MRK - NUMANA 15
15
Ne Gli Yesɔ agar ben Bilatus
1Amblimblɛ bib, angɔŋgɔŋ abɛ Gli ntun, ben anuŋkub, ben abɛ tsar Atɔra ben bɔbɔk Abɛ te ambuk neka kpa lɛ. Nǝ kpa Yesɔ, te gliu aru agar asak Bilatus ne aŋɔk. 2Bilatus aribu <<Ayi uwa uyi tum ayou Yahudawa mai?>>
Yesɔ adi ba, <<E, ubla anenen,>> 3Angɔŋgɔŋ abɛ Gli ntun agbib bu te aba abɛ vuŋu ne lǝlɛ tetɛk. 4Fe Bilatus atara na rib bu, <<Bau lɛ kai?>> Bau wɔ ba alɛ mbumbur alɛ tetɛk ne atu ami ka?>>
5Yesɔ akyak sak ba ilɛmɛ, fe Bilatus akɔ vuŋ anu.
6Iki yiŋ ndi anai ne mkpaŋ kɛ igyaŋa aneshir ate ben te abɛ zhɔk ba ner nuŋ ne kur ne jaru akɔ zhɔk ba anewu 7Ner nuŋ ndi azhɔu te Barabas ane kukur ne jaru ben anuŋ ndi ne aŋlɔk aneshir. 8Ntsan aneshir anyɛ te di Bilatus abɛ na aba iki ndi abene anai. 9Bilatus adi, <<Izhin di mbǝ nzhɔk zhin itum ane Yahudawa waŋai?>> 10Ne men azhi tedi ayi wub kɛ ne duŋ ba avuŋ Yesɔ asak wa ne aŋɔk 11Fe Angɔŋgɔŋ abɛ Gli ntun akɔ shɔk aneshir te abɛ di Bilatus abɛ zhɔk Barabas
12Bilatus arib ba. <<Nga mna kikin, ben waŋ ndi izhin zhɔu te itum ane Yahudawa ma?>>
13Ate ahwa, Kpaŋ zhi ne wu ne nkunkun!>>
14Bilatus arib ba, <<Tei ni? Ne lalɛ anii?>>
Atana te ahwa, <<Kpaŋ zhin ne wu ne nkunkun kɛ gen!>>
15Bilatus akɔ zhɔk ba Barabas te wa abɛ sik ntsan aneshire asusun. Akɔ duŋ ashur Yesɔ tsik, te avuŋu anab anǝk ba abɛ akpaŋu ne nkunkun kɛ gen.
Abɛ kpaakpa ne mlak Yesɔ
16Abɛ kpaakpa ma akɔ vuŋ Yesɔ te kɔmɔ ne amkpa ane te ambuk ayou itum te zhɔ bɔbɔk abɛ kpaakpa abiŋ amkpa azhiin. 17Akɔ baŋ anklu alɛlɛ dindilim ake su itum asuu, tena nyɛn ŋguŋgu kɛ ncoŋ te abaŋ kɛ asuu nǝ tu. 18Tǝ akɔ agbaru asak ayi nyak, <<Tɔ zhin itum anǝ Yahudawa!>> 19Te klɛ te zen mligu tsik nǝ mkpɔk ki nǝ tu. Te tar agbaru te agbaru asak ayi mu. 20Ndi ne zhabu aklɛ, fe akɔ tun anklu dindilim te kam anklu amaa asuu. Fe akɔ gliu te kɔmɔ ne amkpa ane kpaŋu ne nkunkun kɛ gen.
Ne kpaŋ Yesɔ ne kuŋkun kɛ gen
21Awɔnǝ Kurane, Siman, Tetɛɛ ma Alikzanda ben Rufus, ne agar atsǝn are min ntun, Akɔ sagu ne mgbyamgbyaŋ abɛ baŋ kuŋkun kɛ gene. 22Agli Yesɔ te nyɛ amkpa ndi azhɔu te Golgota (amkpa ne akpukpotu). 23Fe akɔ nǝgu amashir mwamwaŋ ben anǝlik, akyak sou ma. 24Akɔ kpaŋu ne nkunkun kɛ gen. Te vu iki yi su maa gbuŋa agab, te ashur ankeŋkam te kɔte tawa abɛ zhi iki ndi iwa atei baŋ. 25Ne kpaŋu ne nkunkun kɛ gen ne kab arik. 26Ne cɛr lalɛ ma akpaŋ ne nkunkunɔ tedi: <<WAŊA AYI ITUM ANE YAHUDAWA.>> 27Ne na kpaŋ abɛ zhib ayaa ndɔ ben abɔu, izhiin ni ŋɔk li maa, inuŋ ne ŋɔk mla maa. 28Ilɛ kɛ Arik ne shaga 29Aner abǝ gayir agar alɛ ne atu amaa, te ajaŋ atu amen tedi, <<Haha! Iwa ndi udi utei zir akabaŋkɔŋ te meu ne min kɛ bɛr tar, 30ta tu mi zhɔk zi rɛ tu nkunkun kɛ gen!>>
31Angɔŋgɔŋ abɛ gli ntun ben abɛ tsar Atɔra azhabu ne akpa mɛn tedi <<ne ta anuŋ azhɔk,>> te di, <<ama ba azhi ta tu ma zhɔk ba! 32Duŋ zhin Kristi waŋa, Itum ne Isrela, zi rɛ tu nkunkun kɛ gen azizaŋa, te tabǝ yik te tanyɛme.>> Abaŋ ndi ne kpaŋ ba ndɔmɔ ne zhabu tetɛk imenyi.
Iku kɛ Yesɔ
33Ndi kab anzaŋ ne te akpa ne te bu gar yir kab arik. 34Ndi arik ne kam aden Yesɔ azhɔk zhin tedi, <<Elɔi, Elɔi, Lama sabaktani?>> Ndi adi, Arik amuŋ, Arik amuŋ, aye nii duŋu kam goŋ nǝm?>>
35Aner anuŋ ndi aklɛkli ne amkpama awɔ, tedi, <<Wɔ zhin, azho Iliya.>>
36Ner nuŋ akɔ klu, agar abaŋ soso asu ne amashir ane mwamwaŋ, te asuu ne tu mkpɔk ki, te anab anǝk Yesɔ tei abɛ so. Adi, <<Duŋ zhin newu. Tǝ tab tɔ ka Iliya atei nyɛ abaŋu agli azime.>>
37Yesɔ aŋar kɔr te zhin, te zhɔk vli ma.
38Mplenklu kɛ akabaŋkɔŋ ne gbuŋa amplɛ aya rɛ tu gar shin. 39Ndi ngɔŋ ne abɛ kpaakpa, aklikla ne ti kɛ Yesɔ, awɔ zhine te yik ndi azǝn gbaŋ iku, adi, <<Ner waŋa ai Izu Arik ilɛ didige!>>
40Amba anuŋ aklɛkli shaan te zen klɔtɔ. Ne min mǝne ayi Meryamu Magadaliya, Meryamu iya maa Yakubu ambusher ben Yusuu, bǝn Solɔmi. 41Amba abaŋa ne zǝ Yesɔ atsǝn are Galili tena bǝn anegu azɔb. amba anuŋ tetɛk abaŋ ndi ne zeu are Urshelima ayi ne amkpama.
Ne ruu Yesɔ
42Ndi bɛr ŋan itei nyɛ iber yi sɔŋ sik. Amgbalu ne te 43Yusuu ne Arimatiya, ngɔŋ neshir ne min mǝne, uwa maayi azǝn ŋub nyɛ kɔb Arik, ne gar ben Bilatus te abenu abɛ neg wa ikum kɛ Yesɔ. 44Ikime ne neg Bilatus vuŋ anu ndi ne wɔ tedi Yesɔ neka ku. 45Ndi ne awɔ are ben ngɔŋ ayou abɛ kpaakpa ma tedi iyi amɛ, akɔ nek Yusuu ikumɔ. 46Yusuu akɔ lɛb mplɛ anklu klikla, abaŋ ikumɔ aglɛ zǝme, te nyɛn kɛ aku ne anklu aklikla, te zhɔk kɛ ne min bɛ ndi ne ka kɛ ne min nkpaŋ. Tǝ atur nkpaŋ aku anu bɛme. 47Meryamu Magadaliya ben Meryamu iya maa Yusuu ne yik amkpa ndi ne ruu ma.
ទើបបានជ្រើសរើសហើយ៖
MRK - NUMANA 15: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria