Luke 13
13
Helung nreulumecai kekap
1Cipau tingdau cika kebam midungge Jisu dage Pilate Galileeme midungge de penui ratak tei kebam dau teitsetdi lie rangbeu. 2Nah Jisu penui sam keli eh, “Penui iciu eh keherei kecu nnui Galileeme cidungde Galileeme kedamedung swa mau kilie cet lani? 3Melie, Ih nnui dage ranggaila. Dede nnui helungnreu lumai, nnui pelane de cinzwa kap dizie. 4Mede mina hang kereieheset reu Siloam ga renei meumie penuide teitset kedimedung, nnui kecet cidungde Jerusalem ga kelungme pelane swa mauki lie eh cet bamni? 5Melie, Ih nnuide ranglia zie. Dede nnui helungnreu lumai, nnui pelane de cidungde nzwa kap dizie.”
6Pecai pa samgwa aide rang, “Mige pe gurie gage tangzütbang ge ling pwa bam, nah pa cika petsi peei gwang, dede ngaulu ma. 7Nah pa hegurie kekwabe dade rangdi, ‘Ainie, Ih mmi kecum ge aipau tangzütbang tsi de pei eh gwang nah kette ngau luma. Cide bi di. Daitei cide peu heni teingkap bamlai?’ 8Dede hegurie kekwabe pe mpaube dage keligai, ‘Kedibo, peu cide de hekum de bamlu rielo, Ih cide tei ndu nah tangnia keyi kaigai kecu dau. 9Magade cide ngkikum petsi builu cai yida; dede bui mecai, nang cide bidi lubui!’”
Pi kesia pui ge de Sabbath benai tei kengkei
10Pa Sabbath benai synagogue ge ga mide ledeu bam, 11nah cika mipui ge bam pecu mmi kereieheset ge kemnei peukela rabe ge ne pecu tei mnei eh bam, pa pekiabwak eh nzang nzuilu tadi. 12Cu Jisu pecu ngau keludau, pa pecu qu nna gai, nah pedage rangdi, “Mipoe, n kemneidung teihemi beu dida.” 13Nah pa pereu gage pe ba hwagai, ge pa nzang zette lu eh pa Tinggwang de twadi. 14Dede synagogue reu kedibe pelung tsamdi kedanemene Jisu Sabbath benai mide teingkei kebeune#13:14 Sabbath benai mide teingkei: Jewme cetla aide Sabbath zai gi kah lie, hezai kaibeu pemdaibe tei helo kebeube tei eh., samkeli nah hemaabe dage rangdi, “Heta tei kera tingba lang herokne bam. Cine cidau gwang mide teingkeilu, dede Sabbath benai so.” 15Dede Rampaube pe sam keligai nah rangdi, “Hezai teikelamedung! Nnui ket ket kecu Sabbath benai pe tumseu mede pe gada peki gade hiaklwe ngngwa mie peu dui sakla meni? 16Dede aipau mipui de Abraham leuh napui ge, Satan ne pecu mmi kereieheset ge kangteu kela Sabbath benai hebaang aide gade pecu lungmpet peu kerabe meni?” 17Nah pa aidungde rang kegai dau, pecu reniakelamedung ngngam di, dede hemaabe peciakne pa ma kendu tadung tei kegaidung ziemne penui suiyi sütdi.
Zeigi tsi nah tsehi samgwa
18Ge pa rangdi, “Tinggwang hegwang daipai nzwano? Nah Ih cide daipai le keu keda lai? 19Cide au ziegi tsi pumge mige pe gurie gage mrok kegai nzwa, nah cide lungh cuhlwe tsingbang kedi teilu, nah tinggim ruinedung pekiak gage penui ciep teulu kela nzwa delie.”#13:19 Rabbanic zai ga “ziegi tsi” de kecu pekie au mage ceusüt kecu ria gage rang bamla. Israel ga ziegi bang au mabang keceu ge nzwa lung la nah pekiak ga nruine peki teila.
20Ge pa rangdai eh, “Ih Tinggwang hegwang daipai de keu kedagai laino? 21Cide au mipui ge cehi teu tokkui kecum mdet ge gage ruiza gai eh haikap kelu nzwa da.”
Kikam kenrumbe
22Pecai pa renam kedi nah keceu gadung mie ledeu eh tetkah gwang Jerusalem lege tet gaidi. 23Ge mige pe dade keteudi, “Rampaubo, kelikelume cam zieni?” Ge pa penui dade keligai, 24“Herie kenrumbe gade lütkera nnui laikai teilu, kedanemene, Ih nnui dage ranglia zie, mina kekiee lütkera peei zie, dede lüt gailak. 25Ki mpaube kikambe cuh lwe ngkui dizie, nah nnui hegwale saplwe kikambe kekung eh rangzie, ‘Rampaubo, anuide ngkei beulo.’ Dede pa keli eh nnui dage rangzie, ‘Ih nnui de cima, dai gade gwang labi.’ 26Pecai nnui rang cu zie, ‘Anui nang kebam gade matyei nah masak da, nah nang anui lampui gade ledeu.’ 27Dede pa keli zie, ‘Ih nnui dage ranglia zie, nnui dai gade gwang labi Ih cima. Nnui kesia keteimedung, a dade tet dilu!’#Lei. 6:8 28Cipau ni gade, hap nah geigim pungbam dizie, cidau nnui Abraham, Isaac, Jacob, nah caihakecime peciakne Tinggwang hegwangram ga bam eh ngau zie, dede nnuide kelien mpet dida. 29Nah penui naimiak kepetle nah kenlütle, nah tingtünle de nah tingbangle de gwang zie nah Tinggwang hegwang bamga bamzie. 30Nah ainie, kekamme raidi zie, nah keraime kamdi zie.”
31Cipau bamdakkak dau, Phariseeme dungge peda gwanglwe rangdi, “Aika de tet dilu, kedanemene Herod#13:31 Herod: Herod Antipas ncu teitset dineu bam kedine.” 32Cine pa penui dade rangdi, “Gwang delwe cipau maiserung Herod dage rangbeu, ‘Ainie, Ih herakesiabe de gwa, nah Ih henai penai ncünne mide teingkei zie, nah langcumne benai a ta teicang dizie.’ 33Dede Ih henai, nah ncünne, nah pecai benai tet la maisia, nah kedanemene caihakecime ge Jerusalem gwale de tsaidi daulak lu. 34Jerusalem, Jerusalem, caihakecime de teitset nah n dage langkegaime de tangtsu le samla kelade. Ih n namedung de daikenzwa gede hekwalu neu no nruipui pe namedung de pe hesiukang gage gum kela nzwa, dede nang au neu luma. 35Ainie, n ki gi dida. Cine Ih n dage ranglia zie, nang acu ngaudai lakta, ‘Rampaube ziteu kegwangbe au samlam pungtu delie de rangkera ting gwangcang kemaktane.’”#13:35 Lei. 118:26, Jeremiah 12:7
ទើបបានជ្រើសរើសហើយ៖
Luke 13: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
