Job 39
39
1Wuli kumanya chipindi cha kulela vameni dasi?
Awu kumuwona kamu njapuli palela?
2Wuli, ukwesha kwivalanga myesi yawu ya kulela vang'ongolu ava?
Wuli, kumanya kucha davaleli chipini liki?
3Veni vakunyunyumala pavalela vana vawo,
na lihingili lya kulela likupela?
4Vana vawu vakunemunila aku kumidasi,
pambeli vakuyenda, vakuwuya kandi ha.
5Ghani yamuleka chihongu dasi ghavi pekesu?
Na ghani yamuwopusolili ng'oyi chihongu dasi?
6Ndimugayila mlima wa kucheja kuva kayaki.
na mlima wa munyu kuva wawu.
7Mweni akwisegha na kuwumba kwa machi,
akupikana ha ngingi sha yayendesha mbutuka.
8Akuyendayenda mufidunda kusaka filivi,
akusaka muhali wowosi ghalyi.
9Wuli, ngufi dajumili kukukimbanikila?
Awu dayikali muligeleli lyaku?
10Wuli, ukuwesha kumkonga lingongola ngufi alimi?
Awu dawumgoli akatuli chitava?
11Wuli, dawumwidumbili kwa liwovi lyaki likomi,
awu dawumlekeli mweni chichuku chaku chidindalili?
12Wuli, damwiyidumbili kucha dayeghi yifibeniwili kaya,
na kukulundikila pala pa kututila?
13Mbuni akupunda mbapatilu shawu kwa seku,
lakini vaweshi ha kuwuluka kucha mbombu yivamkema kolongu.
14Akuvakulila mayi vaki mumuhanga,
ili vahutuki mumuhanga.
15Kunu kayivasuwa kucha liwulu likuwesha kuvavata,
awu ng'ongolu wa kumidasi akuwesha kuvabalula.
16Akuvagolela umakuluhu vana vaki kucha vaki ha,
akwihola ha tabu yaki ya kuvalela.
17Kayivasuwa kucha Chapanga kamkaja luhala,
na kamugayila ha umanyi.
18Lakini pakamda patuvi,
akumseka fwalasi na yula yakwelili fwalasi.
19Wuli, yuwi ndi wamugayilili fwalasi liwovi
awu ndi yiwumupili wagi mtali mungulu shawu?
20Wuli, yuwi nda yiwumgolili awuluki kucha ngumbingumbi
kuwumba kwaki kukuvalilimusha vandu?
21Akukwanda uganga kundenyeku kunu panemilela liwovi lyaki,
akuyenda kutang'ana na vala yivavelili na fidumu.
22Mweni akuchiseka chipwembwi na akutila ha,
wala pawona upanga akuwuya kumbeli ha.
23Fidumu fivatola vala yivakwela fwalasi,
fikwibotanga kwa lishu likomi na kuyaka palijuva.
24Fwalasi ngajila lyogha na kwa maya akuwumila mlima,
wala akuwoloka kwa kutila lishu lya limbalapi ha.
25Kila papikana limbalapi akudeta,
Mgoha ukunungilila kwa kutali,
chikupikanika chivembu cha mkomi wa machonda.
26Wuli, wamuwulili yuwi kuwuluka,
na kukusumbula mbapatili shaki kulola kuchanya?
27Wuli, Litumbu lya ndembu akuwuluka kumbindi kwa kumlamula yuwi,
na kugola chiyumba pambindi ya chidunda?
28Akwikala pambindi ya migonguveli mikomi,
migonguveli mikomi yisongukili ndi luviwu lwaki.
29Kwa kutali akushungulila filivi fyaki,
mesu vaki vakulola kufumila kutali.
30Myoni yaki yikuyonga mwasi,
Pala palivelili lifimba na mweni kava baha.
ទើបបានជ្រើសរើសហើយ៖
Job 39: OTNdambBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Ndamba @The Word for The World International and Ndamba Language translation. All rights reserved.