Luka 16
16
1 Lûkêndê lwa mwimeni gûmo mulimuke
1Yesû wêbalombwele baana babûganga bage: “Mpeta gûmo ûbele no mwimeni wage, gûdjo mwimeni ûsongelwe kwana wêngêlêshe bibê bûeta bwa mpeta wage. 2Kwanansho gûlya mpeta umwitile no kumulombola: ‘Mianda kêê gyana ntegelela kibalo kyobe? Imia lûbalê lwa bwêmeni bobe, kibalo haûnyonghoni kûba mwimeni wane byonka.’ 3Gûlya mwimeni uningile mumutêma gwage, ‘mpeta wankûmba kumingêlo gya bwêmeni, shanonge ntêê byonka? Nsilê bumu bwakûlêma, no ninonsoni gya kûlomba lomba. 4Namanya byandê kalonga, kibalo anankakûmbwa mingêlo ano, nikaba no balûnda be kankûka kûmasese gabo.’
5“Nfulo, witile gegense ûbele no lêni lya mpeta wage. umubulishe mutangi: ‘Wêno leni linga kwê mpeta wane?’ 6Umwêndwêle: ‘Biûmbû mia gibêlê bya makita ga Mpasi,’ gûlya mwimeni umlombwele; ‘gikana ansê, usinte biûbû lûkama ulisalibe leni lyobe.’
7Kûwa umubulishe gûnge: ‘Nogwee wêno leni lyalinga?’ Noge umuêndwêle: ‘Lûkama lwa ngano,’ gûlya mwimeni umulombwele; gikana ansê sinta, ‘Milêmba makumi muganda.’
8“Nfulo gûlya mpeta umutumbikile gûdjo mwimeni usi no sitêê kwa kûba wêngêle lweni; kibalo bantû bakandje kano beno lweni biiko no mianda gyabo kûlêmba bantû ba mugenge.”
9Noge Yesû ûgêlêlêle kwêsamba: “Nanimilombola mwingêle lûheto lwakandje kano kwakwêlongela balûnda bobe gwe mwine, kûba kyaba lûheto alûlê kakûbidjêka, ûkakûnkwe mugikeno gya miaka. 10Gegense mulûmbûlûke mu mianda gisho, wêkaba mulûmbûlûke mu mianda gikata, no gegense usi mulûmbûlûke mu mianda gisho, hakabi mulûmbûlûke mu mianda gikata. 11Kyokûba ntê benywe, hamwibalûmbûlûke kibalo kya kûempa lûheto lwa kadje kano, nani wekemikûdjagela kwa kûempa lûheto lwa sitê? 12No benywe ntê hamwibalûmbûlûke kibalo kya lûheto lwa muntû gûûnge, nani wêkemiabêla lûheto lwenyu benywe bene?
13 #
Mt 6.24
“Hakûlê mwingili webunyonghona kwengêla ba mpeta babêlê; kibalo shaamusikwe gûmo no kûkampwa gûûnge ao shaakwatane no gûmo no kumubedja gûnge. Hamunyonghoni kwêngêlêla Kabesha Mpûngû no lûheto amo.”
Milango hala hala gya Yesû
(Matayo 11.12-13; 5.31-32; Maluko 10.11-12)
14Mone Bafalisayo, lwabategelele gigyo kibalo babele bakampwe lûheto biiko, bamubedjile Yesû. 15Yesû wêbalombwele: “Benywe mwakwêmonia kûba balûmbûlûke kûgêbwa gya bantû, mone Kabesha Mpûngû wêdjê mitêma gyenyu. Kibalo kilya kyakûmoneka kûba ntûmbo kûgêbwa gya bantû, kwa Kabesha Mpûngû byakûkolesha.
16 #
Mt 11.12-13
“Bisila bya Musa no lûnsinto lwa bamoni lûsawêlwe kibalo kya kûsha kwa Yoano Mubatisha. Kûbambêle kyaba kilya, musahu gûsoga gwa Bûkolo bwa Kabesha Mpûngû gûsawêlwe, no muntû gense wakwêtwesha kwa bumu kûtwela. 17#Mt 5.18 Mone biele mbeela, gûlû no kandje kûêta, kûlêmba helufi limo lya bisila bya Musa kusimwa. 18#Mt 5.32; 1 Bakl 7.10-11 “Muntû gegense walekela mukashage no kûkwela gûnge walonga bûseki; no mwana mulûme wakûkwela mwana mukasi ukumbilwe walonga bûseki byonka nansilya.
Lûkêndê lwa mpeta no Lasalo
19“Kûbele muntû gûmo mpeta, ûbele mwidjêbêle kûshala bishandê bibele bisoga no bya kitûngo kikata biiko, no wêkene mumulogo masigi gonse. 20Amushango gwa gûdjo mpeta, abele no nanda gûmo sina lwege Lasalo, kwana ûbele no biene biingê, 21Lasalo ûkampilwe kûebwa bisigela bigwilile kuima amutalako gwa gûdjo mpeta. No nghimba gya ao mbwa gibele gyasha gyalamba biene byage.
22“Kyaba akiikile gûlya nanda ukile no Masalagûlû gamubûgwêle gamubikile mukyalê kya Bûlaimu. Gûlya mpeta noge ukile ushikilwe, 23Gûlya mpeta, ûbele no mudjembo gûkata kûko kûkalûnga nyembo ûtûlwêle meso gage. Ûmumwene Bûlaimu kûla no Lasalo ûbele kûbwêhê nage. 24Nansho gûlya mpeta umwitile Bûlaimu kwa djwê: ‘Tata Bûlaimu, nkyêle lûsa, no mutume Lasalo akunye lwala lwa munie gwage mu madjê, aoshe lulimi lwane kibalo nansûsûka biiko mukaya kano!’
25“Mone Bûlaimu umwindwêle: ‘Mwanane gidjûkana kwana ûtambwêle bisoga byobe mungikeno, noge Lasalo ûtambwêle bibê, mone ano gee waempûlwa, nogwe wêmumudjembo gûkata. 26Nghimba gya ao, abûkata bwetû no benywe kûbêkwe bwêna bûkata, kibalo bakûkeba kûsha kwamulê kuima kûno habakûnyonghona no bakûkeba kuima kwamulê kûsha kwatûlê habakûnyonghona.’ 27Gûdjo ûbele mpeta wêndwêle: ‘Nfulo, Tata Bûlaimu nankûlomba mutume Lasalo abagale kû nsese gya tata wane, 28kwakûba nino baana nane ba baana balûme batano. Agye ebalêngele kibalo nabakasi nobo kuika hantu ano amudjembo.’
29“Mone Bûlaimu umulombwele: ‘Baana nobe beno lusinto lwa Musa no bamoni, wêbaleke bebategelele boo.’ 30Gûlya mpeta wêsambile: ‘Hakiyenene tata Bûlaimu, mone muntû kûshûka kuima kûbaki, no kwêbaikêla bekesasa.’ 31Mone Bûlaimu wêbalombwele: ‘Ntêê abebategelele ba Musa no bamoni, habanyonghoni kûbembwa nomwine muntû wa shûka kuima kûbaki.’”
ទើបបានជ្រើសរើសហើយ៖
Luka 16: HBT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
