युहन्ना 10
10
ग्वालालो ओसात्रो
1सत्य रो:, ङा जेलाई हैङाडाच्यो, “जो भेडा गोठोलं झला फैडे मापसिडे बार पाडे पसिये, नो चोर सोनो डाङ्कु ची, 2बुरु झला येमङाम गोठोलं पसिने के भेडा ग्वालाज़। 3गोठो गुनेये नोलाई झला फैड्योवये, होकाम भेडाराई नोलो ओगा ठैरंये, होसोनो नोये ओभेडारंलाई यामिन पान्डे खुलोरंये, होकाम नोरंलाई पाखाडे लाङोरंये। 4नोये स्यान्टै भेडारंलाई पाखाडे उपुलोयोरं पाना, नो भेडाराई याङा-याङा नाये, होकाम भेडारं नोलो उछिन-उछिन नारंये, कडालेकं भेडाराई नोलो ओगा सरे:रंये। 5हैनि पनि यामस:रेव मीलो उछिन्ट भेडारं मानारंये, भेडारं नोलाई र:ङडे ढोङने लेरं। कडालेकं मासरेसिव मीलो ओगा भेडाराई मासरेरंये।” 6येसुये नोरंलाई आव सात्रो झाडेओयोवरं, हैटानि पनि येसुये नोरंलाई हैओडोवरं रो: नोराई माबुझिरंये।
येसु चाव ग्वाला
7हैजैडे येसुये नोरंलाई हैओडोवरं, “सत्य रो:, ङा जेलाई हैङाडाच्यो, भेडाराई याझलायेम ङाज़। 8ङा भन्डा ङाडे रावरं स्यान्टै चोर सोनो डाङ्कुरं ची, भेडाराई नोराई यारो: माठैरंये। 9झला ङाज़ ची, कोइ मी ङालेवङाम ज़ी:मलं यापसि भने नो बान्चिनेले, होकाम गोठोलं सोनो पाखाडे राने-नाने डानेले, होसोनो ज़्याव डैनेरंले। 10चोर के कुने, सै:ने सोनो नास झैने मान्त्रायाज़ राये। ङा के नोराई जीबन गडैरंकं, सोनो नो बनै भ्या गडैरंकं वार्डे ङाराव।” 11ङा के चाव ग्वाला ची। चाव ग्वालालाई ओभेडाराई यालागिटं उज्यु पनि झावये। 12भाराला नैसिव मी के भेडाराई याग्वाला माटाये। नो के ब्वाङसा ओराज़्याव र:ङडे भेडारंलाई रा:डे नो ढोङ्ये, होकाम ब्वाङसाये भेडारंलाई क्यो:डे लाङोरंये, होसोनो भेडारं चित्राङ पुत्राङ जोयोरंये। 13नो ढोङ्ये कडालेकं नो भाराला मी ची, नो भेडाराई कडि यावास्टाज़ माडोव। 14“ङा चाव ग्वाला ची, ङा ङाभेडारंलाई ङासरेरंये, होसोनो ङाभेडाराई ङालाई सरेसङरंये। 15कैजैडे बाबुये ङालाई सरेसोङो, ङा पनि बाबुलाई ङासरेये, होसोनो ङा भेडाराई यालागिटं ङाज्यु पनि ङाजा।” 16“ङा उरु ङाभेडारं पनि लेरं, नोरं आव गोठोलारं माङ्कची। नोरंलाई पनि ङा रोयो परिज़्यारं, होकाम नोरं टोबो बगालज़ टाने लेरं, होसोनो टोबो गोठोलाज़ टानेले। 17बाबुये ङालाई आव कारनये मया डाङोये, कडावार्क ङा ङापोहोन फरि सोवोल्डे रैने झैडे ङायोज़्या। 18काङ्काये पनि ङालेवङाम ङाप्रान लाङो माढुव, बुरु ङा ङाइछ्याये ङाप्रान ङायो। ङाप्रान योने अढिकार ङासंज़ ले, होसोनो फरि सवोल्डे रैने अढिकार पनि ङासंज़ ले। आव ङा ङाबाबुङाम ङाडोयो आग्या ची।” 19आव बचनलो ओकारंनये यहुडीरं फरि यायुसिव। 20नोरं भ्याबिछोये ऐयावार्ज़्याव, “आवलाईके ज़्या: ची लागिडेले, होसोनो आव माल्ङग्याडे ची ले। जे आवलो ओरो: कडाने जेठैज़्याव?” 21उरुराई हैयावार्ज़्याव, “ज़्या: लागिव मीलो ओरो: ऐटाव माटाये। होकाम भुतंये अन्डलाराई यामि फैडुव डोरो?”
