John 15
15
Kubebang nah pe kiakdung
1Ih kubebang kesangbe, nah a Pei hegurie keteibe. 2Ada kebam pe kiak#15:2 Ada kebam pe kiak: kesangbe gade acai sui kela leune, kenlum gade acu ncüt kelume. petsi builu kemak leune, pa cide teigi dila; nah pekiak petsi builu kela leune, pa cide teimci beula iciu eh cide petsi bui kieelu kerane. 3Nnui mci bam dida Ih nnui dage rangkebeu samlia de ziemne. 4Ada ket tei bamlu, nah Ih nnuida bamzie. Pekiak be kubebang ga bam lu mecai pekatei petsi builu la kemak nzwa, nnuide ada bam lu mecai, nnuide petsi bui gailak. 5Ih au kubebang, nnui au pekiakdung lie. Mina keheibe de ada kelame nah Ih peda kelame, pa petsi bui kiee süt lula, kedanemene acu si mai nnui magede teigai lak lu. 6Magade keheibe de ada bamlu mecai, pecu kelien gidi la pekiak kidi kela ge nzwa, nah penui pekiakdung hekwalu nah cidungde mi gage kelien gaidi la, nah cidungde rudi la. 7Nnui ada bamlu cai, nah magade a samdung nnui lungga bamlu cai, nnui suibe makeheibe kielu, nah cide nnui ziemne tei beuzie. 8Nnui tsibui kieesi kelu gade, a Pei au ndulu aide gade nah nnui a caisuimedung teilu zie. 9Peibe acu ku kegwang nzwa, Ih de nnuide ku gwang delie. A keku ga nnui bam lulo. 10Nnui a sam kai kebeudung de mzailu cai, nnui a keku ga bam luzie, Ih a Pei sam kai kebeudungde mzai eh nah pe keku ga bamlu kecunzwa. 11Ih ma aidungde nnui dage ranggai lie iciu eh a suikeyi de nnuida bamlu kerane nah iciu eh nnui suiyi canglu kera ziemne. 12A aja au aide da, nnui hangge ge de ku lulo kecu Ih nnuide keku nzwa. 13Migede keku kedi aide swa galie, pa pezangme ziemne pe teilung kai beu kecu. 14Nnui au a zangme delie Ih nnuide tei lulo kebeu ta dungde nnui teilu liecai. 15Ih nnuide kilamedung lie qusi lakta, kedanemene kilabe au pe mpaube dai tei bambi ci lama. Dede Ih nnuide a zangnamedung lie qulu, kedanemene Ih a Pei dade siukelu leune, Ih nnuide peu ci luda. 16Nnui acu kedet luma, dede Ih ne nnuide kedetlu nah nnuide kelanglu iciu eh petsi bam tielu kelabe nnui mie delwe petsi bui sütlu kerane. Aide au iciu lude makeheibe de Peibe dade a zi gade nnui kie de, pa cide nnuide peu zie. 17Ih ma aidungde nnui dage kai beula, iciu de nnui hangge ge de hunglu kerane.
Kideube ledeukelume de kengkau
18Kideube nnuide ngkaula cai, nnuide ngkau kemak dwa acu ngkau di delie kecu ci lulo. 19Nnui kideube gu lie cai, kideube pekatei pe gume de nzwa nnuide hung luzie. Dede nnui au kideube gu kemakne nah Ih nnuide kideu gade kedet mpetlu, aide ziemne, kideube nnuide ngkaula. 20Nsung gailo Ih nnui dage sam rang kebeu de, ‘Kilame ge au pe mpaume swa dima.’ Penui acu mneu liecai, penui nnui dede mneu zie; penui a sam mzai lucai, penui nnui sam de mzai zie. 21Dede penui ma aidung pelane nnui dage teigai zie a zi ziemne, kedanemene acu lang kegaibe de penui ci melu. 22Magade Ih gwang eh penui da rangbeu melie cai, penui mau di lak nage, dede cu au penui mau magede penui kebai kelu gada. 23Acu ngkau kelabe a Pei dede ngkaula. 24Penui kak gade migede teigai kemak tadung Ih teigai melie cai, penui mau dilak nage, dede cu penui ngau de luda nah acu nah a Pei anai de ngkaula dida. 25Dede aide au penui hezai ga rau teu kela de teicang kerane, ‘Penui pekie kega gade acu ngkau.’ 26Ih Peibe dade nnui dage langgai kerabe Helungtaukemlabe, Peibe dade kepetbe kesang Rabe, kegwangdau, pa a ha zierang tei beuzie. 27Dede nnuide a zierang teizie kedanemene nnui raitu gade acu ngngwa la di delu.
ទើបបានជ្រើសរើសហើយ៖
John 15: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
