Matendu 4
4
Petelo na Yohanawanguyeghwa kunjengakaya
1Petelo na Yohanapawawelili wakiyendelela kulongela na wandu, watambika na mkulu wa watovangondo wa lighuta lya Sapanga pamonga na Masadukayo wakahika. 2Wandu hagha wawelili na lilaka nesu, kwaikiva wala wandumindumi waivili wawelili wanguwavula wandu yiwa Yesu ahindukili, mghalu hau ungulangiha lipala yiwa wahovili watehinduka. 3Kwa nagha wakawakamula Petelo na Yohanana kuwavika muuwopwa mbaka kilau ghaki kwaikiva uhiku uwelili upabehi. 4Ila wandu watangala paghati gha wala wayoghanilili ujumbi ghao hula waulongili Petelo na Yohanawakwinilili, na lipinga lya wavulwa likayongeseka na kuhika pabehi walumi ielufu itano.
5Kilau ghaki, vilongosi wa Wayahudi, wagogolo na wavula wa laghililo gha Musa wakongine pamonga kula Yelusalemu, 6kunjengakaya hai kuwelili na Anasi mtambika mkulu na Kayafa na Yohanana Alekisanda na wamonga wa ukolu wa mtambika mkulu. 7Pawawagholokesha wandumindumi kuulongolo ghao, wakawakonya, “Mwenga mghola mghalu hau kwa ulongosi gha ghani na kwa lihina lya ghani?”
8Hinu kunu Petelo akilongoswa na Mpumulo Mbuletenesu, akayanga, “Mwenga vilongosi na wagogolo wa wandu, 9ikiva mngutukonya lelu kwa lilando lya mghalu maha agholelilwi yula mundu awelili mlemafu na vila alamilwi, 10kwa nagha, mwenga wogha pamonga na Waizilaili wogha mmanyi maheli yiwa mundu hayu angugholoka kuulongolo gha mwenga akiva kalama chakaka, ni kwa uweso wa lihina lya Yesu Kilisito wa Nazaleti, hayu Yesu mumvambili kunani gha lipingika, ila Sapanga kamuhindula. 11Hayu ndiwa yula mayandiko mambuletenesu yangulongela havi kwa mwenga,
‘Liganga lilekilwi na mwenga wachengaji,
liwela hinaa liganga lya maha lya kitumbulo kya lighuta.’
12Kwahela ulokola kupitila mundu ghangi yoyose, kwaikiva kwahela lihina ghangi lipiti Yesu pahi gha ndumba tupeghilwi wandu tutewesa kulokolwa kwa lyeni.”
13Wala wagogolo wa njengakaya, pawalolile yiwa Petelo na Yohanawawelili wandu wasoma ng'ogha na wavile ng'ogha na mavulo yoyose, walikangasili nesu kwa kulola vila wailongile kwa kuikwinila. Wakamanya yiwa wawelili wavulwa wa Yesu. 14Ila pawamwonili yula mundu alamilwi kagholoka pamonga na Petelo na Yohana, wakalepelelwa kulonga chochose. 15Nagha, wakawalaghila wahuki panji gha lighuta lya njengakaya, na weni wakayendelela kutama mghati wakilonga weni kwa weni. 16Wakakonyana, “Tughole kyani na wandu hagha? Wandu wogha walikala Yelusalemu wangumanya yiwa mghalu hau wa kukangasa ugholilwi na weni na twenga tuwesa ng'ogha kulema mghalu hula. 17Ila ili tuwesi kulemesa mghalu hau ukotoho yendelela nesu paghati gha wandu, ingupalwa tuwakanisi wakotoho kulonga na mundu yoyose kwa lihina lya Yesu.”
