Job 38
38
Chapanga akumyangula Ayubu
1Topi, Bambu kufuma mulingukumbi,
kamuyangula Ayubu kadeta.
2Ayu ghani yayashinganya maywangu vangu,
kwa filongu fingajila kujakwa?
3Woloki kucha mlulumi,
nongwa dangudashi na yuwi dawunyanguli.
4Yuwi waveli koti pamikagha chikandilu cha mlima?
Topi, ung'ombeli kucha kumanya.
5Ghani yavikili figelu fyaki?
Leki kumanya!
Awu ghani yavikili luwoyi lwa kulingila chikandilu cha mlima?
6Chikandilu chaki chavikiwili pambindi ya liki?
Ghani yavikili ligonguveli lya lusiki?
7Ndondwa sha pamalavila pasisomolagha pamu,
na vana va Chapanga vavika njova kwa seku.
8Ghani yalitatilili lilava lya bahali?
Chipindi palimwayikili kufuma mumilima.
9Nenga ndi yigubikili bahali kwa mafundi,
na chisi chikomi kuva fwali yaki ya wana.
10Ndayivikilili mbaka bahali,
ndiyitatila yivi mahali paki.
11Padetili, “Dawuyendileli kandi ha,
apa ndi davapeleli majinga vaku vavelili na liwovi.”
12Ayubu, mungalilu yaku kulamula kamu, pamalavila yivi,
na kuliwombela lijuva sosumoki?
13Kuyiwombela ha ngesha ya lijuva yigubiki mlima,
na kwiwombela ha yidagi findu fya wafu yifigoleka mungesha.
14Mlima wukughalambuka
vandu vakuwona mlima lipala hela,
findu fyosi fikuwoneka kucha fwali yimelimetishiwili.
15Vandu vawafu davakajiwi ngesha,
na ngesha yikuwusha liwovi lyawu lya kugola wafu.
16Wuli, kufika kamu mufiseselu fya bahali?
Awu kuyendayenda kamu pasi ya mihiva ya bahali?
17Wuli, kulangushiwa kamu mlyangu va vandu yivasovili,
awu kuwuwona kamu mlyangu wa kulyowu lingajila mbelu?
18Kuumanya ukomi wa mlima?
Ung'ombeli leki kufimanya afi fyosi.
19Yiva koti deha ya kuvafikila makalu va ngesha,
Na chisi chikwikala koti?
20Dawuweshi kufiwuyishi kumakalu vaki,
dawuseleki deha ya kuyendela aku kwa mweni?
21Nakaka yuwi ukudayiliwa kumanya afi, nongwa kwikala majuva vatangalili
Nongwa yuwi kwikala myaka yitangalili.
22Wuli, wayingilili kamu mulusanja lwa balafu,
awu kusiwona sanja sha ndonya maganga?
23Ndifivika kwanongwa ya chipindi cha gobuleku,
kwanongwa ya lijuva lya kuleva mgoha mkomi.
24Koti lumuli kuluyenda,
awu aku kuufuma uyegha wa kundamba wuumemili mumlima?
25Ghani yagolili deha ya ndonya aku kululanga,
na ghani yalangushili deha ya lukata aku kumafundi?
26ghani yagoala ndonya mumlima wungajila vandu,
na kugola cheja chingajila vandu?
27Ndonya yikutonya ili mlima wupwti machi
na kugola midasi yimela.
28Wuli! Ndonya yina tati?
Awu ghani yalelili mindwesi ya mitungwi?
29Balafu yafumili muyinda ya ghani?
Na ghani yalelili likungweta kumbindi kwa Chapanga.
30Balafu yikugola machi kuva kucha ligonguveli,
na kumbi ya mihiva ya machi kukwigima.
31Wuli, ndondwa sha chilimila ukuwesha kusiwopa pamu mingongola ya kulimila,
Awu kusihogosha ngoyi sha Olioni?
32Wuli, ukuwesha kusilongosha sayali kwa chipindi chaki,
awu ukuwesha kumlongosha ng'ongolu yivamkema dubu na vana vaki?
33Wuli, kuvamanya malawu va kumbindi kwa Chapanga?
Wuli, ukuwesha kusivika sitavali pamlima?
34Ukuwesha kulandula lishu lyaku mbaka kumafundi,
na kuvalamula mafundi vatonyi ndonya.
35Ukuwesha kululayisha lumuli, na lweni lukuyenda,
na lweni dawukuwombeli, yufwi tuva apa?
36Ghani yavikili luhunja kunda?
Awu ghani yavikili umanyi kumutwi?
37Ghani yaveli na luhala yawesha kuvalanga mafundi,
awu ghani yawesha kuvika fijamanda sha machi kumbindi kwa Chapanga?
38Chipindi lifu kwibata
na milundu ya mafundi kwimata pamu?
39Wuli, ukuwesha kumvingila majabi,
na kuvayikutisha vana vaki yivatopili
40chipindi veni vayififa mumyowu yawu,
awu pavatendela mufisaku?
41Ghani yamugayila ngungulu filivi,
chipindi myoni yaki payimlilila nenga Chapanga,
na pavayeleja yeleja kwa kupota filivi?
ទើបបានជ្រើសរើសហើយ៖
Job 38: OTNdambBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Ndamba @The Word for The World International and Ndamba Language translation. All rights reserved.