LUK - NUMANA 15
15
Nkanlɛ wanta ne dɔ
1Ndi abɛ ta gendu ben <<abɛ naki mimin>> Ne zhɔk Yesɔ ne tsutsu te zen wɔu. 2Fe na Iferisawa ben abɛ tsar nkanlɛ alɛ ne: <<Neshir waŋa ata abɛ na ki mimin tena li kili bene ba.>>
3Ankyak Yesɔ abla ba nkanlɛ yiŋɛ: 4<<Te bɛ di inuŋ ne miŋ mine ayi ne awanta sɔkwur te zhiin ne dɔ. Bai duŋ sɔk tres anetres ne amkpa ne kyu te kama te wɔb bu te yigu baliŋ kai? 5Fe ate yigu, batei mlak anyɛr te baŋu asak ne ampa 6te kɔmɔ ne kɔb. Fe atei zhɔ akpa amaa bene akpa abɛ sɔŋ yaŋa akpa te di, <Zok mezhin nyere; te mniyik iwanta amuŋ ndi ne adɔmɔ.> 7Mbla zhin te ye mee atei nyɛr ŋgɔŋ ne shu ne atu ayi ner zhin ne lalɛ waŋ ndi ne duŋ na ki mimin inaŋ aner sɔk tres anetres ndi ayi tsetser.
Nkanlɛ yi dɔ azɔb
8<<Ka abɛdi Iwa waŋ ndi ayi ne azɔb awur fǝ izhin lu yaŋa. Bai lɔ sak lu ne ki laŋ, te kun min kɔbɔ bwe te bɛ wɔb kɛ abaŋ kai? 9Ndi ate yik kɛ, bai zhɔ akpa amaa bene abɛ sɔŋ yaŋ akpa tedi, <Zok mezhin nyere; Mniyik zɔb muŋ keŋ ndi ne dɔ.> 10Nǝ na ye mee, mbla zhin, nyɛr yime ne ayi abɛ shar Arik ne atu yi neshir ne lalɛ ndi ne duŋ lalɛ maa te zǝ Arik.>>
Nkanlɛ yi vǝvǝn ne dɔ
11Yesɔ azǝn le: <<Ineshir nuŋ ayi ne amumun ayaa. 12Fe ivǝtsob o adi tetɛɛ maa, <Tetɛɛ, nǝm ki yiŋ ndi iyi muŋ yi gadu.> Fe akɔ gab ba kime ntǝg yaa.
13<<Bane baŋ mkpaŋ ba, vǝtsɔbɔ ata ki maa bɔbɔk, te gar tsǝn kɛ lak te kɔmɔ ne Ntun nuŋ te vu azɔbɔ maa aŋlɔk ne nyaŋatɔŋ. 14Ndi ne ŋlɔk iki iyi nǝgu ma aklɛ, ijɔŋ ŋgɔŋ ne lu kɔte me fe ba na yi ne kinuŋ yi li ba. 15Ankyak akɔte wɔb ndum kǝ na ne ntuno, inuŋ anugu yɔk anegluk abɛ kɔb. 16Ana vu kili yi shur anegluk go azǝn li, ba nǝgu kinuŋ ba.
17<<Ndi susun maa ne kam nyak, adi, <Amkpaŋa ben tetɛɛ muŋ abaŋ abɛ nau ndum te li kili tena duŋ nki, te ijɔŋ tei ŋun me! 18M tei ŋurkam nyak ben tetɛɛ muŋ te ndiu: Tetɛɛ, mni laa shu lɛ tena laulɛ. 19Bam nayi waŋ ndi uzhɔm tǝ Zumi ba, duŋ mǝ yi izhiin ne min kɛ agɛn ami. 20Ankyak alɔ kɔmɔ te ate yik tetɛɛ maa.
<<Ndi anaga ri yi gbagbaŋ, tetɛɛ maa atɔu azhi te wɔ lɔ susun maa; aklu te yigu, te klau avuŋ te tsar nyɛr maa. 21<<Zu maa adiu, <Tetɛɛ, Mni laa shu tena lau lɛ. Bam ne mla te ubǝ zhɔm te zumi ba.>
22<<Fena tetɛɛ me adi agɛnɛ maa, <Nama! Baŋ zhin anklu akɛ rɛ ŋgɔŋ ayuŋɔ suu. Suu zhin ne wu vǝne ankawun ne vǝnŋɔk maa tena suu akpaza. 23Gli zhin alandɔŋ aŋgɔŋ te yak zhin ne wu. Tǝ tabǝ na igyaŋ ŋgɔŋ te glu nyɛr. 24Tǝ Vǝvǝn amuŋ waŋa ne ku ama ayi tsitsir azizaŋa; ne dɔ ama ne yigu.> Fe akɔ naa gyaŋ.
25<<Ne mee, Izu maa ŋgɔŋɔ ayi ne ahwaŋ. Ate tsǝne te gbahir ne kɔb, awɔ asem ben glu. 26Fe akɔ zhɔ zhin ne min kɛ agɛnɛ te rib bu anii tsǝn. 27<Izumin neka nyak,> a blau, <fe tetɛɛ mi ne yak alandɔŋ aŋgɔŋ te ne nyak kyekye.>
28<<Izu maa ŋgɔŋɔ ate mfu te kyak yir kɔbɔ. Ankyak tetɛɛ maa aru abɛm te benu. 29Fena adi tetɛɛ maa, <Tɔ! Ne se yiŋɛ M zǝn yik iya bam nena ŋglak ilɛ mi nuŋ ba. Ne mee kɔ bɛr zhiin bɔu ne dim ta vǝn wuwu nuŋ yak tem nyɛr ben akpa amuŋ ba. 30Ama izumi waŋ ndi ne ŋlɔk kiki mi ben amba abɛ zǝ alulum ne kama nyak kɔb, fe uyagu alandɔŋ aŋgɔŋ!>
31<<<Izu muŋ,>> tetɛɛ me adi, <kɔte bɛr tayi ndɔ, iki muŋ inayi mi. 32Ndi amɛ tabǝ naa igyaŋ tena nyɛr, te izumin waŋa ne ku fe ayi tsitsir azizaŋa, ne dɔ te ne yigu.>>>
ទើបបានជ្រើសរើសហើយ៖
LUK - NUMANA 15: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria
