Matendu 5
5
Uhwangi wa Anania na Safira
1Kuwelili mundu mmonga wamkema Anania na mdala ghaki Safila wawusili litawa lyao. 2Ila Anania na mdala ghaki walaghine kuhigha amonga gha mapesa ghala na kuyegha zila zihighala kwa wandumindumi. 3Hinu, Petelo akamkonya, “Anania, kwa kyani ulilekili Lihyukana liyingili mmoyu ghako ili kumlongela uhwangi Mpumulo Mbuletenesu, kwa kuhigha simonga gha mapesa upokelili kuhuma kulitawa? 4Lipindi unguliwachila kuwusa lila litawa liwela ng'ogha litawa lyako? Na badili gha kuliwusa, hilahila hagha mapesa upokelili ungatumila ng'ogha vila upalili? Hinu kwa kyani uliwachilili kughola mghalu hau? ulongela ng'ogha ughwangi kuulongolo gha wandu ila kuulongolo gha Sapanga!” 5Bahala Anania paahyoghanila nagha, akaguwa pahi, akahova. Wandu wogha wayoghanilili lilando lila watilili nesu. 6Wahongolo wakahika, wakagubika higha ghaki sanda, wakauhumisa panji, wakayenda kuusika.
7Iwachilwa saa itatu kuulongolo mdala ghaki Anania na mweni akayingila mula mghati, akiva kamanya ng'ogha mghalu uhumilili. 8Petelo akamkonya, “Unilongeli! Ghuli mapesa hagha ndiwa hyogha mpokelili kwa kuwusa lila litawa?” Mweni akamyanga, “Hina, ni hagha hela.”
9Hinu Petelo akamkonya, “Kwa kyani mlaghine na mlumi ghako kumyesa Mpumulo wa Bambu? Ulolayi! Wala wandu wayendili kumsika mlumi ghako, hinaa wagholoka kumlyangu na watekutola na wenga kangi.” 10Palapala akahova na akaguila kumaghulu gha Petelo. Wala wahongolo pawayingilili, wakamlola kahova kala, hinu wakamuhumisa panji, wakayenda kumsika pabehi na mlumi ghaki. 11Holu ngulu ikawahumila lipinga limkwinila Kilisito na wogha wayoghanilili mghalu hula wakatila.
Wandumindumi wangulamisa wandu watangala
12Wandumindumi wagholili vilaghihi na makangaso yatangala paghati mwa wandu. Wandu wogha wamkwinila Yesu wawelili wakikongana pamonga kulyugha lya Selemani. 13Wandu wala wamkwinila ng'ogha Yesu wawelili wakiwajumila nesu, hata nagha kwahela mundu ayesili kuwakovekela kwaikiva gha kutila. 14Hata nagha wandu wamkwinila Yesu wakayongeseka, walumi kwa wadala, wayongesekili nesu. 15Hata wandu wawelili wakiwayegha wavina munjila na kuwawonjesa kunani gha vindanda na mahinda ili Petelo paapitili, kisisi kyaki kiwesi kuwayavisa na kuwalamisa. 16Wandu watangala walihika kuhuma kumimbwani itindila Yelusalemu, wakiwayegha wavina ghao na wala wawelili na mahoka, na wogha wakalama.
Wandumindumi wa Yesu wanguhakilwa
17Hinu, mtambika mkulu na wayake wawelili wa lipinga lya Masadukayo wa mahala pala, wakawalonela wandumindumi wifu. 18Hinu, wakawakamula wandumindumi na kuwayegha muuwopwa. 19Ila uhiku mtumikila wa kundumba wa Bambu akafughula milyango mikulu gha muuwopwa, akawayegha panji, akawalongela, 20“Myendi mkagholoki ku lyugha lya Lighuta lya Sapanga mkawalongeli wandu milandu hyogha gha ukomu hau.” 21Ndiwa Wandumindumi wakayenda ku Lighuta lya Sapanga malawila pee na wakatumbula kuvula wandu.
