Luke 9
9
Jisu kereiekena de langkempet
1Jisu caisuime kereiekenabau de qu hekwa luge, penuide herakesiabe reu pelane kengkieng nah mateeidung teingkeilu kera kengkieng pwapeu, 2delwe pa penuide Tinggwang hegwangram pwa zierang tei kera nah mateei de tei ngkeilu kerane langgai. 3Pecai pa penui dage rangdi, “Nnui beu ziemne magede teuso, hetui mede nsung mede tangku mede rangkang, mede ncwa kena teuso. 4Nah nang ki keheige ga lüt de, cika bamlu, cipau heni gade tet dai kemaktane. 5Nah kegwang leuga mi nnuide lulu mecai, nnui cipau renam gade tet mpet kecu dau, penui zierang kesia tei kegai rehi gade nnui pi gade rebui kepeu gidi lulo.” 6Pecai penui tet lamna renamdung ga gwang eh samliakeyi teu mide ledeu nah kehei gade keteeime de teimmi ladi.
7Cu Herod kedibepei ma cidung de tei kedi siupwa pecu kebwak di, kedanemene midungge John ketsai gade ringcuh daidi delie rangdi, 8nah midungge Elijah gwang dai bamlie, dede kedamedung ndaa caihakecibe kehegwame hangge cuh daidi delie kedine. 9Dede Herod rangdi, “Ih John peu dang dida, dede Ih pe ha ci kenzwa dungge siu kecu de cauno?” Cine pecu ngau gai zielie pei ladi.
Jisu mina cang mengei pukketei
10Cu langkegaimedung nligwanglu ge, pecu penui ta tei keludung ranglia. Iciu ge pa penuide ngngwalwe, penui nreu Bethsaida#9:10 Bethsaida: Jordan reuki kepetle kungga kebam namdi, Tiberias Jaaidi ga nlüt kecu kereuki taiga. lie kecu nam ge ga gwangdi. 11Dede hemaabe aide siu luge, penui pecaisuidi nah pa pe suiyi eh penuide ngngwalu, delwe penui dage Tinggwang hegwangram ha ranglia, nah pa mateei teihemi maikesia peda kelamedung de teingkeibeu. 12Cu tingbaziebe canggwang dizeu, nah caisuime kereiekena bau peda gwang eh rangdi, “Hemaabe de peu renam twagwakebamdung ga nah luhdung ga ketyeipuk nah kezeuni ngaulu kerane penuide lang dilo, kedanemene anui renaam ga lalu.” 13Dede pa penui dage rangdi, “Nnui penuide peu tyei kera madung ge peulo.” Dede penui rangdi, “Cika anui da tangku kwak mengei nah heka pumna gwale ga, anui mie mina peciakne ziemne ketyeipuk lui zielie maige.” 14(Kedanemene cika mina cang mengei kenzwa ge kebamne.) Ge pane ledeukelumedung dage rangdi, “Penuide peu pemaa tei eh maage ga riakngei kenzwa ge ge bamlu.” 15Cine penui cinzwa teilu, nah penui peciakne de peu bamlu. 16Pecai pa tangku kwak mengei nah heka pumna de keulwe tinggim ngang pie eh cidungde samlam gai eh cidungde tei panglu, delwe ledeukelumedung de hemaabe dwa gage kaibeu lo eh pwabeu. 17Cine penui peciakne tyei eh nggeilu, nah penui tyei kebangbe, ge pesuina raptui kereiekena palu.#2 Heg. 4:44
Peter Jisu ha kepet
