Maku 3
3
Yesu wandondoha mutu mutshila wu sabatu
(Matayi 12:9-14; Luka 6:6-11)
1Mutshila munga Yesu ukahinga mu sunangonga. Mukadu mutu muakala bo dikatshi difuba. 2Batu banga baka mutshioboka holua, bu kulubuka tshinakueseyi mutshila wu sabatu bualu bakadu batshieba mushindu wu kumufunda. 3Neku yesu ukambila mutu ukadu bo dikatshi difuba ne: “Bika hashi, wamana kubushi ku batu bosu.” 4Neku, ukabokoshi ne: “Tshinganyi tshiatataboshi tshiadi tshienu bu kuesa mutshila wu sabatue? Kuesa malonga mbe kuesa bubodue? Bu kuha batu moyi mbe kubashihe?” Kadi bobu kaba kudumuna diyi.
5Yesu ukabadingila mubungama, ukadu kabidi bo ngayayi mindi bu kukoleshi kuabu ku nyinga. Ukambila mutu ukadu bo dikatshi difuba ne: “Wolola dikatshi diebi.” Ukadiolola neku dikatshi, dikololoka. 6Amu hahu, bafalesa bakatambuka mu sunangonga, bakadisangishi bo bayidi ba Helode bakayi manyangu bu kuela tshifufu buku shiha Yesu.
Batu bandi balamata Yesu.
7Yesu bo bayidi bandi bakatambuka, bakayi kumbambadi ku dishiha di Ngalela, batu bandi bakamulamata. Bakadu baduadu ku Ngalela ibo ku Yudayi, 8mu Yelushalema, mu Didime mu tshitshinyi tshi bula tshikadu dishi di Yudayi ibo mu tshimenga tshi Tilo yi Sidona. Bakadu baduadu kudi Yesu bualu bakofu musahu wu malu akeseyi. 9#Mk 4:1; Lk 5:1-3.Hakamoneyi bundi bu batu, Yesu ukalomba kudi bayidi bandi bune bamu tshuadila buatu. 10Ukondoha batu bandi, kabukayi bena mbabala bandi, bakadu babondolangana bu kumukoha makatshi hambidi. 11Neku, batu bakadu bakuata kudi nyinga mibodu hakamonebu Yesu, bakadiela ku makasa andi bakela diyi dikola eeii: “Yesu udi Munandi wu Tshiambi Teta menemene!”
12Kadi Yesu ukabambila bikola bune kabambidi batu bualu buandi.
Yesu wasungula bayidi bandi disandi yi babidi
(Matayi 10:1-4; Luka 6:12-16)
13Kunyima, Yesu ukabanda ku luhongu, ukela batu bakadueyi wananga diyi, bakamulamata. 14Ukasungula Tutuma disandi yi tubidi mukakatshi muabu. “Bune bakala nandi” bu kubatuma, “Bune baye kuamba musahu ulengela, 15neku ukabaha ngudu yi kuahata nayi nyinga mibodu.”
16Ukasungula disandi yi babidi, menabu; Simona (ukenyekeyi dina dinga ne Petelu), 17Yakobu bo munabu wu babalumi Yone, bubidi buabu bakadu bana ba Sebedayi, (bakahebu mena manga kudi Yesu. Bowenege kukudumuna “Bana ba dibanda di kuba”); 18Andele, Filipoyi, Batolomayi, Matayi, Tomasa, Yakobu, Alafayi, Tadaya, Simona muena Kananayo, 19Yudasa Isakaliote ukamuelela lukanyi lubodu.
Yesu bo belesebule
(Matayi 12:22-32; Luka 11:14-23; 12:10)
20Hakahinga Yesu ku subu, batu bandi bakasangila kabidi,Yesu bo bayidi bandi kabamona mushindu wu kudi. 21Hakofu bena bulungu buabu, bakadu bu kumuangata ku ngudu, bualu bakadu bambamba ne: “Washimishi lungenyi!”
22 #
Mat 9:34; 10:25. Bayishi ba biadi banga bakadu ku Yelushalema bakamba ne: “Udi bo Belesebula munda muandi, umuhaha ngudu ikuahata nayi nyinga mibodu.”
23Neku, Yesu ukabela diyi buku bambila mukundewu. “Muhitshi udi mukuahata muhitshi nandie? 24Biakala bena bushashendi bumuabu buhanduluka bobu kayabu, bushashendiabu buyafu. 25Biakala bena bulungu bumuabu batandangana bobu kayabu, bulunguabu buyafu. 26Biakala Muhitshi udiatandanganyishi kayandi, biakaleyi muhanduluka kayandi, kanayi kubushi, kadi uyafu.
27“Mutu nashi umu kena mukubuela mu subu wu muena ngudu, weba bitu biandi mbe kamukandila mioshi kubushi, amu hanamukandeyi mioshi, hahu uya kuangata bitu biandi biosu.
28“Nanuambiambila diyi di kokuakoku, batu bandi babalumi baya bafuila muengu bu malu mabodu abu.#3:28 malu mabodu adiebu mukuamba; nashi malu mabodu adiebu mukuamba bu Tshiambi. 29#Lk 12:10.Kadi unatuka Nyinga Ulengela, kabana mofuela muengu kokoko bubodu buandi kabunahu bi.” 30(Yesu ukatueyi naku bualu, bakadu ba muambamba ne: “Udi bo nyinga mubodu.”)
Mamandi wu Yesu bo bana babu ba babalumi
(Matayi 12:46-50; Luka 8:19-21)
31Mamandi wu Yesu bo banababu bakadu. Bakatuma mutu bu kuela Yesu diyi. 32Batu bandi bakadu bashakama bamu tshimbidila, bakamuambila ne: “Fudikishi, mamiebi bo bana benu ba babalumi, bakuatshieba.”
33Yesu ukabakudumuna ne “Mamami nganyie, bana betu ba babalumi banganyie?” 34Kunyima ku kutshioboka batu bakadu bashakama bamutshimbidila ukamba ne: “Tshiobokayi, mamami bo bana betu ba babalumi! 35Bualu yosu wasesa muananga Tshiambi, mutu yawu, ka munetu wu babalumi, munetu wu babakashi, mamami.”
ទើបបានជ្រើសរើសហើយ៖
Maku 3: KBT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International