Luke 7
7
Haireu kedibe kenlum
1Pecai Jisu minadung kingnei kebam gade pe samdung pelane rangcang dige, pa Capernaum namdi ga nlütdi.
2Cu haireu kedibe kilabe ge, pecu herüt peu süt kecu kauge, mateei eh, tsaidi lai eh bam. 3Nah haireu kedibe Jisu ha siulu ge, pa pe dage Jewme hangkiamedung de langgai eh, pecu gwanglo keteu ciu eh pe kilabe de teingkei beulo di. 4Nah penui Jisu da gwanglu ge, penui nggia kie eh ranggai, “Pa au nang pe ziemne tei gailu kebuime ge, 5kedanemene pa anui leuhme de ku, nah pa anui ziemne synagogue de teibeulu.” 6Ge Jisu penuide ngngwalwe tetgwang. Dede pa peki gade mdei kemak ga gwangla ge, haireu kedibe pe zangme de langpwa pe dage ranggai, “Rampaubo, nkatei ncu tei keherei la helo, kedanemene Ih au ncu peu gwang a kikang lütlu kebuime melu. 7Aide ziemne Ih akatei de teilu kebui nda gwang kera de cet meda, dede sambe ranggai beulo iciude a kilabe yi luzie. 8Kedanemene Ih de hezai kang ga kebamme ge, reugwame a kang gade bam, nah Ih hangge dage rang eh, ‘Tetdi,’ dege pa tet dila; nah kedage dage, ‘Gwang,’ dege pa gwangla; nah a kilabe de, ‘Aide teigai,’ dege pa cide teila.” 9Cu Jisu aide siulu ge, pe ziemne pa peswa gadi, nah nreu gwang mina pecaisui kela hemaabe dage, pa rangdi, “Ih nnui dage rang liazie, Ih Israelme kak gade de kenlum ci kenzwa Ih ngau ma.” 10Mina langkegaimedung kilung nligwanglu ge, kila peide yibam eh penui ngaulu.
Jisu hemipui ge na de teucuh kebeu
11Iciu eh gwang pecai benai pa Nain#7:11 Nain: Namdi aide Galilee ga bam, Mount Tabor tingbangle de mile kena kenzwa ge, nah Capernaum gade dei ma. lie kecu namdi ga gwang. Nah pa ledeukelumedung nah mina maadi ge pecu ngngwalwe miedi. 12Pa namdibe rieki nnagwang kezeu dau, nah ainie, ketsaime mige de pwa mpetla, pa pepui na pumlibe (nah pa hemipui ge) nah namdi gade mina maadi ge pecu ngngwala. 13Cu Rampaube pecu ngaulu ge, pa pecu ngau nggia sütdi nah pe dage rangdi, “Hap so.” 14Pecai pa gwang eh paaupwarak deugai ge pwa kelamedung nlai mene sap bamdi. Iciu eh pa rangdi, “Rehangbo, Ih n dage rangla, cuhlu.” 15Cine ketsaibe cuh bamlu delwe marang bamdi, nah pa pecu pwa pe puide peudi. 16Pecai mina pelane ngngidi, nah penui Tinggwang de twa eh ranggai, “Caihakecibe kedige anui kakga cuhbam dida” nah “Tinggwang gwang pe minadungde pie gaida.” 17Nah pe ha aide Judea deu pelane ga nah twagwapung kebam cuikui leune ga rang gwangdi.
Jisu nah Duipumketeibe John
18Pecai John ne ledeukelume ma aidung pelane ziemne pe dage ranglia. Cine John pane ledeukelume hangna de qulu, delwe 19penaide langpwa Rampaube dage kai eh cu, “Nang gwang zielie kelabe deni, mi anui mi kedage de piebam zie reuno?” 20Cu penai Jisu da gwang luge, penai rangdi, “Duipumketeibe John anaide langgai nda rang kera, ‘Nang gwang zielie kelabe deni, mi anui mi kedage de pie bamzie reuno?’” 21Cipau bamdakkak gade pa mateei keherei kelamedung mateei kecuk, nah herakesiabe ne tei keherei kela kekiee de tei ngkeibeu, nah pa miakcitme kekiee de peu mangaulu. 22Iciu eh pa penui dage samkeli eh rangdi, “Nnai tetgwang kelucai John dage nnai ngau nah siu keludung rang beulo: miakcitme de mangau luzeu, pepi ketelwame de tetlu dizeu, kempame de de teimci luda, kwenpangme de ma siu luzeu, ketsaimede de kwakcuh luzeu, kegame de samliakeyibe rangpwa penuide ledeubam dida, #Isa. 35:5-6;61:1 23nah acu mmau kemakpe au samlam pungtu delie.”#Isa. 35:5-6;61:1
24John samgwamedung tet kedicai, pa hemaabe dage John ha ranglia eh, “Nnui hetaideu ga daipai pie zielie pet no? Tingkai ne gui nlai kebam hekuu bang ni? 25Dede nnui daipai pie zielie petno? Mina paini kenciep kaikela deni? Ainie, maniadung pemi kehungbe teu kecu nah kehega eh lungh kelame au hegwangkidung ga bamlie. 26Dede nnui daipai pie zielie petno? Caihakecime ge ni? Yeo, Ih nnui dage rang liazie, nah caihakecime ge swade direu. 27Cipaude au pe ha ainzwa raupwa kelade da,
‘Ainie, Ih au a samgwabe de ndwa langgai zeu,
Cipaude ndwa n lampui telei zie.’#Mal. 3:1, Isa. 40:3
28Ih nnui dage rang liazie, mipui dade lung kegwangdung kakgade, migede John swadi dima, dede Tinggwang hegwangram gade au ceutu nabe de peswa diki.” 29(Cu mina peciakne nah heraha kehame de si eh, John duipumketeibe ba gade duipum tei kelume sam aide siulu eh Tinggwang au masang lie eh twadi. 30Dede Phariseemedung nah Jewish hezaikecimedung au John de peu penuide duipum tei mene Tinggwang lungningbe mlaidi.) 31“Iciucai, Ih mina aipau ceheu dede daipai le keukeda gai zieno, nah penui daipai nzwano? 32Penui au hename nzwa litakni ga kebamme, bamlwe hangge ge de qu eh ranggai, ‘Anui terwaine nnui ziemne kwagai, dede nnui limlu meda. Anui tsaibai lei teigai, dede nnui haplu meda.’ 33Kedanemene duipumketeibe John tangku tyeima nah zau sak mene gwang, ge nnui rang eh, ‘Pa herakesiabe de ngngwala,’ dedi. 34Mina Nabe matyei masak eh gwang, nah nnui rang, ‘Ainie, tyei keneu kauge nah zausak kauge, heraha kehame nah kemaube zangbe!’ 35Dede Tinggwang maci macet au pe name pelane kesanglie dida.”
Kemau pui ge ne Jisu de keheniak
36Cu Phariseeme hangge Jisu de ngngwa matyei zielie qu. Cine Phariseebe kiga nlütlwe, pa taktyeibam ga ngngei bam. 37Cika namdi ga mipui kemau ketei puige bam. Phariseeme ki gade pa taktyeibam ga ngngei kebam ci luge, pemi kewhung maca kehengui bung ge teugwang, 38nah pecaile pepi taiga sap eh hapbam, iciu eh pa pe miakduile pepi teihwadi, nah pa pe peutamle pwa neucangdi eh pepi kemamgai delwe maca le pwa cide keniaklu. 39Cu Phariseeme Jisu de qu kegaibe aide ngau luge, pelung gade rang eh, “Magade aipau peide caihakecime ge lie cai, pa pecu deu kebambe puide cau nah daikenzwa puige bi ci luzie nage, pa au kemaume ge lie kecu.” 40Cine Jisu pe samkeli nah pe dage rangdi, “Simon, Ih n dage mage rang kera bamlie.” Pa rangdi, “Ranggailo, keledeubo!” 41“Rangkang mide releubeu kelame ge mi hangna pepau pungla. Mige denarii hai mengei nah mige be riakngei pungla.#7:41 denarii ge tingnai ge makam tei kelu zie nzwada. 42Penai pecu peu gailak dige, pa penai hangna nade nggah beudi. Ciziemne, penai caube pecu pesui yiki zieno?” 43Simon pe sam keli eh rangdi, “Ih cet kecu pecu kemaugi kiee kebeube zie.” Ge pa pe dage rangdi, “Nang rangdau da.” 44Iciu eh pa mipui lam nreugwanglwe Simon dage rangdi, “Nang mipui aide de ngaubam. Ih n kilung lütlu. Nang a pi hui kera dui peu ma, dede pa au pe miakduile a pi teihwa lwe cide pe tamle neucang dida.#Ken. 18:4 45Nang au acu kemam ma, dede Ih gwang kelu gade pa a pi kemam kecu mtak ma. 46Nang maca pwa a peu keniak#7:46 Maca pwa a peu keniak: Maca pwa mipeu gage mniak kecu zai Jewme kakde tei bamla. ma, dede pa maca kehengui pwa a pi keniak.#Lei. 23:5 47Ciziemne Ih n dage rangla, pe maudung, kiee süt kecu, gibeu dida, kedanemene pa acu kusüt kecune. Dede gi ncam pwa pecu kepeube, ku cam.” 48Pecai pa pe dage rangdi, “N maudung gibeu dida.” 49Dede mi pecu ngngwa ketaktyei kebamme penuikatei penui kak gade rang eh cuh, “Aide cau no, mimau de gibeu kelu?” dedi. 50Ge Jisu mipuibe dage rangdi, “N kenlumle ncu kelilu da. Lungciep gade tetlu.”
ទើបបានជ្រើសរើសហើយ៖
Luke 7: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