18Cu cinzwa eh pa ledeukelumedung de ngngwa lwe, pekatei kekie tei bam, nah pa penuide keteu eh, ranggai, “Hemaabe acu caulie lano?” 19Penui sam keli eh rangdi, “Duipumketeibe John. Dede kangge Elijah lie rang nah kedame rang ndaa caihakecime kakgade hangge cuh dida.” 20Ciu eh pa penui dage rangdi, “Dede nnuibe acu caulie lano?” Ge Peter sam keli nah rangdi, “Tinggwang Khrista.”#9:20 Tinggwang Khrista: Tinggwang “Keniak kelube.” Tinggwang ne kedet teu kelabe “Messaih.” 21Dede pa penuide kaambi di, aide mida gede rang helo penuide rang eh, 22ranggai, “Mina nabe ma kekiee ge keherei süt maisia, nah hangkiamedung nah cingku kedimedung nah laisiukecime ne pecu mlai dizie, delwe pecu teitsetdi zie, nah langcumne benai ringcuh dai luzie.” 23Ciu eh pa pelane dage rangdi, “Mina keheibe de a caisui keneume, pekatei pecu ketiplu maisia, nah tingba ramsang pe krus pwalwe a caisui lulo. 24Kedanemene mina keheibe de pe pum kelilu keneume cide deu nggah dizie, nah mina keheibe de a ziemne pe pum nggah gaibeu liecai cide kelilu zie. 25Kedanemene mige kideu pelane gie pwa pegu teilu liede, pe pumbe de teinggah di mede deu ngkapdi liecai pe kemmi daipai bam no? 26Kedanemene keheibe de a ziemne nah a samdung ziemne ngngam di cai, Mina Nabe de pe kendu nah Peibe nah kemci tinggimgwame hecili eh kendu teu kegwang benai cipaude ziemne ngngam dizie. 27Dede Ih nnui dage kesangbe rangzeu, cika midungge Tinggwang hegwangram kengaudwa ketsai msi kelakdung ge aika sapbam.”
Teintsam kelia
28Cu cide kegwang aidung rang kedi langhesetne cai Peter, John nah James penuide ngngwalu delwe pa kekie tei zielie lamlwatu ga nghangdi. 29Cu pa kiebam ge, pezu rehi tsamdi, nah pe pai tinghepik kegai nzwa baaha di. 30Nah ainie, mina hangna pecu mpau, Moses penai Elijah,#9:30 Moses penai Elijah: Mat. 17:3 31penai baaha eh, penaide peu ngaugai eh pa tetnli daikera ha rang, pa cide Jerusalem gade tei cangbeu kerade. 32Cu Peter nah pecu ngngwa kelamedung zipna sütdi, dede penui nrak dailuge, penui pe kebaa nah pecu ngngwa sap kebambe kenade ngau. 33Pecai mina ci kenade pe dade nreu tetdi kezeudau, Peter Jisu dage rangdi, “Keledeubo, anui aika bam de yi zielie. Cu anui ha kecum teigo, ket n ziemne, nah ket Moses ziemne, nah ket Elijah ziemne” (pa daipai rang au bi pa ci ma.) 34Dede pa aide rang kebam dau, hemwa ge gwang penuide gumlu, nah penui hemwa lungga lüt keludau penui ngngidi. 35Pecai makwa ge hemwa gade rangpet eh ranggai, “Aide a na, Ih kedetkelube; pe sam kingneilu.” #Isa. 42:1 36Cu makwa de rangcangdi ge, Jisu katei bam eh ngaulu. Cine penui mlei ma nah cipau tingdau magede penui kengaudung migede ranglia ma.
Herakesiabe kela na ge de teikengkei
37Cu cide gwang pecai benai penui lamlwatu gade nghunglu ge maadi ge pecu redaulu. 38Ciu eh ainie, hemaabe gade mige sahbak eh, “Keledeubo, a napei de pie gailo, Ih n dade a nggia kiela, kedanemene pa au a na pumli na lu. 39Cu ainie, marabe ge ne pecu tui teudi, nah pa zette nradi la, nah pa petei ndet eh pe mcai tapet dila. Nah pecu tei mnei kedi caide pecu püt raubi didi zeu. 40Nah nang ne ledeukelumedung de cide gwadi lo Ih a nggia kie, dede penui teilu meda.” 41Ciu eh Jisu sam keligai, “Oh nlumkemak nah mikai kemak ceheu, Ih daitie ge nnuide ngngwa eh a lung tiela laino? N napei de aika ngngwa gwanglo.” 42Henanabe gwang kezeu dau, herakesiabe pecu keling mie eh petei ndetlwe pecu tei kera di. Dede Jisu mcikemak rabe de kesiu gai delwe henanabe de teingkeibeu eh pecu pwa pe peide peu daidi. 43Ciciuge penui peciakne Tinggwang kengkieng kedi ngau eh penui swagah di. Dede pa tei kegai pelane de cet eh penui macang kebam dau, ledeukelume dage pa rangdi, 44“Sam aidungde peu nnui kün ga lüt lulo: kedanemene Mina Nabe de minadung ba gage tui gaidi lau delu.” 45Dede penui sam aide cilu ma, cide penui dade hekim kedine, cine penui cide cetlu ma, ciciuliede sam aide kie pe dade penui keteu ngngi di.
Caube ditube lai?
46Pecai penui kakgade cau ne ditu ziebi rang eh kesamlimdi. 47Dede, Jisu penui lungning ci luge, pa hename gede ngngwa pwa petai gage pecu kailu, 48nah penui dage rangdi, “Keheibe de a zi gade hena ainade de ngngwa kelume, acu ngngwa lula; nah acu ngngwa kelume acu langkegaibe de ngngwa lula. Kedanemene nnui peciakne kak gade ceutube au, pa kedibe delu.”
49John pe sam keli nah rangdi, “Kedibo, anui mige n zi gade herakesiabe de gwala eh ngau, nah anui pecu kaam dida, kedanemene pa anui caisui melu.” 50Dede Jisu pe dage rangdi, “Pecu kaam so, kedanemene keheibe de nnuide mmau kemakme au nnui kilam delu.”
Samariame mcaukedi
51Cu pecu ngngwa tinggim ga nghangdi kera ting mna gwangdi kezeu dau, pa Jerusalem ga hang kerale ge pema nghwa gaidi. 52Pecai pa samgwame de pedwa mrai langnswa gaidi, nah penui gwang eh Samariame nam gega lüt, pe ziemne ma mtei kerane. 53Dede minadung pecu ngngwa lak lie di, kedanemene pa Jerusalem ga hang kerale pema nghwa gai kedine. 54Cu ledeukelume kena James penai John aide ngau luge, penai rangdi “Rampaubo, nang peu anaide tinggim gade mi kie nghunglo ranggai eh penuide ru kedi nsui mi?” 55Dede Jisu nreugwang penaide kesiu gai, 56nah penui renam keda gage gwangdi.
Jisu caikesui mi
57Cu penui lampui ga mie kela dau, mige pe dage rangdi, “Nang kegwang leuga Ih de n caisui zielie.” 58Dede Jisu pe dage rangdi, “Maiserungdung penui kuiki bam, nah tingkam ruine de penui ciep bam, dede Mina Nabe au pe peu kezeubam de gah.” 59Pecai pa kedage dage rangdi, “A caisuilu.” Dede pa rangdi, “Rampaubo, peu acu keraibe gwang delwe a pei de kungdi rielo.” 60Dede pa pe dage rangdi, “Ketsaime de peu ketsaime de kunglu. Dede n ziemne au, mie Tinggwang hegwangram ha mide ledeu lo.” 61Pecai cude kedage rangdi, “Ih n caisui zie, Rampaubo, dede peu acu a kilung ga kebammedung de gwang keresiu railo.”#1 Heg. 19:20 62Dede Jisu sam keli eh, “Migede, hepei pwalwe cainok gwang pie cai, Tinggwang hegwangram name teilu dau gailak.”
ទើបបានជ្រើសរើសហើយ៖
Luke 9: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
