Luka 16
16
Mgholokela mkalamuka
1Yesu awalongelili wavulwa ghaki, “Pawelili na mundu avile na hindu na mgholokela ghaki. Hayu avile na hindu akalongelwa yiwa hayu mgholokela ghako awelili akitumila kwa kuyananga hindu ghako.” 2Hinu hayu mundu mnaisa akamkema na kumkonya, “Ni mighalu ghani hai nihyoghanila wangulongelela kwa wenga? Unipeghi mavalangilo gha mapokelo na matumilo gha hindu ghangu, kwaikiva uwesa ng'ogha kuyendelela kuvile mgholokela ghangu kangi.” 3Yula mgholokela akajiwachila mmoyu ghaki, “Niteghola kyani hinaa? Bambu ghangu anguniwinga kulihengu lya nenga, nenga nahela makakala gha kutukutula na nenga ningulola honi kuluwaluwa.” 4Hinaa, ningumanya lila nitelighola, ili paniwingwa lihengu, “Wandu wawese kunipokela kuukaya ghao handa mgholokela.”
5Hinu yula mgholokela, akawakema wala wapalwa kuhipa kwa mkulu ghaki, mmonga mmonga, akamlongela yula wa mtumbula, “Ungupalwa kuhipa mapesa yinga kwa bambu wa nenga?” 6“Na mweni akayanga, ‘Mipipa imia gha mahuta gha libiki lya zaituni.’ Yula mgholokela akamlongela, ‘Utoli likalatasi lyako’ na ughalambuli uyandiki ihamsini.” 7Hinu akamkonya wa ivili, “Wenga ungupalwa kuhipa ninga?” Mweni akamyanga, “Magunila imia gha ngano.” Yula mgholokela akamlongela, “Utoli likalatasi lyako uyandiki isemanini.”
8“Ndiwa yula bambu akamuyinula yula mgholokela mhakata kwa vila aigholili kwa luhala. Kwaikiva wandu wamwinula ng'ogha Sapanga wa mlima wogha hau wangughola lihengu lyao kwa luhala kupiti wandu wamkwinila Sapanga.”
9Yesu akayendelela kuwalongela, wandu ughola uhakata ili kupokela mapesa, “Muwatangi maghanja kwa hindu gha mlima wogha, ili paiyomoleka, mpati kupokelwa kumahala gha machuwa hyogha bila mwihu.” 10Yeyose avile apalili kuwela mundu mchakaka kumighalu misokombi, hayu atewela mundu mchakaka kumighalu mikulunga, na yula avile apalili ng'ogha kuwela mundu mchakaka ng'ogha kumighalu misokombi kangi avile atewela ng'ogha kuwela mchakaka kumighalu mikulunga. 11Ikiva mwenga, pamgholokela hindu muwela ng'ogha na kukwinila na unagha kwa vindu Sapanga awapeghili mumlima wogha hau, Hinu, mtewela ng'ogha wachakaka kumighalu mikulunga gha unagha? 12Na mwenga ikiva mvile ng'ogha wandu wa maha pamgholokela hindu gha mundu ghangi, hinu ni ghani atewakwinila hindu mgholokeli mweni?
13“Kwahela mtumikila anguwesa kutumikila bambu waivili. Kwaikiva atempala mmonga na yula ghangi atemhyomela. Mtewesa ng'ogha kumtumikila Sapanga pamonga na hindu.”
Mavulo wekaweka gha Yesu
Matayu 11:12-13; 5:31-32; Maliku 10:11-12
14Mafalisayo wahyoghanilili ghala hyogha wakatumbula kumuheka na kumpughanya kwaikiva weni ni wapala mapesa. 15Yesu akawalongela, “Mwenga mngujighola yiwa wandu wa maha kuulongolo gha wandu, ila Sapanga angumanya mioyu gha mwenga. Kwaikiva vila vindu vivile vinguwoneka vya utundamilu kwa wandu, vingumghola Sapanga ahyomi.”
