LUK - NUMANA 19
19
Zaka ne ta gendu
1Ndi Yesɔ ne yir Jerikɔ te gara zǝ min ntunɔ. 2Fe neshir nuŋ waŋa ndi azhɔu te Zaka; ayi ŋgɔŋ ne min kɛ abɛ ta gendu, ana yi ne adudunki. 3Ne wɔb yik ka ai ŋɔwa ayi Yesɔ mɔ, ama ne lak akana te yi ner vǝmkpuk, aneshir neyi ne du. 4Akɔ klu akɔmɔ ne tii te gar ayuŋ tiŋ bwab asɔŋɔ tǝ bɛ yigu, ne zhi te Yesɔ atei zǝ amɔ.
5Ndi Yesɔ ne yir amkpama, a lɛk ayi atɔ shumɔ te diu, <<Zaka, zi andanda, M tei ŋgar kɔmi aliŋǝ.>> 6Akɔ nama azǝ te tau aŋɔgɔ yaa.
7Aneshir te nak ayik amɛ, akɔ lɛ mumur, <<Ne yir kɔb kɛ nena zumimiŋ.>>
8Fena Zaka alu aklɛ adidik tedi Ŋgɔŋ, <<Tǝ,Ŋgɔŋ! Baŋ rɛ aliŋ, iki yiŋ ndi yi muŋ M tei ŋgab nkime nek abɛ yaŋ adudunki, fe te yi ndi mne nkyer kinuŋ nta ben nuŋ, M tei yai amkpaŋa nas.>>
9Yesɔ adiu, <<Aliŋe ita zhɔk ne yir kɔb kǝŋe, te neshir waŋa maayi, ayi izu Ibrai. 10Tǝ Izu Nǝshir ne nyɛ te bɛ wɔb tena ta iki yiŋ ndi ne dɔ azhɔk.>>
Nkenlɛ yi abɛ na ndum ka mkpaŋ
11Ndi ne asɔŋ azǝn wɔu, Yesɔ a blaa ba nkenlɛ, ndi ne te gbahir ne Urushelima, ndi aneshir ayik te di kɔb Arik itei nyɛ andanda. 12Adi, <<Neshir waŋ ndi ne ŋliu ne kɔb ŋgɔŋ ne gar ntun nuŋ yi lak te bɛ nyɛn wa Itum tɛka kama nyak. 13Fena, alu azho agɛn amaa amɛ wur te nek ba azɔb amɛ wur tedi, <Kam zhin aŋɔgɔ neyi, mla ne nyak muŋ.>
14Ankyak agɛn amaa akɔ kyagu, te lu ashar anuŋ ne goŋ maa te bɛ blau, <Ba ta ne tanyɛme te neshire abɛ yi itum amɔr ba.>
15<<Ne shuru itu mɔ, ndi amɛ, ne nyak kɔb. Fena, akɔ duŋ azho agɛnɛ abaŋ ndi ne nek ba azɔb ayi kam aŋɔgɔ, te wa abɛ zhi kɔ ayi kin kɔte ŋɔwa ne yik ne sɔŋ ne tu mɔ.
16Fe ine kuti me anyɛ di, <Ŋgɔŋ, azɔb ayiŋ ndi une nǝm ma, mne kam aŋɔgɔ neyi nena nǝm azɔb awur ne tu mɔ.>
17<<Igen amuŋ une na ndum didik!>> Atukɔ amaa adiu, <Ndi une na ki didik ne ki vǝtsɔb, nyɛ Gli ntuntun wur.>
18<<Ine yaa maa anyɛ tedi, <Ŋgɔŋ, azɔb ayiŋ ndi une nǝm ma ne ŋli azɔb amɛ tuŋ ne tu mɔ.
19<<Atukɔ amaa adiu, <Uwa bǝ Gli ntuntun mei tuŋ.
