Malukusa 15
15
Yesus koshipala shaPilatus
(Mateusa27:1-2; 11:14; Lukasa23:1-5; Yohanesa18:28-38)
1Ongula onene, aawiliki yaayambi oya ongala meendelelo naakulunhu, naalongimhango, noilyo ayihe yaapanguli noya ninga eemhangela vawo. Oya manga Yesus nomalyenge, ndele ta ye mu yandja kuPilatus. 2Pilatus okwe mu pula a ti, “Ooye Ohamba yAajewish?
Yesus okwe mu yamukula, “Ngahnyi to ti.”
3Aawiliki yaayambi oya li taye mu lundile moinima oyindji. 4Natango Pilatus okwe mu pula ta ti, “Iho yamukula sha? Pwaikina komalundilo ayehe nga topopilwa!”
5Ndele Yesus ina yamukula sha, onghee Pilatus okwa li a kumwa.
Yesus ta tokolelwa eso
(Mateusa27:15-26; Lukasa23:13-25; Yohanesa18:39—19:16)
6Poshitufi shOpaasa kehe, Pilatus okwa li e na omukalo, ha mangulula omunavologo umwe, kehe ngu aanhu ya pula. 7Pefimbo mho opwa li pu na omulumenhu umwe wevina Barabbas ngu a li movologo naakolokohi ooyakwawo mba ya li ya lwa nepangelo, nomokukolokoha kwawo oya li ya vipaa aanhu. 8Ongudu yaanhu oye ya, ndele taa tameke okupula Pilatus e ya ningile, nganhyi ha ningi shito. 9Pilatus okwe ya pula a ti, “Omwa hala ndi mu mangululile ohamba yaaJewish?” 10Shaashi okwa li e shi shii kutya aawiliki yaayambi oye mu etela Yesus omolwa ondubo.
11Ndele aawiliki yaayambi oya lombwela aanhu ya indile Pilatus e ya mangululile Barabbas. 12Pilatus natango okwa ti, “Omulumenhu ngu amu ti oye ohamba yaaJewish omwa hala ndi mu ninge ngeepi?”
13Oya ingiva ya ti, “Mu yaalela komushiyakano!”
14Pilatus okwe ya pula, “Hano okwa ninga ouyi washike?”
Ndele oya ingiva mopale ya ti, “Mu yaalela komushiyakano!”
15Ndele molwanhyi Pilatus okwa li a hala okwoopalela aanhu, okwe ya mangululila Barabbas. Okwa vegifa Yesus, ndele te mu yandja, a ka yaalelwe komushiyakano.
Yesus ta shekwa
(Mateusa27:27-31; Yohanesa19:2-3)
16Aakwaita oya fala Yesus meni yoluumbo lweumbo lwombala, ndele taa ifana etanga lyao alihe lyaakwaita. 17Ndele oye mu zaleka onguwo yolwaala lwafa oshiyokahi, oya tunga oshishani shomakwiya, ndele taye shi mu zaleke komutwe. 18Oya tameka oku mu kunda taa ti, “Kala nomwenyo omuleka ohamba yaaJewish!” 19Oye mu vega noshihati komutwe, ndele ta ye mu siile omate, ndele ta ye mu twile eengolo ya fa ngeno ta ye mu inyongamene shili. 20Nhyi ya mana oku mu sheka, oye mu vula onguwo ndjo yolwaala lwafa oshiyokahi, ndele ta ye mu zaleke onguwo yaye mwene. Oye mu kufa, ye ke mu yalela komushiyakano.
Yesus ta alelwa komushiyakano
(Mateusa27:32-44; Lukasa23:26-43; Yohanesa19:17-27)
21Mondjila yawo oya shakena naSimoni, omulumenhu Omukireni a li ta zi kepya a uka koshilando. Oye he ya Aleksandel naRufus. Aakwaita oye mu kondjifa a hinde ko komushaakano waYesus. 22Oya eta Yesus kehala a li ifanwa Golgota, nhyi ashi ti, Ehala Lyomakolotwe. 23Oye mu pa omaviinyu ya tulwa mumwe nomuti hawu ifanwa Omira, ndele Yesus ine ya mwa. 24Nhyi ye mu yalela komushiyakano, oya topolelafana oikutu yaye moku ninga oshihoololifo, kutya otayi ningi yalye nalye. 25Efimbo ndi ye mu yalela komushiyakano, oya li omungoyi wongula. 26Komushiyakano oya li ya shanga ko enyolo lyanhyi shemu yaalelifa komushiyakano a li ti, “ohamba yaaJewish.” 27Pamwe naye opwa li pwa yalelwa aakolokohi yaali, umwe okolulyo namukwawo okolumoho. 28Oshonhyi enyolo olya wanifwa ndi ali ti, ‘Okwa yalulilwa maakolokohi.”
29Aanhu mba ya li taya ende po oya li taya umbu omihe nokupukaapuka komitwe ya ti, “Hamba ooye, ngu to kumunapo Eumbo lyaKalunga, ndele to li tungulula momasiku yatatu, 30ihupifa ooye mwene, oye wiikufe ko komushiyakano.
31Momukalo wa faafana aawiliki yaayambi naalongimhango oye mu sheka ya ti, “Okwa li ha hupifa aanhu yamwe, ndele paife okwa nyengwa okwii hupifa ye mwene! 32Kilistus ohamba yaIslaeli, za ko komushiyakano ngho paife opo tu shi mone, se tu itaele!”
Namba ya li ya yaalelwa pamwe naYesus, oye mu sheka.
Eso lyaYesus
(Mateusa27:45-56; Lukasa23:44-49; Yohanesa19:28-30)
33Mokati komutenya oshilongo ashihe osha siikilwa komilaulu siyo opo nhatu. 34Powili onhinhatu Yesus okwa ingiva mopale a ti, “Eloi, Eloi, lama sabaktani?” Nhyi ashi ti, “Kalunga kange, Kalunga kange, oshishi wa ekela nge hi?”
35Yamwe yomumba ya li ya fikama mho nhyi ye shi uva, oya ti, “Pwaikineni, ota ifana Elia!” 36Wumwe womuyo okwa matuka, ndele ta kufa elapi, ndele te li yaeke omaviinyu omalulu, okwe li tula koshihati, ndele te mu mwefa ta ti, “Teeleleni tu tale nge Elia ote ya oku mu kufa ko komushiyakano!”
37Yesus okwa lila mopale, ndele ta si,
38nelapi ndi lya li lya topola ko ehala ndi eyapukilela Meumbo lyaKalunga olya tauka pokati moipambu iyali okuza pombada siyo opohi. 39Omukulunhu waakwaita ngu a li a fikama komeho yomushiyakano, nhyi a mona nghee Yesus a sa, okwa ti, “Oshili, omulumenhu ngu okwa li Omonamati waKalunga!”
40Okwa li kuna aakiinhu ya fikama kokule taa tala. Mokati kawo omwa li muna Malia Mahatalena, Salome naMalia yina yaYosef naYakopo womushona. 41Aakiinhu mba oya kala ya landula Yesus, nhyi a li mu Galilea no ya kala ta ye mu yakula. Aakiinhu oyendji mba ya li ye ya ku Yelusalema naYesus nayo opo yali.
Yesus ta fundikwa
(Mateusa27:57-61; Lukasa23:50-56; Yohanesa19:38-42)
42Esiku Yesus a yalelwa komushiyakano olya li etitano, esiku ndi Aayuda ye na okwiilongekivila esiku lyEsabati. Nhyi kwali ku li poku toka, 43Yosef Omurimatia oshilyo sha simana shaapanguli, ngu a li a teelela Ouhamba waKalunga okwa ya kuPilatus nokwe mu indile e mu pe olutu lwaYesus. 44Pilatus okwa li a kumwa, nhyi a uva kutya Yesus okwa sa. Okwa ifana omukulunhu waakwaita e mu pule nge Yesus okwa sa nale. 45Nhyi a uva komukulunhu waakwaita kutya okwa sa shili, okwa pitike Yosef a ka kufe ko olutu lwaYesus. 46Yosef okwa landa elapi etokele. Okwa kufa ko olutu lwaYesus komushiyakano ndele te lu vigile melapi ndyo, ndele te lu nangeke mombila ndji ya li ya panda memanya, ndele ta alangatifile po emanya posheelo shombila. 47Malia magdalena naMalia yina yaYosef, oya li taa tala noya mona mha olutu lwaYesus lwa tulwa.
ទើបបានជ្រើសរើសហើយ៖
Malukusa 15: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International