Mishingo 5
5
Ananiyasi naSafila
1Koga umwe unhulume unowhi Ananiyasi nonkaji uwe Safila, wakatengesa chikamu chefuma yiye, 2akasiya imwe indipo, unkaji uwe ezwiziba, akabuza chikamu chendipo akachibiga mumaboko abapositoli. 3Koga Pita wakati, “Ananiyasi, ini na ungwinwa naGuluzhanje kuti unyepele uMpepo Nchena akale usise imwe imali yominda uwo? 4Seni wabeli minda uwo kojoba usanu watengesa ? Pawakati wontengesa, azwijabeli mumasimba awo na? Ini zwangwina mumwoyo uwo kuti unyepe ali? Aujaniepela banhu koga Mwali.” 5Ananiyasi paakawha mawhi yaya wakawila pasi akafa. Naibo bose bakawha yezwi bakangwinwa nolutyo lukulwana. 6Bazhuzha bakanyamuka, bakomputilija, bakounyamula bakanonjika.
7Kwapinda maawa angaba matatu, kwakaswika unkaji uwe esinoziba zwakabatikana. 8Akale Pita wakati kwaali, “Ndibuje kana mwatengesa minda wenu nemali yeyi na!”
Iye wakashandula eti, “Eya, nemali yakaleyo.”
9Koga Pita wakati kwaali, “Mwazwita chini kugowana kuti mukweje uMpepo waTezi? Ilinga, makumbo aabo bajika undume uwo aipo pankoba, akale nawi banokunyamula benda nawi pazhe.” 10Pakalepo wakawila pasi pamakumbo aPita, akafa. Bazhuzha pabakabuya bakawana akafa, ndokuva bonyamula bakenda naye kuzhe bakonjika pelyo nondume uwe. 11Lutyo lukulwana lwakangwina mugubungano lyose, akale nokunaibo bose bakazwiwha yezwi.
Zwichenamiso neZwishamiso
12Ngweno zwitondejelo nezwichenamiso zwinji zwakatiwa mubanhu, namaboko abapositoli. Akale bose bakabeli pamwempela mugumbi linowhi Solomoni. 13Apana munaibo bakada kubatobela, koga banhu bakabalemekeja zwikulwana. 14Banhulume nabanhukaji banji bakadimbwa munaShe bakawanda, 15nokudalo bakabuza balwaji mujinzila jeguta, bakabalajika pabushasha, kuti kana Pita epinda, untuzi uwe uswike pabali. 16Banhu bakabungana beva mumakuta alobakijana neJelusalema, bebuza bo balwaji nabakabejiijwa nemipepo mibi, bose bakachiliswa.
Bapositoli banoyabiswa
17Nokudalo untebuji unkulwana, wakanyamuka naabo bose baakabeli nabo, begapo lyabaSadusi, bakazhala ifupa, 18bakabasunga bapositoli bakababiga muntolongo lyabanhu koga. 19Koga busiku ingilozi yaShe yakazhula matendele ejele ikababhisa ikati, 20“Indani, munoma mutempeli mulebeleke nabanhu mawhi wose obupenyu yobuno.” 21Pabakazwiwha yezwi, bakangwina mutempeli izhuba libhuda bakatanga kulayija.
Untebuji unkulwana wakezha nabo baakaba elinabo, akashoba igota lyabatongi bose boluji lwaIzilayeli, kukawhi bapositoli ngebenotolwa kuva kuntolongo 22Pabakenda batungamili babalindi, abajakabawana muntolongo, akale bakabwilila bakanobanyeulila, 23beti, “Tawana intolongo yakakonywa zwilosima, balindi bakalinda belimile pamikoba, koga patazhula tawana musina unhu mukati.” 24Bakati bazwiwha yezwi, untungamili wabalondoti betempeli nabatebuji bakulwana, bakakankabala kasakasa nezwabo, bechenama kuti yezwi zwinhu zwichapela chini. 25Umwe wakezha akababuja eti, “Banhu bamwakabiga muntolongo, bamile mutempeli bakumulayija banhu.” 26Untungamili wabalondoti betempeli nabatungamili babalindi bakenda kunobabuza pesina kukakabajana nokuti bakabetya kupubulwa nabanhu namabwe.
27Pabakababuza bakabatula mbeli kwegota. Untebuji unkulwana wakababhuza, 28eti, “Takamulayisisa kuti musilayije pezhulu pezina lyaJesu, ilingani, hezwi mwazhaja iJelusalema yose nendayijo yenu, akale mumuda kuti ilopa lyoyu unhulume libe pezhulu pedu.” 29Koga Pita nabapositoli bakashandula beti, “Tinokwelela kuwhilila Mwali kuna kuti tiwhilile banhu. 30Mwali wamatategulu edu wakomusa Jesu wamwakabulaya nokumpachika panti. 31Mwali wakonyamula akombiga kuluboko lulwe lwokululyi soNtungamili akale soNchiji, kupa banhu bokwaIzilayeli lushanduko akale nokulekelelwa kwoluchinyo. 32Isu tibasumikiji bezwi zwinhu, akale Mwali wakapa uMpepo uNchena kuna yabo banonwhilila.” 33Pabakawha yezwi bakanyetela kasa, bakada kubabulaya. 34Koga, unFalisi mugota, izina lilye liwhi Gamaliyeli, eli undayiji wemilawo akale elemekejwa kasa nabanhu bose, wakabalaya kuti bebhise bapositoli kuzhe kwegota kwonshaji unshoma. 35Wakati kwabali, “Imwi banhulume bokuIzilayeli, chenjelelani nezwamumuda kuta kunaba banhulume.” 36Nokuti kwapinda unshaji unshoma kwakamuka Teudasi ezwita unhu kasa, bamwe banhulume, baluswika posa mazana mana bakontobela, koga wakabulayiwa, nokudalo ibo bose batobeli babe bakatataukana, zwikabwandila. 37“Mushule moyu unhulume, Judasi wokuGalili wakamuka naiye mumazhuba okulabwa kwabanhu, akachenga banhu banji kuti beuntobele. Neebo wakafa akale bose bakabontobela bakapalalana. 38Akale kunezwi zwangweno ndinoti kwamuli, banhulume yaba balekejeni, nokuti kana chilongwa yechi uli unshingo wonhu, zwinopelela mumpepo, 39koga kana zwili zwaMwali, amungazwikubukile. Mungoowana munyenyejana naMwali!” 40Nokudalo bakawhilila chilayo chiche, akale pabakabashoba bapositoli kova bebakwaisa, bakabalaya kuti besilebeleke nezina lyaJesu, bakabalekeja benda zwabo. 41Pabakabhuda pegota, bakashantilwa beti bawanikwa bakakwelela kuti beyabisilwe izina lilye. 42Mazhuba ose mutempeli nomujingumba jose abajalekeja kulayija nokubhaunula kuti Jesu ndiye Kristo.
ទើបបានជ្រើសរើសហើយ៖
Mishingo 5: LTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for The World International
