Joni 16
16
1“Ndaleba zwose yezwi kwamuli kuti musilashike mukudimbwa kwenu. 2Banoomutata mumasinagogo, chokomende unshaji ukumuzha wokuti aanizwe unomubulaya unoyeya kuti ukumushingila Mwali. 3Akale banoota zwinhu yezwi nokuti abajakabaziba Tate, kana imi. 4Koga ndaleba zwinhu yezwi kwamuli, kutila kuti unshaji wabo ungoswika mulangalile kuti ndakamubuja nezwabo. Andijakaleba zwinhu yezwi kwamuli, kuvila pakutanga nokuti ndakabechinanamwi.”
Unshingo WoMpempo UNchena
5“Koga ngweno ndikumunda kuna iye wakandituma, asi akuna kana umwempela wenu ukumundibhuza eti, ‘Ukumunda kupi?’ 6Nokuti ndamubuja zwinhu yezwi, myoyo yenu yazhala neshungu. 7Zwisineni, ndinomubuja ichokomende, zwinobhancha imwi kuti ndinde nokuti kana ndisenda uMbhanchi aangezhe kwamuli koga kana ndenda ndinoontuma kwamuli. 8Akale angozha, unoobwetekeja inyika pezhulu poluchinyo, nobululami, akale nontongo. 9Balolashika undingilo wabo noluchinyo, nokuti abatodimbwa kwandili, 10balolashika pandingilo wabo wokululama, nokuti ndinonda kunaTate, akale amuchinoondibona kabili, 11akale balolashika pandingilo wabo wontongo, nokuti untongi wenyika yeno ulotongwa kale.”
12“Ndina zwinhu zwinji zwandichinoda kulebeleka kwamuli, koga amungatubule kuzwibhatisisa ngweno.” 13Paachezha uMpepo wechokomende, unoomutungamilila muchokomende chose, nokuti aatoleba zwesimba lilye, koga yezwo zwaanowha ndizwo zwaachaleba, akale unoomuzibisa zwichinozha. 14Unoondikuja, nokuti unootola zwandinoleba emubuja. 15“Zwinhu zwose zwabananazwo Tate ngozwangu, ndizo ndati uMpepo unootola zwandinoumbuja emuzibise imwi.”
Kushulubala Kunooshandulwa Kukaba Kushanta
16“Mushule monshaji unshomanana, amutondibona, koga mushule monshaji unshomanana, moondibona akale.”
17Bamwe balayijwa babe bakati umwe kunoumwe, ‘Ini yezwi zwakumuleba kwatili kuti, mushule monshaji unshomanana, amutoba muchinondibona, koga mushule monshaji unshomanana, moondibona akale?’ akale paanoti, ‘nokuti ndimunda kunaTate.’ 18Bakati, “Ini zwaanoleba nokuti mushule monshaji unshomanana? Atitoziba zwaanoleba.”
19Jesu wakabeziba kuti bakumuda kuumbhuza, nezwo wakati kwabali, “Ndizwo yezwi zwakumumubhuzana na kuti ndandilebani nditi, ‘Konshaji unshomanana amutondibona akale munshaji unshomanana munoondibona?’ 20Ndolebesa nditi kwamuli munoofwikula nokulila, koga inyika inooshanta, munoowushubala koga kuwushubala kwenu kunooshanduka kubelushanto 21Unhukaji kana imimba ilwaja unohetela, nokuti unshaji uwe unosoba waswika, asi kana achila mwana aachinolangalila kulwajilwa yokuya, pezhulu polushanto lwokuti kwachilwa mwana penyika. 22Nezwo mulohetela ngweno, koga ndinoomubona, munooshanta, akale apana uchoomutolela lushanto lwenu.”
23“Nelyo izhuba amutoondikumbila chinhu. Ndinolebesa nditi kwamuli, chose chamuchakumbila kunaTate muzina lyangu banoomupa. 24Kuswikila yono nshaji apana chamwanhu mwakumbila muzina lyangu, kumbilani, akale munootambula, kuti lushanto lwenu luzhulile.
Kuzunda Inyika
25“Ndamubuja yezwi nezwichimbe, koga kunoozha unshaji pandicholeba ndisinoshingisa mikwejaniso koga ndinoomubuja zwaTate pachena. 26Muzhuba yelyo munookumbila muzina lyangu, akale anditoti kwamuli ndinoomunamatila kunaTate, 27nokuti Tate bomene banomuda, nokuti imwi mwakandida akale mukadimbwa kuti ndakava kunaTate. 28Ndakava kunaTate ndikezha penyika, akale ndimusiya inyika ndinda kunaTate.”
29Balayijwa babe bakati, “Ngweno umulebeleka zwipopachena, kusi nezwichimbe. 30Ngweno taziba kuti unoziba zwinhu zwose, akale azwitoshaka kuti unhu ebenombhuzo kwauli, neezwi tadimbwa kuti wakava kunaMwali.”
31Jesu wakabashandula eti, “Ngweno mwadimbwa na? 32Unshaji umuzha, chokomende waswika, pamuchatataukana, unhu wose kunzi uwe, akale moondisiya ndoga. Koga anditobandoga, nokuti Tate bana nami. 33Ndamubuja yezwi, kuti munami muwane lunyalalo. Munyika munamasheto, koga ibani nolushanto, inyika ndaizunda.”
ទើបបានជ្រើសរើសហើយ៖
Joni 16: LTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for The World International