16Malaghililo gha Bambu ampeghili Musa na mayandiko gha walota wa Sapanga yatumililwi kuwalongosa mbaka kuhika kwa Yohana Mbatisa. Kuhuma lipindi hali Habali Maha lya Unkosi wa Sapanga ingutangaswa na kila mmonga wangulongelwa kwa njila wekaweka wayingili. 17Ila inguwesekana kundumba na mlima wogha kuhuka ila iwesekana ng'ogha kupungula elufi kuhuma kumayandiko gha laghililo lya bambu ampeghili Musa.
18“Mundu yeyose apala kumpegha mdala ghaki mayandiko gha kumleka na kumposa mdala ghangi angughola ngongola, na mlumi amposayi mdala alekilwi na mlumi ghangi angughola ngongola.”
Mundu avile na hindu na Lazalo
19Yesu akayendelela kulonga, “Pawelili na mundu mmonga awelili na hindu na avalili nguu zya zambalau na mbulete pee, hayu awelili kalikala kwa kujihekelesa mweni kila lelo.” 20Hilahila kumlyango ghaki alikalili mundu avile na hindu ng'ogha lihina lyaki Lazalo awelili akiyeghwa pala, mundu avile na vilonda higha wogha. 21Yula Lazalo awelili akiliwachila kulyegha na kuyukwite kwa mulyo usyeghilili udangilwi kuhuma kwa yula mundu mnaisa. Hata waghalu wahikili na kumhyanga vilonda ghaki.
22Lipindi likahika yula mundu avile na hindu ng'ogha akahova, na watumikila wa kundumba wa sapanga wakamtola alikali pamonga na Ibulahimu. Hilahila yula mundu naisa akahova na akasikwa. 23Na yula mundu awelili mnaisa paawelili akihakilwa na maghaso kula mlima wa wandu wahovili, akalola kundumba, akamlola Ibulahimu kwa utali, na mweni Lazalo awelili pabehi na mweni. 24Hinu yula mundu avile mnaisa akamkema, “Tati Ibulahimu, uniwoneli luhungu na umlaghili Lazalo ataviki kyala kyaki mghati mwamasi yapongi lulimi ghangu, kwaikiva ninguhakilwa nesu kulyoto hali.”
25Ila Ibulahimu akamyanga, “Mwanaghangu, ukumbwike yiwa lipindi uwelili ukomili upokelili mighalu gha maha nesu, ila Lazalo apokelili mighalu ihakata. Ila hinaa anguhekeleswa baha na wenga ungulikoma kumaghaso.” 26Pamonga na hagha, “Kuvile na lyohu likulunga nesu paghati gha twenga na mwenga. Hinu wala wavile haku wawesa ng'ogha kuhika kula kwa mwenga, na wala wavile kula wawesa ng'ogha kuhubuka kuhika haku kwa twenga.” 27Kuulongolo mundu avile na hindu ngoo akalonga, “Ikiva nagha, tati Ibulahimu, ningukuluwa umlaghili Lazalo ayendi ukaya kwa tati ghangu,” 28“kwaikiva nivile na walongo waitano, ayendi akawalemese wakotoho likala kwa kughola mahakata wakayingila mahala haku pavile na mahakili nesu.”
29Ila Ibulahimu akamuyanga, “Walongo ghako wavile na laghililo lya Musa na walota wa Sapanga, wawahyoghanili hagha wogha.” 30Yula mundu avile na hindu ngoo akalonga, “Ng'ogha nagha, tati Ibulahimu, ila mundu paahinduka kuhuma mlima wa wandu wahovili na kuwayendela watelekisela mahakata na kumhyukila Sapanga.” 31“Na mweni Ibulahimu akamlongela, ‘Ikiva watekovekela ng'ogha mayandiko gha Musa na walota wa Sapanga, watewesa ng'ogha kughola kyokyose hata ikiva kahinduka mundu kuhuma kumlima wa wandu wahovili.’ ”
ទើបបានជ្រើសរើសហើយ៖
Luka 16: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