येसुलाई याममानिव
22यरुसलेमलं मन्डिर सुम्पिने पर्ब लेव। आव युङ:डा बेलाकं लेव। 23येसु प्रार्ठना डोने ज़ी:म ज्युङलं सोलोमन याडोज़्याव मैराटं आडेहोडे ओबाज़्याव। 24यहुडीरं चारकोनाङाम डुप्सिडे येसुलाई याखार्ल झाडे यापजोयो, “खर्का समं नङ गेलाई डोमनलं ननैसि? नङ ख्रीस्टज़ टावसं गेलाई प्रस्टज़ हैडासि।” 25येसुये नोरंलाई जबाफ याडे हैओडोवरं, “ङा जेलाई हैडाडे ङाखेम्च्योव ची, जे बिस्वासज़ जेम्डाये। ङाबाबुलो उमिन्ट जो ये:न ङाडोये, नो ये:नयेज़ ङागोहाई योवये। 26हैनि पनि जे बिस्वास जेमडाये, कडालेकं जे ङाभेडारं माङ्करं ची।” 27“ङाभेडाराई ङा गा ठैरंये, हैजैडे नोरंलाई ङा ङासरेरंये, होसोनो नोरं ङाछिन्ट रारंये। 28नोरंलाई ङा खर्कज़ मासिने जीबन ङायोरं, होकाम नोरं खर्कज़ नास टाने मालेरं, होसोनो नोरंलाई काङ्काये पनि ङाकुइटाम नानडे लाङने मालेरं। 29ङाबाबुये नो ङालाई याडेनैसोङो; होके स्यान्टैराई भन्डा घ्योव ची ले। बाबुलो उकुइटाम काङ्कायेज़ नानडे लाङने मालेरं। 30बाबुसं गिन टोबोनि ज़।” 31यहुडीराई येसुलाई फरि लुङ टिडे झोम्ने यापानो। 32येसुये नोरंलाई हैओडोवरं, “ङा जेलाई ङाबाबु लेवङाम बनै भ्या चाव ये:न डाडे सटन्डे ङायाच्योव, होकाम काव ये:न जेमन मालागिडे ङालाई लुङये झोम्ने जेपान्सङज़्याव?” 33यहुडीराई येसुलाई जबाफ यायोव, “चाव ये:नलो ओलागिटं गे नङलाई लुङये गेमझोमसन, बुरु परमेस्वरलो उबिरोड नडोव कारनये, कडालेकं नङ मी टाडे पनि नङलाई परमेस्वर नजैज़्या।” 34येसुये नोरंलाई जबाफ ओयोवरं, “कडा जेन्यामटं सर्सिव माले, ‘ङा हैङावारो, जे डेवतारं ची’? 35जोराई लेवकं परमेस्वरलो ओबचन ओराव, नोरं डेवता याटारं भने (ढर्मसास्त्र भङ्ग टाव माढुव), 36बाबुये चोखो झैडे प्रिठीबीलं उपरि:ङो मीये ‘ङा परमेस्वरलो ओज़ा ची’ ओवार्क कैजैडे परमेस्वरलो उबिरोड ओटाव? 37होकाम ङा ङाडोज़्याव ये:न ङाबाबुलो माटाखे भने ङालाई बिस्वास टाडाङ्च्यो। 38होसोनो ङा ङाबाबुलो ओये:न ङाडोये हैटानि पनि जे ङालाई बिस्वास जेम्डाङखे भने आव ये:नरंलाई के बिस्वास डाच्यो, होकाम जे ठा सन्नेजेले होसोनो बुझिनेजेले, बाबु ङासं उलिज़्याव, सोनो ङा बाबुसं।” 39नोराई फरि येसुलाई क्यो:ने यापानो, होकाम येसु नोराई याकुइटाम हाइसिडे ओनाव। 40होकाम येसु फरि यर्डन भै होपंटं ओनाव, नटं युहन्नाये ङाडे बप्तिस्मा ओयोज़्यावरं, होकाम येसु नङंज़ ओलेव। 41बनै भ्या मीरं येसु लेवकं याराज़्याव, होकाम नोराई हैयावारो, “युहन्नाये कडि चिन्नरं माडोवये, हैनि पनि युहन्नाये आवलो ओबारेलं जो-जो हैओवारो नो सत्यज़ ओलेवलेव।” 42होकाम नलं भ्या मीराई येसुलाई बिस्वास याडोव।
ទើបបានជ្រើសរើសហើយ៖
युहन्ना 10: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
