Lukasa 5
5
Yesus ta ifana aalongwa yotango
(Mateusa4:18-22; Malukusa1:16-20)
1Esiku limwe Yesus nhyi a li a fikama pefuta lyaGenesaleta, aanhu oye mu ongalela, ya pwaikine ohapu yaKalunga. 2Okwa mona eewato mbali vili pomukunghulo wefuta, ndele aakwati yeehi oya hangika kaye li po yaka koha eenhete vao. 3Yesus okwa ya muimwe yomeewato vo, mundji yaSimoni, nokwe mu pula e yi heenife komeho kanhiki, yi ze ko komunghulo wefuta. Yesus okwa kala omutumba mowato ndjo, ndee ta longo ongudu yaanhu.
4Nhyi a mana okupopya, okwa lombwela Simoni a ti, “Ukifa owato mokati kefuta, ndee amu umbile eenhete veni momeya mu kwate eehi.”
5Simoni okwe mu yamukula a ti, “Mulongi, ousiku auhe otwa longa nouviinini ndele inatu kwata ko sha, ndele shaanhyi owa popya, eenhete andi vi tula mo.” 6Nhyi ye shi ninga, oya kwata eehi ovidji, neenhete vao ova li a vi hala okutokoka. 7Oya lapa yakwao ya li mowato onghwao, opo ye uye ye ya kwafele. Oye ya, ndee taa uvifa eewato avihe mbali neehi, neewato ova li a vi hala okuningina molwouviyu. 8Ndee Simoni Peetulusa nhyi a mona nhyi sha ningwa po, okwa twa eengolo koshipala shaYesus ndee ta ti, “Omwene, za po pwaame, shaanhyi ame ondimulunde!.”
9Peetulusa naayehe mba ya li naye oya li ya kuminwa eehi ovidji vi ya kwata. 10Osho nghaa naYakopo naYohanesa, oyana yaSebedeus, mba ya li aakwati yeehi naSimoni. Yesus okwa ti kuSimoni, “Ino tila, okuza nena oto ningi omukwati waanhu.” 11Konima yanhyo, oya fala eewato vao komutunda, ndee taa fiipo oinima yao ayihe ndee taa landula Yesus.
Yesus ta eluva omulumenhu e na oshilundu
(Mateusa8:1-4; Malukusa1:40-45)
12Esiku limwe Yesus okwa li moshilando shonhumba, mo omwa li omulumenhu e na oshilundu. Omunashilundu nhyi a mona Yesus, okwa twa eengolo koshipala shaYesus, ndee te mu indile ta ti, “Omusimanekwa, nge ouna ehalo, yeleka nge.”
13Yesus okwa elufa eke lyaye, ndee te mu kumu, ndee ta ti, “Onda hala, yela.” Viyaviya oshilundu oshe mu efa ndee ta yela. 14Yesus okwe mu kumaiva neenghono a ti, “Inda, ndele ino shi popya nande okulye. Inda ike uke iyulike komuyambi, oye to yandja omaano yealuvo, nga ya ufwa kuMoses, nakehe umwe a mone kutya owa eluka.” 15Ndele nande ongaanhyo, onghundana kombinga yaYesus oya tandaela shi vulife nale. Aanhu oyendji oye ya oku mu pwaikina nokweeluvwa komikifi vi ya li ye na. 16Ndele Yesus okwa kala ha yi kokule naanhu, taka yalikana.
