Luke 8
8
Hetaketabe samgwa
1Jisu zette namdidung nah renamdung ga mbeu kegai mide ledeu nah Tinggwang hegwangram samliakeyi zierang tei ladi, nah caisuime kereiekena bau pecu nzangla, 2nah mipui ge dade herakesiabe gwa kedi nah pe mateei teingkei kebeudung gede: Mary, Magdalene lie qu kela#8:2 Mary, Magdalene lie qu kela: “Magdula” gade qu kelu, pa lung bam kela heni. Galilee Jaaidi ga bam cide, Capernaum tingbang le bie. pui, pe dade herakesiabe hena mpetdi; 3nah hegwanpei Herod kerengeibe, Chuza nau Joanna, nah Susanna; nah penui katei penui mabamle penui gwatei kela mina kekieege desi.
4Cu maadi ge namceu ketsamtsam gade gwang ngkwalu ge, pa samgwa ge teu rang eh cu: 5“Heleuh kegime ge peleu gi zielie miedi, nah pa gigai ge, kesa lampuikung ga cakmie, nah cide pidau teidi, nah tingkam ruinedung ne cide patyeilu. 6Nah heleuh keda tsura reuga cak miedi, nah cide lungcu luge, cide kidi, kedanemene cide pe kehwa kegane. 7Nah heleuh keda cak hetupui kakga lütdi, nah cide lungh cu ge, hetu ne zin cetdi. 8Dede heleuh keda tangnia keyi ga cakmie, delwe cide lungcuhlu, cide tsi hai swa kie eh builu”. Pa aidungde rangcangdi cai sahbak eh, “Kingnei kera pekwen kebamme de peu kingnei lulo.”
9Pecai pane ledeukelumedung, “Samgwa aide pekie daipai no?” peda de keteudi. 10Nah pa rangdi, “Nnuide au Tinggwang hegwangram kebaih teu keladung de cilu kera peu dida, dede kedamedung dage au Ih samgwadung gade rang, ciu de, ‘ngau bamde, penui ngaulu ma, nah siu bamde penui cilu tadi’ kerane.#Isa. 6:9-10 11Cu samgwa de au ai nzwa: heleuh be au Tinggwang samda. 12Lampui kungga kebamdung de siu kelumedung, dede herakesiabe gwang eh penui mlung gade sambe keuteu di, ciciu eh penui nlum nah kelilu melu kerane. 13Tsura reu ga kebamdung de au, penui siu kelu dau, penui suiyi eh sambe luu kelume da. Dede penui au pe mah gah; penui kak nage nlumlu, nah kehedei gwang ge penui kaudi la. 14Hetupuidung kakga cak mie kecudung de cai, penui siu kelumedung da, dede penui lung pet si ge, aipau kideu teilung zaidung nah mahei nah pumtei hengindung ne zim kedime da, nah penui tsicak builu lama. 15Dede tangdei keyi ga lüt kelumedung cai, penui sambe siulwe cide teu masang nah helungkeyi gage kaiteu eh, helung ketie teu bam eh petsi bui kelume da.
Mitaubung ge nah pebam
16Migede mibung mtau lwe#8:16 Mibung mtau lwe: Jisu mina de ranglia kera cetlu; agu samgwadung de ma kesangbe teu hebai di kera ne teigai ma, dede keulia mcibeu kerane. li gele pwa gumdi lama mede cide zeu kang gage kai lama. Meliene, pa mitaubam gage kaila iciu de mi tet kelütme de kebaabe ngaulu kerane. 17Kedanemene magede kebaih teu kela peu cilak lie kecube, mede kengkim peu cilak lie kecube nah hegwale kebaa ga teumpet lak lie kecu bamma. 18Cine nnui dainzwa kingnei zeubi, cet siakte lulo, kedanemene kebambe de peukie kisi zie, dede bam kemakme, pe kecet gade bam ha kebam nade de pe dade keuteu si dai dizie.”
Jisu pui nah sinamedung
19Cipaucai pe pui nah sinamedung peda gwang, dede hemaabe ziemne penui peda gwang nna luma. 20Ge mi pe dage rangbeu, “N pui nah n sinamedung hegwale sapbam ncu ngauneu eh peei lalie.” 21Dede pa sam keli nah penui dage rangdi, “Caugame Tinggwang sam kingnei lu eh cide tei mzai labi, cipaume a pui nah a sinamedung delie.”
22Cu cipau tingdau langnaige, pa kesang ledeukelumedung de liemge ga ngngwa nlütlu, delwe pa penui dade rangdi, “Anui rejaai lule gim kah mpet lugo.” Cine penui tet gaidi. 23Dede penui liem tet lage pa zipdi. Nah rejaai ga tingkai gui sütdi, ciu eh penui liem de duile puidi, nah penui kengngi ga ladi. 24Ge penui peda gwanglwe pecu ngkia eh cu, “Keledeubo! Keledeubo! Anui kapdi lauda!” Dede pa mrak lwe, tingkai nah dui mswak de kesiu, ge penui mtakdi, nah cika zing dedi. 25Ge pa penui dage rangdi, “Nnui kenlum daiga bam no?” Ge penui ngngi nah penui swaga eh hangge ge de ranggai, “Tingkai nah dui dage de sam ranggai ge pe sam mzai kecu aide ai cauno?”
