Malukusa 16
16
Eumuko lyaYesus
(Mateusa28:1-8; Lukasa24:1-12; Yohanesa20:1-10)
1Esiku lyEsabati nhyi lya pita, Malia Mahatalena, Salome naMalia yina yaJokob oya landa oiziba ya nyika nawa, ya ka yaeke olutu lwaYesus. 2Ongula onene yosoondaha, etango nhyi a li piti oya ya kombila. 3Mhanga ye li mondjila, oye ipula ya ti, “Olye teke tu kufila po emanya posheelo shombila? 4Nhyi ya tala kombila, oya mona kutya emanya olya kufwa po nale, nande olya li enene neenghono. 5Nhyi ya ya meni lyombila, oya mona mo omulumenhu omunyasha, e li omutumba kolulyo, a zala onguwo ondeka onhokele, noya li ya tila.
6Omulumenhu okwa ti kuyo, “Inamu tila. Ondishi shii kutya amu kongo Yesus Omunasareta, ngu a li a yaalelwa komushiyakano. Okwa umuka, keli mo mu. Tala pehala mha, opo ya li ye mu tula. 7Indeni mu ka lombwele aalongwa ya ye mwakwatelwa na Peetulusa kutya Yesus ote ke mu tetekele ku Galilea, nghu amu ke mu mona nganhyi e mu lombwela.”
8Oya za mo mombila taa matuka yangwagwana yo taa kakama. Inaa popya sha nande okomunhu, shaanhyi oya li ya tila.
Yesus te ihololele Malia Mahatalena
(Mateusa28:9-10; Yohanesa20:11-18)
9Ongula onene yOsoondaha Yesus nhyi a umuka, okwe yi hololela tango Malia Mahatalena, ngu muye Yesus a li a tamo eemhepo va kaka heyali. 10Malia okwa ya nokwa hokololela ayehe mba ya li haa kala naYesus mba ya li ya nyika oluhovi yo taa lili. 11Ndele nhyi ya uva kutya Yesus oku na omwenyo nokwe mu mona,ina ye mu itaela.
Yesus te ihololele aalongwa yaali
(Lukasa24:13-35)
12Konima yanhyi, Yesus okwe iholola molupe lwa yooloka kaalongwa yaye yaali mhanga ya li ya uka komikunda. 13Oya shuna ndele taa ka lombwela yakwawo, ndele nayo ina ye shi itaela.
Yesus te ihololele aalongwa omulongo naumwe
(Mateusa28:16-20; Lukasa24:36-49; Yohanesa20:19-23; Oilonga1:6-8)
14Lwahwiinina, Yesus okwe ihololela aalongwa omulongo naumwe, mhanga ya li taa li. Okwe ya umanena molwokuhaitayela kwawo nomolwoukukutu womitima vawo nanhyi inaa itaela mba ye mu mona nhyi a umuka. 15Okwa ti kuyo, “Indeni nouyuni auhe, ka uvifileni aashitwa ayehe Onghundana Oiwa. 16Ngu ta itaele ndele ta shashwa ota ka hupifwa, ndele ngu ina itaela, ota ka pangulwa. 17Mba ya itaela otaa ka pewa eenghono vokulonga oikumwifalonga. Mevina lyange otaa ka ta mo eemhepo va kaka, yo otaa ka popya omalaka omape, 18Otaa ka kwata omayoka neenyala, taa ka mwa ouziyo ndele ihawu keya ningi sha. Otaa ka tenheka omake kaanauvu ndele aanauvu otaa ka yeluka.
Yesus ta falwa meulu
(Lukasa24:50-53; Oilonga1:9-11)
19Konima Omwene Yesus nhyi a popya naalongwa yaye, okwa kufwa po ndele ta yi meulu, ndele ta kala omutumba kolulyo lwaKalunga. 20Aalongwa oya ya, ndele taa uvifile aanhu ayehe. Omwene okwa longa pamwe nayo nokwa koleke kutya omauvifo yawo oyo shili noikumwifalonga mbi ya longwa.
ទើបបានជ្រើសរើសហើយ៖
Malukusa 16: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International