मर्कुस 9
9
1होकाम येसुये नोरंलाई हैओडोवरं, “डस्साज़, ङा जेलाई हैङाडाच्यो, आका च्याङ्सिउरंकाम कोइ-कोइरं परमेस्वरलो ओराज्य सक्तिसं ओराज़्याव यामर:ङया सम्म सिने मालेरं।”
येसुलो उरुप उफिरिव
मत्ती १७:१-१३; लुका ९:२८-३६
2होकाम छ डिन झिन्डे येसुये पत्रुस, याकुब सोनो युहन्नालाई ओल्स टोबो झेनो डान्डाटं ओलाङोरं होटं येसुरं याज़ लेवरं, होकाम होराई याङाकंज़ येसुलो उरुप छुट्टभान्ट्याव ओटाव। 3होकाम येसुलो ओक्वा टक पलाङो मिलंङ झिने ओटाव, ऐटाव पलाङो ओटाव, प्रिठीबीलं काङ्का मीये पनि क्वा छेडे हैटाव माझैडुव। 4होकाम सोम्भऱ्याङ उसिसराई एलिया सोनो मोसानी येसुसं नेपाङज़्याव यारो:ङो।
5पत्रुसये येसुलाई हैओडोव “रब्बी, गे आटं गेलेव बनै चाव याटा। गे आटं सोम्भऱ्याङ गोठो गेझैके, टोबो नलागिटं, नेभऱ्याङ मोसा सोनो एलियानी नेलागिटं।” 6पत्रुस सोनो ओल्स लेनेरं बनै याछेव कडि पाङने हो नोराई मासनरंये।
7होकाम टोबो बाडंल राडे होरंलाई ओकपोरं, हो बाडलटाम टोबो ऐटाव गा ओठोयो, “आवके ङा ङायुङ्का ङाज़ाची, जे आवलो ओपाङ ठैच्यो।”
8होकाम होपानाज़ आडेहोडे यार:ङकं येसुलाई याज़ यासं यारो:ङो।
9येसुरं डान्डाटाम याझरिज़्याकं यायेम्बैटं येसुये होरंलाई आग्या ओयोवरं “मानवालो ओज़ा सिडे ज्युङडा ओम्टाया समं आव जेरो:ङो रो: भरि काङ्कालाईज़ हैटाडाच्यो।” 10होराई नो रो: यायुङलज़ यानोयो, सिडे ज्युङडा टाने ओवारो कडि वार्डे या-याज़ यापाङो।
11होकाम नोरं आव रो: येसुलाई यापजोयो, “ङा:डे एलिया राव परिय वार्डे सास्त्रटा न्याम पैने मीराई कडाने हैयावारज़्यावखेने?”
12येसुये हैओडोवर “पक्काज़ एलिया ङा:डे रा, होकाम स्यान्टै रो: फरि झोयो। होकाम मानवालो ओज़ाये बनै भ्या डुखं डैडे उरुराईङाम हेलाहारी टानेले वार्डे सास्त्रटं कडाने सर्सिव उलिज़्यावखेने? 13ङा जेलाई हैङाडाच्यो, एलिया राडेयाखेम्डु, होसोनो एलियालो ओबारेलं सर्सिव स्यानाव, एलियासं नोराई जो यायुङये सुन्चिव होज़ यालेव।”
माचाव आत्माये ओडापो छोऱ्या ओसोमो
मत्ती १७:१४-२१; लुका ९:३७-४३
14येसु सोनो सोम्भऱ्याङ उसिसरं बाङ्की उसिसरं लेवकं वोल्डे याराकं माहुले मीराई नोरंलाई घिरीडे न्याम पैने मीरासं बनै यायुसिज़्याव येसुये ओरो:ङो। 15स्यान्टै मीराई येसुलाई यारो:ङोपानाज़ बक्क टाडे येसु लेवडे गुरक्याटं ज़ोरिडे ढो याडोव।
16येसुये नोरंलाई ओपंजोयोरं, “जे आवरासं कडाने जियुसिज़्याव?”
17नो माहुल्ये मीरंकाम टोबोये येसुलाई हैओडोव, “गुरबा ङाज़ालाई मापाङ्ने माचाव आत्माये क्यो:डे नोयो, होकाम नङ लेवकं रैडेङानै। 18जोकं नो माचाव आत्माये ङाज़ालाई क्यो:वये। होकाम छोऱ्यालाई नामलं टवये, होसोनो छोऱ्याये ओया:लाम फेन रा:वये, होकाम ओहा कट्र सपिडे गेखेङ्टेङ टाये, ङा नसिसरंलाई नो माचाव आत्मा पुलैच्यो वार्डे बिन्ती ङाडोवरं, नोराई माढुरंये।”
19होकाम येसुये नोरंलाई हैओडोवर “ए बिस्वास माडोने पुस्ता, ङा जेसं खर्का सम ङालेके? ङा जेलाई खर्का सम ङासहिच्योके? नो छोऱ्यालाई आकं रैच्यो।” 20हो छोऱ्यालाई येसु लेवकं यारैज़्याकं येसुलाई ओरो:ङोपानाज़ हो माचाव आत्माये छोऱ्यालाई ल-ल ओटंव, छोऱ्या नामलं टसिडे ओया:लाम फेन पुलैडे नाम्ल फर्लिङ-फर्लिङ उपल्टिव।
21येसुये छोऱ्यालो ओबाबुलाई ओपजोयो, “खाबलाकाम आव छोऱ्यालाई ऐ ओटाव?” छोऱ्यालो ओबाबुये हैओडोव “ज़ी:मज़ा ओलेवकामज़। 22ङाज़ालाई सै:ने लागिटं नो आत्माये घरि मे:लं घरि रि:लं ख्यावये। नङ ससोमो नढुखे भने, नयुङ नाडे गेलाई सायता गयासिके!”
23येसुये छोऱ्यालो ओबाबुलाई हैओडोव, “‘नङ नढुखिन!’ वार्डे नो कै नवार्ज़्याव? बिस्वास डोनेराई यालागिटं स्यान्टै रो:ज़ टाये।”
24होपानाज़ छोऱ्यालो ओबाबुये की:डे हैओवारो “ङा बिस्वास ङाडो। ङा कम्जोर ङाबिस्वास बडैने ङालाई सायता डाङ।”
25होकाम माहुले मीरं बोलोङ गुरक्याटं याराज़्याव र:ङडे येसुये हो माचाव आत्मालाई ऐ वार्डे ओहक्लोयो, “ए मापाङने सोनो बैरा आत्मा, ङा नङलाई आग्या ङायान, नो छोऱ्याटाम पुलुडे रान, होकाम खर्क पनि नो लेवटं टानान।”
26होकाम हो माचाव आत्मा चीर-चीर कि:डे छोऱ्यालाई फङ-फङ टडे उपुलुव, होकाम हो छोऱ्या लल्याट्रो ओटाव, भ्या बिछुराई के उसिव ची वार्डे हैयावारो। 27होकाम येसुये हो छोऱ्यालाई उकुइटं क्यो:डे पङ्ल्याङ ओसोचोयो, होकाम छोऱ्या ओच्याङसिव।
28होकाम येसुरं ज़ी:मडे यानाव येसुलो उसिसराई ओबाठङ ओलेकं येसुलाई ऐ लेडे यापजोयो, “गे नो माचाव आत्मालाई कडा गेमहाइडुखेने?”
29येसुये नोरंलाई हैओडोवरं, “आव खाले माचाव आत्मालाई खेपैने प्रार्ठनाये याज़ खेपैसिडु।”
30होकामटानि येसुरं होलाम पुलुडे गालीललाग्यान यानाव। गे आलं गिलिज़्याव रो: काङ्कायेज़ टासनरंकं वार्ने येसुलो उयुङ लेव, 31कडालेकं येसुये उसिसरंलाई ओपैज़्यारंकं हैओडोवरं, “मानवालो ओज़ा मीराई याकुइटं सुम्पिसिनेले, होकाम होराई नोलाई सै:नेलेरं, होकाम उसिव झिन्डे सोङलाका ज्युङडा टाडे सोनेले।” 32येसुये ओपाङो आव रो: उसिसराई माबुझिरंये, होकाम येसुसं पजैने पनि याछेव।
स्यान्टैराई भन्डा घ्योव काङ्का?