18Hinu wakawakema kangi mghati na kuwalongela wakotoho kulonga na kuvula kwa lihina lya Yesu. 19Ila Petelo na Yohanawakawayanga, “Mulamuli mwenga baha ikiva ni umaha kuulongolo gha Sapanga kuwatundamila mwenga au kumtundamila Sapanga. 20Ila twenga tuwesa ng'ogha kuleka kulonga mighalu hila tuilolili na tuyoghanilili.” 21Hinu, wagogolo wa njengakaya wakawalongela kwa kukalipa nesu, ila kumwihu wakawaleka wayende. Wawesa ng'ogha kuwahakili kwaikiva wandu wogha wawelili wakimtundamila Sapanga kwa ghala yahumilili. 22Hayu mundu alamisilwi awelili na machuva yapiti ialobaini.
Wandu wamkwinila Yesu wanguyupa
23Pawalekwa wayende, Petelo na Yohanawakahuya kwa wayao, wakawalongela yala walongelilwi na watambika wakulu na wagogolo. 24Na weni wala wamkwinila Yesu pawayoghanila habali zila wakakongana pamonga kumyupa Sapanga wakilonga, “Bambu, wenga ni mghola kundumba na mlima wogha, na bahali na vyogha vivile mumu!” 25Wenga ulongile milandu hagha kwa kupitila Mpumulo wa Sapanga kwa mlomo wa mtumikila ghako tati gha twenga Daudi,
“Kwa kyani wandu Wayahudi ng'ogha wanguhyoma?
na kwa kyani wandu wanguwachila kughola mighalu gha maha ng'ogha?” 26“Wankosi wa mlima wogha wangujiyandala,
wakulu wangukongana pamonga wapati kumhyuka Bambu,
na Kilisito amhaghulili.”
27Na ndiwa inguwoneka, nkosi Helodi na Ponitio Pilato wakonganikili kummbwani hau wa Yelusalemu pamonga na Waizilaili na wandu Wayahudi ng'ogha kwa kughola mawachilo gha maha kwa Yesu, mtumikila ghako Mbuletenesu yula umvikili avile Kilisito ahaghulilwi. 28Chakaka weni, wakonginili ili wagholi mighalu hila uliwachilili kuhuma mtumbulo igholeki kwa uweso wa wenga na mapalo ghako. 29Ila hinaa, wenga Bambu, uloli vila wangututaya holu. Hinu utuwesesi twenga watumikila ghako kuilongela habali ghako kwa makakala makulu. 30Ututangi ili tuwesi kughola makangaso gha wekaweka kwa kupitila lihina lya Yesu mtumikila ghako Mbuletenesu.
31Pawayomolili kuyupa, pala mahala wawelili wakonganila pakatikanilwa, na wogha wakalongoswa na Mpumulo Mbuletenesu. Wogha wakatumbula kutangasa lilando lya Sapanga kwa holu ng'ogha.
Wamkwinila Yesu wangulikala handa walongu
32Wandu wogha wamkwinili yesu wawelili na moyu na mawachilo mamonga. Hinu kwahela hata mmonga ailongile chochose awelili nachu ni hindu ghaki mweni, ila wapeghanili vyogha wavikamulili. 33Wandumindumi wakatangasa uhinduki wa Bambu Yesu kwa makakala nesu na Sapanga akawahighila nesu. 34Pakawela ng'ogha mundu yoyose mulipinga lyao kahela kindu, kwaikiva wogha wakolili matawa au lighuta wayesili kuwusa na kuyegha mapesa gha kila wawelili wakiwusa, 35na kuwapegha wandumindumi mapesa ghala, na kila mmonga apeghilwi kwa kulola lung'ai ghaki.
36Kuwelili na mlawi mmonga, muwelekwa wa Kupulo, lihina lyake Yusufu, yula avile wandumindumi wamkemili Balinaba, ingumanyika, “Mundu wa kutuvika moyu,” 37Na mweni hilahila awelili na litawa lyaki akaliwusa, akayegha mapesa, na kuwapegha wandumindumi.
ទើបបានជ្រើសរើសហើយ៖
Matendu 4: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