Jisu herakesia ne ngngwa kela gede teihemmi kebeu
26Cine penui Gerasenes cuikui ga gwanglu, cide Galilee rejaai de kencwa ga bam. 27Pa kideu reuga tet mpet ge namdi gade mi herakesiabe ngngwa kelame ge, pecu redaulu. Nah peting ketieege pa pai heni teumah, nah pa kilung gade lung mene, heraudung ga ladi. 28Pa Jisu de ngaulu ge, pa hapsüt eh, pe dwaga keumie, nah pa sahbak eh rangdi, “Nang acu teu daipai tei kera bam no Jisu Tinggwang Hutube napei? Ih n dade kiela, nang acu tei keherei helo.” 29Kedanemene Jisu mcikemak rabe de mpet dilo aja kaibeu. Peting kekiee ge cide ne pecu keliang la, nah pecu mine kwa nah hegeuria le pecu kang nah pikangle kang, nah pecu hegeuriadung cidungde pungcak lwe herakesiabe ne pecu gwa renaamkang gage kaidi zie. 30Pecai Jisu pecu keteudi, “N zi cauno?” Nah pa rangdi, “Legion,” kedanemene herakesiabe kekiee peda nlüt kedine. 31Nah pe dade penui nggia kie bamdi, aja kaipwa penuide penli kegah kecuk gage kaidi helo eh. 32Cu cika hebak maadige kideutu ga mapeei tyeila, nah penui pe dade penui nggia kie eh peu cipau maame lungga lüt lodi. Cine pa penui kekie de tei beudi. 33Ge herakesiabe minabe dade mpet lwe hebakdung lungga lütdi, nah hebak maabe pak rejaaikung kehetia ga hung eh rejaaibe ga lütdi, iciu eh penuide hegak di. 34Cu tei kedidung de hebak kekwame cide ngau luge penui pakdi, nah cide namdi ga nah renam gage pau liagai. 35Iciu ge minadung tei kedidung de pie zielie miedi, nah penui Jisu da gwanglu ge mina pe dade herakesiabe mpet kedibe de pe kecet de petau di nah paini de teulwe Jisu pi taiga bam eh ngaulu, iciu eh penui ngngidi. 36Pecai cide kengaumedung dainzwa herakesiabe ne ngngwa kelabe de teingkeilu bi kecu penui dage paulia. 37Dede Gerasenes cuikui ga kebam mina pelane Jisu de penui dade tetdi lo kiedi, penui ngngi süt kedine. Ciu eh pa caili kerane liem ga lütlu. 38Mina pe dade herakesiabe mpet kedibe de pecu ngngwa la zielie pe nggia kie, dede pa pecu langgi eh, ranggai, 39“N kiga gwang dai cu nah Tinggwang daipai ge n ziemne teigai bi peciakne mi dage rang lialo,” debeu. Cine pa Jisu daipai ge pe dage teigai bi cidung pelane renam ga sah rang gwangdi.
Relei tsaikedi ge nah maketeei pui ge
40Cu Jisu nligwang ge hemaabe penui suiyi eh pecu ngngwalu, kedanemene penui peciakne pecu kwa kebamne. 41Ge ainie, cika mige pezi Jairus lie kecu ge bamla, nah pa synagogue ga muiteume ge. Nah pa Jisu pi ga keumie eh pecu peki ga gwanglo pedade pe nggia kiedi, 42kedanemene pe napui mmi kereiekena nage rünsangne bamge, pa tsaina bamdi. Pa gwang kezeu dau, mina maabe pecu nyia titi ladi.
43Cu cika mipui ge mmi kereiekena hejai lwa la kedi pui ge la, pa pe mabam pelane doctorme dage mpetdi,#Laisiukecime samkiePe mabam pelane doctorme dage mpetdi de kecu de aika ge kaimi lakbi kesuisam luma. dede migede pecu tei mmilu tadi. 44Pa pecaile de pecu gwanglwe pe pairi deugai, nah hejai kelwa de kaam zette di. 45Ge Jisu rangdi, “Cau acu deu no?” Mina peciakne melie dige, Peter rangdi, “Kedibo, mina maabe ncu twagwa la nah penui ncu nyia titi la.” 46Dede Jisu rangdi, “Mige acu deulie kedanemene ada de kengkieng mpet kedi Ih cibam di delu.” 47Mipuibe pa mbai gai kelak ngaudi ge, pa mbeu eh gwang pe dwaga keumie di. Mina peciakne kebam gade daitei eh pa pecu deubi nah dainzwa eh pa yi zette lu dibi kecu pa ndugai. 48Ciu eh pa pe dage rangdi, “A napoi, n kenlum ne ncu teihemi luda. Lungciep gade tetlu.”
49Pa marang kesap dau, mige synagogue reu kedibe ki gade gwang eh ranggai, “N napui tsai dida, keledeube de tei keherei si talu.” 50Dede Jisu aide siulu ge, pa sam keli eh peda cu, “Ngngi so; nlumkelu gwale, nah pa yilu zie.” 51Pa cipau kiga gwanglu ge, Peter, John nah James nah henanabe pui penai pe pei de gwale peu mi kedade pecu ngngwa lüt ma. 52Cu mina peciakne hap nah pecu hei bam, dede pa rangdi, “Hap so, kedanemene pa au tsai ma, dede zip bam lu.” 53Dede penui pa tsai kedi ci kebam ne, pecu nuidi. 54Dede pa, pe ba teulwe qu eh ranggai, “Henabo, cuhlu!” 55Ciu eh pe rabe nligwanglu, delwe pa zette cuhlu, nah pa penuide peu pecu matyei kera peulo rangbeu. 56Cu pe pui pe pei penai swagahdi, dede tei kedidung de mina dage rang helo pa penuide kaamdi.
ទើបបានជ្រើសរើសហើយ៖
Luke 8: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
