Lukasa 9
9
Yesus ta tumu aalongwa omulongo nayaali
(Mateusa10:5-15; Malukusa6:7-13)
1Yesus okwa ifana aalongwa yaye omulongo nayaali. Okwe ya pa eenghono nepangelo lyokutamo eemhepo va kaka nokuyeluva omikifi. 2Okwe ya tuma yaye yaka uvifile aanhu kombiga yOuhamba waKalunga nokuyeluva aanauvu. 3Okwa ti kuyo, “Inamu ya nasha mondjila, handibo, hamhunda yokweenda nayo, haikulya, haimaliwa, haikutu iyali. 4Nge mwa ya meumbo lyonhumba, ndee omwa tambulwako, kaleni mo siyo amu zamo moshilando nhyo. 5Kehe mha amu yi ndee inamu tambulwako, zenimo moshilando nhyo, ndee amu pupula ko ondwi keemhavi veni, shi ninge elondovo kuyo.”
6Aalongwa oya ya, ndee taa ende momikunda avihe, taa uvifa Onghundana Oiwa, ndee taa eluva aanauvu apehe.
Helodesa a limbililwa
(Mateusa14:1-12; Malukusa6:14-29)
7Nhyi Helodesa omuleli waGalilea a uva ayihe mbi ya ningwa po, okwa kala a limbililwa, oshonhyi yamwe otaa ti, oYohanesa omushashi a umuka kousi. 8Yo yamwe otaa ti, oElia a holoka, nayakwawo otaa ti, umwe womaahunganeki a umuka kousi. 9Helodesa okwa ti, “Yohanesa onde mu tetifa omutwe, ngu oye lye hano? Ondauva omahokololo omendji kombinga yaye.” Helodesa okwa kala ta kongo omhito yokumona Yesus.
Yesus ta kutifa aanhu omaovi yatano
(Mateusa14:13-21; Malukusa6:30-44; Yohanesa6:1-14)
10Aayapostoli nhyi ya yaluka, oya lombwela Yesus ayihe mbi ya ninga. Yesus okwe ya kufa mo maanhu, ndee tayi nayo kondoolopa yevina Betsaida. 11Aanhu nhyi ye shi uvu, oye mu landulila ko. Okwe ya tambula nehafo, ndee teya hokololele kombiga yOuhamba waKalunga, ndee ta yeluva aanauvu mba yali ya pumbwa okuyeluvwa.
12Nhyi etango lyali li li pokuningina, aalongwa yaye omulongo nayaali oye ya kuye, ndee taa ti, “Poima mha omombuwa ike, onghee lekela aanhu ya ye momikunda nomomaumbo yopoushiinda, ya ka konge oikulya nomilele.” 13Yesus okwa ti kuyo, “Ya peni oikulya.”
Ndele oya tya kuYesus, “Mha otuna po ike eemboloto nhano neehi mbali. Owa hala tuye tuka landele aanhu ayehe mba oikulya?” 14Aalumenhu mba ya li po oye fike pomayovi yatano. Yesus okwa lombwela aalongwa yaye ta ti, “Ningeni aanhu ya kale omutumba meengudu, kehe ongudu naikale ina aanhu omilongo nhano.”
15Oye shi ninga, ya kaleka aanhu ayehe omutumba. 16Yesus okwa kufa eemboloto vo nhano neehi mbali, ndee ta liyamene keulu, ndee te vi yambeke, te vi pambula, ta pe aalongwa yaye ya topolele aanhu. 17Aanhu ayehe oya lya, ndee taa kuta. Aalongwa oya toola oihupe youpambu, oimbale omulongo naiyali.
Ehepululo lyaPeetulusa kombiga yaYesus
(Mateusa16:13-19; Malukusa8:27-29)
18Esiku limwe mhanga Yesus ali ta yalikana oye auke, aalongwa oye ya kuye. Yesus okwe ya pula a ti, “Aanhu otaa ti aame lye?”
19Oyemu yamukula ya ti, “Yamwe otaa ti oYohanesa omushashi, yamwe otaa ti o Elia, na yamwe otaa ti umwe womaahunganeki yonale a umuka kousi.”
