MRK - NUMANA 14
14
Ne nuk Yesɔ anyɛ ne Batani
1Ndi igyaŋ yi tuk glak bǝn igyaŋ yi borodi kɛ yaŋ saŋ ne dǝk bɛr yaa, angɔŋgɔŋ abɛ tsik baŋ ne akabaŋkɔŋ ayou Arik bǝn abɛ cɛr lɛ kɛ Musa ne zen wɔb ankɔŋ ndi aba atei vuŋ Yesɔ te aŋunu. 2Fe adi, <<Bata te na amɛ ne mkpaŋ kɛ igyaŋa ba,>> <<Kǝr aneshir abɛ lɛk mgbu ba.>>
3Ndi Yesɔ ne yine Batani, te asɔŋ ali kili ne tu tebur ne kɔb kɛ ner ndi azhɔu te Siman ndi ne yi amkpuk te zen li ikili, iwa nuŋ ne Gli anyɛ ane anyaŋ ndi azhɔu te alabasta te anyɛ, ane nau ne inardi kɛ tsetser. Ne bu anyɛ me te bwau ashur Yesɔ ne tu.
4Aner anuŋ ndi ne yine amkpama akɔ baŋ afuk tedi <<Ayi anii yi cɔk anyɛ ne mgbɔ shushum awaŋa lai? 5Abɛzhi te baŋu alɛb ne azɔb ayi mla ya ihwa kɛ se zhiin te nek abɛ iyah azɔbɔ.>> Fe akɔ vǝu ŋgɔŋ.
6Yesɔ adi ba <<Duŋ zhin newu>> Susun min cɔkla te nii? Ne naam iki didik. 7Izhin yi ndɔ ben abɛ iyah kɔte mkpaŋ takɛ, izhin ibǝ dik nǝk ba kɔte mkpaŋ takɛ. atei nga ba zhin te yi ndɔ ben abɛm kɔte mkpaŋ takɛ ba. 8Ne na iki ndi mgbyamgbyaŋ maa ne nǝgu. Ne abaŋ anyɛ ane mgbɔ shushum anuk me ne kpa te abɛ na kpa muŋ aŋyak agar bɛr iyi rum. 9Mbla zhin zub, Ne amkpa awaŋ ndi ate bla lɛ didik kǝŋe ne gɔŋmimi, atei bla ki yiŋ ndi iwa waŋa ne anai, iki yi shuzhi.
10Fe Yahuda Iskariyɔti, izhin ne miŋ kɛ awur ane yaa ma, akɔ lu agar ben angɔŋgɔŋ abɛ na ndum kɛ Arik te wa abɛ baŋ Yesɔ alɛb ba. 11Ikime ne nek ba nyɛr ne miŋ asusun amen tetɛk te akɔ di aba atei nǝgu azɔb. Fe Yahuda azǝn wɔb alɛla ndi wa atei vuŋu anǝk ba.
Yesɔ ne ikili iyi bɛr tuk glak ben abɛ zeu tsin
12Nǝ bɛr yi kuti yi igyaŋ yi borodi kɛ yaŋ saŋ, ndi mkpaŋ kɛ tsik baŋ ne ven wanta ne te, abɛ zeu tsǝn aribu tedi <<Udi te tabǝ gar nau amkpa ane li kili yi tuk glak neme?>>
13Fe akɔ shar abɛ zeu tsǝn aya, adi ba tedi, <<Tsǝn te yir zhin miŋ ntuno, izhin tei yik ner nuŋ ndi ahru mkpalin amashir. Zǝ zhin ne wu. 14Ndi iner ne kɔbɔ ate yir, <Ine Tsar arib: iki kɛ ta cen imuŋɔ iyi neme, keŋ ndi M tei li gyaŋ yi tuk glak ben abɛ zǝm tsǝn?> 15atei tsar zhin iki adǝdak ngɔŋ, keŋ ndi neka nakǝ anyak. kɔte na zhin ta ikili yi tuk glak amɔ,>>
16Abɛ zeu tsǝne akɔ kɔmɔ, te gar ayir ntuno te yik ikiki me anenen ndi Yesɔ ne naga abla bama. Fe akɔ gar ana ikili aŋyak yi li ne igyaŋ yi tuk glak.
17Ndi amgbalu ne te, Yesɔ ben abɛ zeu tsin awur ane yaa ne nyɛ. 18Ndi asɔŋ azǝn li kili ne tu tebur, adi ba tedi, <<Mbla zhin zub, izhiin ne miŋ min atei baŋ me alɛb, waŋ ndi asɔŋ ali ne agbǝgba azhin ben abɛm.>>
19Asusun amene ne cɔkla, fe akɔ rib Yesɔ ne akpa amen azhi zhiin te di, <<Ayi ngai?>> 20Yesɔ adi, <<Ayi zhiin ne miŋ kɛ awur ane yaa ma,>> <<Iwaŋ ndi asɔŋ afa borodi ne miŋ agbǝgba azhin ben abɛm. 21Izu Neshir atei kɔmɔ ir keŋ ndi ne men acɛr ne atu maa. Zhin zhɔk tu mi ner waŋ ndi atei baŋ Izu Neshir alɛb! Ibǝ rɛ ndi bane aŋliu ba.>>
22Ndi azǝn li kili Yesɔ akɔ baŋ Borodi, te akɔ anyɛr te amun kɛ, te nek abɛ zeu tsǝn, te di, <<Ta zhin; waŋa ayi kpa muŋ.>>
23Fe akɔ na baŋ kpar antse me, te nyɛr te nab kɛ anǝk ba, akɔ ta kɛ so bɔbɔk mǝne.
24Yesɔ adi ba Waŋa ayi azhizhi amuŋ ane kpa nyak, awaŋ ndi ne bwau ashur ne atu aneshir tetɛk,>> 25<<Mbla zhin zub, Bam tei na nsɔ igbar nkunkun iyiŋɛ ba ikam gar bɛr yiŋ ndi M tei sɔi yayas ne kɔb Arik.>>
26Ndi ne duk asem aklɛ, akɔ ru akɔmɔ ne Gbu Zetun.
Yesɔ ne mǝne bla te Biturus atei tun zhi wa
27Yesɔ adi ba, <<Bɔbɔk mine izhin tei klu ŋar,>> <<Ne cɛr tedi:
<<<M tei ŋun ine kyu,
Awanta maa atei klu aŋar.>
28Ndi mte lu ne beh, M tei nkuti min te yir Galili.>>
29Biturus adiu, <<kɔ nkime ate klu aŋar bɔbɔk, Nga bam tei nduŋu ba.>>
30<<Mbla zhin zub,>> Yesɔ adi, <<Aliŋ mdi ne buu yiŋɛ utei tun zhim amkpaŋ atar te agbak abɛ shi atuk amkpaŋ ayaa.>>
31Fena Biturus atsekli te di, <<kɔte yi ndi M tei nku ndɔ ben abɔu, bam ntei kyagu ba.>> Bɔbɔk mǝne anaga na bla nkan zhin yiŋɛ
Yesɔ ne ben Arik ne Getsemani
32Ne kɔmɔ ne amkpa awaŋ ndi azhɔu te Getsemani, fe Yesɔ adi abɛ zeu tsǝne maa, <<Zisɔŋ zhin yaŋa tem gar ben Arik.>> 33Ne vu ane Biturus, Yakub ben Yɔɔna ndɔ ben abɔu, fe susun maa ne lɛnu tena cɔkla tetɛk.>> 34Adi ba. <<Susun muŋ ne cɔkla tetɛk gar yir ankɔŋ ane ku, sɔŋ zhin yaŋa te shur zhin ayi.>>
35Ate naga atib akɔmɔ akɔ zhaku ne mimi te ben Arik te di ibǝ rɛ ndi mkpaŋ kǝŋe bǝ gar kam wa. 36adi, <<Abba, Tetɛɛ,>> <<Une zhi na kɔte nii. Baŋ kpar antse kǝŋe igli tibma. Ba yi ina muŋ ba, duŋǝ bɛ yi na mi.>>
37Ate kam anyɛ ben abɛ zǝu tsǝne anyɛ yik ba akɔ kurna. <<Siman,>> adi Biturus, <<Izhin nak kukur nai? Ba zhin tak zhi sɔŋ tsitsir yir mkpaŋ zhin kai? 38Shur zhin ayi te ben zhin Arik ndi ba zhin tei zhaku ne lɔm mimin ba. Min susun ne tanyɛme, ikpa maa kɛ kyak.>>
39Yesɔ ana kama kɔmɔ te agar ben Arik ir yuŋɔ. 40Ate kama nyɛ, anyɛ yik ba azǝn kurna, te ina ne shak ba kpa. Bane zhi diu ikinuŋ ba.
41Ate kama nyak mkpaŋ kɛ ntar, adi ba, <<Izhin rǝ kukur na ben kur sik? Nǝ mla amɛ! Mkpaŋa ne ka nyɛ. Tɔ zhin, ne baŋ Izu Neshir asak ne aŋɔk aner amimin. 42Lu zhin! Te tabǝ kɔmɔ!>> Tɔ ne baŋ me lɛbɛ waŋ!>>
Nǝ vuŋ Yesɔ
43Ayi ne miŋ kɛ zen lɛ, Yahuda, izhiin ne min kɛ awur ane yaa ma, akɔ nyɛ. Ntsan aneshir ne yi ben abɔu ne hru nzinzigba ben amkpogoki, abaŋ ndi angɔŋgɔŋ abɛ na ndum kɛ Arik, abɛ tsar Atɔra ben Anuŋkub ne shar ba.
44Waŋ ndi atei baŋu alɛbɛ ne ka men bla ba ir keŋ ndi atei vuŋu: <<Iwaŋ ndi M tei vuŋu nku asa amuŋ ayi wa; vuŋ zhi ne wu te Gli zhi ne wu te tabǝ tsǝn ndɔ ben abɛ blɛ.>> 45Ate nak anyɛ gbur akli ne ti kɛ Yesɔ, Yahuda akɔ diu, <<Ine Tsar!>> Te akɔ vuŋu aku ne asa maa. 46Aneshire akɔ kum Yesɔ avuŋ te akpau. 47Ner nuŋ ndi aklɛkli anyaŋ ba akɔ tun anzigba amaa te atsɔm tɔŋ kɛ ine naa ŋgɔŋ ndum ne akaba, akyaŋ.
48Yesɔ adi, <<Nga myi ngɔŋ ayou aner amimin ndi izhin hru nzinzigba ben amkpogoki te izhin bǝ nyɛ vuŋ mei? 49Nga mne yi ndɔ ben izhin kɔte bɛr tayi, te zen tsar ne Akabaŋkɔŋ, izhin ne kyak vuŋ me ma. Tǝ lɛ Arik bǝ shaga.>> 50kɔte ŋɔwa aklu te duŋu.
51Ivǝnenzak nuŋ, ndi ne su anklu akɛ min ankyak, ne zǝ Yesɔ. Ndi ne komo avuŋ, 52ne klu yaŋ anklu, te duŋ anklu amaa.
Yesɔ ne ti kɛ angɔŋgɔŋ aneshir
53Ne baŋ Yesɔ te kɔmɔ ben ngɔŋ nena ndum kɛ Arik, ben angɔŋgɔŋ abɛ na ndum Arik, anǝŋkub ben abɛ tsar Atɔra ne nyɛ biŋ atu. 54Biturus ne zeu shashan, te aklɛkli ne anɔkɔŋ amkpa ane te ambuk ayou ngɔŋ ne na ndum Arik. Tǝ azǝ asɔŋ amɔ ndɔ ben abɛ blɛ te sɔŋ azǝn vli lu.
55Angɔŋgɔŋ abɛ na ndum ne akaba ben bɔbɔk abɛ amkpa ne te ambuk awɔb nkan yiŋ ndi aba atei vuŋǝ agli ne tu ayi Yesɔ te aba bǝ aŋunu, bane yik nkan nuŋ ba. 56Aner tetɛk ne timu asagu, lǝlɛ mǝne nak tsǝn kaŋkaŋ.
57Fe anuŋ akɔ lu aklɛ te timu yiŋɛ asagu: 58<<Tane wɔu udi, <M tei ntsǝk akabaŋkɔŋ ane me ne aŋɔk awaŋa ŋar te me anuŋ ne min kɛ bɛr tar, awaŋ ndi aba ne meu ne aŋɔk ba.>>> 59kɔte amɛ ma lǝlɛ mǝne itsin kaŋkaŋ.
60Fe ngɔŋ ne na ndum ne akabaŋkɔŋ alu aklɛ ne min mǝne te rib Yesɔ, <<Bau bu anu te lɛ ka? Anii aner abaŋa azǝn blai ne atu ami?>> 61Fe Yesɔ aku anu te akyak ilɛmɛ.
Ngɔŋ ne na ndum ne akabaŋkɔŋ ana rib bu, <<Iwa uyi Kristi mei, Izu ne ta anu adidik yi?>>
62Yesɔ adi, <<Ayi nga. Izhin tei yik Izu Neshir akɔsɔŋ ne ŋɔk li kɛ Ngɔŋ te anyɛ ne akpa ayi Shu.>>
63Ngɔŋ ne na ndum ne akabaŋkɔŋ ma akɔ gbu anklu maa aŋa. Arib ba. <<Ta na wɔb lɛ takɛ?>> 64<<Izhin nak wɔb cɔk sak kɛ Arik la. Izhin yik kikin?>>
Bɔbɔk mǝne adiu ne mla ne ku. 65Anuŋ akɔ ruk ante ashuru; te ku amacincii, te shuru ante, te mligu tsik tedi <<Bla ta iki yi ti!>> Fe abɛ blɛ agbaŋu te tsǝgu.
Biturus ne tun zhi Yesɔ
66Ndi Biturus akɔ sɔŋ ne shin kɛ amkpa ne te ambuk, Ven wa nuŋ ndi are ben ngɔŋ ne na ndum kɛ akabaŋkɔŋ anyɛ agbur aklɛ. 67Ate yik Biturus azǝn sɔŋ vli lu, akɔ shuru ayi par.
Adiu, Uwa ma uyi ndɔ ben awɔnǝ Nazara, Yesɔ.>>
68Biturus akɔ tun zhiu ma tedi <<Bam ne zhi iki yi bla mi yiŋɛ ba,>> te akɔ ru agar anɔkɔŋ. Ankyak agbak atuk.
69Ndi ven wa ma te kam ayigu amɔ, akɔ bla abɛ klikli ne amkpama, <<Ner waŋa ayi zhiin ne miŋ mǝne.>> 70Biturus atara na tun.
Ndi mkpaŋ gayir watsɔb, abɛ klikli ne amkpama adi Biturus, <<Unak yi zhiin ne miŋ mǝne, te uyi awɔnǝ Galili.>>
71Biturus akɔ gbar tu maa Arik, te ashe arim ashur ba, <<Bam ne zhi ner waŋ ndi zhin kɛ lǝlɛ ma ba.>>
72Ankyak agbak akɔ atuk mkpaŋ kɛ yaa. Fe Biturus akɔ shu azhi nkanlɛ ndi Yesɔ ne men ablau: <<Utei tun zhim amkpaŋ atar te agbak abɛ tuk amkpaŋ ayaa>> Fe ikpa kɛ Biturus iku sik te akɔ te zhin.
ទើបបានជ្រើសរើសហើយ៖
MRK - NUMANA 14: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria