Yohana 9
9
Yesu angumlamisa mundu angalikulola
1Yesu pawelili akityanga, akamlola mundu mmonga angalikulola kuhuma uweleka ghaki. 2Hinu, wavulwa ghaki wakamkonya, “Mvula, ni ghani mweni kughola sambi, mundu hayu au walela ghaki, hata ikamghola kuweleka angalikulola?”
3Yesu akayanga, “Mundu hayu kawela ng'ogha angali kulola kwaikiva gha sambi zyaki mweni, hilahila kwa sambi zya walela ghaki, ila awelekili angalikulola ili makakala gha Sapanga yawoneki yakighola lihengu mghati mwaki. 4Tungupalwa kughola lihengu ghaki yula anilaghilile, ikiwela yambila pamuhi kwaikiva uhiku unguhika lipindi wandu wanguwesa ng'ogha kughola mahengu. 5Paniwela nambila kumlimawogha, nenga ni mhana wa mlima wogha.”
6Badili gha kulonga ghala, akahunya mata pahi akatimbinganya mindakali, akamtyelemeka yula angalikulola kumihu, 7Yesu akamlongela, “Uyendi ukalikuwi ku libosi lya Siloamu.” ingumaanisa, “Mweni kuyeghwa.” Hinu akayenda kulikuwa, akahuya akiwela angulola.
8Hinu, wandu wa pabehi ghaki pamonga na wala wamlolili haku dahile yiwa ni mundu wa kuluwa luwa, wakalonga, “Ghuli, hayu ng'ogha yula kapuku mweni kuwela akitama na kuluwa kuluwa?”
9Wamonga gha weni wakalonga, “Mweni hina.” Wamonga wakalonga, “Mweni ng'ogha,”
ila yula awelekili angalikulola akalonga, “Nenga ndiwa.”
10Hinu wakamkonya, “Hinaa, mihu ghako igubutulikaghuli?”
11Mweni akawayanga, “Mundu yula wangumkema Yesu katimbinganya mindakali, akanityelemeka kumihu akanilongela, ‘Uyendi kulibosi lya Siloamu ukalikuwi.’ Hinu nikayenda na kulikuwa, nikawesa kulola.”
12Wakamkonya, “Kakugha mundu hayu?”
Mweni akalonga, “Nenga nimanya ng'ogha.”
Mafalisayo wangulolesa kulamiswa kwa yula awelile angalikulola
13Hinu wakamyegha hayu mundu awelili angali kulola kwa Mafalisayo. 14Lichuwa hali Yesu paagholili mindakali na kumgubutula mihu mundu yula, liwelili lichuwa lya kupumulila. 15Hinu Mafalisayo wakamkonya mundu yula, “Uwesaghuli kulola?” Akawayanga, “Anityelemikili mindakali kumihu, nenga nikalikuwa na masi hinaa ningulola.”
16Hinu wamonga wa Mafalisayo wakalonga, “Mundu hayu kahuma ng'ogha kwa Sapanga, kwaikiva kakola ng'ogha laghililo lya kupumulila.”
Wamonga wakalonga, “Anguwesaghuli mundu mweni sambi kughola kilangihi handa haki?” Kukawela na mlekanu paghati gha weni.
17Mafalisayo wakamkonya yula angalikulola kwa liyanja lya ipili, “Wenga ndiwa ulamiswa mihu. Ungumlongelelaghuli mundu hayu?”
Akalonga, “Mweni ni mlota wa Sapanga.”
18Wakulu wa Wayahudi wakakwinila ng'ogha yiwa mundu yula mweni kulola yiwa mtumbulo awelili angalikulola. Wakawakema walela ghaki. 19Hinu, wakawakonya wala walela, “Ghuli hayu ndiwa mwana wa mwenga mngulonga awelekili angalikulola? Hinaa kawesaghuli kulola?”
20Walela ghaki wakayanga, “Tungumanya yiwa hayu ndiwa mwana wa twenga na kangi awelekili angalikulola. 21Ila twenga tumanya ng'ogha kila kimhumila hata hinaa kangulola, na kangi tungummanya ng'ogha yula kamghola awesi kulola. Mumkonyi mweni baha, mweni kamnung'una ng'ogha, anguwesa kulitetela mweni.” 22Walela ghaki wailongile nagha, kwaikiva wawatilili wakulu wa Wayahudi, kwaikiva wawelili wajumilana yiwa mundu yoyosi yula ateyitikila yiwa Yesu ni Kilisito atewingwa palighuta lya kuyupila Wayahudi. 23Ndiwa kwaikiva walela ghaki wakalonga, “Mweni kamnung'una ng'ogha mumkonyi mweni.”
24Hinu, wakamkema kangi yula mundu awelili angalikulola kwa lihanja lya ivili, wakamlongela, “Ulongeli uchakaka kuulongolo gha Sapanga! Twenga tungumanya yiwa mundu hayu mweni kukulamisa ni mweni sambi.”
25Mweni akayanga, “Ikiwela namweni sambi nenga nimanya ng'ogha. Ila kindu kimonga hela ningumanya, niwelili mundu ningalikulola, na hinaa ningulola.”
26Hinu, wakamkonya, “Kakugholela kyani? Kagubutulaghuli mihu ghako?”
27Akawayanga, “Nenga niwalongela kala, mwenga mpala ng'ogha kuyughanila, hinu kwakyani mungupala kuyughanila kangi? Ghuli na mwenga mungupala kuwela wavulwa ghaki?”
28Ila vilongosi wa Wayahudi wakamligha wakilonga, “Wenga ni mvulwa ghaki, twenga ni wavulwa wa Musa.” 29Kangi tungumanya yiwa Sapanga ailongile na Musa, ila yula mundu tummanya ng'ogha kahuma kugha.
30Yula mundu akawayanga, “Hau ni mghalu wa kukangasa. Mwenga mumanya ng'ogha kahuma kugha, ila mweni kanigubutula mihu ghangu.” 31Tungumanya yiwa Sapanga anguwahyoghanila ng'ogha wandu weni kumgholela uhakata Sapanga, ila angumhyoghanila mundu yoyosi mweni kumtundamila na kutimilisa mapalo ghaki. 32Kuhuma mtumbulo wa mlima wogha ihyoghanika ng'ogha yiwa mundu kamlamisa mihu mundu angalikulola. 33“Handa mundu hayu kahuma ng'ogha kwa Sapanga, angaliwesa ng'ogha kughola lolose.”
34Weni wakamyanga, “Wenga uwelekili na kulelwa mahala kwa wandu wenikumgholela Sapanga uhakata, unguwesaghuli kutuvula twenga?” Hinu wakamuwinga kuhuma mulighuta lya kuyupila Wayahudi.
Ungalikulola kwa mighalu gha kimpumulo
35Yesu akahyoghanila yiwa wamuwinga mundu yula kulighuta lya kukonganika Wayahudi, akayenda kumuhakula. Hinu paamlolili akamkonya, “Ghuli, wenga ungumkwinila Mwana wa Mundu?”
36Yula mundu akayanga, “Hayu Mwana wa Mundu ni ghani, ili mbati kumkwinila?”
37Yesu akamlongela, “Umlolili kala, na mweni ndiwa hayu mweni kulongela na wenga hinaa.”
38Hinu, yula mundu akalonga, “Ningukukwinila Bambu!” Akamtundamilila.
39Yesu akalonga, “Nenga nihika kumlimawogha hau kulamula wandu, lukani wandu wala walola ng'ogha waloli, na wala weni kuliwachila yiwa wangulola wakotoho kulola.”
40Wamonga wa Mafalisayo wawelili pamonga na mweni pawahyoghanila hagha, wakamlongela, “Ghuli, twenga hilahila ni wangalikulola?”
41Yesu akawalongela, “Handa mngaliwela wangalikulola mngawela ng'ogha na uhakata kwa Sapanga, ila hinaa mngulonga, ‘Twenga tungulola,’ hai ingulangiha mmbila mumgholela uhakata Sapanga.”
ទើបបានជ្រើសរើសហើយ៖
Yohana 9: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
