Luke 11
11
Jisu kekie ciem keledeu
1Tingnai ge Jisu henige gade pa kekie teibam ge, pa kie cangdi ge, pa ne ledeukelu hangge pe dage rangdi, “Rampaubo, anuide kekie tei kera ledeu lialo, John de pa ne ledeukelume de ledeu kebeu nzwa.” 2Nah pa penui dage rangdi, “Nnui kekie keteidau ainzwa ranglu,
‘Apei, n zi kemci depeu hetwapung lulo.
N hegwangram tei gwang kelube tei lulo.
3Tingnai ramsangne puk anuide peulo.
4Nah anui maudung gibeu lo,
Kedanemene anui de mi anui
dage kemau teikegaime mau gibeu lalu.#11:4 anui mi kedame mau gibeu kemaktane, Tinggwang anui mau gibeu lak.
Nah anuide mdakkepie gage kai diso.’”
5Pecai pa penui dage rangdi, “Nnui kakgade caube pe zangme ge bam eh, tingmuisum dauge peda mie eh, ‘Azangbo, acu tangku kwak cum releu beulo de rang zieno, 6a zangme ge mbeu la eh gwang kebam ne, nah Ih magede pecu pwapeu kera galu’? 7Pecai pa pelung gade keli eh rang lubui, ‘Acu teinang so. Cu kikambe ngkui dida, nah a namedung acu ngngwa zeu bam. Ih cuh lwe ncu magede peu gailak ta.’ 8Ih nnui dage rangla, pa pe zangbe kecune cuh lwe pecu magede peu melie de, dede pa kiebi kedi ziemne pa cuh lwe pa teu mai kesia kieege pecu peuzie. 9Nah Ih nnui dage rangla, kielu, iciude cide nnuide peuzie; peeilu, nah nnui ngaulu zie; ketunglu, nah cide nnuide ngkei beu zie. 10Kie kelame leu ngaulu la; nah peei kelabe de ngaulu la; nah ketung kelabede de ngkei beu zie. 11Nah nnui kakgade cau pei ge, magade pe na heka kie cai, pa heka mding gade pecu henei peu lano?#11:11 Kesa kehegwa laisiudung au rau tie nzeu, Mat. 7:9 gade ngau luzieNnui kakgade cau pei ge, magade n napei tangku kwak kie cai, nang tangtsu peu zieni? Mede heka, nang henei peu zieni? 12Mede pa nruibum kiege pecu heruinegapui peula no? 13Ciziemne, nnui kesiame de ma keyibedung nnui name de kepeu cim cicai, nnui Pei tinggim ga kebambe au Kemci Rabe pe dade kie kelame de daikenzwa gede peu kiee si zie no?”
Jisu nah Beelzebul
14Cu Jisu pelet kegame ge dade herakesiabe de gwa bamdi. Nah herakesiabe mpet kedi dau, pelet kegabe de maranglu, ge hemaabe penui swagahdi. 15Dede midung ge rangdi, “Pa herakesiabedung reu kedibe Beelzebul#11:15 Beelzebul: Greekme let gade aipau sam ga, Satan de “Beelzebul” de qu. “Beelzebul” au Tinggwang de nlumla kemakme rabe, nah mina aipau zi Satan de rang eh keula de ngngwa hera kesiabedung de gwala.” 16Kedame pecu kedei eh, pedade tinggim gade marehi teilialo kiedi. 17Dede pa penui lungning cibam nah pa penui dage rangdi, “Hegwangram leune de pe katei pecu pungpang di cai kap di la, nah ngngwa ket teilu kemakbe ki kaudi la. 18Dede magade Satan liede pelam tsam eh kengaurau cai pe hegwangram dainzwa saplu lai? Kedanemene nnui Ih Beelzebul de ngngwa herakesiabe de gwala lie rangzeu. 19Cu Ih magade Beelzebul zi gade herakesiabe de gwa cai, n caisuimedung cau zi gade cidungde de gwa mpet lano? Aide ziemne, penui ne nnui tutiakme tei zie. 20Dede magade Ih Tinggwang kengkieng teu herakesiabe de gwala lie cai, iciucai Tinggwang hegwangram gwang nnui da cangbam dida. 21Dede kengkiengme ge pe reunet teulwe pe ki kwabam dicai, pegu mabamdung kwakbam lula, 22dede peswa ngkiengki kecu gene pecu tuilu ge, pa pecu ngam luzie, pa nlum kebam reunet de keutet kap dila, nah pe mabamdung nzi lula. 23Acu ngngwa la kemakpe au acu mmau la, nah acu ngngwa hekwa la kemakpe au teuzang la. 24Mcikemak rabe mige dade mpet kedi dau, pa mtak kera pe bam pei eh dui kega gadung kah gwang, dede kette ngaulu mege, pa ranggai, ‘Ih kegwang a ki dega Ih cailigwang dai dizie.’ 25Nah pa cailigwang ge, cide biak di eh mtei siakte pwa kebam ngaulu. 26Ge pa mie heradung keda peswa siaki kecu hena de ngngwa gwang silu nah penui cika lung kerane gwanglu. Pecai cipau peide kerai dau swa kekamle siaki dila.”
27Pa aidung de rangdi ge, hemaa gade mipui ge sahbak eh pe dage rangdi, “Mipui peza gage ncu tetlak kelube pui nah nang petung tung eh kelungbe pui de samlam pungtu delie.” 28Dede pa rangdi, “Iciumeliene, Tinggwang sam kingnei lwe cide mzai kelame samlam pungtu.”
