Lukasa 6
6
Epulo kombiga yeSabati
(Mateusa12:1-8; Malukusa2:23-28)
1Mesiku limwe lyEvululuko lyAayuda ha li ifanwa Esabati, Yesus okwa pita mokati komapya. Aalongwa yaye oya teya omitwe voilya ndee taa fengele eemuma pomake yao ndee taa li. 2Aafalisai yamwe oya pula ya ti, “Omolwashi amu ningi nhyi inashi pitikwa okuningwa pamhango mEsiku lyEvululuko?” 3Yesus okwa yamukula a ti, “Nani ina mu lesha, nhyi David naanhu yaye ya li ya ninga nhyi ya li ya sa ondjala? 4David okwa ile mOtembeli, ndee ta kufa mo eemboloto vi va li va yambelwa Kalunga, ndee ta pe naanhu yaye. Eemboloto kava li va pitikwa okuliwa komunhu kehe, ndele okaayambi ayeke.” 5Yesus okwa ti, “Omona womunhu oye Omwene wEsiku lyEvululuko.”
Omulumenhu e na oshikaha sha lemana
(Mateusa12:9; Malukusa3:1-6)
6Mesiku lyEvululuko ekwao, Yesus okwa ya mOshinagoga, ndee ta longo aanhu. MOshinagoga omwa li omulumenhu e na oshikaha shokolulyo sha lemana.
7Yamwe yomaalongimhango nayamwe yomAafalisai oya li ya hala etomhelo lyokulundila Yesus, onghee oya kala ye mu kotokela, ya tale nge ota eluva mEsabati. 8Yesus okwa vibulula omavilaavilo yao, nokwa ti komulumenhu woshikaha sha lemana, “Fikama, ila komeho.” Omulumenhu okwa fikama, ndee ta yi komeho. 9Yesus okwe ya pula a ti, “Oshishi sha pitikwa okulongwa mEsiku lyEvululuko, okulonga ouwa ile okulonga ouyi, okuhupifa omwenyo ile okuwu kanifa?” 10Yesus okwa tala oipala yaayehe mba ya li po omutumba, ndee ta lombwele omulumenhu ngo ta ti, “Ukililifa oshikaha shoye.” Omulumenhu okwe shi ukililifa, noshikaha shaye osha yeluka.
11Aafalisai naalongimhango oya li ya handukila Yesus neenghono, noya kundafana kombiga yanhyi ye na oku mu ninga.
Yesus ta hoolola aatumwa omulongo nayaali
(Mateusa10:1-4; Malukusa3:13-19)
12Limwe lyomomasiku ngo, Yesus okwa ya kondudu a ka yalikana. Okwa kala ko ousiku auhe ta yalikana kuKalunga. 13Nhyi kwa sha, okwa ifana aalongwa yaye ayehe, ndee ta hoolola mo aalongwa omulongo nayaali, ndee teya luku Aayapostoli kokutya Aatumwa, 14Oya li nee, Simoni, ngu Yesus a luka Peetulusa, namumwaina Andiliasa, naYakopo naYohanesa naFilipusa naMbatolomeus, 15Mateusa naTomasa naYakopo naAlfeusa, naSimoni (ngu ha ifanwa kutya okuhole oshilongo shaye), 16naYudas yaYakopo naYudas Iskaliot ngu a ka kengelela Yesus.
Yesus ta longo ye ta eluva
(Mateusa4:23-25)
17Yesus okwa londoloka ko kondundudu pamwe nAatumwa omulongo nayaali. Okwa fikama pehala lya yelekana, pamwe nongudu onene yaalanduli yaye. Opwa li ongudu yaanhu ya za muYudea ashihe noyomuYelusalema nomoilando yopomunghulo wefufa Tilus naSidon, ye uya oku mu pwaikina nokueluvwa komauvu yao, 18na mba ya li ya hepekwa keemhepo va kaka oya eluvwa. 19Naanhu ayehe oya kala ya hala oku mu kuma, shaanhyi muye omwa li amu zi eenghono, va eluva ayehe.
Ehafo noluhovi
(Mateusa5:1-12)
20Yesus okwa tala kaalongwa yaye, ndee ta ti,
“Aanelao onye mba mwa hepa,
oshonhyi ouhamba waKalunga oweni.
21Aanelao onye mba mwa sa ondjala nganhyi,
oshonhyi amu ka kutifwa.
Aanelao onye mba amu lili nganhyi,
oshonhyi amu ka yola.”
22“Aanelao onye, ngeege aanhu taye mu tondo, taye mu anya, taye mu tuku, taye mu ula nayi molwa Omona wOmunhu! 23Nge amu shi ningilwa hafeni, ndee amu vana, molwanhyi ondjabi yeni onene oyi li meulu. Oshonhyi noohe osho ya ningile aahunganeki.
24Ndele oihuna oifike peni kunye mba aakengeli nganhyi ndji,
omwa lumba eenghalamwenyo veni moulinawa ndee ashi ka kala oshiviyu kunye.
25Oihuna oifike peni kunye mba mwa kuta nganhyi,
oshonhyi amu ka sa ondjala.
Oihuna oifike peni kunye mba amu yolo nganhyi,
oshonhyi amu ka nyika oluhovi nye amu ka lila.”
26“Oihuna oifike peni nge aanhu ayehe taye mu popile mouwa, oshonhyi noohekulu osho ya popile kaahunganeki aanaipupulu.”
Holeni aatondi yeni
(Mateusa5:38-48; 7:12)
27“Ndele nye mba mwa pwaikina nge andi mu lombwele, holeni aatondi yeni, mba ye mu tonde ya ningileni ouwa, 28yambekeni mba taye mu fingi, yalikaneneni mba taye mu sheke. 29Ngu teku vege kolupanda lumwe, mu efa a vege nokulukwao. Ngu teku kufa oshikutu shokombada, nanhyi shokohi shi mu pa. 30Kehe ngu teku indile, mu pa, nangu teku kufa sha, ino shi mu pula eshiku alulile. 31Ningileni yakweni nhyi mwa hala okuningilwa. 32Nge omu hole ike mba yemu hole, amu mono epandulo lyashi? Oshonhyi naalunde oye hole ike mba ye ya hole. 33Nge amu ningile ike ouwa mba haye mu ningile ouwa, amu mono epandulo lyashi? Oshonhyi naalunde osho haa ningi. 34Ngeege amu yandja ike kumba mwa teelela yeshi mu yalulile, amu mono epandulo lyashi? Shaanhyi naalunde ohaa yandja ike kaalunde, ya yalulilwe shi fike punhyi ya li ya yandja. 35Ndele nye, holeni aatondi yeni, nye mu ya ningile ouwa. Yandjeni, nye muha teelele okuyalulilwa sha, opo ondjabi yeni yi ninge onene, nye mu ninge oyana yaKalunga Wopombadambada. Oshonhyi ye omuwa kumba ihaa pandula nokumba aalunde. 36Kaleni mu na onghenda nganhyi Ho weni e na onghenda.
Okupangulafana
(Mateusa7:1-5)
37Inamu pangula yakweni opo Kalunga inemu pangula. Inamu tokola opo Kalunga inemu tokola. Viminafaneni po, opo mu viminwe po. 38Yandjeni opo Kalunga e mu pe. Amu ka pewa oshiyelekifo sha uva, ashi hunga, sha findwa, ashi tika, ndele ashi tulwa momakolo yeni. Oshonhyi oshiyelekifo nhyi amu yelekele nasho yakweni, osho nghaa Kalunga teke mu yelekela nasho.”
39Yesus okwe ya lombwele eele a ti, “Omuposi ota vulu nghaa okukwata mukwao koshiti? Ayehe yaali ihaa wile melambo? 40Kakuna omulongwa e vule omulongi waye, ndele nge omulongwa a mana okulongwa, opo ta kala e fike pomulongi waye.
41“Ongeepi u wete okambodi meiho lyamukweni, oye kuwete endagalati meiho lyoye mwene? 42Ongeepi to vulu okulombwela mukweni, ‘Kaume, andiya ndi kufe mo okambodi ke li meiho lyoye,’ ndee endagalati ndi li li meiho lyoye ku li wete? Mwiiningifi ooye, kufamo tango endagalati ndi li li meiho lyoye opo u vule okumona okambodi ngha ke li meiho lyamukweni.”
Omuti noiyimati yawo
(Mateusa7:16-20; 12:33-35)
43Omuti omuwa ihau vulu okwiima oiyimati oiyi, nomuti omwii ihau vulu okwiima oiyimati oiwa. 44Kehe omuti ohau vibululwa koiyimati yao. Eenghwiyu ihavi vulu okulikolwa komano, nomandjebele ihaa vulu okulikolwa koshihwa sheno. 45Omunhu omuwa ota holola ouwa kuza momutima waye omuwa. Osho nghaa nomunhu omwii, ota holola ouyi kuza momutima waye omwii. Oshonhyi okanya ohaka popi nyi sha siikililwa momutima.
Aatungingulu yaali
(Mateusa7:24-27)
46“Omolwashi hamu ifana nge, ‘Omwene, Omwene,’ ndee ihamu longo nhyi andi mu lombwele? 47Kehe ngu te ya kwaame ndee ta pwaikine eehapu vage ndee ta vulika kuvo, nandi mu pe oshihoolelwa kutya okwa fa shi. 48Okwa fa omunhu ta tungu eumbo, ta fe mopale ndee ekanghameno te li tungile kemanya. Eelu olye ya, nefundja olya panuka ko ndee a li hanga eumbo ndi, ndele inali teka po, shaanhyi olya li lya kola. 49Ndele kehe ngu ta uvu eehapu vage, ndee iha vulika kuvo, okwa fa omunhu a tungila eumbo lyaye peheke, ina tungila po ekanghameno lyasha. Eelu nhyi lye ya, eumbo olya teka po, nekumauko lyalyo olya li enene.”
ទើបបានជ្រើសរើសហើយ៖
Lukasa 6: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
