Lukasa 19
19
Lukasa 19
Yesus naSakeus
1Yesus nhyi a li ta ende mu Yeliko, 2opwa li puna omulumenhu omukulunhu waafendelifi wevina Sakeus. 3Sakeus okwa li ha kala a hala okumona Yesus, ndele molwanhyi kwa li omuhupi nomolwoundji waanhu, kali ta vulu okumu mona. 4Okwa matuka, a tetekela ongudu yaanhu komeho, ndele ta londo pombada yomuti opo a vule okumona Yesus, ngu a li ta ende po. 5Yesus nhyi a fika mha Sakeus a londa, okwa tala pombada ndee ta ti ku Sakeus, “Sakeus, endelela londoloka ko ngho, oshonhyi ondi na oku ka kala meumbo lyoye nena.”
6Sakeus okwa endelela okulondoloka ndee ta tambula ko Yesus nehafo. 7Aanhu ayehe mba yeshi mona oya ngugutula ya ti, “Ngu otayi a ka talelepo meumbo lyomulunde.” 8Sakeus okwa fikama, ndee ta lombwele Omwene ta ti, “Pwiikina! Etata lyeliko lyange andi keli pa eehepele, nonge opuna ngu nda nyeka nenge nda longifa oipupulu, andi ke mu shunifila oinima yaye lune.” 9Yesus okwa ti kuye, “Kalunga okwa hupifa eumbo ndi nena, nganhyi Sakeus naye okwa ninga omukwanezimo waAbeleham. 10Molwanhyi Omona wOmunhu okwe ya okukonga nokuhupifa mba ya kana.”
eele lyoimaliwa oikukutu
(Mateusa25:14-30)
11Yesus okwa hokololela mba ya li ye mu pwaikina eyele. Efimbo ndi, oyali yeli pokufika mu Yelusalema, naanhu oyali yeshii Ouhamba waKalunga owuli pokuholoka. 12Onghee okwa ti, “Okwa li ku na omulumenhu a valeka, ngu ali ta yi koshilongo shokokule a ka nangekelwe ouhamba ye a yaluke ko. 13Mhanga inaya, okwa ifana aapiya yaye omulongo ndee teyape kehe umwe oshimaliwa shimwe oshikukutu, ndee ta ti kuyo, ‘Indeni, mukeyi likolife ikwawo mhanga andi yaluka.’ 14Ndele aanhu yomoshilongo shaye oyali yemu tonde ndee tayemu tumine aatumwa yemu lombwele kutya, ‘Inatu hala omulumenhu ngu a ninge ohamba yetu.’
15Omulumenhu okwa pewa ouhamba, ndele taaluka. Okwa ifana aapiya yaye ye uye kuyeeye, opo a shiwe kutya oya likola shi fike peni. 16Wotango okwe ya ndee ti, ‘Muhona, oshimaliwa shoye shimwe onde shi likolifa ikwawo omulongo.’ 17Ye okwa ti, ‘Iyaloo, omupiya omuwa! Molwanhyi owumwiineekelwa moinima oishona, andi kupe epangelo lyoilando omulongo.’ 18Omutiyali okwe ya ndee ti, ‘Muhona, oshimaliwa shoye shimwe oshikukutu ondeshi likolifa ikwawo itano.’ 19Ngu okwe mu lombwele a ti, ‘Oye oto ka pangela oilando itano.’
20Mukwawo okwe ya, ndee ta ti, ‘Muhona, oshimaliwa shoye osho nhyi, onda kala ndeshi tula moshikaiwa. 21Ondali ndeku tila, oshonhyi oye omulumenhu omuviyu. Oho kufa nanhyi kaishi shoye, noho teya nhyi ino kuna.’ 22Omuhona wae okwa ti kuye, ‘Oye omupiya omwii! Andi ku pangula omolweehapu voye. Wu shii nge ndimuviyu, handi kufa nhyi kashi shi shange nohai teya mha inandi kuna. 23Omolwashi ino tula oimaliwa yange mombaaga? Opo ngeno nhyi andi aluka, ngeno onda alulilwa nhyi shange kwa wevelwa noihohela.’
24“Ohamba oya lombwela mba yali ya fikama mho ya ti, ‘Mu kufeni oshimaliwa nhyo, nye mu shi pe ngu a likolifa oimaliwa omulongo.’ 25Aanhu oya ti kuye, ‘Muhona, ngo oku na nale oimaliwa ya wana.’ 26Okwe yamukula, ‘Andi mu lombwele; Kehe ngu e na sha, otaa ka pewa oshindji, ndee mba ka ye na sha, noshishona nhyi yena ota ye ke shi kufwa. 27Paife aatondi yange mba yali inaahala ndi ninge ohamba, ya eteni mha mu ya vipaele komeho yange!’”
Yesus ta yi muYelusalema
(Mateusa21:1-11; Malukusa11:1-11; Yohanesa12:12-19)
28Konima nhyi Yesus a popya nhyi, okwe ya tetekela kuYelusalema. 29Nhyi a fika popepi naBetfage naBetania pondudu yeeholivi, okwa tuma aalongwa yaye yaali komeho 30nelombwelo ndi, “Indeni komukunda u li komeho yeni. Nge mwa fika ko, amu ka mona ko ondoogi ya mangwa, inayi kailwa nande onale. Yi mangululeni ndee amu yi eta nghu. 31Ngeege opuna umwe temu pula kutya amu yi mangululile mo shi? Mu lombweleni kutya, Omwene okwe yi pumbwa.”
32Mba ya tumwa oya ya, noya hanga ayihe yi li nganhyi Yesus eyi ya lombwela. 33Mhanga ya li ta ya mangululamo ondoogi, mwene wayo okwe ya pula a ti, “Omolwashi amu yi mangulula mo?” 34Oya yamukula ya ti “Mwene okwe yi pumbwa.” 35Oya eta ondoogi kuYesus ndee taa yala oikutu yawo pombuda yako, ndee taa kwafele Yesus a kaile. 36Mhanga a kaila, aanhu oya yala oikutu yawo mondjila. 37Nhyi a fika popepi naYelusalema, pehala mha ondjila ta yi kuluka ta yi zi kondudu yeeholivi, ongudu onene yaalongwa yaye oya tameke okupandula nokuhambelela Kalunga mopale, omoilonganghono ayihe mbi ya mona 38ya ti, “Omuyambekwa ohamba ndji tayi ya mevina lyOmwene! Ombili meulu neyavimo pombadambada. 39Yamwe yomAafalisai ya li mongudu yaanhu oya ti kuYesus “Mulongi ngada aalongwa yoe ya mwene.” 40Yesus okwa ti kuyo, “Andi mu lombwele; ngeege oya mwena, omamanya otaa tameke okukuwilila.”
Yesus ta lili molwa Yelusalema
41Yesus nhyi a fika popepi noshilando Yelusalema, okwe shi tala, ndele teshi lili 42a ti, “Owa li wa pumbwa okushiwa nhyi ashi ku kwafele molwombili yoe, ndele paife ihamu vulu okushuuvako. 43Omasiku otaye ke ya, mha aatondi yoe taye ke ku kondeka, ndele taye ku vigilile keembiga avihe. 44Otaye ke ku hanauna po filufilu naanhu ayehe ye li mo, ihaa ka fiya nande emanya lya londa kekwawo inaye li kumuna po, molwanhyi ino vibulula efimbo ndi Kalunga e ya e ku hupife.
Yesus ta yi kOtembeli
(Mateusa21:12-17; Malukusa11:15-19; Yohanesa2:13-22)
45Yesus okwa ya molwuumbo lwotembeli, mu a hanga mo aanhu taa landifilemo oinima yawo, ndee ta tameke oku ya tamo. 46Okwa ti kuyo, “Okwa shangwa, ‘Otembeli yange oyina okukala Eumbo lyomayalikano,’ ndele nye omwe li ninga ehala lyaanyeki.” 47Esiku kehe Yesus okwa kala ta longo motembeli. Aawilikiyambi naalongimhango naakulunhu yoshiwana oya li ya hala ye mu vipae, 48ndele oya nyengwa oku shi ninga, molwanhyi aanhu ayehe oya li ye na ehalo okupwiikina Yesus.
ទើបបានជ្រើសរើសហើយ៖
Lukasa 19: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