Jonah zasi
29Hemaabe kie reu reu dige, pa rang cuhdi, “Aipau ceheu de ceheu kesiage. Cide marehi ge peeila, ciude marehi gede penuide teilia lakta, Jonah dage tei kelia rehi de gwale. 30Kedanemene Ninevehme ziemne Jonah marehi tei keliage nzwa, aipau ceheude ziemne Mina Nabe de cinzwa zie. 31Tingbang lebie Hegwangpui#11:31 Hegwangpui: Sheba mina aipau ceheude de ngngwalwe tutiak ga sap zie, nah penuide mmau zie, kedanemene pa kideu nlile de Solomon maci sam kingnei zielie kegwang ziemne, nah ainie, Solomon swa diki kecuge aika bam.#1 Heg. 10:1-10, 2 Heg. 9:1 32Ninevehme aipau ceheu de de ngngwa lwe tutiak ga sap zie nah cide de mmau dizie, kedanemene Jonah keledeu gade penui helungnreu kelune, nah ainie, mige Jonah, swade diki kecuge aika bam.#Jon. 3:5-10
Mipum mitaubung
33Migede mitaubung ge mtau kelucai, pwa kebai mede marak kangga ge kaidi lama, dede mitaubam reu gage kaila, iciu eh ki ga kelütme de peu kebaa de ngaulu kerane. 34N miak de n pum mitaubung da. N miak yi kebamdau, n pum pelane de gi n baa lula. Dede cide sia dige, n pum de kemuine puidi la. 35Ciziemne, sünnelu ciude nda kebaa kelade muidi melu kerane. 36Ciziemne magade n pum pelane baaha bamcai, zi gede kemui kepui gahcai, cika kebaa kepui teibam zie, mitaubung pe kebaa nnuide taumbaa keladau nzwa eh.”
Kerehim herok
37Cu pa marang canglu ge, Phariseeme ge pe dade pecu ngngwa matyei lodi. Pa lütlu delwe taktyeibam ga ngngeilu. 38Ge Phariseebe matyei kemak dwa pa keraibe pe ba mtiak kemak ngau eh pe swa gahdi.#11:38 Jisu matyei kera ntumlu. Jewme zai gade heba kemtiak zaide keraibe teila. 39Dede Rampaube pe dage rangdi, “Nnui Phariseeme hekwak hepiak hegwale hui mci la, dede nnui lungle au makehengin nah kesia le puila. 40Nnui kemiemedung! Hegwale tei kegaibe ne helungle de teigai#11:40 Helungle de teigai: aide ranggai kecu Tinggwang, “mipum” tei kegaibe, “keringria” de teigai lie. meni? 41Dede pe lungga dai bambi mide peulo, nah pielo, ma pelane nnui ziemne mci luzie.
42Dede ainie Phariseemedung da keherei gwang zieda, kedanemene mihui nah rue de nah ginei pelane de zi kerei tei eh zige kaila, dede nnui masang nah Tinggwang keku gi dida. Dede aidungde tei kerabe, nah kedabedung de gidi mene. 43Ainie, Phariseemedung da keherei gwang zieda, kedanemene nnui synagoguedung ga hebam yitube ga bam neula nah litaknidung gade kelum kegai luuneu kelane. 44Ainie, nnui teilu buida, kedanemene nnui heraudung tei heci kemakbe, nah mina ci mene pereu ga tetkah kelabe nzwa.”
45Pecai hezai keledeumedung hangge pe sam keli eh pe dage rangdi, “Keledeubo, nang aidung de rang eh, anuide de hega zeu.” 46Dede pa keligai, “Ainie, nnui hezai keledeumedung de! Kedanemene nnui hepüt kerütle mina püt teirüt beu la, dede nnui nnui katei be hepütdung nnui zurangdung ket lede deu lama. 47Ainie nnui da keherei gwang zieda, kedanemene nnui caihakecime rau tei, dede nnui peime ne penuide teitset di. 48Cine nnui nnui peime ta zierangme nah cide petau delie kelamedung delie, kedanemene penui penuide teitsetdi kesang, nah nnui penui raudung teibeu kelane. 49Cine aipau kie de ziemne de, Tinggwang macisam rangdi, ‘Ih penui dage caihakecime nah langkegaimedung de langgai zie, penui mina kangge de teikeherei nah teitset zie.’ 50Ciziemne, kideu tei kelu gade caihakecime pelane jai lwa kedi de aipau ceheu dade kie zie, 51Abel jai gade gwang Zechariah jai kecang, recabam nah kerecaki kakgade teitset kedibe.#11:51 Hebrewme gu laisiukwak ga Kendeu laisiukwak raitube tei eh Heleuhha Kenabe laisiukwak de kamtube lie la. Yeo, Ih nnui dage ranglia zie, cide aipau ceheu dade luzie.#Ken. 4:8, 2 Hel. 24:20-22 52Ainie hezai keledeumedung da keherei gwang zieda, nnui maci cabibe keuteu kedine; nnuide lüt luma, nah nnui lüt kelamede de kaam dila.”
53Pa cikade tetdi ge, laisiukecime nah Phariseemedung pecu renia sütdi nah pecu ma kekiee rang mmau di, 54pe samrang gade pecu tui kera kwabamdi.
ទើបបានជ្រើសរើសហើយ៖
Luke 11: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
