Matendu 6
6
Watangili isaba wa wandumindumi
1Kumachuwa ghala, kuwakwinila wala kuwelili na Wayahudi wailongile kwa kigiliki weni pawayongeseka, kukahumila mang'ung'uliko paghati gha wavulwa walongelili Kigiliki na wala walongelili Kiebulania. Wala wawelili wakilongela Kigiliki wang'ung'ulikili yiwa wadala wa wala wahovitiliwi na walumi ghao wawelili wakiwaisemwa kupeghwa hindu gha kila lelo. 2Hinu, wandumindumi ikumi na ivili wawakemili lipinga lyogha lya wala wavulwa wa Yesu, wakalonga, “Maha ng'ogha twenga kuleka kulilongelela lilando lya Sapanga ili tughole lihengu kupeghana mulyo. 3Hinu, walongu wa twenga, mhaghuli paghati mwa mwenga wandu isaba wavile wamaha wangulongoswa na Mpumulo Mbuletenesu na wavile na luhala, na twenga tutewapegha lihengu hali lya kupegha mulyo. 4Ila twenga, tuteghola kuyupa na lihengu lya kutangasa lilando lya Sapanga.”
5Mghalu hula upalilwi na lipinga lyogha lya wakwinila. Wakawahaghula Sitefano, mundu wa kukola lilando lya Sapanga nesu na avile na kulongoswa na Mpumulo wa Sapanga, Filipu, Pilokolo na Nikasoli na Timona na Palimena na Nikolao wa Anitiokia akiva awelili kakonganika na dini gha Kiyahudi. 6Wakawavika kuulongolo gha wandumindumi, na weni wakawayupila na kuwavikila mawoku.
7Hinu lilando lya Sapanga liyendelelili kuyongeseka na wakwinila kula Yelusalemu wakayongeseka nesu na lipinga likulunga lya watambika wakayitikila.
Sitefano angukamulwa
8Sapanga amhighilili nesu Sitefano, akampegha makakala ngoo na mweni akaghola vilangihi na kukangasa paghati mwa wandu. 9Ila wamonga wa wandu wawelili wa Lighuta lya kukonganika Wayahudi likemilwi, “Lighuta lya kukonganika wayahudi lya wandu wavile pekesu” wasindanili kwa milandu na Sitefano na weni wahumili ku Kulene na ku Alekisandilia; wamonga wahumili ku Kilikia na ku Asia. Wandu hagha wakatumbula kusindana na Sitefano. 10Ila wawesili ng'ogha kumsinda kwaikiva gha luhala ghaki na kwaikiva gha yula Mpumulo amlongosili lipindi paalongelili. 11Hinu, wakawapegha swinda wandu wamonga ili walonge, “Tumyoghanilili Sitefano akimlighu Musa na Sapanga kwa milandu ghaki.” 12Hinu, wakawasongesela wandu na wagogolo na wavula wa laghililo. Na weni wakamhikila Sitefano, wakamkamula na kumyegha kuulongolo gha njengakaya ngulu gha Wayahudi. 13Wakawayegha wandu munjengakaya wa kumlongelela uhwangi wavile wakilonga, “Mundu hayu, kaleka ng'ogha kulonga milandu gha malighu mlighuta hali baha kumbuletenesu pamonga na laghililo lya Musa. 14Kwaikiva tumyoghanilili kala akilonga yiwa hayu Yesu wa Nazaleti ateyalamisa nesu lighuta hali na kupyatilila kutali mighalu gha dahile ghala hyogha tupokelili kuhuma kwa Musa.” 15Wogha wawelili munjengakaya wakamtumbulilila mihu Sitefano, wakaulola wuso ghaki uvile handa Mtumikila wa kundumba wa Sapanga.
ទើបបានជ្រើសរើសហើយ៖
Matendu 6: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
