन ओं जों ओवो तों पालीइलोअ काजे तियाआ ओलखातीइ आखे माहें सेटेज उबे रोयेते. तिहींमेहें गालीलोम रोत तियाआ फासाड़ी आवल्यी बोईं बी ओती.
ईसुहू ओजे पाड़त्ले
(मत्तय 27:57-61; मार्क 15:42-47; योहान 19:38-42)
50तिहीं एक योसेफ नावोअ माटी ओतू. तो यहुदी माअहोंअ पोन्साअ एक सदस्य ओतू, आन हाजू आन धर्मी ओतू. 51तो तियांआं निर्णय आन कामों मेहें ने सान्बाअयू. तो यहुदीइ अरमिती होयरोअ रेवासी ओतू. तो देवोअ राजोहो वाट जोवित रोयुतो. 52ओ माटी पिलातोअ जागे गोयू आन ईसुउ तोड़ माग्यो. 53तिये तोड़ोहो क्रुस खांबो पोअ रोत निसे उतारीत हुतोअ साअकाम वेटाल्यो. तिहीं रोत तिये तों तोड़ एका खड़काम कोरवीइल्या माहणोम ओज्यो. ओं माहोंण एहेलोह ओतो के तिहींमेहें ओमें जाआं कोड्लोज तोड़ ने ओज्योतो.
54तो सुकरवारोअ दिही ओतू, आन आरामोअ दिही सुरु ओवनारु ओतू.
55गालीलोम रोत ईसुउरी आवयी ते बोईं योसेफोअ फासाड़ी-फासाड़ी गोयी. तियां तों माहोंण आन तिहींमेहें तों तोड़ केहें कोइत मेक्यो तों पाल्यो. 56ताहरीइ ते आखी बोईं कोअ गोयी, आन तोड़ोहो लागाड़ीइलोअ मासालो आन मोगो-मोगो गुंदाअनारो अत्तर तियार कोअयो.
आरामोअ दिही कायदाअ पुरमाणे तियीं आराम कोअयू.
ទើបបានជ្រើសរើសហើយ៖
लुक 23: NST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.