Yesus ta eluva omusilombada
(Mateusa9:1-8; Malukusa2:1-12)
17Esiku limwe Yesus nhyi a li ta longo aanhu, Aafalisai naalongimhango nayo opo ya li omutumba, ya za komikunda avihe vomuGalilea nomuYudea nokuYelusalema. Neenghono vOmwene ova li muye, oku eluva aanhu. 18Aalumenhu yamwe oya etela Yesus omusilombada ye mu hinda poshiinda. Oya kambavala oku mu fala meni lyeumbo ndyo, ye mu nangeke komeho yaYesus, 19ndele molwoundji waanhu, oya li ya nyengwa okushi ninga. Oya londa naye kombada yeumbo, ndee taa ulula ombululu kombada yonduda, ndee taye mu kulukifile noshiinda shaye pevu, mokati kaanhu siyo ta fiki puYesus. 20Yesus nhyi a mona eitaelo lyao, okwa lombwela omusilombada, “Eendjo voye ova vimwapo kaume kange.” 21Ndele aalongimhango nAafalisai oya tameka okupopya taa ti, “Ngu oye lye ta tuku Kalunga? Kaku na nande omunhu ta vulu okuvima po eendjo, oKalunga auke.” 22Yesus nhyi a vibulula nhyi taa vilaavila, okwa ti kuyo, “Omolwashi amu vilaavila ngaanhyo? 23Nhyi oshipu shipi? Oku lombwela omusilombada, ‘Eendjo voye ova vimwa po, nenge oku mu lombwela, fikama u ende?’ 24Onda hala mu kale mu shi shii kutya, Omona wOmunhu oku na epangelo kombada yevu okuvima po eendjo.” Yesus okwa ti komusilombada, “Andi ku lombwele, fikama, kufa oshiinda yoye, ndee toyi keumbo.” 25Omulumenhu okwa fikama viya monhaneho yaanhu, ta kufa ombete yaye, ndee ta yi kolyawo, ta ende ta hambelele Kalunga. 26Aanhu ayehe oyali ya kumwa, ndee taa hambelele Kalunga ya ti, “Nena otwa mona oinyenganduge oinene.”
Yesus ta ifana Levi
(Mateusa9:9-13; Malukusa2:13-17)
27Konima yambi, Yesus okwa ya pondje. Okwa mona po omufendelifi wevina Levi, e li omutumba ponduda yomafutilo, ndee ta ti kuye, “Landula nge.” 28Levi okwa fikama ndee ta fii po ayihe ndee te mu landula.
29Levi okwa ningila Yesus oshitufi oshinene meumbo lyaye. Maahiwa omwa li ongudu onene yaafendelifi naanhu yamwe. 30Aafalisai yamwe naalongimhango yamwe yomongudu yao oya nyenyeta kaalongwa yaYesus ya ti, “Omolwashi amu li nye amu mu pamwe naafendelifi naalunde?”
31Yesus okwe ya yamukula a ti, “Mba ye na oundjolowele inaa pumbwa ndokotola, ndele aanauvu oyo ya pumbwa ndokotola. 32Oshonhyi ame inandi uya okwiifana aayuuki, ndele onde ya okwiifana aalunde ye itevulule.”
Yesus ta pulwa kombiga yokwiivilika
(Mateusa9:14-17; Malukusa2:18-22)
33Aanhu yamwe oya ti kuYesus, “Aalongwa yaYohanesa oha ye ivilike nokwaalikana olundji, naalongwa yAafalisai osho haa ningi, ndele aalongwa yoye ihaye ivilike.” 34Yesus okwe ya yamukula a ti, “Ookaume komuhomboli otaa vulu nghaa okwiivilika mhanga omuhomboli e li puyooyo?” 35Ndele omasiku otae ya, nhyi omuhomboli taka kufwa po puyooyo, opo nee taa ka vula okwiivilika. 36Okwe ya lombwela eele ali ti, “Kaku na omunhu ta kufa oshaando koshikutu oshipe, ndee teshi tula koshikutu oshikulu. Nge oteshi ningi, ota nyonauna po oshikutu oshipe. Oshaando oshipe ihashi opalele koshikutu oshikulu. 37Omaviinyu omape ihaa zilwa momhunda yoshipa onghulu, nge umwe teshi ningi, omaviinyu omape nhyi taa pi, otaa taula omhunda, ndee taa tika mo, nomhunda tayi nyonauka. 38Omaviinyu omape oye na okuzilwa meemhunda eemhe. 39Ko kaku na ngu a ikilila omaviinyu omakulu ta hala omaviinyu omape, shaanhyi ota ti, ‘omakulu omawa.’”
ទើបបានជ្រើសរើសហើយ៖
Lukasa 5: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
