Job 41
41
1Wuli ukuwesha kumulopola ng'ongolu yivamkema Leviatani yayikala mubahali kwa ndovanu ya somba,
awu kumuwopa mlomu waki kwa luwoyi?
2Wuli, yuwi ukuwesha kwingisha luwoyi mumbula yaki,
awu kutobola malaka vaki kwa logha?
3Wuli, dakuluvi umuwoneli lusungu?
Awu dakuwombeli kwa lishu lya ushishamoyu?
4Wuli dagoli lilaghanu na yuwi,
ghavi ndumindumi waku majuva vosi?
5Dawumkinili kucha mbongu,
awu dawumfughi kwanongwa ya vakavali vaku?
6Wuli, yivafuva somba davamgoleli uchulusi?
davavaghani gati ya vachulusi?
7Wuli, dawutungi ngwembi yaki mufyuma fisongukili,
awu mutwi waki kwa mgoha?
8Pawumuvikila liwoku pambindi yaki,
dawivasuwi ha mgoha na dawuwuyilili ha!
9Akukapusha pawumlola Leviatani,
pawumuwona hela mundu luwongu.
10Kwahela mundu yoyonda yavelili mlulumi,
yagela kumuwolosha.
11Ghani yahigha nenga ndimuhombi?
kila chindu chivelili mumlima ndi changu.
12Danguwombeli ndambu wivelili mawulu vaki na ndambu wuyivelili na liwovi,
liwovi lyaki na ndambu wavayilili.
13Ghani yawesha kumuwopa ngoyi mumlomu waki?
ili amuyendeshi.
14Ghani yawesha kumdawula mlomu waki,
minu vaki vakugola vandu vakapushiwi.
15Mipatu yaki yiibata pamu kucha ngawu,
yidindala kucha lyuma yikutikanyika ha.
16Yiibata pabehi pabehi,
hata uyegha uwesha ha kupita.
17siilumba na kwibata pamu
na kwahela yawesha kusilekanisha,
18Patyemula mivavali yaki yikumelimeta,
na mesu vaki kucha myengi ya lijuva lya pamalavila.
19Mimbamba yikufuma mumlomu yaki,
na mivalivali yikufuma mumlomu yaki.
20Lyosi likufuma mumbula shaki,
nga chingu yichitokota kwa motu wa mateti.
21Lyosi likufuma mumbula shaki,
kucha lyosi lya mibeleghi yiilungula pasi ya chiyungu.
22Liwovi lyaki liva mungulu,
na kokosi kuliyenda vandu vakulitila.
23Njimba yaki yidindala,
na ikamala yikuwesha ha kuwushiwa.
24Chifuva chaki chidindala kucha ligonguveli,
chidindala kucha ligonguveli likomi lidindalili.
25Patandamuka vanaliwovi vakutila,
vakuwuya kumbeli, na kutuva.
26Palimfika lisala akugobuleka ha,
hata mgoha na hata msali wukumgobola ha.
27Mweni akuliwona lyuma kucha lidasi,
na shaba kucha libiki yiliwolili.
28Kwahela msali dawumgoli atuvi,
na mbulungwa sha ludendi siva kucha myeyu.
29Chimbongu chiva kucha lidasi,
na mweni akuseka ngingi ya mgoha pawutula.
30pasi ya mtima waki wuva mbiliwa sivelili vekuveku, kucha migosi yabang'ulili mundu
payenda kuulongolu yikuva kucha mikatulilu ya mihuka ya vasenga.
31Mweni akutikanya mihiva nga machi yivapwata pachikoshu,
na akugubuwa bahali kucha chiyungu cha mafuta.
32Papita akuleka kumbeli likuluwukilu yilimetameta,
mundu angachili mihiva ya soghi.
33Kwahela chiyifwanili na mweni apa pamlima,
chilumbi chingajila ufoyi.
34Akuvalola vosi yivayifuna apa pamlima,
mweni ndi mutwa kwa vala vosi yivavelili na lukilu.
ទើបបានជ្រើសរើសហើយ៖
Job 41: OTNdambBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Ndamba @The Word for The World International and Ndamba Language translation. All rights reserved.