Mtambika mkulu na wayaki wakahika wakaikema njengakaya hyogha gha wagogolo wa Izilaili hinu wakalaghila wagholokela wa Lighuta lya wawopwa kulighuta lya wawopwa wawayeghi wala wandumindumi. 22Ila wala wagholokela pawahikili kula, wawalolili ng'ogha wandumindumi wa Yesu na weni wakayihuyila. wakalongela kila wakilolile kula kulighuta lya wawopwa ku njengakaya. 23Wakalonga, “Tulolile lighuta lya wawopwa liwopwa kila upandi na watovangondo wakigholoka kumilyangu. Ila patufughula mlyango tumlolili ng'ogha mundu yoyose mghati!” 24Mkulu wa wagholokela wa Lighuta lya Sapanga na watambika wakulu pawayoghanila habali hai walikangasili nesu, wakakonyana vila itewela badili gha kuhyoghanila mghalu hula. 25Akahika mundu mmonga, akawalongela, “Wala wandu muwavikili muuwopwa, hinaa wavile kulighuta lya Sapanga, wanguwavula wandu.” 26Hinu, mkulu wa wagholokela wa Lighuta lya Sapanga pamonga na wandu ghaki wakayenda ku Lighuta lya Sapanga, wakawayegha. Ila watumila ng'ogha makakala kuwakamula, kwaikiva wawelili na holu yiwa wandu watewatova maganga.
27Hinu, wakawayegha wandumindumi wala, wakawagholokesa kuulongolo gha njengakaya. Mtambika mkulu akawakonya, 28“Tuwakanisili lipalalipala kukotoho kuvula kwa lihina lya Yesu, hinaa Myalandalili mavulo gha mwenga ku Yelusalemu hyogha na kangi mngupala twenga tuwoneki yiwa tumkoma mundu hayu.”
29Petelo, akiva pamonga na wala wandumindumi ghangi, akayanga, “Tungupalwa tumyitikili Sapanga na ng'ogha wandu. 30Sapanga wa mbuyi wa twenga amhindulili Yesu kuhuma kukihu kwa mwenga kumkoma kwa kumvamba kumpingika. 31Sapanga amyinulili alongosi pamonga ma mweni, akiva Kilisito na mlokola, ili awawesesi wandu wa Izilaili waleki mahakata, wapokeli kulekeselwa mahakata ghao. 32Twenga tulola kwa mihu gha twenga mighalu hai, pamonga na Mpumulo wa Sapanga avile Sapanga anguwapegha wogha wamyitikila.”
33Wajumbi wa hila njengakaya ngulu pawayoghanila milandu hai, wahyomili nesu, hata kupala kuwakoma wandumindumi. 34Ila Mfalisayo mmonga akemilwi Gamalieli awelili mvula wa laghililo na atundamililwi nesu na wandu wogha, akagholoka kuulongolo gha lila njengakaya, akalaghila wala wandumindumi wahumiswi panji kwa lipindi mayaghani. 35Hinu, akawalongela wala wajumbi wa njengakaya, “Mwenga Waizilaeli wayangu, mliwachili kwa yala mngupala kuwagholela wandu hagha. 36Dahile mayaghani, kuhumilili mundu mmonga lihina lyake Teuda, akajilongela yiwa mundu mkola mlima na wandu pabehi imia njechi wakamyitikila. Ila akomilwi, hinu wavulwa ghaki wogha wakapalaghanyika na lihengu lyaki likayomokela baha. 37Kangi, kuulongolo, lipindi lila lya kuvalanga wandu, akahumila Yudasi wa Galilaya. Hayu na mweni alilongosa wandu, ila na mweni kangi akomilwi, na wavulwa ghaki wakapalaghanyika. 38Hinaa kangi ninguwalongela, mkotoho kuwaghola wandu hagha kindu chochosi, muwaleki wayendi! Kwaikiva, ikiva mghalu hau au lihengu lyao hali litumbulilwi na mundu, liteyalamila lyeni. 39Ila ikiva itumbulilwi na Sapanga, mtewesa ng'ogha kuwasinda, ila mtelilola mngutovana na Sapanga.”
Hinu, wandu wogha wa njengakaya wakayitikilana na Gamalieli. 40Nagha wakawakema wala wandumindumi, wakalaghila watovwe hiyatu na kuwakanila wakotoho kuvula kangi kwa lihina lya Yesu, hinu wakawaleka wayendi. 41Hinu, wandumindumi wakahuka panji gha hila njengakaya wakiva na luheku nesu, kwaikiva Sapanga awavalangilili yiwa wavile na utundamilu kwa weni kupughanywa kwaikiva gha lihina lya Yesu. 42Waleka ng'ogha kuvula na kutangasa Habali Maha gha Yesu yiwa ni Kilisito. Wakayendelela kuvula na kutangasa machuwa hyogha ku Lighuta lya Sapanga na mumaghuta gha wandu.
ទើបបានជ្រើសរើសហើយ៖
Matendu 5: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
