Yelemiya 15
15
Mlaho kwa wantu wa Yuda
1Nee Zumbe Mulungu akanighambila, “Hata kati Msa na Samwei wangeiza kweniombeza, ningeshewaivila mbazi awa wantu. Waushe mwe mesho yangu waite zawe. 2Wakikuuza, ‘Tite hii ushe?’ Uwaghambe kuti, Zumbe Mulungu aghamba ivi,
Wekundwa kufa kwa matamu
newafe kwa matamu!
Wekundwa kufa kwa uhamba
newafe kwa uhamba!
Wekundwa kufa kwa saa
newafe kwa saa!
Wekundwa kuighawa na mwe shi ya ugheni
newaighawe.
3Imi Zumbe Mulungu nizaamua kuwaetea ntogho za mbali ne ndizo ziwalawiye, newafe kwa nkondo, mii yawe neibuutwe ni makui, kudomonywa ni madeghe ya uko ulanga na kujighwa ni vizama vya tundui. 4Neniwaghalushe waituke wantu weihiwa ni wantu wa zumbe zosheni za shi, kwa mbuli aghosholeyo Manase ng'wana wa Hezekia zumbe wa Yuda uko Yelusalemu.”
5Zumbe Mulungu aghamba ivi,
“Nemuoneewe mbazi ni ndai inywi wantu wa Yelusalemu,
na nemukemeewe ni ndai?
Neuvuiwe ni ndai?
6Inywi muzaniemela imi Zumbe Mulungu,
kia mshi mutahimba kunihituka.
Ushe, nenimikome,
nizatibuka kumiivila mbazi.
7Mwe kia mzi,
nenimihete sa mahaagi,
nenimikome inywi,
na kukoma wana wenyu,
kwa kuti hemwaekile mbuli zenyu mbada.
8Neniwaeke wavyee wangi wafiiwe ni waghoshi wawe
kuzinka shanga ye mwe bahai.
Neniwakome wabwanga wenyu
na kuwagea wanine zawe ukiwa.
Neniwaeke wabulwe ni ukiwa na wogha,
kwa kumaka.
9Mvyee afiiweye ni wana mfungate neazimie,
neahese moyo.
Zua jakwe nejigongooke kuike mshii,
neagewe shoni na kushekwa.
Na waja wemoyo washighalewo,
neniwaeke wakong'we ni wankuu wawe kwa hamba.
Imi Zumbe Mulungu, nizalonga.”
Yelemia atamkaaiza Zumbe Mulungu
10Changu ndicho! Kwai mnaa aazanivyaa? Nizaituka mntu wa nkumbizi na kuheekuana na kia mntu mwe inu shi. Sina nikopesheye wala sikopeshwe, miya kia mntu atanilaha. 11Zumbe Mulungu akaghamba, nenikuambize kunga uonee mbuli ntana, shuti niwaeke wankuu wako wakuombeze uwambizi mwe mishi ya ntogho na sungu. 12Ivi kuna mwedaha kubonda chuma cheandukia wazu wa kasikazini ama shaba?
13Zumbe Mulungu aghamba ivi, “Neniete wankuu waghue mai zenyu na kiiko chenyu na hewamilihe kintu chochoshe kwa mbuli ya uhuza wenyu mughosholewo mwe shi ngima. 14Nenimighalushe watung'wa wa wankuu wenyu mwe shi mushitailayo, kwa kuti nizakweewa ni maya sa moto ushizimawo kale na kale.”
15Nami nee niheghamba, “Miya iwe Zumbe Mulungu waataila. Nifukila uniambize. Waihiize wankuu wangu. Usheisiize kuwaivila mbazi mpaka wakanikoma. Fukila kuti, nikankwa kwa mbuli yako. 16Naategheleza mbuli zosheni ulongiezo na imi. Izo mbuli zikaninka nyemi na mpolele mwe moyo wangu kwa kuti, imi ni wako iwe Zumbe Mulungu mwena ufung'wa woshe. 17Siikale hang'we na wantu weghoshola mbuli zewatamila wo wenye. Naikala ike du, kwa kuti ni weyo mwegholokela mbuli zosheni nizeghoshola. Naimi nikamemighwa ni maya yako. 18Kwai uzanieka niikale mwe sungu? Sitaila kuti kwai uzanieka nisungudike. Kwai vionda vyangu hevihona? Hambu ukunda unikome moyo sa shoko za mazi zenahwa mwe mishi ya zua?”
19Kwa ivyoho Zumbe Mulungu akahisa, “Ukivoteka nenikuuze uituke sa ndivyo uivyo aho boosi kunga unitumikile vingi. Waona walonga mbuli zena viugho na shiyo mbuli za udashi, nenikuitushe mntu mwelonga mbuli zangu. Awa wantu newakubashe iwe miya shiyo iwe mwewabasha. 20Nenikutogheshe sa ukando wa shaba mwe mesho ya awa wantu. Newatoane na iwe, miya hewakudahe, kwa kuti imi ni hang'we na iwe kunga nikuambize na kukuvunia. Imi Zumbe Mulungu nizalonga. 21Nenikuvunie mwe mikono ya wahuza na kukuusha mwe mikono ya wantu makatii.”
ទើបបានជ្រើសរើសហើយ៖
Yelemiya 15: SHBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Shambala, @The Word for The World International, and Shambala Language translation. All rights reserved.