LUK - NUMANA 20
20
Akyak tanyɛme ne mgbyamgbyaŋ kɛ Yesɔ
1Iber nuŋ yime, Yesɔ azǝne tsar aneshir te na bla ba lɛ didik, ne iki kɛ ku ayi, ankyak angɔŋgɔŋ abɛ bla lɛ kɛ Arik, ben abɛ tsar kenlɛ yi cɛr Musa, a gar bene bɔu. 2<<Bla ta ai mgbyamgbyaŋ ta kɛ u na iki yiŋɛ ne kǝ,>> te di. <<Ai ŋɔwa ne nugu mgbyamgbyaŋ?>>
3A di ba, <<M tei na rib zhin. Blam azhin, 4Isu aneshir ne amashir iyi Yɔɔna, ire shu ka rɛ bene aneshir nii?>>
5Akɔ lɛ ne akpaa men te di, <<Ta te di, <Ire shu,> Atei rib ta, <Tǝ nii yar zhin tau nyɛmɛ?> 6Fe na ta te di, <Ire bene aneshir,> aneshir bɔbɔk atei tyak ta ne mkpaŋ, te ne zhi te Yɔɔna ayi ne bla nek lɛ kɛ Arik.>>
7Fe akɔ diu, <<Bata ne zhi ka are amɛ ba.>>
8Yesɔ adi ba, <<Nga muŋ yi bam bla zhin kai mgbyamgbyaŋ ta kɛ mna ki yiŋɛ ba.>>
Nkan lɛ yi ne sɔŋ ne kɔb kɛ yaa
9Akɔ bla ba nkanlɛ te di: <<Ner nuŋ ne lɔn ahwaŋ inabi ama, te baŋu nek anuŋ te bɛ bene tɔu newu, te lu kɔmɔ ne tsǝn gbagbaŋ ndi ba ne wɔ ŋyak ba.>> 10Nǝ mkpaŋ kɛ kye dɔ kuŋkunɔ ne te ashar gene amaa te bɛ ta dɔ kuŋkunɔ a gliu ma. Ankyak abɛ na ndum ne ahwaŋa avuŋ anu tsik te duŋɔ ŋuro kama kɔmɔ sha. 11Ana shar gen nuŋ iwa mayi ne na vuŋɔ tsik azhɔk ishisha te duŋɔ kɔmɔ sha. 12Atara na shar gen nen tar, avuŋ anu tsik ashur amkpaa te yaru tibɛ.
13<<Fe iner ne ahwaŋa adi, <M tei na kikinei? M tei shar zumuŋ, waŋ ndi mne tanyɛme bene abɛba; kai tɔu ashaga yi.
14<<Ndi amɛ abɛ na ndumo ne yigu, tɛ ru. <Waŋa ayi zu maa,> adi. <Duŋ tabǝ ŋunu, ahwaŋ Tetɛɛ maa ai ka yi amɔr.> 15Fe akɔ tsǝgu agli rumɔ ne ahwaŋ te ŋunu te baŋu tyak zhɔk ne goŋ ganki kɛ arumɔ.
<<Yesɔ arib, iner ne ahwaŋa atei na ba kikini? 16Ataki ne ahwaŋa atei nyɛ ŋlɔk anere te baŋ ahwaŋa nek anuŋ.>>
Ndi aneshir ne wɔ bla yiŋɛ, akɔdi, <<Bata ben te kinuŋ bǝ yeme ba!>>
17Ankyak Yesɔ alǝk ayi atɔ bama te rib, <<Fe bla me zhin kiyiŋ ndi ne icɛre te di:
<<<Mkpaŋ yiŋ ndi abɛ mee ne kyagǝ
Ayi ne anyage ne nju ki>?
18Iwaŋ ndi ate zhaku ne mkpaŋa, atei tsik amlik. Ama waŋ ndi mkpaŋa te zhaku ne tu maa, atei te mbumbur ndi mumuŋ.>>
19Abɛ tsar lɛ ben abɛ tsar nkenlɛ kɛ Arik ne wɔb ankɔŋ ne vuŋu andanda, te ne zhi te ilɛ kɛ bla maa iyi ne atu amen. Ndi amɛ azǝn klu aneshir.
Iyah Kaisar Gandu
20Azǝn zib aza maa, te bene aduŋ anuŋ azǝn ŋubu te na di aba ye abɛ na lɛ didik, te aba abɛ vuŋu ne nkenlɛ maa te abaŋu anǝk angɔŋgɔŋ te duŋ abɛ teu ŋas. 21Izhiin ne min mine aribu tedi: <<Nǝ tsar, tani zhi teu lɛ tena tsar ikiyiŋ ndi rɛ, bau na nyer tu mi naŋ nuŋ ba, ubla ilɛ kɛ Arik anenen. 22Ire te ta bǝ yaa Kaisar gendui?>>
23Yesɔ ne tɔ ba aklɛ te di ba, 24<<Tsar me zhin izɔb. Ayi ti bǝn cɛr yi ŋɔwa isɔŋ ne zobo?>>
25<<Kaisar>> akɔ diu.
Yesɔ a di ba, <<Fe nek zhin Kaisar ki yiŋ ndi iyi Kaisar, nek zhin Arik iki yiŋ ndi iyi Arik.>>
26Ilɛ maa iduŋ ba awɔb ankɔŋ ane vuŋu alakakna akɛne ne du aneshir. Ilɛ maa duŋ ba shur ayu, bane na di kinuŋ ba.
Ikamlu ben ŋaa
27Isadukiyawa anuŋ abaŋ ndi adi ina kam lu ndi neshir ate ku ba yime ba, anyɛ rib Yesɔ. 28<<Ine Tsar, <<Musa ne cɛr te di, ner ate ku yaŋ vǝvǝn ben wa maa, izu mǝne abɛ ta uwa kɔmɔ te ŋlii zumen amumun. 29Fe amunwa amɛ taŋgba. Ine kuti me ne ta iwa ma te lɔ te ku ayaŋ vǝvǝn. 30Ine yaa maa nena tau, 31ne ntar ma nena tau, amɛ itaŋgba mǝne ne ku bɔbɔk iyaŋ amumun. 32Ankyak, iwama ne aku mayi. 33Azizaŋ fa, ne mkpaŋ kɛ kam si abɛ ku, iwama atei yi ayou ŋɔwa ndi ne ŋa ba bɔbɔk mene?>>
34Yesɔ adi, <<Anere abɛ mkpaŋ kǝŋe alulum ata mbǝmba te na gar ŋa. 35Fena abaŋ ndi ne mla tɔ shak ayi ne mkpaŋ yuŋɔ ba tei na kama lu ba tei ta amba ba ne min kɛ abaŋ ndi neka ku batei na ta mbǝmba ba ben abɛ gar ŋa. 36Fe ba tei na ku ba; ne kam ate ndi abɛ shar ayou Arik. Ayi amumun abɛ Arik, ndi ayi ne min kɛ abɛ tei kam si. 37Nǝ atu ayi igɔŋ zizik, Musa ne bla ilɛ kɛ kpo tuk te di abɛ ku atei kam asi, amkpa waŋ ndi ne zhɔ Arik, <Arik ayou Ibrai, ben Arik ayou Ishaku, ben Arik ayou Yakubu.> 38Ba yi Arik abɛ ku ba, ayi ayou aner abɛ vli ben abɔu bɔbɔk avli.>>
39Fe abɛ tsar Atɔra a tanyɛme te di, <<Ine tsar une bla anenen!>> 40Ne muɔ fe nuŋ ba ne na rib bu kinuŋ ba.
Yesɔ mɔ ayi zu ŋɔɔ?
41Fe Yesɔ ne di ba, <<Ayi anii duŋ ba di Yesɔ mɔ ayi zeu Doda? 42Doda ne tu maa ne Zabura ne di:
<<<Arik ne di ngɔŋ amuŋ:
<<Zǝ sɔŋ ne ŋɔk li muŋ
43Mte duŋ abɛ kyagu
Utei caŋ ba ne aza mi.>>>
44Doda ne zhɔu te di <Ngɔŋ amuŋ.> Atei na kikin te yi vǝvǝn amaa?>>
45Ndi aneshir bɔbɔk ne zin wɔu, Yesɔ adi abɛ zeu tsǝne te di, 46<<Izhin bǝ te zee bene abɛ tsar Atɔra, abɛ tsin ne nkluŋklu ngɔngɔŋ te zǝ ntuntun ben abɛ li dub, abɛ wɔb mkpemkpa yi sɔŋ didik ne akaba, ben mkpemkpa yi abɛ tɔ shak ayi ne gyaŋ. 47Alɔm amba kɔ ne kɔbɔ men te anyɛr baŋ mkpaŋ te ben Arik. Atei nek anere abaŋa iyah tetɛk.>>
ទើបបានជ្រើសរើសហើយ៖
LUK - NUMANA 20: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria
