Job 37
37
Elihud kayendilela kudeta
1Kwa afi ndima yangu yikubagama,
wukujumba pala pawuvelili.
2Mupikani, chowu cha lishu lyaki,
na kubelema kwa lishu kufuma mumlomu yaki.
3Mweni akulekela lupanga lyaki kufuma kumbindi kwa Chapanga,
na lumuli lwaki lukukwila mbaka kumbembu sha mlima.
4Pambeli lishu lyaki likulindima,
akulindima kwa lishu lya ukomi waki,
na lishu lyaki likupikanika kandi na kandi.
5Chapanga akulindima kwa lishu lya kwikanganika,
akugola findu fikomi fitungajila kufimanya.
6Akwiwombela balafu poneki pamumlima,
akunyunyuta na kutonya ndonya ngomi.
7Akuwoloshaa fichuku fya kila mundu,
ili vandu vonda vamanyi kasi yaki.
8Vang'ongolu va mudasi vakwingila kwififa,
na kwikala mumbaku shawu.
9Lingukumbi likuwumba kufuma pala palukandila,
na lupepu lukomi kufuma mulusanja lwaki.
10Ufuki wa Chapanga ukuyegha balafu,
na ngengileka ngomi ya machi yikwigima.
11Akuvamemesha mafundi machi,
na mweni akuvika kila mahali lumuli lwaki.
12Mafundi vakushengeta kunu na kunu,
na kufigola figoli ngimu wadayila mweni,
palamula mweni dayivi wuwu kwa vandu va kumlima.
13Akuwutonyela ndonya mlima,
akuyegha ndonya ili kuvatova vandu,
na kuutonyela mlima waki na kulangusha utami waki.
14Ayubu, pikani chilongu achi,
nyamali, pikani figoli fya kwikang'anika fya Chapanga.
15Wuli, yuwi kumanya ndambu wavalaghilila,
na kugola lumuli lwaki lung'aliki mumafundi?
16Wulu, kumanya ndambu mafundi wuvaning'inila mululanga?
Achi chigolikili ndi na umanyi waki.
17Chipindi cha chifuki liyegha likuwumba kufuma kuchanya, kwahela yichiwuka mumlima
njimba yaku yichodoka kwa yingwa shafwalili.
18Wuli, ukuwesha kuvawusha mafundi pamu na mweni,
kunu pavatapata kucha lindala?
19Ayubu wutuwuli chilongu liki tumuwombeli Chapanga,
nongwa tukuywanga lipala ha tuva muchisi.
20Wuli, ghani akugela kumuwombela kucha ngudayila kuywanga?
Awu kwaveli mundu akudayiya kumilwa?
21Ponopa ngesha kululanga yikung'alika,
yiva ng'ali ng'ali patwilola,
lulanga lung'alishiwa mbuleteee kwa mafundi.
22Kufuma kalihingila,
Chapanga akwisa na ukomi wung'alili kucha chumang'andu.
23Chapanga munaliwovi yangajila kufikiwa na mundu,
muna seku na goleki akumuwonela mundu ha.
24Kwanongwa ayi vandu vonda vakumtila,
mweni akuvalola ha vandu yivayiwona kucha vana luhunja.
ទើបបានជ្រើសរើសហើយ៖
Job 37: OTNdambBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Ndamba @The Word for The World International and Ndamba Language translation. All rights reserved.