मत्ती १८:१-५; लुका ९:४६-४८
33येसु सोनो उसिसरं कफर्नहुम नाङ्खारलं याराव, ज़ी:मकं यालिज़्याकं येसुये नोरंलाई ओपंजोयोरं, “येम्ट जेराकं कडि रो: जेपाङरिज़्याव?” 34होकाम होरं कडिज़ मापाङरंये, कडालेकं होरं येम्ट “गे भरिलाम स्यानटैराई भन्डा घ्योव काङ्का?” वार्डे या-या यायुसिव। 35होकाम येसु चुङडे बारजना उसिसरंलाई खुल्डे नोरंलाई हैओडोवरं, “जो मी पैला टाने युङ डोव, हो स्यान्टैराई भन्डा आलिज़ा टाडे यासेवा डोव परिय।” 36होकाम येसुये टोबो आलिज़ा बाल्खलाई रैडे उसिसराई याखार्ल उसुचुनो, होकाम बाल्खलाई ओघोन्ट रैडे उसिसरंलाई हैओडोवरं, 37“जोये एटाव आलिज़ा बाल्खराईलाम टोबोलाई ङामिन्ट ग्रहन डोव होये ङालाईज़ ग्रहन डाङो, होकाम जोये ङालाई ग्रहन डाङो होये ङालाई माङ्कची, ङालाई परि:ङनेलाई ग्रहन डोवये।”
जो गेबिरोडलं माले हो गे लेवडे ले
लुका ९:४९-५०
38युहन्नाये येसुलाई हैओडोव, “गुरबा टोबो मीये नमिनङाम ज़्या:रं उपुलैज़्यावरं गे गेरो:ङो। गे हो मीलाई नेटाव ये:न टाडो वार्डे हैगेडोव, कडालेकं हो मी गेसंका माङ्कची।” 39होकाम येसुये हैओडोवरं, “हो मीलाई टावोङच्यो, कडालेकं ङामिन्टाम सक्तिला ये:न डोनेये झिन्डे ङाबिरोडलं चानो माचाव पाङने माले। 40कडालेकं जो गेबिरोडलं माले हो गिज्युङङाम झैसिये। 41कडालेकं जोये जेलाई जे ख्रीस्टसंकारं ची वार्डे जेलाई ङामिनङाम टुखुरि रि: ओंँव यायाच्योव भने, डस्साज़ ङा जेलाई हैङाडाच्यो हो मीये पक्काज़ उइनाम डैनेले।”
पाप डोव परि:ङने कारन
42“जोये ङालाई बिस्वास डोने आलिज़ारंलाम टोबोलाई पाप डोव परि:ङो, होलाई के टोबो घ्योव रान्ठै ओढेङलं झुन्डैडे समन्डरलं ख्यानि पनि चाव याटाहो। 43होकाम नकुइये नङलाई पाप डोव यापरि:ङसोनोखे भने होलाई कटंडे ख्या। नेभऱ्याङ कुइसं नर्गला मासिने मे:लं नाने भन्डा के टोबो कुइ मालेव खर्कज़ मासिने जीबन डैने नलागिटं चाव टाये 44नर्गलं के रुईर पनि मासिरं, मे: पनि मासिये।#9:44 आव कोइ-कोइ ग्रीक कुइये सर्सिव कितापटंयाज़ ले 45नखङये नङलाई पाप डोव यापरि:ङसोनोखे भने होलाई पल्डे ख्या। नेभऱ्याङ खङसं नर्गलं नाने भन्डाके टोबो खङ मालेव खर्कज़ मासिने जीबन डैने नलागिटं चाव। #9:45 आव कोइ-कोइ ग्रीक कुइये सर्सिव कितापटंयाज़ ले 46नर्गलं रुइर पनि मासिरंये मे: पनि मासिये 47नमिलङये नङलाई पाप डोव यापरि:ङसोनोखे भने नोलाई हाइडे ख्या। नेभऱ्याङ मिलङसं नर्गलं नाने भन्डा के टोबो मिलङसं परमेस्वरलो ओराज्यलं नाने नलागिटं चाव टाये। 48नर्गलं रुइरं पनि मासिरंये मे: पनि मासिये।”
49“कडालेकं स्यान्टैलाई मे:येज़ चोखो झोयोये होमान्टिज़ सापिये चरैसिव बस्तरं चोखो झोयोये।”
50“सापि चाव टाये, सापिलो ओडार यानाखे भने फरि कडिये डारो झैने? जे स्यान्टैरं नै-नैलं सापि स्याव डारो टाच्यो, होकाम सान्तिसं लेच्यो।”
ទើបបានជ្រើសរើសហើយ៖
मर्कुस 9: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025