Yohana 17
17
Yesu anguwaluwila wavulwa ghaki
1Yesu pakayomola kulonga yala kwa wavulwa ghaki, akalola kunani kundumba, akatumbula kuyupa, “Tati, lila lipindi lihika kala! Uwalangihi wandu ukulu wa Mwana ghako ili na Mweni apati kukutundamilisa.” 2Kwaikiva umpeghili uwesa wa kuwalongosa wandu wogha, ili niwapeghi wandu wogha ukomu wa machuwa hyogha bila mwihu. 3Hau ndiwa ukomu wa machuwa hyogha bila mwihu, yiwa wakumanyi wenga ni Sapanga wa chakaka wa weka na kummanya Yesu Kilisito yula umyeghili. 4Nenga nikutundamilisa kumlimawogha hau kwa kutimilisa lila lihengu unipeghili niligholi. 5Hinaa, Tati, unipeghi ukulu hula niwelili nau pambila gha mlima wogha hau kulumbwa.
6“Nighola umanyikani na wandu unipeghili kumlimawogha hau. Weni wawelili wa wenga ukanipegha nenga na lilando lyako waliyitikila.” 7Hinaa wangumanya yiwa vyogha unipeghili vihuma kwa wenga. 8Milando hila unipeghili niwapegha weni, na weni waipokela na kukwinila yiwa chakaka nihuma kwa wenga, hilahila wangukwinila yiwa wenga ndiwa unilaghila.
9Nenga ninguwayupila weni, niuyupila ng'ogha mlima wogha, ila ninguwayupila wala unipeghili, kwaikiva ni wawenga. 10Wogha wenikuwela wa nenga ni wa wenga na wogha wenikuwela wa wenga ni wa nenga, na ukulu ghangu uwoneka kupitila weni. 11Hinaa nenga ninguhika kwa wenga Tati, ninguuleka mlima wogha hau ila weni wahamu, hinu Tati ninguyupa uwagholokeli kwa makakala gha lihina lyako unipeghili ili waweli kindu kimonga handa nenga na wenga vila tuwela wamonga. 12Paniwelili na weni, nenga niwagholokela, kwa uwesa ghako unipeghili. Nenga niwagholokela, hata ikawela kwahela mmonga mweni kuyaghamika, ila yula mweni kupalwa ayaghamili na kughola Mayandiko gha Sapanga yatimili. 13Hinu, hinaa ninguhika kwa wenga na ningulonga mighalu hai nikiwela nambila kumlimawogha hau, ili wawesi kuwela na luheku handa vila nenga ninguhekelela. 14Nenga niwapeghili lilando lyako, ila wandu wa mlima wogha wakawahekelelela ng'ogha, kwaikiva hagha weni kukukwinila, ng'ogha wandu wa mlima wogha hau, handa nenga vila niwela ng'ogha wa mlima wogha. 15Nenga ninguluwa ng'ogha uwahumisi kumlimawogha ila uwagholokeli ili wakotoho kusindwa na yula mhakata. 16Weni ng'ogha wa mlima wogha hau, handa vila nenga niwela ng'ogha wa mlima wogha hau. 17Ningukuluwa uwagholi kuwela wandu ghako chakaka, kuuchakaka ghako, kwaikiva lilando lyako ndiwa chakaka. 18Wenga unilaghilili nenga kumlimawogha hau, na nenga hilahila ninguwalaghila weni kumlimawogha, 19na kwaikiva gha weni nenga mwenibaha ningulihumisa kukutumikila, ili na weni walihumisi kukutumikila kwa uchakaka.
20“Ninguwaluwila ng'ogha hagha wavulwa weka yau, ila ninguwayupila hilahila na wala wogha watenikwinila kupitila lila wateyughanila kuhuma kwa hagha wavulwa.” 21Ninguyupa hagha wogha waweli kindu kimonga. Tati ningukuyupa hagha wogha waweli mghati mwa twenga handa wenga vila uwela mghati gha nenga na nenga mghati gha wenga. Ninguluwa waweli kindu kimonga ili wandu wa mlima wogha upati kumanya yiwa wenga ndiwa unilaghilili. 22Ukulu hula unipeghili na nenga niwapegha weni, ili waweli kindu kimonga handa twenga vila tuwela mmonga. 23Nenga niweli mghati mwa weni na wenga mghati gha nenga, ninguluwa watimiliswi waweli watimila kwa kuwela kindu kumonga, ili mlima wogha upati kumanya yiwa wenga ndiwa unilaghilili, na unguwapala weni handa ungunipala nenga.
24“Tati ningupala wala unipeghili waweli pamonga na nenga kokosi niwela, ili wawesi kulola hula ukulu unipeghili kwaikiva unipalili pambila gha kulumbwa mlima wogha.” 25Tati wa Mmaha mlima wogha ungukumanya ng'ogha, ila nenga ningukumanya. Hagha na weni wangumanya yiwa wenga ndiwa unilaghilile. 26“Nighola umanyikani kwa weni na niteyendelela kughola nagha, ili upalo uwela nau kwa nenga uweli mghati mwa weni na nenga niweli mghati mwa weni.”
ទើបបានជ្រើសរើសហើយ៖
Yohana 17: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
