LUK - NUMANA 16
16
Nkanlɛ netu ner ne yaŋ bla lɛ didik
1Yesɔ ablaa abɛ tsǝnɛ ma: <<Ine yi ne azɔb nuŋ waŋa ne vǝ ngɔŋ abɛ nau ndumo te avu azɔbɔ avar ate nten. 2Fe a zhɔu ayir min ki te diu, <Aye nii tsǝn tem wɔi ne tu mi? Blam ki yiŋ ndi une nai nǝ min kɛ na ndum mi, te bam na duŋu na ndum kǝŋe ba.
3<<Iwaŋ ndi ne sagu ndum ne ŋɔgo adi tu maa, <M tei na kikin azizaŋa yi? Ŋgɔŋɔ muŋ ata ndumo. Bam yi ne mgbyamgbyaŋ kɛ ka dudu ba, fe Ishisha tem ne ben ki 4Mni zhi ki ndim na ndi, kɔ mte suk ndum muŋ ayaŋa, aneshir atei tam ne akɔb amen.>
5<<Ankyak akɔ zhɔ kɔte neshir waŋ ndi ne ta hria ne aŋɔgɔ maa. Arib ne kuti me, <Ayi kin ŋgɔŋ amuŋɔ zeu?>
6<<<Ambu sɔkwur amɛ tender iyi anyɛ zetun,> adi.
<<Ta azɔb ami, zisɔŋ andanda, te duŋ kɛ ŋli sɔkwur me nas.>
7Fe akɔ rib ne Yaa amaa, Fǝ ihria mi yi kikin?>
Adiu,<<<Ai azhin azhiin kɛ alikama,>
<<A blau, <Baŋ azɔbɔ ami te kam aŋɔgɔ neyi tǝ bɛ ŋliu sɔkwur me tender ne tu mɔ.>
8<<Ŋgɔŋ ne amkpama adi nǝ yaŋ Gli ndum Gli didige ndi ne nakǝ nten. Tǝ Aneshir abɛ gɔŋmimi kǝŋe ayi nten ne na ki men inaŋ aner abaŋ ndi ayi abɛ laŋ abɛm. 9Mbla zhin, na zhin ndum ne adudun ki yi gɔŋmimi te yik akpaa ye tu min, ndi iki me tei klɛ, atei ta zhin ne mkpǝmkpa yi sɔŋ sik.
10<<Iwaŋ ndi ate kiu ki vetsɔb te ne kyui agli anenen, atei nugu ŋgɔŋ, fe waŋ ndi bate zhi kyu ivetsob agli ba, ba atei zhi Gli ŋgɔŋ ba. 11Iye mee ndi bau tei zhi na ndum ne azɔb ndi ne nǝgu ubǝ kam ŋɔgo ayi gɔŋmimi, ŋɔwa atei baŋ azɔb adidik anegui? 12Fe ate yi ndi bau tei zhi na azɔb ayi nuŋ nyak ba, teu na kikin ne ki mi?
13<<Igen ba tei naa aneshir angɔŋgɔŋ ayaa ndum mkpaŋ zhin ba. Ai kyak zhin te ta nyɛmɛ ne zhin, kɔ abɛ nek tu maa ben zhin te kyak nuŋɔ. Bau tei zǝ Arik tena zǝ azɔb ba.>>
14Iferisawa, abaŋ ndi asu ayi ne azɔb, ate wɔ mee akɔ gli Yesɔ. 15A diba, <<Ai zhineba na ki yige ayi te aneshir abɛ yik ne akpamin, ama Arik ne zhi asusun amin. Iki yiŋ ndi aneshir ayige ire ben Arik ba rɛ ba.
Ne na kama tsar
16<<Ibla nkenlɛ ben abɛ na ndum bla tii ne lɛ kɛ Arik ne di te Yɔɔna abe shɛ nyɛ. Ire mkpaŋ yuŋɔ, ilɛ kɛ men ike shu kɛ kɔb Arik ne bla kɛ, ankyak kɔte ŋɔwa asu tu maa tǝ bɛ gara. 17Iyi ne sik te ishu ben gɔŋmimi bǝ naŋ ndɔ inaŋ yiŋ ndi kɔ ntǝ ke ne kɛ cɛr nkanlɛ bai naŋ dɔ ba.
18<<Iwaŋ ndi ate kyak iwa maa tena ta wanuŋ ne lalɛ, kai lulum nuŋ ne ta iwa ndi ne kyagu nena lalɛ maayi.
Ine yi ne adudunki ben Lazaru
19<<Neshir nuŋ waŋ neyi ne adudunki, iki su yi duŋ maa irɛ ŋgɔŋ tena yi ne kɔb didik. 20Ne kɔb maa ine ben ki nuŋ ndi a zhɔu te Lazaru, amkpaa ne ku kpa maa 21aŋub mbumbur kili yiŋ ndi ŋgɔŋɔ nɛ li tǝ nɛ var hrie ne mimi tǝ wa abɛ vu ali. Ane vieu ana nyɛ lak amkpaa ma.
22<<Mkpaŋ ndi ine ben kime ne ku fe ine shar Arik anyɛ baŋu ate zhɔk ne angus Ibrai. Ine yine adudunki nena nyɛ ku maayi tena ruu. 23Nǝ min lu azǝn zhin te tsik kpa alǝk ayi ayik Ibrai tedi wa yik iyah, tena yik Lazaru ne nkɔn sa maa. 24Fena akɔ zhɔu, <Itetɛ Ibrai, wɔ lɔ susun muŋ te shar Lazaru te bɛ yiŋ ven ŋɔk maa ne amashir ayiŋ me lǝlɛne, te myi ne min kɛ yik iyah ne lu.>
25<<Ankyak Ibrai adiu, <Izu muŋ, shuzhi ne mkpaŋ kɛ yine iki didik mi, ndi Lazaru bane yi ne kinuŋ ba, fe azizaŋa Lazaru ai su ayi amaa te iwa uyi ne min kɛ yik yaa. 26Ba amɛ ankyak ba, ne min mɔr bǝn iwa mgbɔk ŋgɔŋ yine angus amɔr, ndi abaŋ ndi atei wɔb ankɔŋɔ ane gar bene bɛ zhin ba yime ba, inuŋ bai glɔ aŋyak ben taba ba.>
27<<A sagu ma tedi, <Tǝm mbenu, tetɛɛ, shar Lazaru ne kɔb tetɛɛ muŋ, 28Tǝm yi ne amun zumɔr amɛ tuŋ. Tǝ bɛ gbaŋ ba atɔŋ, kǝr abɛ na zǝ ankɔŋɔ ane yik iyah awaŋa ba.>
29<<Ibrai adiu, <Ayi ne Musa ben abɛ bla ba lɛ kɛ Arik; Duŋ ba abɛ wɔ ba.>
30<<<Mkyak, tetɛɛ Ibrai,> Adi, <Tǝ nuŋ ne abɛ ku ate gar bene ba, atei duŋ lalɛ men,>
31<<Adiu, <atedi ba tei wɔ Musa ben abɛ bla lɛ kɛ Arik ba, ba tei ta nyɛmɛ ben nuŋ di ne ku te kama lu ba.>>>
ទើបបានជ្រើសរើសហើយ៖
LUK - NUMANA 16: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria
