Yohana 10
10
Mlandano wa mhungaji maha
1Yesu akayendelela kulonga, “Ninguwalongela uchakaka, yoyosi yula yayingila ng'ogha kulihungulu lya kondolu kwa kupitila ndatilo, ila anguyingila kwa njila ghangi hayu kamwihi na mpokola. 2Ila mweni kuyingila kupitila ndatilo hayu ndiwa muhungaji wa kondolu. 3Mgholokela wa lihungulu angumuwoposelela ndatilo mhungaji hayu wa kondolu na kondolu wanguhyoghanila liloi lyaki, mweni anguwakema kondolu ghaki kila monga kwa lihina lyaki na kuwalongosa panji. 4Pakawahumisa panji anguwalongola kuulongolo, na weni kondolu wangumkovekela, kwaikiva wangulimanya lilowi lyaki. 5Ila kondolu hagha wawesa ng'ogha kumkovikela mhenja na kangi watetula mbilo kwaikiva walimanya ng'ogha lilowi lyaki.”
6Yesu awalongilile mlandano hau, ila weni wawesa ng'ogha kumanya kila apalili kuwalongela.
Yesu ni mhungaji wa maha
7Hinu Yesu akawalongela kangi, “Ninguwalongela uchakaka, nenga ndiwa ndatilo gha kondolu.” 8Wala waghangi wogha walongolili kuhika pambila gha nenga ni wawihi na wapokola, na kondolu wawayoghanila ng'ogha. 9Nenga ni handa ndatilo, hinu mundu yeyosi ateyingila kupitila kwa nenga atelokoka, na hayu atepata kila angukipala. 10Mwihi anguhika kwa lukani lwa kuhija, kukoma na kuyaghamisa. Ila nenga nihika mpati kuwela na ukomu, kangi waweli nau kwa utangala.
11“Nenga ndiwa mhungaji wa maha. Mhungaji wa maha angujumila kuhova kwaikiva gha kondolu ghaki.” 12Mundu mweni kughola lihengu lya kuhunga kondolu ili apati mapesa, na kondolu hagha hindu ghaki ng'ogha pakalola ghalumwitu anguhika, hayu anguwaleka kondolu na kutula mbilu, na hinu ghalumwitu anguwakamula na waghangi wangulekanila. 13Mweni angutula mbilu kwaikiva mweni angulola mapesa weka na ng'ogha kondolu. 14Nenga ni mhungaji maha. Ninguwamanya wala wa nenga, na wenikuwela wa nenga wangunimanya nenga, 15handa vila Tati angunimanya, hilahila na nenga ningummanya Tati. Nenga ningujumila kuhova ili kondolu wakotoho kuyaghamika. 16Kangi niwela na kondolu waghangi, wenikuwela ng'ogha wa lihungulu hali. Ingunipala niwakunguli na weni hilahila, na weni watelihyoghanila lilowi lya nenga, hinu patewela na lipinga limonga na mhungaji mmonga.
17“Tati wa nenga angunipala kwaikiva ningulihumisa nihovi ili nipati kuwela mkomu kangi.” 18Kwahela mundu angumboka ukomu ghangu, ila nenga ninguuhumisa kwa kupala mwenibaha. “Nenga niwela na uweso wa kuhumisa, na uweso wa kuutola kangi, havi ndiwa Tati kanilongela nigholi.”
19Pawahyoghanila milando hila kukahumila kangi na mlekano paghati gha Wayahudi. 20Watangala gha weni wakalonga, “Kana lihoka hayu, kangi kana lukwale! Kwa kyani tumyoghanili?”
21Ghangi wakalonga, “Hagha ng'ogha milando gha mundu mweni lihoka. Ghuli, lihoka anguwesa kumghola angalikulola aloli?”
Yesu angulemwa na Wayahudi
22Haku Yelusalemu kuwelili na mhambu wa kukumbwiki kuwoposolwa Lighuta lya Sapanga. Iwelili lipindi lya lupepu. 23Yesu akawela angutyanga mu Lighuta lya Sapanga kulyugha lya Solomoni. 24Hinu, Wayahudi wakamtindila, wakamlongela “Tungupala kumanya yiwa wenga kwa ghani? Handa wenga ndiwa kilisito, utulongeli lipalapala.”
25Yesu akayanga, “Niwalongilili, ila mwenga mkwinilili ng'ogha. Mahengu ninguyaghola kwa uwesa wa lihina lya Tati ghangu yangunihighilisa nenga.” 26Ila mwenga mungukwinila ng'ogha kwaikiva mwenga ng'ogha kondolu wa nenga. 27Kundolu wa nenga wangulihyoghanila lilowi lyangu, nenga ninguwamanya, na weni wangunikovikela. 28Nenga ninguwapegha ukomu wa machuwa hyogha bila mwihu, na weni wateyaghamila ng'ogha machuwa hyogha bila mwihu, na kwahela mundu atewesa kuwahumisa mumawoku ghangu. 29Tati wa nenga anipeghili kondolu hagha ni mkulu kupiti wogha na kwahela mundu mweni kuwesa kuwapokola kuhuma kumawoku gha Tati wa nenga. 30“Nenga na Tati twa mmonga.”
31Hinu, Wayahudi wakatola maganga ili wamtovi na yeni ili wamkomi. 32Yesu akawalongela, “Niwalangiha mahengu matangala kuhuma kwa Tati. Kindu liki paghati gha havi kinguwaghola mnitovi maganga?”
33Wayahudi wakamyanga, “Tungukutova wenga maganga ng'ogha kwaikiva gha mahengu maha, ila kwaikiva gha kumlighu Sapanga ungujighola wenga kwa Sapanga na ikiwela wenga kwa mundu hela handa wandu waghangi.”
34Yesu akayanga, “Ghuli, iyandikwa ng'ogha kumayandiku gha laghililo gha mwenga, mwenga ni milungu?” 35Ikiwela Sapanga kawakema milungu wala wahikilwa na lilando lya Sapanga, na twenga tungumanya yiwa Mayandiko gha Sapanga yangulonga chakaka machuwa hyogha, 36Ghuli mnguwesaghuli kumlongela yula Tati kamhaghula na kumyegha kumlimawogha angulighu, ghuli ni kwaikiva nilongile yiwa nenga ni Mwana wa Sapanga? 37Ikiva ningughola ng'ogha mahengu gha Tati ghangu mkotoho kunikwinila. 38Ila ikiwela ningughola mahengu gha Tati ghangu, pamonga na yiwa mungunikwinila ng'ogha, hinu mkwinili hagha mahengu ghangu. Kwa nagha mtemanya yiwa Tati kamghati gha nenga na nenga na mghati gha mweni.
39Ndiwa Wayahudi wakayesa kangi kumkamula, ila akachulubuka mumawoku ghao.
40Yesu akayenda kangi kumwambu gha lweni Joludani, akayenda mbaka kula Yohana paawelili akibatisa akalikala pala. 41Wandu watangala wakamyendela, wakalonga, “Yohana kaghola ng'ogha mkangaso wowosi. Ila mighalu hyogha awelili kamlongelelela hayu mundu ni chakaka.” 42Wandu watangala wala wawelili pala wakamkwinila Yesu.
ទើបបានជ្រើសរើសហើយ៖
Yohana 10: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