20Yesus okwe ya pula natango, “Nye amu ti aame lye?” Peetulusa okwe mu yamukula a ti, “Ooye Kilistus waKalunga.”
Yesus ta popi okuhepekwa kwae nokusa kwae
(Mateusa16:20-28; Malukusa8:30—9:1)
21Yesus okwe ya indika opo inaye mu popya nando okulye.
22Yesus natango okwa twikilako ta ti, “Omona womunhu ota ka hepekwa nomahepeko omendji, nota ka ekelwahi kaakulunhu, aawiliki yaayambi nokaalongimhango. Otaka vipawa, ndele mesiku etitatu ota umuvwa.”
23Yesus okwa lombwela aanhu ayehe a ti, “Nge opuna ngu a hala okulandula nge, neivibwe ye mwene, ndee ta hinde omushiyakano wae esiku kehe, opo a landule nge. 24Oshonhyi ngu a hala okuhupifa omwenyo wae, ote wu kanifa. Ndele ngu ta kanifa omwenyo wae molwa nge, ote wu hupifa. 25A shi kwafa shike mbela, omunhu nande neyi likolele ouyuni auhe, ndele ota kanifa omwenyo wae nenge tei nyono po? 26Nge opuna omunhu ta si nge ohoni neehapu vage, Omona wOmunhu oteke mu sa ohoni, nhyi teke ya e li meyavimo lyaye mwene nolya He nolyaayengeli aayapuki. 27Oshili andi mu lombwele, opuna yamwe yomumba ye li ofika mha, ihaa makele eso mhanga ina ya mona Ouhamba wa Kalunga.”
Yesus ta lundululwa
(Mateusa17:1-8; Malukusa9:2-8)
28Nhyi pwa piti oule woshiike lwaamho konima nhyi Yesus a popya nhyi, Yesus okwa kufa Peetulusa, naYohanesa na Yakopo, ndee ta yi nayo kondudu ya ka yalikana. 29Mhanga a li ta yalikana, olupe lwoshipala shaye olwa lundululuka, noikutu yaye oya avima, ya fa ouyelele. 30Ombaavilila, opwa li aalumenhu yaali taa popi naYesus. Aalumenhu mba oya li oyo Moses naElia. 31Oya li ya holoka meyavimo lyomeulu, ndee taa kundafana naYesus nhgee ena okuwanifa ehalo lya Kalunga, nhyi ta ka sa muYelusalema. 32Ndele Peetulusa nayakwawo oya li ye kwetwe keemhosi, ndee nhyi ya papala, oya mona eyavimo lyaYesus naalumenhu yaali ya fikama pu ye. 33Ndee Moses na Elia nhyi ya fiya po Yesus, Peetulusa okwa ti kuye, “Mulongi, mha opouwa nokukala mha. Natu vikeni po omatwali yatatu, limwe olyoe, limwe olya Moses, na limwe olya Elia.” Peetulusa kali eshii nhyi ta popi.
34Mhanga a li ta popi natango, opwa holoka oshikoo, ndee tashi ya siikile, naalongwa yaye oya li ya tila unene. 35Moshikoo omwa za ewi a li ti, “Ngu Omona wange, nde mu hoolola, mu uveni.”
36Konima yokupopya kwewi, aalongwa oya mona Yesus e li oye auke. Oye shi mwenena, yo inaa hokololela nande oumwe pefimbo ndyo ashihe nhyi ya mona.
Yesus ta eluva omumati a kwatwa ko keemhepo va kaka
(Mateusa17:14-18; Malukusa9:14-27)
37Mesiku lya landula, Yesus naalongwa yaye yatatu nhyi ya londoloka kondudu, okwa shakenekwa kongudu onene yaanhu. 38Omulumenhu umwe womongudu okwa ingiva mopale a ti, “Mulongi! Andi ku indile, tala omumwange, ewifa lyange! 39Omhepo ya kaka ohai mu ponokele, ta tameke ta kuu, ta yi mu pundaula, yo ta yi mu etifa onhutu kokanya, yo inayi hala oku mu efa! 40Onda li nda indila aalongwa yoe yeyi temo, ndele inaa pondola sha.”
41Yesus okwa yamukula a ti, “Oihuna oifike peni kepipi lyonganhyi kali na eitaelo lyo olya pilalala, siyo onaini andi kala punye noku mu ivivimikila?” Ndee Yesus okwa ti komulumenhu, “Omumwoe mu eta nghu.” 42Mhanga okaana taka etwa ku Yesus, omhepo oye ka mbugaambuga, ndele ta yi ka hata pevu. Yesus okwa ngada omhepo ya kaka nokwa yeluva omumati, ndele te mu fala kuhe. 43Aanhu ayehe oya kuminwa eenghono eenene va Kalunga.
Yesus ta popi natango okusa kwae
(Mateusa17:22-23; Malukusa9:30-32)
Aanhu ayehe oya kala natango ya kuminwa oinenelonga mbi a longa ayihe, nhyi a lombwela aalongwa yaye ta ti, 44“Pwiikineni nawa kunhyi ndili poku mulombwele, nye mu vi viinine! Omona wOmunhu ota ka yandjwa moikaha yaanhu.” 45Aalongwa ina ya uva ko kutya, okwa hala kutya ngeepi oshonhyi osha li sheya holekwa, noya tila oku mu pula yasho.
Olye omunene?
(Mateusa18:1-5; Malukusa9:33-37)
46Mokati kaalongwa omwa penduka evilaavilo kutya, olye omunene e vule yakwawo ayehe. 47Yesus nhyi a vibulula omavilaavilo yomitima vawo, okwa kufa okaana, ndele te ka fikameke ponho yaye, 48ndee ta ti ku yo: “Kehe ngu ta tambula ko okaana ngha mevina lyange, ye ota tambula nge; na ngu ta tambula nge, ye ota tambula ngu a tuma nge. Oshonhyi ngu omuvinwa kwaayehe mokati keni, oye omunene.”
Ngu keli omhinge nanye okwa ama kunye
(Malukusa9:38-40)
49Yohanesa okwa popya a ti, “Mulongi, otwa mona omunhu umwe ta temo eemhepo va kaka mevina lyoye, ndele otwe mu indika oshonhyi ye keshi womongudu yetu.” 50Ndele Yesus okwa ti kuye nokaalongwa aakwao: “Inamu mu indika, oshonhyi nge ke li omhinge nanye, ye okwa ama kunye.”
Aanhu yomomukunda womuSamalia ya anya okutambula Yesus
51Hano efimbo lya Yesus lyokulonda a ye meulu nhyi lya fika, okwa tokola opo a ye kuYelusalema. 52Okwa tetekelifa aatumwa yaye, ya ye komukunda womuSamaria, opo yeke mu longekivile oinima ayihe. 53Ndele ina tambulwa ko, oshonhyi oshali shayela kutya Yesus okwa li a uka kuYelusalema. 54Hano aalongwa yaye Yakopo na Yohanesa, nhyi ye shi mona, oya ti, “Omwene, owa hala tu indile omundilo u ze meulu, uya halakanife po?”
55Yesus okwe ya tala, ndee te ya ngada. 56Ndee Yesus naalongwa oya ya komukunda umwe.
Mba ya hala okulandula Yesus
(Mateusa8:19-22)
57Molweendo lwawo, omulumenhu umwe okwa ti ku Yesus, “Andi ku landula kehe mha to yi.”
58Yesus okwa ti kuye, “Eembadje ovi na omitutu, neevila vaulu ovi na oihavi, ndele Omona wOmunhu ke na mha ha nangala.”
59Yesus okwa lombwela umwe a ti, “Landula nge!”
Ndele omulumenhu ngu okwa ti, “Omwene, pitika nge manga ndi ka fundike tate.”
60Yesus okwe mu yamukula a ti, “Efa aasi ya fundike aasi yawo. Inda, uka uvife Ouhamba waKalunga.” 61Umwe natango okwa ti ku Yesus, “Omwene, ondahala oku ku landula, ndele efa ne mhanga ndi ka lekele yambilyetu.”
62Yesus okwe mu yamukula a ti, “Kehe ngu ta pulula, ndele ota tala konima, ina opalela Ouhamba waKalunga.”
ទើបបានជ្រើសរើសហើយ៖
Lukasa 9: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
