Yelemiya 16
16
Zumbe Mulungu avyekunda Yelemia aikale
1Zumbe Mulungu atelonga na imi akighamba, 2“Iwe usheteghue wala kuonea wana aha hantu. 3Nenikughambile mbuli ndizo zilawiye kwa mbuli ya wana wa kibwanga na wa kindee ndiwo wavyaighwe aha hantu na kwa wavyazi wawe. 4Newafe kwa matamu yegea wogha, na hekuna ndiye awaghosholee ndiyo wala kuwazika. Maiti zawe neziasakane sa mantu mwe shi. Newafe kwa uhamba na kwa saa na maiti zawe neziituke nkande za madeghe ya uko ulanga na vizama vya tundui.”
5Zumbe Mulungu akaghambila vingi, “Ushezaingila mwe nyumba yena nkande za ndiyo. Usheite kwewakemea wala kuwaivila mbazi, kwa kuti nizausha mng'azo wangu wa mesho, ukundisho wangu na mbazi zangu kwa awa wantu. 6Wekidaha na wakiwa newafe mwe inu shi, miya hewazikwe wala kughoshoewa ndiyo. Hekuna mwekishengashenga wala kumoa kinoo kwa mbuli yawe. 7Hekuna mwewainka nkande za kuwagea moyo wala kuwainka vyanywa waja wafiiwewo hata kati wafiiwe ni waishe zawe ama wanine zawe.”
8Usheingile mwe nyumba yena mvigha. Usheikale nawo kunga uje na kuvata. 9Kwa kuti imi Zumbe Mulungu mwena ufung'wa woshe, Mulungu wa Izilaeli, naghamba ivi, “Neniushe vigima vuzo ja nyemi na kutamilwa hang'we na vuzo ja nteghuzi. Izi mbuli nezilawiye muimoyo, muiwelele kwa mesho yenyu.”
10“Ukizawaghambila awo wantu izi mbuli zosheni, newakuuze kuti, ‘Kwai Zumbe Mulungu azafanyanya kutietea ubada weinga aha? Tibaniei? Timghosholee uhuza ani Zumbe Mulungu, Mulungu lweshu?’ 11Neuwahise kuti, ‘Vilawiye kwa kuti, baba zenyu waazanieka imi, wakatongela mulungu mituhu, wakaitumikila na kuivika. Watenieka wala hewategheleze vinyanyi vyangu. 12Miya inywi muzaisiiza kughoshola mbuli mbada kushima zia zaghosholwezo ni baba zenyu, kwa kuti kia mng'we wenyu atongela utii wa fanyanyi zakwe mbada, vingi hemunitegheleza. 13Kwa ivyoho, nenimihomele na mwe shi mushitailayo inywi na baba zenyu. Nemukatumikile mulungu mituhu uko na senimiivile mbazi.’ ”
Kuuya kulawa mwe shi ya ugheni
14Zumbe Mulungu aghamba ivi, “Mishi yaaiza wantu hewalape vingi kwa zina jangu wakighamba, ‘Kweli sa avyeishi Zumbe Mulungu awalavizeye wantu wa Izilaeli mwe shi ya Misii.’ 15Miya newaghambe, ‘Sa avyeishi Zumbe Mulungu awalavizeye wantu wa Izilaeli mwe shi ye wazu wa kasikazini na mwe shi zosheni awaasakanyeko.’ Kwa kuti, neniwauze na mwe shi yawe nawainkayo baba zawe.”
Mlaho wetongea
16Zumbe Mulungu aghamba ivi, “Miya ushe neniwaaghiize wankuu wangi waize kwewagwia wantu wa Yuda sa wantu wavyevuuwa mpeege. Vikibinda, neniwaaghiize wantu wangi waize kwewaingata. Newawasake sa weingata wavyesaka vizama mwe kia muima, mwe kia kitui na mwe mpanga. 17Kwa kuti imi naaona mbuli zosheni wazeghoshola, hekuna nishitailacho. Uhuza wawe woshe naautaila. 18Neniwazise kihii kaili kuzinka vivyekundwa kwa mbuli ya uhuza na ubanasi wawe, kwa kuti wazaieka shi yangu ishenitamile kwa mbuli ya mulungu yawe ifieyo yeniihiza wamemeezeyo mwe shi yangu.”
Yelemia ataombeza nguvu kwa Zumbe Mulungu
19Zumbe Mulungu, iwe u nguvu zangu na ughojo wangu, nikualila iwe mwe mishi ya ntogho. Mbali zosheni neziize kwako zikighamba, “Baba zeshu nee waishina kintu kituhu kushima mulungu ya lufyo na vinyago vishiambizavyo. 20Wantu waadaha kukighoshoela mulungu yawe wenye? Doo! Kati wazaghoshola ivyoho, utaile kuti uyo shiyo Mulungu.”
21Zumbe Mulungu akahisa, “Kwa ivyoho, neniwahinye wataile nguvu zangu na ufung'wa wangu. Newataile kuti imi ni Mulungu.”
ទើបបានជ្រើសរើសហើយ៖
Yelemiya 16: SHBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Shambala, @The Word for The World International, and Shambala Language translation. All rights reserved.