Lukasa 10
10
Lukasa 10
Yesus ta tumu aalongwa omilongo heyali nayaali
1Konima yambi, Omwene okwa hoolola aalongwa omilongo heyali nayaali nokwe ya tumu moyaali, ye mu tetekele kondoolopa nokehala kehe e na okuya ko. 2Okwe ya lombwele a ti, “Oilya oyi li po oyindji, ndele aalongi aashona. Yalikaneni hano mwene woilya, a tume aalongi keteyo. 3Indeni! Andi mu tumu ongeezi mokati komambugu. 4Inamu hinda okamhunda koimaliwa nenge omhunda yokweenda nayo, hanghaku, nye inamu fikamena aanhu meendjila muya kunde. 5Nge amu yi meumbo lyonhumba, tango tyeni, ‘Ombili nai kale meumbo ndi.’ 6Nge omu na omunhu e hole ombili, nena ekundo lyeni lyombili ali kala naye, ndele nge hasho, ombili yeni otayi mu yalukile. 7Kaleni meumbo olyo tuu ndyo, lyeni nokumwa kehe nhyi tamu pewa, oshonhyi omulongi kehe okuna okupewa ondjabi yaye. Inamu za meumbo limwe muye kulikwawo. 8Nge amu yi moshilando shonhumba ndele amu tambulwa ko, lyeni nhyi amu pewa. 9Yeluveni aanauvu mondoolopa mo, nye amu ya lombwele kutya Ouhamba waKalunga oweya popepi nayo. 10Nge amu yi moshilando ndele inamu tambulwa ko, indeni momapandaada yasho ndee amu ti, 11ondwi yomoshilando sheni ndji ya kanyatele keemhavi vetu, atu yi pupula ko, opo yi ninge elondovo kunye. Ndele kaleni mu shi shii kutya Ouhamba waKalunga ouli popepi nanye. 12Onghee andi mu lombwele, Sodom ashika kala oshihwepo shi vule oshilando nhyo, mesiku lyepangulo!”
Oilando inayi itevulula
(Mateusa11:20-24)
13“Oihuna oyi fike peni kwooye Korasin! Oihuna oyi fike peni kwooye Betsaida! Ngeno muTilus nomuSidon mwa ningilwe oikumwifalonga mbi ya ningilwa munye, ngeno oye itevulula nale, taa zala omahahi nokukala omutumba momutoko ya ulike kutya oye itevulula. 14Ndele Tilus naSidon otayi ka kala oihwepo esiku lyepangulo kunye. 15Nooye Kapelenaum, oto ka tumbala tuu siyo omeulu? Ahawe, oto ka umbilwa moheli!”
16“Kehe ngu ta vulika keehapu veni, ota vulika keehapu vage. Nakehe ngu ihe mu tambula, iha tambula nge; na ngu iha tambula nge, iha tambula ngu a tuma nge.”
Okwaaluka kwaalongwa omilongo heyali nayaali
17Aalongwa omilongo heyali nayaali oyaaluka nehafo enene, noya ti, “Omwene, neemhepo va kaka nhyi twe vi ngada mevina lyoye, ova vulika kuse.”
18Yesus okwa ti kuyo, “Ondamona Satana a wa meulu ongolwaavi. 19Taleni, onde mu pa epangelo neenghono, vokulyata omayoka neendje, nokusinda eenghono avihe vomutondi, ko kakunaali nhyi ashi mu etele oshiponga. 20Ndele inamu hafa molwanhyi eemhepo va kaka avi vulika kunye; ndele hafeni nge omavina yeni ya shangwa membo lyomeulu.”
Ehafo lyaYesus
(Mateusa11:25-27; 13:16-17)
21Pefimbo mho, Jessus okwa li a uvifwa ehafo kOmhepo Ondjapuki ndee ta ti, “Tate, Omwene weulu nowevu! Andi ku hambelele, shaanhyi oinima mbi oweyi holeka aanongo naananduge, ndele owei hololela mba ya fa ounona. Eeno Tate, nhyi osho wa hala shi kale.”
22“Tate okwa pa nge oinima ayihe. Kaku na ngu a shiwa Omona, kakele kuTate, ko kaku na ngu a shiwa Tate, kakele kOmona namba Omona a hoolola oku ye mu hololela.”
23Yesus okwa tala kuyo ndele ta ti, “Onye aanelao mba amu mono ayihe mbi mweyi tala! 24Oshonhyi andi mu lombwele kutya, eehamba naahunganeki oyendji oya li ya hala ya mone mbi amu tala, ndele inaye yi tala, nokuuva mbi amu uvu, ndele inaye yi uva.”
Eele lyOmusamalia omunamutimanghenda
25Ndee omulongimhango umwe okwe ya a makele Yesus ta ti, “Mulongi, ondi na okuninga shi opo ndi mone omwenyo waaluhe?”
26Yesus okwe mu yamukula a ti, “Momhango omwa shangwa kwati ngeepi? Owii uviteko ngeepi?”
27Okwa yamukula a ti, “Hola Omwene Kalunga koye nomutima woe auhe nomwenyo woe auhe nomavilaavilo yoe ayehe neenghono voye avihe’, oye Hola mukweni nganhyi wu ihole mwene.’” 28Yesus okwa ti kuye, “Owa yamukula mondjila, shi wanifa ndee to kala nomwenyo.” 29Ndele omulongimhango nhyi a li a hala okwiimonikifa omuyuuki, okwa pula Yesus natango a ti, “Mukwetu olye?” 30Yesus okwe mu yamukula, “Okwa li ku na omulumenhu wonhumba a za kuJerusalem ta yi kuYeriko nokwa hangika keembuvi. Ove mu vula oikutu noku mu vega, ndee avi mu fii nokamwenyo okashona. 31Mondjila ndjo omwa hangika amu ende omuyambi. Nhyi e mu mona, okwa kanduka mo mondjila, ndele te mu pitilile. 32Nomulevi naye nhyi e mu mona, okwa kanduka mo mondjila ndele temu pitilile. 33Ndele mhanga Omusamaria a li ta ende mondjila ndjo, okwe ya pomulumenhu ngu, nanhyi e mu mona, omutima wae owa li wa uva olukeno. 34Okwa heena puye, ndele ta panga oipute yaye nomaavi nomaviinyu, ndee te yi manga. Okwe mu londeka kondoogi, ndee temu fala konduda yaayenda ndee temu tonatele. 35Esiku lya landulako, okwa kufa eedenari mbali, ndee tevi pe mwene weumbo lyaayenda ta ti, ‘Mu tonatela, ndee nge eedenari mbali ina vi wana, andiya ndiku yalulile ashihe nhyi wa longifa muye.’”
36Yesus okwa hulifa a ti, “Pamavilaavilo yoe, upi mumba yatatu a li mukwawo wangu a hangikilwe keembuvi?”
37Omulongimhango okwa yamukula a ti, “Oye ngu e mu sila onghenda.”
Yesus okwa ti, “Nooye inda hano u ka ninge shafaafana nanhyi.”
Yesus ta talele po Maalita naMalia
38Molweendo lwaYesus naalongwa yaye, oya ya momukunda umwe, nomukiinhu wevina Maalita okwe mu tambula meumbo lyaye. 39Maalita okwa li e na mumwaina Malia, ngu a li a panda okukala omutumba peemhavi vOmwene, ta pwiikine nhyi Yesus a li ta longo. 40Maalita mokukala ta viyauka unene noilonga yokuyakula, okwa li euvite nai nokwe ya ku Yesus ta ti, “Omwene, ku na ko nasha naame, mumwameme nhyi a efa ndi longe oilonga ayihe aame auke? Mu lombwela euye a kwafele nge.”
41Omwene okwe mu yamukula a ti, “Maalita, Maalita, owe ipyakivila noinima oyindji, 42ndele shimwe ashike shapumbiwa. Malia okwa hoolola ombiga oiwa noiheyi kufwa.”
ទើបបានជ្រើសរើសហើយ៖
Lukasa 10: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
