Luka 15
15
Mlandano wa kondolu ayaghamilili
Matayu 18:12-14
1Lichuwa limonga, watola usulu na wavile na sambi watangala wayendili kumuhyoghanila Yesu. 2Mafalisayo na wavula wa laghilo lya Musa wakatumbula kung'ung'ulika, “Mumloli mundu hayu. Anguwapokela wavile na sambi na kangi angulyegha pamonga na weni.” 3Ndiwa Yesu akawayanga kwa mlandano hau.
4“Ikiva mmonga paghati mwa mwenga kana kondolu imia na mweni akayalamisa mmonga wa weni, ateghola kyani? Ni chakaka atewaleka wala itisini na itisa kumanyahi, na kuyenda kumuhakula yula ayaghamilili.” 5Na mweni paampatili kala, atempapa kukitivi ghaki kwa luheku. 6Paahika ukaya, atewakonya waghanja ghaki na kuwalongela, “Mhekeleli pamonga na nenga, kwaikiva nimpatili yula kondolu ghangu ayaghamilili.” 7Ninguwalongela hilahila, kutevile na luheku nesu kundumba kwaikiva gha kulekiselwa sambi yula mhakata mmonga, kupiti kwa wavile na sambi itisini na itisa wala wangujilola yiwa wa maha na wangupalwa ng'ogha kulekeselwa sambi na kumhyukila Sapanga.
Gwala liyaghamilili
8Yesu akawalongela mlandano ngangi akalonga, “Au tulongi kuvile na mdala kana ligwala lya sendi ikumi, na mweni akaiyaghamila imonga, ghuli, anguwesa ng'ogha kukosa limbamba na kupyaghila lighuta ili kuihakula nesu mbaka aipati? 9Na mweni paaipatili kala, atewakema waghanja ghaki na wandu wa pabehi ghaki kuwalongela, ‘Mhekeleli pamonga na nenga, nilipatili lila ligwala ghangu gha sendi liyaghamilili.’ 10Hilahila, ninguwalongela, havi ndiwa watewela na luheku watumikila wa kundumba wa Sapanga kwaikiva gha mundu avile na sambi mmonga kalekiselwa sambi na kumhyukila Sapanga.”
Mlandano wa mwana ayaghamilili
11Yesu akayendelela kulonga, “Kuwelili na mundu mmonga awelili na wana waivili walumi.” 12Yula msokombi akamlongela tati ghaki, “Tati, unipeghi lipinga ghangu lya hindu ghangu.” Hinu akawapegha wana ghaki hindu ghaki. 13Kuulongolo mayaghani, yula msokombi akakungula na kuwusa hindu ghaki hinu akatumbula mwanja na mapesa apokelili, akayenda kulama kumlima wa kutali na haku akatumila mapesa ghaki kwa kuyananga. 14Kuulongolo paayomola kutumila kila kindu ghaki, njala ngulu ikahumila kumlima hula na mweni akavile kahela chochose. 15Hinu akayenda kuluwa lihengu kwa mwenekaya mmonga wa mlima hula, na mwenekaya yula akamyegha kulitawa lyaki kughola lihengu lya kuwapegha mulyo ghuluwi. 16Kwaikiva Mhongolo yula awelili na njala nesu, hinu akawela na lumatamata lwa kulyegha ghala mahamba gha matungula walyeghili wala ghuluwi, ila kuwelili ng'ogha mundu wa kumpegha chochose. 17Hinu kuulongolo akatumbula kuliwachila mweni na kujilongelela, “Waghola lihengu wa tati ghangu wangulyegha mulyo utangala mbaka wanguleka yasyehilili ila nenga baha ninguhova na njala?” 18Nitehuya kwa tati ghangu na kumlongela, “Tati, nighola uhakata kwa kundumba na ngosa kwa wenga.” 19“Nikotoho kukemwa mwana ghako kangi. Unigholi handa mmonga wa waghola lihengu ghako.” 20Hinu, akatumbula mwanja wa kuhuya kwa tati ghaki.
Paawelili ambila kutali, tati ghaki amlolili, na kumwonela moyu wa luhungu akambhutukila, akamkusukila kwa upalo. 21“Yula mwana akamlongela tati ghaki, ‘Tati, nighola uhakata kwa kundumba na ngosa kwa wenga.’ Nikotoho kukemwa mwana ghako kangi.” 22Ila tati ghaki akawalongela watumikila, “Kwa kuloposela myeghi lihabiti livile maha nesu, na mumviki pete mukyala ghaki na hilatu mumaghulu ghaki.” 23Mumuhinjili ng'ombi msokombi avile na mahuta, tulyeghi na tuhekeleli. 24Kwaikiva awelili handa kahova na hinaa kamkomu kangi, na “Iwachililwi kayaghamila na hinaa kawoneka.” Hinu wakatumbula mhambu pamonga.
25Lipindi lila, yula mwana mkulunga awelili kulitawa. Paasoghelela pabehi na lighuta, akahyoghanila lilohi lya wandu lya uyimbo na wandu wakidinga. 26Akamkema mmonga wa watumikila na kumkonya, “kuvile na kyani?” 27Hayu mtumikila akamyanga, “Mlongo ghako kahuya ukaya, na tati ghako kamhinjila ng'ombi msokombi mweni mahuta kwaikiva kahuya akiva maha na mkomu.”
28“Yula mwana mkulunga akahyoma, akalema kuyingila mghati. Hinu tati ghaki akahuma panji na kumluwa nesu ayingili. 29Ila mweni akamuyanga, ‘Ukumbwike, machuwa ngenju nikutumikila, nitenyula ng'ogha hata laghililo ghako limonga. Unipeghili kyani? Unipegha ng'ogha hata kambuhi kamonga nikahinji nikagholi mhambu na waghanja ghangu. 30Ila mwana ghako hayu alyeghili hindu ghako pamonga na waghola ngongola, paahuya ukaya wenga ukamhinjila yula ng'ombi msokombi mweni mahuta.’ 31Tati ghaki akamuyanga, ‘Mwana ghangu, wenga uvile pamonga na nenga machuwa hyogha, na vyogha vya ukaya ni vya wenga.’ 32‘Ila ipalilwi tuhekeleli na kuheka kwaikiva hayu mfwata ghako awelili kawachilwa kahova na hinaa kamkomu, na iwachiliwi kayaghamila na hinaa angulama.’ ”
ទើបបានជ្រើសរើសហើយ៖
Luka 15: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