20<<Ankyak igen nuŋ anyɛ te diu, <Atukɔ, tɔ izɔb mi keŋ, mne men kpaa kɛ zhɔk ne mkpɔk anklu. 21Mne klu sisik mi, ulɔ zhi, uwɔb li isha, ubaŋ kiyiŋ ndi bai wa une nai ba tedi iyi mi te na sɛr iyiŋ ndi bau ne tibɛ ba.>>
22<<Atukɔ amaa adiu, <M tei teu ŋas ne nkenlɛ mi, uwa gen ne naki mimin! Amɛ une zhi tem lɔ zhi, te mbaŋ kiyiŋ ndi bai ŋgam ne nai ba tem ndi iyi muŋi? 23Ite yeme, anii ne yaru zhɔk kɛ ne amkpa anǝ nyak azɔbɔ, te bɛr yiŋ ndi mte nyak M tei yik kinuŋ ne yuŋ tu mɔ kai?>
24<<Ankyak akɔdi abaŋ ndi aklɛkli amɔ, <Ta zhin izɔb kɛ waŋa, te nek zhin ne amɛ awur ne kɛ.>
25<<Ŋgɔŋ, akɔ diu, amene yi ne wur!>>
26<Mdik mbla zhin,> iwaŋ ndi ate yini ki, atei na anyaŋu nuŋ, fena iwaŋ ndi ayaŋ ki a tei ta vǝ yiŋ ndi ayime neyi. 27Ndi amɛ, abɛ di aba kyak me iyi, te kǝr me yi itum amen ba, gli zhine ba nyɛmɛ te ŋlɔk ba ne tii muŋ.>>
Yesɔ ne yir Urshelima ndi Tum
28Ndi Yesɔ ne lɛ amɛ, alɔ ku ti te kɔmɔ ne Urushelima. 29Ndi ne te gbahir ne vǝ ntun yi Batani bene Batanya, yaŋ igbu yiŋ ndi azhɔi te Igbu atiŋe akuŋkun Zetun, fe ne shar abɛ zeu tsǝn amɛ ayaa. 30Te di ba, <<kɔmɔ zhin ne vǝ ntun yi ti min amɔ. Izhin te yirǝ, izhin tei yik ne kpa tatur, waŋ di nuŋ bane zǝn yuŋu atɔ ba. Zuk zhin ne wu igli nyɛmɛ. 31Ineshir nuŋ ate rib zhin, <Ŋɔwa adi izhin bǝ zu gu?> Izhin bǝ diu, <Ŋgɔŋ awɔbu.>>>
32Abaŋ ndi ne shar ba ne kate yigu ndi ne blama. 33Ayi ne min kǝ zu gu ma, aner abɛ tatur ma arib ba, <<Ai ŋɔwa adi zhin bǝ zuk Tatur waŋai?>>
34Fe akɔ di, <<Ŋgɔŋ awɔbu.>>
35Agliu agli Yesɔ mɔ, ne lab nkluŋklu mǝne ne goŋ taturo te baŋ Yesɔ asak ne goŋɔ. 36Ayi ne min kǝ tsǝn, aneshir avu nkluŋklu mǝne lab ne ankɔŋ.
37Mkpaŋ keŋ ndi ne tsǝne te yir andǝgǝlɛk ane zi kɔmɔ ne atiŋe akuŋkun ayi gbu Zetun, ankyak abɛ tsǝn amaa akɔ nyɛr te gbara Arik ŋgɔŋ asak ne akɔr amen ne ki ngɔngɔŋ iyiŋ ndi aba ne yigǝ.
38Tedi, <<Inǝk anu adidik ne te ne atu ayi Itum waŋ ndi ne nyɛ ne sak kɛ ŋgɔŋ!>> Sik susun ne shu ben ŋgɔŋ ne gbarshu!>>
39Anuŋ ne min kɛ Ferisawa ne miŋ ntsan kɛ aneshire adiu, <<Ine Tsar, tsaŋ abɛ zeu tsǝn abaŋa!>>
40<<Mdi zhin,>> A tanyɛme, <<Ate kyak lɛ, mkpaŋ tei ŋur ruru.>>
41Ndi ne tsǝne gbahir ne Urushelima te yuŋ aru yik ntuno, akɔ hrie ayi ne tu ayi ntuno 42te di, <<atei wa, mdi wa, abɛdi une zhi tedi bɛr yiŋɛ atei Gli zhin sik susun, amɛ ne sui ayir zhin ma. 43Ibɛre nyɛ ndi abɛ kyak zhin ayi atei mee nkɔn tsǝn, te kam zhin ngir, te bɛ te ikum ben zhin. 44Atei caŋ zhin ashur ne mimi, ben amumun amin abɛ klɛ ne akɔnɔntsin. Ba tei duŋ mkpaŋ nuŋ ne atɔ ayi nuŋ ba, te zhin ne kyak kam tɔ mkpaŋ kǝŋe ndi Arik ne anyɛ atu amin>>.
Yesɔ ne Yis Akabaŋkɔŋ
45Ankyak akɔ yir gar kɛ Akabaŋkɔŋ ŋɔ te kɔ yar aneshir abɛ zen lii dub ne akɔnɔsa ayi mɛ me. 46Ablaa ba te di <<Ne mǝne cɛrǝ,>> <Ikɔ muŋ itei yi kɔb kɛ ku ayi te ben Arik,>; fena izhin kam kɛ te min kɔb abɛ zhib!>>
47Kɔ te bɛr ta yi a zen tsar ne Akabaŋkɔŋ. Ndi amɛ, angɔŋgɔŋ abɛ bla lɛ kɛ Arik, abɛ tsar zhi lɛ cɛr Musa, bǝn acicɛ nuŋkub awɔb ankɔŋ ane ŋunu. 48Ne wɔb ki nau alakakna akana, te ilɛ maa ne baŋ asusun aneshir.
ទើបបានជ្រើសរើសហើយ៖
LUK - NUMANA 19: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria
