Luke 12
12
Rangkemriak nah teikengkuu
1Cipau tingdau mina pecang gwang ngkwa kelu dau penui hangge ge reu daudi, ge pa ledeukelume dage rang eh, “Nnui Phariseeme gu tsehi, cide hezai ketei gade mriak lulo. 2Dede magede keulia laklie gum kenzeu galie, mede peu cilak lie kebai kenzeu galie. 3Cine makeheibe de nang kemui gade rang kedide kebaa ga siu zie, nah nang kibung kecuk kengkim gade cüt kegaide kireu gade sah gaidi zielie. 4Dede Ih nnui dage rangla, a zangmedung, mipum teitset kelame de hing so, nah pecai penui ciswa magede teisi gailak lu. 5Dede nnui caude hing buibi Ih rangmriak beuzie. Teitset kelucai mijaai gage keliengai dilu kebui kengkieng kebambe de hinglu. Yeo, Ih nnui dage rangzeu, Tinggwang de hinglu. 6Tangkine mengeile rangkanggeu kena gade zwala me luini? Ciuliede cidung de ket liede Tinggwang dwade nsungta dila ma. 7Dede nnui peu tamdung kecangde peilu da. Ngngi so. Nnui au tangkine kekiee ge swade nnui mi hungki lu. 8Dede Ih nnui dage rang zeu, peciakne de mina dwade a ha rang kelame, Mina Nabe de Tinggwang gu tinggimgwamedung dwade pe ha rang zie, 9dede keheibe de mina dwade a ha rangmei di cai Tinggwang gu tinggimgwame dwade pe ha rangmei dizie. 10Nah keheibe de Mina Nabe de samge rang mmau lade, pemau gibeu zie, dede kemci Rabe de rangmsia kelame mau gibeu lak. 11Mi nnuide synagoguedung ga nah kedimedung nah kengkieng teu kelame da ngngwa kegwang dau, nnui dainzwa mede nang daipai sam rang ziebi mede nnui daipai rang ziebi cet eh n nuilung nei so, 12kedanemene Kemci Rabe cipau bamdakkak ga nnui daipai rang mai siabi nnuide ledeu beu zielu.”
Kehei kemiebe samgwa
13Pecai hemaa gade mige pe dage rangdi, “Keledeubo, a sinabe de acu de mabam de mzi beulo#12:13 Mabam de mzi beulo: Mabam au pe name de pe pei ne lungdiak kebeu lie. rang beulo.” 14Dede Jisu pe dage rangdi, “Minabo, caune acu nnai tuketiakbe mede nnai kakga hekak ketetbe teigai beuno?”#Tet. 2:14 15Pecai pa penui dage rangdi, “Mriaklu nah nnuikatei nnuide kehengim pelane gade kezeu lulo, kedanemene mina teilung pe mabam kekiee ga bam swalu la melu.” 16Pecai pa penui dage samgwa ge rang eh, “Keheime pei ge luhga ma lung hemi süt lu, 17nah pa pe katei pelung gade mning eh, rang eh, ‘Ih daipai tei lai, kedanemene Ih a tsiu hekwa kera bam gah da?’ 18Cine pa rangdi, ‘Ih aide tei zie: Ih a ciuki ralwe tei mdisi zie, nah Ih cika ge a ciu pelane nah a gunia kedabedungde kai hekwa zie. 19Pecai Ih a keringria dage rangzie, “A keringria, nang ma kekiee ge mmi kekiee teulu kera hekwalu da. Relui lu, tyei sak eh nsuiyi lu.”’ 20Dede Tinggwang pe dage rangdi, “Kemiebo, heziu n dade n keringria keudi zieda, nah nang hema mtei keludung de, cide caube gu zie no? 21Cine cipaude au pekatei pe ziemne hema hekwa lwe Tinggwang kilam mahei kemak kauge delie.”
Helung keherei so
22Pecai pa ledeukelumedung dage rangdi, “Aide ziemne Ih nnui dage rangla, nnui teilung ziemne n nuilung keherei so, daipai tyei zie no, mede nnui pum daipai paini ba nni zie no de eh. 23Kedanemene teilung au ketyeipok swade di nah mipum au paiheni swa diki reulu. 24Nruinedung zai cet gai pielo, penui heleuh gila ma nah rum de lama. Penui hema kehekwa ki mede ciuki de bam ma, dede Tinggwang penui pok teila. Nnui daikenzwa kieege nruine swade nnui mi hungki reuno!#Lei. 147:9 25Dede nnui caube pelung keneile pwane pe teilung cubit ge#12:25 Cubit ge: mede banim kereieheset. teitie silu laino? 26Cine nnui ma keceu cikenzwa nage de tei gailak liecai, daitei eh nnui kedabedung ziemne nnui lung nei lano? 27Teizuine pa zai cet gailo, penui dainzwa lungh labi. Penui mata tei lama, mede helang de zang lama. Dede Ih nnui dage ranglia zie, Solomon pe pwa keyi pelane bahlu liede aidungde kette nzwa luma. 28Cu magade Tinggwang tsehei luh ga, henai lung kebam, nah ncünne mimang gage kelien gaidi kela de de pepwa teibeu la liecai, daikenzwa kieege pa nnui pwa tei beu zie no, O nnui kenlum kecammedung! 29Cine nnui daipai tyei ziebi nah daipai sak ziebi de peei so, nah nnui lungnei so. 30Kedanemene kideu ga heleuh pelane de aidungde peeila, nah nnui Pei nnui cidung keumai kesia ci. 31Dede nnui Tinggwang hegwangram peeilu, nah ma aidung pelane de si eh nnuide peusi zie. 32Ngngi so, hemaa kecam nabo, kedanemene nnuide hegwangram peu kera nnui Pei suidi delu. 33Nnui mabam zwadi delwe kegame de mapeu lo. Rangkangbung sia dila kemakbe nnui ziemne tei lulo, tinggim ga mabam madaude gahdi kelak ga, keregame gwang nna gai kelak, nah taklei nede teimsiadi kelak ga. 34Kedanemene n mabam kebam ga, cika n mlung de bam zielu.
Kwasünne kelu
35Nnui kiakang de peu kangpung bamlu nah nnui mitaubung de peu heu bamlu,#12:35 Tinggwang ta tei kera telei lwe bam muilu. 36nah mina penui mpaube meunui ngyi gade caili kegwang kwa kebamme nzwa lu, iciu eh pa gwang eh ketung kegai dau, penui zette pecu kikam ngkei pwa peulu kerane. 37Rampaube kegwangdau kilame kwa bam eh penuide peu ngau kelume samlam pungtu da. Ih nnui dage rangsiakte liazie, pe katei pekia kanglwe penuide peu taktyeibam ga bamzie, nah pa gwang penuide taktyei rengei beuzie. 38Pe mpaube kekwating kenabe mede kecumbe #12:38 Kekwating kenabe mede kecumbe: muisum dau mede naimiak kepetle kakgagade gwang cai, nah penui kwabam eh ngau lucai kila cidungde samlam pungtu da. 39Dede aide cilu, magade kilung mpaube daipau bamdakkak ga keregabe gwang ziebi cide ci cai, pa peu pe ki raklwe lüt lak. 40Nnui de mteilu, kedanemene Mina Nabe au nnui cet kemak bamdakkak gage gwang zielu.”
41Ge Peter rangdi, “Rampaubo, nang samgwa aide anui ziemne rangzeu ni, mi pelane ziemne rangzeu no?” 42Ge Rampaube rangdi, “Ciciu cai caube samsang nah makeci kikwabe no, cipaude de pe mpaube ne kedetlu eh kilame peureu bam eh penuide peting siakdau ketyeipuk penui lie peu kera? 43Pe mpaube kegwang dau iciu bam eh ngaulu kela kilabe de samlampungtu delie. 44Ih kesangsiakbe nnui dage rangzeu, pa mina cipaude de peu pe mabam pelane reu kedibe tei zie. 45Dede kila cipaude pe katei pe lung gade, ‘A mpaube gwang kera peting keu tiezie,’ nah kila pei nah kilapuidung de dap, nah tyei nah sak eh, nah sakmie bamcai, 46kila cipaude mpaube pa cet bam kemak tingba, bamdakkak nah pa ci kemakdau gwang zie, nah pecu dang takcai dizie nah pecu samsangkemakme lamge kaidi zie. 47Dede cipau kilabe pe mpaube lungning cilu, dede mteilu ma mede pelungning nzwa teilu mecai, pecu dapsüt zie. 48Dede mige ci mene bam, nah daplu kebui tadung ge tei dicai, pecu dap cam zie. Dede peu kie kebeu keheibe dade keu kiee zie, nah nlum kieeki kebeube dade kie kieegwa zie.
Ngngwakeyi maa dade pangkepop
49Ih kideu gage mi kaibeu kera gwang, nah Ih cide peu heu bam di lie neu de lie. 50Dede Ih duipum, tei kera duipum ge bam, nah Ih cide teicanglu kemaktane a lungnei bam! 51Ih kideu ga kezuyi peu kerane gwanglie nnui cet lani? Ma, Ih nnui dage ranglia zie, meliene pang kepop. 52Kedanemene cu gade kilung gega hang mengei pangpop dizie, hangcum hangna de mmau nah hangna hangcum de mmau dizie. 53Penui pangpop di zie, pepei pena de mmau nah pe na pe pei de mmau; pe pui pe napui de mmau nah pe napui pe pui de mmau; pe nai pe geipui de mmau nah pe geipui pe nai de mmau zie.”#Mic. 7:6
54Pa hemaabe dage rangsi eh, “Nnui naimiak kenlütle hemwa ge him cuh kecu ngaude, nnui zette, ‘Tingrui gwangzeu,’ de rangla, nah ciciu kesangla. 55Nah tingbangle tingkaigui gaige, ‘Tinglum zie da,’ de rangla, nah iciu kesangla. 56Hezai teikelamedung! Nnui kideu nah tingzu rangci lula, dede dainzwa nnui cudau ting ha rangmci lula meno? 57Nah nnuikatei daitei eh petaube cet lula meno? 58Kedanemene n ngauraube de ngngwa hetuketiakbe dwa mie keladau, lampui gade pelung tei nciepdi kera nlaikai teilu iciude pa ncu tutiakbe da teugwang melu kerane, nah tutiakbe ncu langpwa kedibe ba gage kaidi melu kerane, nah kedibe ncu hebaangki gage kaidi melu kerane. 59Ih nnui dage ranglia zie, nang peusa keceu kamtu nabe de de kapdi kemaktane nang madaude mpet gailak.”
ទើបបានជ្រើសរើសហើយ៖
Luke 12: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
